Isaías
53 ¿Ndáana kándíxa ña̱ nátúʼunyó?*
¿Ndáana ni̱na̱ʼa̱ Jehová ndee̱ra nu̱ú?
2 Ta̱ káchíñu nu̱úra kuaʼnura nu̱ú ta̱yóʼo* nda̱a̱ táki̱ʼva xáʼnu ndaʼa̱ iin yitu̱n,
nda̱a̱ táki̱ʼva xáʼnu iin ti̱oʼo* nu̱ú iin ñuʼú yi̱chí.
Va̱ása náʼa̱ra nda̱a̱ táki̱ʼva náʼa̱ iin ta̱a ta̱ ndáyáʼvi ta ni va̱ása náʼa̱ra nda̱a̱ táki̱ʼva náʼa̱ iin ta̱ ku̱i̱ká;
ta va̱ása káchi iniyó kuyatinyó nu̱úra tá xítoyó nu̱úra.
3 Na̱ yiví xi̱kundasína xi̱xininara ta va̱ása níxikuni̱na kutáʼanna xíʼinra,
ni̱xo̱ʼvi̱ra* ta xi̱kunda̱a̱-inira ndáa ki̱ʼva ndóʼo na̱ ndeéndóʼo.
Nda̱a̱ táki̱ʼva íyo na̱ xi̱ndakoto inka táʼví saá ni̱xi̱yoyó chi va̱ása níxikuni̱yó kotoyó nu̱úra.
Ku̱ndasíyó xi̱niyóra ta va̱ása níxi̱ndayáʼvira nu̱úyó.
4 Sa̱kútaʼara kue̱ʼe̱ ña̱ xi̱kuumiíyó
ta saátu nda̱kiʼinra ña̱ sáxo̱ʼvi̱ miíyó.
Soo nda̱kanixi̱níyó ña̱ ta̱xi Ndióxi̱ castigo ndaʼa̱ra, ña̱ ka̱nirara ta sa̱xóʼvi̱rara.
5 Ka̱anna kándíkara xa̱ʼa̱ ku̱a̱chiyó;
sa̱xóʼvi̱nínara xa̱ʼa̱ ku̱a̱chiyó.
Ku̱ndeé-inira nda̱kiʼinra castigo ña̱ va̱ʼa ndakutáʼan ma̱níyó xíʼin Ndióxi̱,
ta xa̱ʼa̱ ña̱ tu̱kue̱ʼe̱ra, ni̱xa̱a̱yó nda̱ʼayó.
6 Nda̱a̱ táki̱ʼva íyo ndikachi* tí nda̱ñúʼu saá ni̱xi̱yoyó;
iin tá iinyó ni̱xa̱ʼa̱nyó nu̱ú kúni̱ miíyó,
ta ta̱xi Jehová ña̱ ná ndakiʼinra ku̱a̱chi ndiʼiyó.
7 Sa̱xóʼvi̱nara ta ta̱xira ña̱ ná ixandi̱va̱ʼana xíʼinra,
soo kǒo ña̱ níxi̱kaʼa̱nra.
Nda̱kiʼinnara nda̱a̱ táki̱ʼva kéʼéna xíʼin ndikachi tí ku̱a̱ʼa̱nna kaʼnína,
nda̱a̱ táki̱ʼva íxaa iin ndikachi ña̱ íyo táxi̱n yuʼúrí tá xáʼndana ixí* sa̱tárí,
saá ni̱xi̱yora ta kǒo ña̱ níxi̱kaʼa̱nra.
8 Xa̱ʼa̱ ña̱ va̱ása nda̱kú níndatiinna ku̱a̱chi xíʼinra, nda̱kiʼinnara ku̱a̱ʼa̱n xíʼinna;
¿ndáana kuni̱ kunda̱a̱-ini xa̱ʼa̱ ndáa míí ki̱xira?
Saáchi ndi̱ʼi-xa̱ʼa̱ra nu̱ú ñuʼú nu̱ú ndóo na̱ táku;
ta̱yóʼo ni̱xi̱ʼi̱ra xa̱ʼa̱ ku̱a̱chi na̱ ñui̱.
9 Ta̱xina iin nu̱ú ndu̱xu̱nra xíʼin na̱ ndi̱va̱ʼa-ini,
ta xíʼin na̱ ku̱i̱ká sa̱ndúxu̱nnara tá ni̱xi̱ʼi̱ra,
ni kǒoví ña̱ va̱ása va̱ʼa níkeʼéra
ta va̱ása níka̱ʼa̱nra nda̱a̱ ni iin ña̱ vatá.*
10 Soo mií Jehová ta̱xi ña̱ ná saxóʼvi̱nínara, ta ta̱xira ña̱ ná kiʼin kue̱ʼe̱ra.
Soo tá ná so̱kóúnra* xa̱ʼa̱ ña̱ ke̱ʼéndó ña̱ va̱ása va̱ʼa,
koo ku̱a̱ʼá se̱ʼera ta ku̱a̱ʼá tiempo kutakura,
ta̱yóʼo kúú ta̱ kuniñúʼu Jehová ña̱ va̱ʼa saxínura ña̱ kúni̱ra.
11 Kusi̱íní-inira tá ná kotora ndáa ki̱ʼva ka̱na ña̱ ke̱ʼéra ni ni̱xo̱ʼvi̱níra.
Xa̱ʼa̱ ña̱ sa̱kúaʼa ta̱ káchíñu nu̱úi̱, ta̱ kéʼé ña̱ nda̱kú,
chindeétáʼanra xíʼin ku̱a̱ʼání na̱ yiví ña̱ xa̱a̱na koona na̱ nda̱kú-ini nu̱ú Ndióxi̱ ta ndakiʼinra ku̱a̱china.
12 Ña̱kán taxii̱ iin táʼví ña̱ nda̱kiʼin ku̱a̱ʼánína ndaʼa̱ra,
ta ndataʼvíra ña̱ nda̱kiʼinra xíʼin na̱ ndakúní,
saáchi nda̱taxira miíra ta ni̱xi̱ʼi̱ra
ta nda̱a̱ táki̱ʼva kéʼéna xíʼin na̱ kúúmií ku̱a̱chi saá ke̱ʼéna xíʼinra;
nda̱kiʼinra ku̱a̱chi ku̱a̱ʼání na̱ yiví,
ta ni̱ka̱ʼa̱nra xíʼin Ndióxi̱ xa̱ʼa̱ na̱ yiví ku̱a̱chi.