Isaías
23 Ña̱yóʼo kúú ña̱ kundoʼo ñuu Tiro:
Kuaku ndóʼó na̱ ta̱a na̱ ñúʼu ini barco tú Tarsis.*
Ndi̱ʼi-xa̱ʼa̱ nu̱ú xáa̱ tú barco; ta va̱ása kívika kunditanú yóʼo.
Nda̱a̱ chí Kitim ke̱e tu̱ʼun ki̱xaa̱ nu̱úna.
2 Va̱ása ka̱ʼa̱nndó, ndóʼó na̱ ndóo yuʼú tá mar.
Na̱ ñuu Sidón na̱ íxi̱íko* ña̱ʼa na̱ xíka nu̱ú mar, sa̱kútuna ña̱ʼa ñuundó.
3 Trigo ña̱ ka̱na chí Sihor* xíʼin ña̱ ndákayandó chí Nilo, yóʼo kúú nu̱ú kána xu̱ʼúnndó,
ni̱ya̱ʼana xíʼinña nu̱ú ku̱a̱ʼání ti̱kui̱í,
ta ku̱a̱ʼání xu̱ʼún na̱ inka ñuu ta̱vána xíʼinña.
4 Ndóʼó na̱ ñuu Sidón ña̱ kútu̱ní ku̱vaʼa yuʼú mar, kukaʼan nu̱úndó,
saáchi tá mar ni̱ka̱ʼa̱nrá ña̱yóʼo:
“Va̱ása níxo̱ʼvii̱* nda̱a̱ táki̱ʼva xóʼvi̱ ná káku se̱ʼe ta ni va̱ása níkaku se̱ʼi̱;
Saátu va̱ása nísakúaʼnui̱ na̱ ta̱a válí ta ni va̱ása nísanáʼi̱ ná ñaʼá válí”.*
5 Nda̱a̱ táki̱ʼva ni̱ndi̱ʼi-inindó tá xi̱niso̱ʼondó tu̱ʼun xa̱ʼa̱ ñuu Egipto,
saá ndi̱ʼi-inindó tá ná kuniso̱ʼondó tu̱ʼun xa̱ʼa̱ ñuu Tiro.
6 Ya̱ʼandó chí Tarsis.
Ndóʼó na̱ ndóo nu̱ú ñuʼú ña̱ íyo chí yuʼú mar, kuakundó.
7 ¿Á ña̱yóʼo kúú ñuu ña̱ xi̱kusi̱íní-ini ta ni̱nuní xi̱kuniña nani tiempo xi̱naʼá tá ki̱xáʼa íyoña?
Xi̱xaʼa̱nna inka ñuu ña̱ xíkání ña̱ va̱ʼa kundoona kán.
8 ¿Ndáana ni̱ka̱ʼa̱n ña̱ kundoʼo na̱ ñuu Tiro ña̱yóʼo?
Ñuu yóʼo kúú ña̱ xi̱taxi ña̱ kaʼndachíñu inkana,
na̱ ta̱a na̱ ndáyáʼvi kúú na̱ xi̱xi̱íko ñuu yóʼo,
ta ndiʼi na̱ yiví xi̱ ixato̱ʼónína na̱ xi̱xi̱íko yóʼo.
9 Mií Jehová ta̱ xáʼndachíñu nu̱ú na̱ ángel kúú ta̱ ni̱ka̱ʼa̱n ña̱ kundoʼona ña̱yóʼo,
ña̱ va̱ása ni̱nuní kunina xa̱ʼa̱ ña̱ liviní ñuuna,
ña̱ va̱ʼa sakúkaʼanra nu̱ú na̱ xi̱ ixato̱ʼóní na̱ yiví.
10 Ndóʼó na̱ ñuu Tarsis, ya̱ʼandó ma̱ʼñú ñuuna nda̱a̱ táki̱ʼva yáʼa yu̱ta Nilo.
Kǒoka nu̱ú kundita barco.
11 Sa̱káa̱ra ndaʼa̱ra sa̱tá mar;
Sákisira ndiʼi na̱ xáʼndachíñu.
Jehová xa̱ʼndara chiñu ña̱ ná sandíʼi-xa̱ʼa̱na ñuu Fenicia ña̱ kútu̱ní ndási.
12 Ta káchira: “Va̱ása kusi̱íka-ini ndóʼó na̱ ñuu Sidón na̱ xóʼvi̱ní.
Ndakunditandó ta ya̱ʼandó chí Kitim.
Ta ni ná xa̱a̱ndó kán kundi̱ʼikava-inindó”.
13 Kotondó ñuʼú na̱ caldeo.
Ñuu yóʼo kúú ña̱ sa̱ndíʼi-xa̱ʼa̱ ñuʼúna ta ndáa kití yukú kúú tí ndóo,
ta su̱ví na̱ ñuu Asiria kúú na̱ níkeʼé ña̱yóʼo,
na̱yóʼo kúú na̱ ke̱ʼé veʼe súkun nu̱ú ñúʼu ña̱ʼa ña̱ xíniñúʼuna tá kánitáʼanna.
Xa̱nina ndiʼi veʼe súkun ña̱ kútu̱ní ndási
ta sa̱ndíʼi-xa̱ʼa̱naña.
14 Kuaku ndóʼó na̱ ta̱a na̱ ñúʼu ini barco tú Tarsis,
saáchi sa̱ndíʼi-xa̱ʼa̱na ñuundó ña̱ kútu̱ní ndási.
15 Ki̱vi̱ saá, 70 ku̱i̱ya̱ nandóso-inina xa̱ʼa̱ ñuu Tiro nda̱a̱ táki̱ʼva íyo ku̱i̱ya̱ ña̱ táku iin ta̱ rey. Tá ná ya̱ʼa 70 ku̱i̱ya̱, na̱ ñuu Tiro kundoʼona táʼan ña̱ káʼa̱n yaa ña̱ káʼa̱n xa̱ʼa̱ ñá kísi̱ xíʼin ku̱a̱ʼá ta̱a:
16 “Kiʼin iin arpa, yóʼó ñá kísi̱ xíʼin ku̱a̱ʼá ta̱a, ñá na̱ndóso-ini na̱ ñuu xa̱ʼa̱ ta kakaún iníí ñuu.
Vií va̱ʼa sakáʼún tú arpa;
ku̱a̱ʼání yaa kataún,
ña̱ va̱ʼa ná ndakaʼánna xa̱ʼún”.
17 Tá ná ya̱ʼa 70 ku̱i̱ya̱, Jehová ndakaʼán tukura xa̱ʼa̱ ñuu Tiro, ta na̱ ñuu yóʼo kixáʼa tukuna xi̱íkona miína nda̱a̱ táki̱ʼva kéʼé ñá kísi̱ xíʼin ku̱a̱ʼá ta̱a, chi ki̱ʼvina xíʼin ndiʼi na̱ chíñu na̱ íyo nu̱ú ñuʼú yóʼo. 18 Soo xu̱ʼún ña̱ kiʼinna, kooña ña̱ yi̱i̱ nu̱ú Jehová. Va̱ása taánva̱ʼanaña* ta ni va̱ása nduku̱a̱ʼáña saáchi na̱ ñuu Jehová kúú na̱ kiʼin xu̱ʼún ña̱ ná chaʼvinana ña̱ va̱ʼa ná kuxuna nda̱a̱ ná xa̱a̱-inina* ta kundixina ti̱ko̱to̱ livi.