Isaías
56 Ña̱yóʼo kúú ña̱ káʼa̱n Jehová:
“Nda̱kúní ndatiinndó ku̱a̱chi ta keʼéndó ña̱ nda̱kú,
saáchi xa̱a̱ ku̱yatin sakǎkui̱ ndóʼó ta kunda̱a̱-inindó ña̱ kéʼíi̱ ña̱ nda̱kú.
2 Si̱íní íyo ta̱ ta̱a ta̱ kéʼé ña̱yóʼo
ta saátu se̱ʼe ta̱ ta̱a ta̱ chíkaa̱ní ndee̱ ña̱ keʼéra ña̱yóʼo,
ta̱ íxato̱ʼó ki̱vi̱ sábado ta ña̱ yi̱i̱ kúúña nu̱úra,
ta kíʼinníra kuenta ña̱ kǒo keʼéra ña̱ va̱ása va̱ʼa ki̱vi̱ yóʼo.
3 Ta ta̱ ke̱e inka ñuu ta̱ ndásakáʼnu Jehová, va̱ása xíniñúʼu ka̱ʼa̱nra ña̱yóʼo: ‘Ndataváva Jehová yi̱ʼi̱ ti̱xin na̱ ñuura’.
Ta ta̱ kǒo kívi koo se̱ʼe* va̱ása xíniñúʼu ka̱ʼa̱nra ña̱yóʼo: ‘Koto. Nda̱a̱ táki̱ʼva íyo iin yitu̱n tú ni̱yi̱chi̱ saá íyoi̱’”.
4 Saáchi ña̱yóʼo kúú ña̱ káʼa̱n Jehová:
“Na̱ kǒo kívi koo se̱ʼe, na̱ íxato̱ʼó ki̱vi̱ sábado,
na̱ kéʼé ña̱ sákusi̱í-inii̱
ta kǒo sándakoona ña̱ kundiku̱nna tratoi̱,
5 taxii̱ ná kundoona veʼi̱ ta ndakaʼíi̱n xa̱ʼa̱ ki̱vi̱na,
va̱ʼaníka ña̱yóʼo nu̱úka ña̱ koo se̱ʼeta̱ana xíʼin se̱ʼe-síʼina.
Taxii̱ ná ka̱ʼyi̱ ki̱vi̱na ta ndiʼi tiempo kooña.
6 Ta na̱ inka ñuu na̱ ndásakáʼnu Jehová ta káchíñuna nu̱úra,
na̱ kúʼvi̱-ini xíni ki̱vi̱ Jehová,
na̱ kúni̱ kachíñu nu̱úra,
na̱ íxato̱ʼó ki̱vi̱ sábado ta ña̱ yi̱i̱ kúúña nu̱úna,
ta kǒo sándakoona ña̱ kundiku̱nna tratoi̱,
7 kixina xíʼi̱n nu̱ú yuku̱i̱ ña̱ yi̱i̱
ta kusi̱íní-inina tá ná ka̱ʼa̱nna xíʼi̱n ini veʼi̱.
Ndakiʼii̱n kití tí kaʼmina,* tí so̱kóna nu̱úi̱* ta saátu inkaka ña̱ so̱kóna nu̱úi̱ nu̱ú altar.
Saáchi veʼi̱ kunaníña veʼe nu̱ú ka̱ʼa̱nna xíʼin Ndióxi̱, ta kán kivi ka̱ʼa̱n ndiʼi na̱ ñuu xíʼi̱n”.
8 Táta káʼnu Jehová, ta̱ ndákaya na̱ ñuu Israel na̱ xa̱a̱ síín síín ndóo, káchira:
“Taxii̱ ña̱ ná ndakutáʼan inkakana xíʼin na̱ xa̱a̱ nda̱kayai̱”.
9 Ndiʼi ndóʼó kití yukú, naʼandó kixáʼanndó,*
ndiʼi ndóʼó kití tí íyo chí yuku̱, naʼandó kixáʼanndó.
10 Na̱ kúáa* kúú na̱ ndáa ñuundó, nda̱a̱ ni iin na̱yóʼo va̱ása kíʼinna kuenta xíʼin nda̱a̱ ni iin ña̱ʼa.
Nda̱a̱ táki̱ʼva íyo ti̱na* tí va̱ása kívi nda̱ʼyi̱ saá íyona.
Ti̱na tí ndóo nu̱ú ñuʼú, tí kée yáa̱* tí kútóoní ku̱su̱n.
11 Íyona nda̱a̱ táki̱ʼva íyo ti̱na tí kúni̱ní kuxu;
tí va̱ása xáa̱-ini.
Íyona nda̱a̱ táki̱ʼva íyo na̱ ndáa ndikachi,* na̱ va̱ása kúnda̱a̱-ini.
Iin tá iinna nda̱kiʼinna ku̱a̱ʼa̱nna nu̱ú kúni̱ miína;
ndiʼina sándaʼvina ta kíʼinna xu̱ʼún ta káchina:
12 “Naʼandó, ná ku̱ʼi̱n nandukúi̱ vino,
ná koʼoyó ndixi nda̱a̱ xi̱niyó.
Táki̱ʼva káa vitin saá koo ki̱vi̱ taa̱n, soo va̱ʼaníka koo ki̱vi̱ taa̱n”.