Isaías
54 “Nda̱ʼyi̱ kóʼún xa̱ʼa̱ ña̱ kúsi̱í-iniún, yóʼó ñá ñaʼá ñá núma̱,
ñá ta̱ʼán kaku se̱ʼe.
Nda̱ʼyi̱ kóʼún xa̱ʼa̱ ña̱ kúsi̱íní-iniún, yóʼó ñá va̱ása níkunda̱a̱-ini ndáa ki̱ʼva xáʼnda se̱ʼena,
saáchi ku̱a̱ʼání kúú se̱ʼe ñá ni̱ndo̱o
nu̱úka se̱ʼe ñá íyo yii̱”, káchi Jehová.
2 “Ndíka̱ka ndasaún nu̱ú níndichi veʼe loʼún.
Sandákaa̱ tela ña̱ kánuu sa̱tá veʼe loʼún ña̱ ndáyáʼviní.
Va̱ása kaka-iniún ta ndasanáni̱ yoʼo̱ ña̱ núʼni veʼe loʼún,
kútu̱va̱ʼa* kataún ka̱a ña̱ tíin veʼe loʼún.
3 Saáchi chí ndaʼa̱ kúaʼa ta saátu chí ndaʼa̱ yitin ku̱a̱ʼáka koo ñuʼún.
Na̱ se̱ʼún ndakiʼinna ñuʼú na̱ inka ñuu
ta ndakundoona ñuu nu̱ú kǒoka na̱ yiví íyo.
4 Va̱ása yi̱ʼvíún, saáchi va̱ása kukaʼanka nu̱ún;
saáchi na̱ yiví va̱ása kusi̱kindaakana yóʼó.
Chi nandóso-iniún xa̱ʼa̱ ña̱ sa̱kúkaʼan nu̱ún tá ni̱xi̱yo loʼún
ta va̱ása ndakaʼánkaún ña̱ ku̱kaʼan nu̱ún tá ni̱xi̱ʼi̱ yii̱ún”.
5 “Saáchi ta̱ káʼnuní ta̱ i̱xava̱ʼa yóʼó íyora nda̱a̱ táki̱ʼva íyo yii̱ún,*
Jehová ta̱ xáʼndachíñu nu̱ú na̱ ángel kúú ki̱vi̱ra,
Ndióxi̱ na̱ ñuu Israel, Ndióxi̱ ta̱ yi̱i̱ kúú ta̱ nda̱satá* yóʼó.
Ka̱ʼa̱nna xa̱ʼa̱ra ña̱ kúúra Ndióxi̱ iníísaá nu̱ú ñuʼú.
6 Saáchi tá ka̱na Jehová yóʼó, ni̱xi̱yoún nda̱a̱ táki̱ʼva íyo iin ñaʼá ñá ti̱ndaʼa̱, ñá ni̱ndo̱o, ñá kúsuchíní-ini,
ni̱xi̱yoún nda̱a̱ táki̱ʼva íyo iin ñá loʼo ñá ti̱ndaʼa̱, soo tándi̱ʼi kǒo níxiinkana kuninañá”, káchi Ndióxi̱ún.
7 “Va̱ása naʼáví nísandákoi̱ yóʼó,
soo xa̱ʼa̱ ña̱ kúndáʼviní-inii̱ xínii̱ yóʼó ndakiʼin tukui̱ yóʼó.
8 Xa̱ʼa̱ ña̱ iin kama ni̱sa̱íi̱ xíʼún, chi̱se̱ʼíi̱ nu̱úi̱ nu̱ún
soo xa̱ʼa̱ ña̱ ndixaní kúʼvi̱-inii̱* xínii̱ yóʼó kundáʼvi-inii̱ kunii̱ yóʼó”, káchi Jehová ta̱ nda̱satá yóʼó.
9 “Ña̱ keʼíi̱ kooña nda̱a̱ táki̱ʼva íyo ña̱ ke̱ʼíi̱ tá tiempo ña̱ ni̱xi̱yo ta̱ Noé.
Nda̱a̱ táki̱ʼva chi̱naʼíi̱* tiempo kán ña̱ va̱ása sandákutúkai̱ ti̱kui̱í nu̱ú ñuʼú yóʼo,
chínaʼíi̱ ña̱ va̱ása sa̱a̱kai̱ xíʼún ta va̱ása taxikai̱ castigo ndaʼún.
10 Ni ná nasa̱ma yuku̱ nu̱ú ndítaña ta ná kisi xi̱kí,
va̱ása sandákoi̱ ña̱ ndixaní kuʼvi̱-inii̱* kunii̱ yóʼó
ta trato ña̱ kíndo̱i̱ xíʼún ña̱ ndakutáʼan viíi̱ xíʼún va̱ása ndiʼi-xa̱ʼa̱ña”, káchi Jehová ta̱ kúndáʼvi-ini xíni yóʼó.
11 “Yóʼó ñaʼá ñá xóʼvi̱ní* xíʼin tu̱ndóʼo ña̱ íyo nda̱a̱ táki̱ʼva íyo sa̱vi̱ tá ndeéní kúun,
ñá va̱ása kívi ndi̱ko-ini xíʼin nda̱a̱ ni iin ña̱ʼa,
yu̱u̱ xíʼin cemento kuniñúʼi̱ ña̱ ixava̱ʼi̱ nama̱ún
ta kuniñúʼi̱ yu̱u̱ ña̱ zafiro ña̱ chindúʼi̱ xa̱ʼa̱ña.
12 Xíʼin yu̱u̱ ña̱ rubí keʼíi̱ xi̱ní nama̱ ñuún,
xíʼin yu̱u̱ ña̱ táxa* ixava̱ʼi̱ yéʼún
ta ndiʼi nama̱ ñuún keʼíi̱ña xíʼin yu̱u̱ ña̱ liviní.
13 Ta mií Jehová kúú ta̱ sanáʼa̱ ndiʼi na̱ se̱ʼún,
ta va̱ʼaní kundoo ndiʼi na̱ se̱ʼún.
14 Ndakú koún saáchi ña̱ nda̱kú kúú ña̱ keʼún.
Va̱ása saxóʼvi̱na yóʼó,
va̱ása yi̱ʼvíún xíʼin nda̱a̱ ni iin ña̱ʼa ta ni va̱ása koo ña̱ sayíʼvi yóʼó,
saáchi va̱ása kuyatin ña̱yóʼo nu̱ún.
15 Tá ná kanitáʼanna xíʼún
su̱ví yi̱ʼi̱ kúú ta̱ chindaʼána.
Va̱ása kuchiñu na̱ kanitáʼan xíʼún”.
16 “Koto. Yi̱ʼi̱ kúú ta̱ i̱xava̱ʼa ta̱ kéʼé ña̱ʼa xíʼin ka̱a,
ta̱ tívi nu̱ú xíxi̱ ñuʼu̱
ta̱ kéʼé ña̱ʼa ña̱ xíniñúʼuna tá kánitáʼanna.
Ta saátu i̱xava̱ʼi̱ ta̱a ta̱ xáʼní.
17 Ni nda̱a̱ ndáaka ña̱ʼa ná kuniñúʼuna ña̱ kanitáʼanna xíʼún, va̱ása kuchiñuna,
nda̱a̱ ndáaka na̱ ná chikaa̱ ku̱a̱chi yóʼó, kuchiñún na̱ʼún ña̱ káʼa̱nna ña̱ vatá.*
Ña̱yóʼo kúú herencia na̱ káchíñu nu̱ú Jehová,
saáchi na̱ kéʼé ña̱ nda̱kúva kúúna nu̱úi̱”, káchi Jehová.