Isaías
15 Ña̱yóʼo kúú ña̱ kundoʼo ñuu Moab:
Iin ñuú kuití ndi̱ʼi-xa̱ʼa̱ña,
ña̱kán ku̱táxi̱n ñuu Ar ña̱ ndíkaa̱ chí Moab.
Iin ñuú kuití ndi̱ʼi-xa̱ʼa̱ña,
ña̱kán ku̱táxi̱n ñuu Quir ña̱ ndíkaa̱ chí Moab.
2 Na̱ yiví ni̱xa̱a̱na chí templo ta saátu chí Dibón,
nda̱ana chí nu̱ú súkun* ña̱ va̱ʼa kuakuna,
na̱ ñuu Moab xákuna xa̱ʼa̱ ñuu Nebo ta saátu xa̱ʼa̱ ñuu Medebá.
Ndiʼina ni̱xa̱tána xi̱nína ta xa̱ʼndana ixí* yuʼúna.
3 Xíkana chí calle ta nda̱kundixina ti̱ko̱to̱ ndayí.*
Xákuna tá ndóona si̱kí veʼena, ta xákuna tá ndóona nu̱ú ya̱ʼvi.
4 Ndáʼyi̱ kóʼóna* chí ñuu Hesbón xíʼin ñuu Elealé.
Nda̱a̱ chí Jáhaz táku̱ ndáʼyi̱na.
Ña̱kán ndáʼyi̱ kóʼó na̱ soldado na̱ ñuu Moab.
Na̱ ñuu yíʼvinína.
5 Ndáʼyi̱ kóʼi̱ xa̱ʼa̱ ñuu Moab.
Na̱ ñuu Moab na̱ ku̱chiñu xi̱nu ni̱xa̱a̱na nda̱a̱ Zóar xíʼin Eglat-Selisiyá.
Xákuna tá ku̱a̱ndaana chí Luhit.
Tá ku̱a̱ʼa̱nna chí yichi̱ ña̱ Horonaim, ndáʼyi̱ kóʼóna xa̱ʼa̱ tu̱ndóʼo ña̱ ndo̱ʼona.
6 Saáchi xa̱a̱ ni̱yi̱chi̱ ti̱kui̱í tá Nimrim.
Xa̱a̱ ni̱yi̱chi̱ ku̱ʼu̱ kúii̱;
ta kǒoka ku̱ʼu̱ kúii̱ íyo.
7 Xa̱ʼa̱ ña̱kán nda̱kiʼinna ña̱ʼa ña̱ kúúmiína xíʼin ña̱ ku̱i̱ká ña̱ kúúmiína ta ku̱a̱ʼa̱nña xíʼinna;
ta ni̱ya̱ʼana chí yoso̱ nu̱ú íyo tú álamo.
8 Saáchi iníí ñuu Moab táku̱ ña̱ ndáʼyi̱ kóʼóna.
Nda̱a̱ chí Eglaim táku̱ xákuna;
ta saátu táku̱ xákuna nda̱a̱ chí Beer-Elim.
9 Saáchi ti̱kui̱í tá íyo chí Dimón nda̱kutúrá xíʼin ni̱i̱,
ta Ndióxi̱ chindaʼára ku̱a̱ʼáka tu̱ndóʼo nu̱ú na̱ ñuu Dimón:
chindaʼára iin ndikaʼa* sa̱tá na̱ ñuu Moab na̱ kunu ku̱ʼu̱n,
ta saátu sa̱tá na̱ kindo̱o ñuu kán.