Isaías
24 Kotondó, Jehová távára na̱ ndóo nu̱ú ñuʼú yóʼo ta kǒo nda̱a̱ ni iin ña̱ʼa sándakoora nu̱úña.
Ndáxikóniʼiraña ta táxira ña̱ xa̱a̱ síín síín ku̱ʼu̱nna kundoona.
2 Inkáchi kundoʼo ndiʼina:
na̱ íyo chí ñuu ta saátu na̱ su̱tu̱,
ta̱ káchíñu ta saátu ta̱ káchíñura nu̱ú.
Ñá káchíñu ta saátu ñá káchíñuñá nu̱ú,
na̱ sátá* ta saátu na̱ íxi̱íko,*
na̱ táxitóo* ña̱ʼa ta saátu na̱ ndúkúña,
na̱ táxitóo xu̱ʼún ta saátu na̱ ndúkúña.
3 Nda̱a̱ ni iinna va̱ása kundooka nu̱ú ñuʼú yóʼo;
ndakiʼinna ndiʼi ña̱ʼa ña̱ íyo nu̱úña,
chi mií Jehová kúú ta̱ ni̱ka̱ʼa̱n ña̱yóʼo.
4 Ñuʼú yóʼo nda̱a̱ táki̱ʼva íyo ña̱ kúsuchí-ini* saá íyoña, ta ku̱a̱ʼa̱n ndíʼi-xa̱ʼa̱ña.
Ñuʼú nu̱ú va̱ʼaní xi̱kana ña̱ʼa, ku̱a̱ʼa̱n yíchi̱ña, ku̱a̱ʼa̱n ndíʼi-xa̱ʼa̱ña.
Na̱ yiví na̱ ndáyáʼvi na̱ íyo nu̱ú ñuʼú yóʼo,
nda̱a̱ táki̱ʼva íyo na̱ ku̱a̱ʼa̱n yíchi̱ saá íyona.
5 Na̱ yiví na̱ ndóo nu̱ú ñuʼú yóʼo, i̱xayaku̱a̱naña,
saáchi kǒo ndíku̱nna ley,
na̱samana chiñu ña̱ xa̱ʼnda Ndióxi̱,
sa̱ndíʼi-xa̱ʼa̱na trato ña̱ ki̱ndoona saxínuna ndiʼi tiempo.
6 Ña̱kán nda̱kiʼin ñuʼú yóʼo chiʼña,
ta na̱ ndóo nu̱ú ñuʼú yóʼo kúúmiína ku̱a̱chi.
Xa̱ʼa̱ ña̱kán loʼoní kúú na̱ ndóo nu̱ú ñuʼú yóʼo,
ta si̱lóʼoní kúú na̱ ta̱a kíndo̱o.
7 Nda̱a̱ táki̱ʼva íyo tá kúsuchí-ini* saá íyo tá vino xa̱á, va̱xi yíchi̱ tú uva,
ndiʼi na̱ kúsi̱í-ini, xákuna.
8 Va̱ása káʼaka yaa si̱í xíʼin tú pandereta;
xa̱a̱ ku̱táxi̱n yuʼú na̱ kútóoní vikó;
va̱ása káʼaka yaa si̱í xíʼin tú arpa.
9 Kǒoka yaa xíta tá xíʼina vino,
ta tá xíʼina ndixi kúú o̱va̱ yuʼúna xíʼinrá.
10 Ndi̱ʼi-xa̱ʼa̱ ñuu ña̱ kǒo nda̱a̱ ni iin ña̱ʼa nu̱ú;
ndási ndiʼi veʼe ta nda̱a̱ ni iinna va̱ása kívi ki̱ʼvi iniña.
11 Chí calle xákundáʼvina xa̱ʼa̱ vino.
Kǒoka na̱ kúsi̱í-ini;
kǒoka ña̱ sákusi̱í-inina nu̱ú ñuʼú.
12 Ndi̱ʼi-xa̱ʼa̱ ndiʼi ñuu;
sa̱ndíʼi-xa̱ʼa̱na yéʼé.
13 Saáchi ña̱yóʼo kúú ña̱ kuu nu̱ú ñuʼú yóʼo, ña̱ kuu ti̱xin ñuu válí:
ndoʼoña nda̱a̱ táki̱ʼva ndóʼo tú olivo tá kánina ndaʼa̱nú,
kundoʼoña nda̱a̱ táki̱ʼva kéʼéna tá nándukúna uva tí ki̱ndoo.
14 Nda̱ʼyi̱ kóʼóna* xa̱ʼa̱ ña̱ kúsi̱íní-inina.
Nda̱a̱ chí nu̱ú íyo mar ka̱ʼa̱nna ña̱ káʼnuní Jehová.
15 Ña̱kán ndasakáʼnuna Jehová chí nu̱ú kíta ñu̱ʼu;*
ndasakáʼnuna ki̱vi̱ Jehová Ndióxi̱ na̱ ñuu Israel chí isla ña̱ íyo nu̱ú mar.
16 Nda̱a̱ xíká xi̱niso̱ʼoyó yaa yóʼo:
“Ná ndukáʼnu ta̱ kéʼé ña̱ nda̱kú”.
Soo yi̱ʼi̱ káʼi̱n ña̱yóʼo: “Ndóʼoní-inii̱, ndóʼoní-inii̱.
Ndáʼviníi̱. Na̱ sándaʼvi, sa̱ndáʼvina inkana;
kǒo sándakoona ña̱ sandáʼvina inkana”.
17 Ndóʼó na̱ ndóo nu̱ú ñuʼú yóʼo, yi̱ʼvíníndó, ko̱yondó ini ya̱vi̱ ta tiinna ndóʼó.
18 Tá ná kuniso̱ʼona ña̱ sayíʼvi miína, kununa ta ko̱yona ini ya̱vi̱,
ta na̱ ná kee ini ya̱vi̱, tiinnana.
Saáchi ndaku̱ná yéʼé ndiví ta ta̱an nu̱ú ñuʼú.
19 Ni̱nda̱ta̱ nu̱ú ñuʼú,
ndeéní sa̱kísinaña;
nda̱a̱ táki̱ʼva íyo ña̱ xíʼi̱ yi̱ʼí saá íyoña.
20 Nda̱a̱ táki̱ʼva ndóʼo iin ta̱ xíʼi tá xíkara saá ndóʼo ñuʼú yóʼo,
ku̱a̱ʼa̱nña chóʼo ta ku̱a̱ʼa̱nña chí káa, nda̱a̱ táki̱ʼva ndóʼo iin veʼe loʼo xíʼin ta̱chí.
Ve̱ení ku̱a̱chi ndísoña,
ndakavaña ta va̱ása ndakundichikaña.
21 Ki̱vi̱ saá, Jehová ndakotora nu̱ú na̱ íyo chí ndiví
ta saátu nu̱ú na̱ xáʼndachíñu na̱ íyo nu̱ú ñuʼú.
22 Sandátakanana ta taánnana ini ya̱vi̱,
nda̱a̱ táki̱ʼva kéʼéna xíʼin na̱ tíinna,
ta ndakasinana ini veʼeka̱a;
ta tá ná ya̱ʼa ku̱a̱ʼá ki̱vi̱ saá taxina castigo ndaʼa̱na.
23 Tí yo̱o̱ kunaarí
ta ñu̱ʼu kunaaña,
saáchi Jehová ta̱ xáʼndachíñu nu̱ú na̱ ángel xa̱a̱ kúúra Rey chí yuku̱ Sion ta saátu chí Jerusalén,
na̱ níʼi yichi̱ nu̱ú na̱ ñuura* kunina ña̱ íyoní ndee̱ra tá ná kaʼndachíñura.