Isaías
52 Ndakáxí-iniún.* Ndakáxí-iniún ta ndakiʼún ndeún, yóʼó yuku̱ Sion.
Ndakundixi ti̱ko̱to̱ún ña̱ liviní, yóʼó ñuu Jerusalén, ña̱ kúú ñuu ña̱ yi̱i̱.
Saáchi na̱ va̱ása níta̱ʼnda̱ nu̱ú yi̱i̱ xíʼin na̱ yaku̱a̱* va̱ása ki̱ʼvikana iniún.
2 Ndakundichi ta kisiún yáká* ña̱ kúúmiíún ta koo nu̱ú tayi̱, yóʼó Jerusalén.
Ndaxín ña̱ núʼni su̱kún, yóʼó ñá se̱ʼe Sion ñá ti̱inna.
3 Saáchi ña̱yóʼo kúú ña̱ káʼa̱n Jehová:
“Ni̱xi̱íkona* ndóʼó soo kǒo ña̱ níkiʼinna xa̱ʼa̱ndó
ta ndasatána* ndóʼó soo kǒo xu̱ʼún kiʼinna xa̱ʼa̱ndó”.
4 Saáchi ña̱yóʼo kúú ña̱ káʼa̱n táta káʼnu Jehová:
“Na̱ ñui̱ ni̱xa̱ʼa̱nna xi̱ndoona ñuu Egipto ta kán xi̱ndoo naʼana;*
tándi̱ʼi, na̱ ñuu Asiria sa̱xóʼvi̱nínana* ni kǒo ña̱ níkeʼéna xíʼinna”.
5 “Tá saá, ¿ndáaña xíniñúʼu keʼíi̱ yóʼo?”, káchi Jehová.
“Saáchi nda̱kiʼinna na̱ ñui̱ ku̱a̱ʼa̱n xíʼinna ta kǒo ña̱ nítaxina xa̱ʼa̱na.
Na̱ xáʼndachíñu nu̱úna, ndáʼyi̱ kóʼóna* xa̱ʼa̱ ña̱ ku̱chiñuna xíʼinna, káchi Jehová,
ta iníí ki̱vi̱ kǒo íxato̱ʼóna ki̱víi̱.
6 Xa̱ʼa̱ ña̱kán, na̱ ñui̱ xa̱a̱na kunda̱a̱-inina ndáaña kúú ki̱víi̱;
ki̱vi̱ saá kunda̱a̱-inina ña̱ yi̱ʼi̱ kúú ta̱ káʼa̱n.
Yi̱ʼi̱ kúú ta̱ káʼa̱nña”.
7 Liviní xa̱ʼa̱ na̱ xíka nátúʼun tu̱ʼun va̱ʼa chí yuku̱,
na̱ káʼa̱n ña̱ kǒoka ku̱a̱chi koo,
na̱ va̱xi xíʼin tu̱ʼun va̱ʼa ta káʼa̱nna ña̱ koo ña̱ va̱ʼa,
na̱ káʼa̱n xa̱ʼa̱ ña̱ ka̱kuna,
na̱ káʼa̱n ña̱yóʼo xíʼin yuku̱ Sion “Xa̱a̱ ni̱xa̱a̱ Ndióxi̱ún ndu̱ura Rey”.
8 Kuniso̱ʼondó. Na̱ ndáa ñuundó ndeéní ka̱ʼa̱nna.
Inkáchi ndáʼyi̱ kóʼóna xa̱ʼa̱ ña̱ kúsi̱í-inina,
saáchi tá ná sandátaka tuku Jehová na̱ Sion, na̱yóʼo kuni nu̱únara.
9 Ná kusi̱í-ini ña̱ʼa ña̱ ndi̱ʼi-xa̱ʼa̱ chí Jerusalén, inkáchi ná nda̱ʼyi̱ kóʼóña xa̱ʼa̱ ña̱ kúsi̱í-iniña,
saáchi sa̱ndíko Jehová ini na̱ ñuura, nda̱satára na̱ ñuu Jerusalén.
10 Jehová ni̱na̱ʼa̱ra ndaʼa̱ra ña̱ yi̱i̱ nu̱ú ndiʼi na̱ ñuu;
nda̱a̱ nu̱ú xíká kunina ndáaña ke̱ʼé Ndióxi̱yó ña̱ sa̱kǎkura miíyó.
11 Kuxíkándó, kuxíkándó, keendó ti̱xinña, va̱ása tiinndó nda̱a̱ ni iin ña̱ yaku̱a̱.
Keendó nu̱ú íyona, ndii* koondó,
ndóʼó na̱ níʼi ndaʼáchíñu Jehová.
12 Va̱ása ku̱ʼu̱nndó xa̱ʼa̱ ña̱ yíʼviníndó
ta ni va̱ása kunundó ku̱ʼu̱nndó,
saáchi Jehová kúú ta̱ kunúu ku̱ʼu̱n nu̱úndó,
Ndióxi̱ na̱ ñuu Israel ku̱ʼu̱nra chí sa̱tándó ta kundaara ndóʼó.
13 Kotondó. Ta̱ káchíñu nu̱úi̱, ndíchiní koo ña̱ keʼéra.
Taxina iin chiñu ña̱ ndáyáʼviní ndaʼa̱ra,
nda̱a̱ nu̱ú súkun koora ta ndukáʼnura.
14 Nda̱a̱ táki̱ʼva nda̱kanda̱ní-ini* ku̱a̱ʼánína,
saáchi ndeéníka na̱sama ki̱ʼva ña̱ náʼa̱ra nu̱ú inkaka na̱ ta̱a,
ta na̱sama ña̱ va̱ʼaní xi̱naʼa̱ra nu̱ú inkaka na̱ yiví,
15 saá ndakanda̱ní-ini ku̱a̱ʼání na̱ ñuu.
Va̱ása ka̱ʼa̱nka na̱ xáʼndachíñu,
saáchi kunina ña̱ va̱ása nínatúʼunna xíʼinna
ta ndakanixi̱nína xa̱ʼa̱ ña̱ va̱ása níxiniso̱ʼona.