Ña̱ va̱ʼa ña̱ ndátuyó ndakiʼinyó

“Soo xíniñúʼu kunda̱a̱-iniún ña̱ ki̱vi̱ so̱ndíʼi, koo tiempo ña̱ yo̱ʼvi̱ní ta kǒo kundeé-inina xíʼinña” (2 TIMOTEO 3:1).

¿Á XA̱A̱ xíniso̱ʼún ña̱ kúú sava ña̱ va̱xi yóʼo?

● Iin kue̱ʼe̱ ña̱ ndeéní xáʼníña ku̱a̱ʼání na̱ yiví.

● Xa̱ʼa̱ ña̱ kǒo ña̱ kuxu na̱ yiví xíʼi̱ ku̱a̱ʼánína.

● Xa̱ʼa̱ ña̱ ndeéní táan ku̱a̱ʼání na̱ yiví xíʼi̱ ta saátu ku̱a̱ʼánína ndíʼi-xa̱ʼa̱ veʼena.

Nu̱ú tutu yóʼo kunda̱a̱ka-iniyó xa̱ʼa̱ táʼan tu̱ndóʼo yóʼo. Ta kivi sakuaʼún ña̱ xa̱a̱ ni̱ka̱ʼa̱n ña̱ Biblia ña̱ koova tu̱ndóʼo yóʼo ki̱vi̱ nu̱ú ndíʼi.a

Ña̱ artículo yóʼo kǒo níkanaña ña̱ saxínu̱ña-iniún ña̱ kandíxaún ña̱ ndóoyó nu̱ú ñuyǐví ña̱ kininí káa, saáchi ka̱naña xa̱ʼa̱ ña̱ kandíxaún ña̱ íyo iin ña̱ ndátuyó ndakiʼinyó chí nu̱únínu. Ta chindeétáʼanña xíʼún ña̱ kunda̱a̱-iniún xa̱ʼa̱ i̱ñu̱ profecía ña̱ náʼa̱ ña̱ xa̱a̱ ku̱nu̱mí ndiʼi-xa̱ʼa̱ ña̱ va̱ása va̱ʼa íyo nu̱ú ñuyǐví yóʼo. Ta saátu ka̱ʼa̱nyó xa̱ʼa̱ sava pregunta ña̱ kúúmií na̱ yiví ta nda̱chun kivi kandíxayó ña̱ ndátuyó ndakiʼinyó iin ña̱ va̱ʼaní chí nu̱únínu.

[Koto]

1. Ndeéní ta̱an

“Ndeéní ta̱an” (LUCAS 21:11).

● Na̱ sáya̱ʼa noticia nu̱ú televisión na̱ ni̱xa̱ʼa̱n xi̱to Haití tá ndeéní ni̱ta̱an, xi̱niso̱ʼona ña̱ tána iinna tañu ña̱ʼa ña̱ ni̱ko̱yo. Ta iin ñá loʼo ñá xi̱kuumií iin ku̱i̱ya̱ sava ñá naní Winnie xi̱kuuñá, tándi̱ʼi ku̱chiñuna ta̱vánañá tañu ña̱ʼa yóʼo ta sa̱kákuvanañá, soo na̱ yiváñá ni̱xi̱ʼi̱vana.

¿NDÁAÑA NÁʼA̱ ÑA̱YÓʼO? Ki̱ʼva 7 magnitud ni̱ta̱an chí Haití tá yo̱o̱ enero ku̱i̱ya̱ 2010 ta yáʼaka 300,000 mil na̱ yiví ni̱xi̱ʼi̱, ta 1,300,000 na̱ yiví ndiʼi xa̱ʼa̱ veʼe. Soo su̱ví iinlá ñuu yóʼo ni̱ta̱an, saáchi yo̱o̱ abril ku̱i̱ya̱ 2009 iinsaá nda̱a̱ yo̱o̱ abril ku̱i̱ya̱ 2010 ki̱ʼva 18 yichi̱ ndeéníka ni̱ta̱an inka ñuu.

ÑA̱ NDÁKANIXI̱NÍ NA̱ YIVÍ. Va̱ása ndeéka táan nda̱a̱ táki̱ʼva ni̱xi̱yoña tá ya̱chi̱. Saáchi ña̱ tecnología nátúʼunña xíʼinyó ama kúú ña̱ ta̱an.

¿Á ÑA̱ NDIXA KÚÚ ÑA̱YÓʼO? Ná kiʼinyó kuenta saáchi ña̱ Biblia va̱ása níka̱ʼa̱nña nda̱saa yichi̱ ndeéní ta̱an ña̱ tiempo nu̱ú ndíʼi vitin. Chi ña̱ Biblia ni̱ka̱ʼa̱nña ña̱ ndeéní ta̱an xa̱a̱ síín síín lugar, saáchi ña̱yóʼo kúú ña̱ ni̱ka̱ʼa̱nña koo tiempo vitin (Marcos 13:8; Lucas 21:11).

¿NDÁAÑA NDÁKANIXI̱NÍÚN? ¿Á ndixa ndeéní táan nda̱a̱ táki̱ʼva ni̱ka̱ʼa̱n ña̱ Biblia?

Sana kivi kachiyó ña̱ táan yóʼo va̱ása náʼa̱ña ña̱ ndóoyó tiempo nu̱ú ndíʼi, soo náʼa̱vaña ña̱ ku̱a̱ʼa̱n xínu profecía ña̱ ni̱ka̱ʼa̱n ña̱ Biblia xa̱ʼa̱. Ta vitin ná ka̱ʼa̱nyó xa̱ʼa̱ inka ña̱yóʼo.

[Comentario]

“Ndi̱ʼi̱ na̱ geofísico káʼa̱nndi̱ ña̱ ndeéní táan, soo nu̱ú inka na̱ yiví kúúña iin tu̱ndóʼo ña̱ káʼnuní”. (TA̱ KEN HUDNUT, SERVICIO GEOLÓGICO DE ESTADOS UNIDOS)

[Ña̱yóʼo kúú na̱ʼná inkana]

© William Daniels/Panos Pictures

2. So̱ko

“Koo so̱ko” (MARCOS 13:8).

● Iin ta̱ ta̱a ni̱xa̱a̱ra iin ñuu loʼo ña̱ naní Quaratadji país ña̱ Níger. Ta saátu na̱ ñanira, ná ku̱ʼvara xíʼin inkaka na̱ veʼera ni̱xa̱a̱na ña̱ ñuu kán xa̱ʼa̱ ña̱ kǒo ña̱ kuxuna ñuu nu̱ú ni̱xi̱yona. Ta ta̱yóʼo xi̱ka̱ndúʼúra nu̱ú iin yivi̱ loʼo. ¿Nda̱chun ke̱ʼéra ña̱yóʼo? “Saáchi nda̱kanixi̱níra ña̱ kǒo kuchiñura taxira ña̱ kuxu na̱ veʼera, xa̱ʼa̱ ña̱kán kúkaʼan nu̱úra kotora nu̱úna”, saá káchi ta̱ Sidi ta̱ ndísochíñu xíʼin ña̱ ñuu loʼo kán.

¿NDÁAÑA NÁʼA̱ ÑA̱YÓʼO? Ku̱a̱ʼání na̱ yiví na̱ íyo iníísaá ñuyǐví kǒo ña̱ kuxuna, soo nu̱ú ndóʼokana ña̱yóʼo kúú chí África subsahariana, ta ku̱a̱ʼání na̱ yiví na̱ íyo yóʼo xíʼi̱nína so̱ko. Ña̱ va̱ʼa kunda̱a̱-iniyó xa̱ʼa̱ ña̱yóʼo, ná ndakanixi̱níyó xa̱ʼa̱ iin ta̱a xíʼin ñá síʼira ta íyo iin se̱ʼena. Tá íyo comida soo ña̱ nani kuxu u̱vi̱ kuitína kúúña, ¿ndáana kuxu, ta̱ ta̱a á ñá síʼira? Ku̱a̱ʼání na̱ familia ndóʼona ña̱yóʼo ndiʼi ki̱vi̱.

ÑA̱ NDÁKANIXI̱NÍ NA̱ YIVÍ. Nu̱ú ñuʼú yóʼo ku̱a̱ʼání ña̱ʼa kána ña̱ nani kuxu ndiʼi na̱ yiví, ña̱ xíniñúʼu keʼéyó kúú ña̱ viíka kuniñúʼuyó ndiʼi ña̱yóʼo.

¿Á ÑA̱ NDIXA KÚÚ ÑA̱YÓʼO? Ña̱ nda̱a̱ kúúña, tiempo vitin kúú ña̱ íyoníka ña̱ kuxuyó nu̱ú iníísaá ñuyǐví, ña̱kán kivi ndakanixi̱níyó na̱ gobierno kúú na̱ kivi kuniñúʼu ña̱yóʼo ña̱ va̱ʼa taxinaña ndaʼa̱ na̱ yiví na̱ íyo iníísaá ñuyǐví ña̱ va̱ʼa koo ña̱ kuxuna, tasaá va̱ása kooka so̱ko. Ni xa̱a̱ ku̱a̱ʼání tiempo chíka̱a̱ na̱ gobierno ndee̱ ña̱ kéʼéna ña̱yóʼo, soo ni saá ta̱ʼán kuchiñuna sandíʼi-xa̱ʼa̱na so̱ko.

¿NDÁAÑA NDÁKANIXI̱NÍÚN? ¿Á ña̱ nda̱a̱ kúú ña̱ káʼa̱n Marcos 13:8? Ni xa̱a̱ ku̱a̱ʼání kúú ña̱ kéʼé na̱ yiví, soo ¿á íyoka so̱ko nu̱ú na̱ yiví?

Ña̱ ndeéní táan xíʼin ña̱ íyoní so̱ko kúú ña̱ náʼa̱ ña̱ xa̱a̱ ndóoyó tiempo nu̱ú ndíʼi.

[Comentario]

“Ku̱a̱ʼání na̱ va̱lí xíʼi̱na xa̱ʼa̱ ña̱ ndóʼona neumonía, xa̱ʼa̱ ña̱ kúun-inina á xa̱ʼa̱ ña̱ ndóʼona inkaka kue̱ʼe̱, soo kiviva ka̱kuna tá ná koo ña̱ kuxuna”. (ÑÁ ANN M. VENEMAN, EX DIRECTORA EJECUTIVA DE UNICEF)

[Ña̱yóʼo kúú na̱ʼná inkana]

© Paul Lowe/Panos Pictures

3. Kue̱ʼe̱

“Kooní kue̱ʼe̱ ña̱ xíkun” (LUCAS 21:11).

● Iin ta̱a ta̱ naní Bonzali, ta̱ xi̱kachíñu ti̱xin iin centro ña̱ salud chí África nu̱ú ni̱xi̱yoní guerra, ke̱ʼéra nda̱a̱ ndáaka ña̱ʼa ña̱ va̱ʼa sakǎkura na̱ ta̱a na̱ xi̱kachíñu xíʼin ña̱ mina ña̱ ni̱xi̱yo ñuura tá ki̱ʼinna iin kue̱ʼe̱ ña̱ naní Marburgo.a Ta, ta̱yóʼo ni̱ka̱ʼa̱nra xíʼin inkaka na̱ kíʼin kuenta xíʼin na̱ kúúmií kue̱ʼe̱ ña̱ ná chindeétáʼanna xíʼinra, soo na̱yóʼo kǒo níndakuiin kamana chi ni̱ya̱ʼa ku̱mi̱ yo̱o̱ saáví nda̱kuiinna. Soo tá ki̱xaa̱na chindeétáʼanna xíʼin na̱ yiví na̱ kúúmií kue̱ʼe̱, xa̱a̱ ni̱xi̱ʼi̱va ta̱ Bonzali. Chi ki̱ʼinra kue̱ʼe̱ ña̱ xi̱kuumií na̱ xi̱kachíñu xíʼin mina na̱ xi̱kuni̱ra sakǎkura.

¿NDÁAÑA NÁ’A ÑA̱YÓʼO? Kue̱ʼe̱ ña̱ kíʼinna tá kǒo kívi ndakiʼin viína ta̱chína tá kúú ña̱ neumonía, á kue̱ʼe̱ ña̱ kúun-inina, ña̱ sida, ña̱ tuberculosis, ña̱ paludismo kúú kue̱ʼe̱ ña̱ sáxo̱ʼvi̱níka na̱ yiví. U̱ʼu̱n saá kue̱ʼe̱ yóʼo xa̱ʼníña ki̱ʼva 11 millón na̱ yiví tá ku̱i̱ya̱ 2004 ta ki̱ʼva 3 segundo xi̱xiʼi̱ iin iinna.

ÑA̱ NDÁKANIXI̱NÍ NA̱ YIVÍ. Ku̱a̱ʼáníkava ku̱a̱ʼa̱n ndúu na̱ yiví; xa̱ʼa̱ ña̱kán kúú ña̱ íyoníka kue̱ʼe̱.

¿Á ÑA̱ NDIXA KÚÚ ÑA̱YÓʼO? Ni ku̱a̱ʼáníka kúú na̱ yiví íyo, saátu chíka̱a̱níkana ndee̱ ña̱ kunda̱a̱-inina ndáa kue̱ʼe̱ kúú ña̱ kúúmií na̱ yiví, tasaá va̱ʼa ndani̱ʼína ta̱tán ña̱ kue̱ʼe̱ yóʼo ta sandáʼana na̱ yiví. Xa̱ʼa̱ ña̱ kéʼéna ña̱yóʼo, ¿á va̱ása xíniñúʼu nuuka ña̱ kue̱ʼe̱ yóʼo? Nu̱úka ña̱ kuu ña̱yóʼo ndeékava íyoña.

¿NDÁAÑA NDÁKANIXI̱NÍÚN? ¿Á ndóʼo na̱ yiví kue̱ʼe̱ ña̱ ndeéníka, nda̱a̱ táki̱ʼva ni̱ka̱ʼa̱n ña̱ Biblia?

Xa̱ʼa̱ ña̱ táan ña̱ íyo so̱ko xíʼin ña̱ íyo kue̱ʼe̱, xóʼvi̱ ku̱a̱ʼáníka na̱ yiví. Ta ku̱a̱ʼání na̱ yiví xóʼvi̱na íxaa inka na̱ yiví, soo ku̱a̱ʼáníka kúú na̱ xóʼvi̱ íxaa na̱ veʼena. Koto ndáaña káʼa̱n ña̱ Biblia xa̱ʼa̱ ña̱yóʼo.

[Koto]

[Comentario]

“Iin ña̱ i̱yoní kúúña tá ná kaxí iin tí león miíyó a inkaka kití tí kue̱ʼe̱, ta saátu iin ña̱ i̱yoní kúúña tá kíʼinyó kue̱ʼe̱ ta xítoyó ña̱ loʼo tá loʼo sáxo̱ʼvi̱ña miíyó”. (TA̱ MICHAEL OSTERHOLM, EPIDEMIÓLOGO)

[Ña̱yóʼo kúú na̱ʼná inkana]

© William Daniels/Panos Pictures

4. Na̱ yiví kǒo kuʼvi̱ka-inina kunina na̱ veʼena

“Va̱ása kuʼvi̱-inina kunina na̱ veʼena” (2 TIMOTEO 3:1-3).

● Ñá Chris ñá káchíñu nu̱ú káʼa̱nna xa̱ʼa̱ derecho ná ñaʼá tá káni yiína miíná chí norte ña̱ Gales. Káchiñá: “Iin ki̱vi̱ ki̱xi iin ñá ñaʼá ñá ndeéní ka̱nina ta ni kǒo níndakunikai̱ñá, ta savatuná xa̱ʼa̱ ña̱ ndeéní xóʼvi̱ná ni va̱ása ndániʼiná nu̱úná ña̱ ka̱ʼa̱nná xíʼinndi̱”.

¿NDÁAÑA NÁ’A̱ ÑA̱YÓʼO? Chí África ku̱a̱ʼání ná ñaʼá ni̱ki̱si̱ná xíʼinná tá ni̱xi̱yo va̱líná, ta suvi mií país kán ni̱nda̱ka̱tu̱ʼunna ku̱a̱ʼá na̱ ta̱a, ta na̱yóʼo ni̱ka̱ʼa̱nna ña̱ iin ña̱ va̱ʼava kúú ña̱ kanina ñá síʼina. Ta su̱ví nda̱saa ná ñaʼá kúú ná kánina, saáchi saátu chí Canadá ku̱a̱ʼání ná ñaʼá kániná yiína.

ÑA̱ NDÁKANIXI̱NÍ NA̱ YIVÍ. Xa̱a̱ ndiʼiva tiempo kánitáʼan na̱ familia, soo vitin kúú ña̱ ndeéka káʼa̱nna xa̱ʼa̱ ña̱yóʼo.

¿Á ÑA̱ NDIXA KÚÚ ÑA̱YÓʼO? Ni ku̱a̱ʼání na̱ yiví káʼa̱n xa̱ʼa̱ ña̱yóʼo tiempo vitin, soo ¿á xa̱a̱ chíndeétáʼanña xíʼinna ña̱ sandákoona ña̱ kanitáʼanna? Va̱ása, saáchi ku̱a̱ʼáníkava kúú na̱ kǒo kúʼvi̱-ini xíni na̱ veʼena.

¿NDÁAÑA NDÁKANIXI̱NÍÚN? ¿Á xa̱a̱ ku̱a̱ʼa̱n xínu ña̱ káʼa̱n 2 Timoteo 3:1-3? ¿Á íyo ku̱a̱ʼáka na̱ yiví na̱ va̱ása kúʼvi̱-ini xíni na̱ veʼena?

Inka profecía ña̱ xa̱a̱ xítoyó xínu kúú ña̱ káʼa̱n xa̱ʼa̱ ña̱ kéʼéna xíʼin ñuʼú nu̱ú ndóoyó yóʼo. Ná kotoyó ndáaña káʼa̱n ña̱ Biblia xa̱ʼa̱ ña̱yóʼo.

[Comentario]

“Ña̱ kánitáʼan na̱ familia kúú ña̱ loʼoka ku̱a̱ʼa̱nna káʼa̱nna xa̱ʼa̱ nu̱ú na̱ chíñu. Iin ñá ñaʼá ki̱ʼva 35 yichi̱ví káni yiíñá miíñá saáví ku̱a̱ʼa̱nñá nátúʼunñá xíʼin na̱ policía”. (TA̱ KÁCHÍÑU XÍʼIN SERVICIO DE AYUDA CONTRA EL MALTRATO DOMÉSTICO DE GALES)

5. Ña̱ ku̱a̱ʼa̱n ndíʼi-xa̱ʼa̱ nu̱ú ñuʼú yóʼo

Ndióxi̱ sandíʼi-xa̱ʼa̱ra na̱ sándiʼi-xa̱ʼa̱ ñuʼú yóʼo (REVELACIÓN [APOCALIPSIS] 11:18).

● Ta̱ Pirri íxi̱kóra vino tú palma chí ñuu Kpor ña̱ país ña̱ Nigeria, soo ndi̱ʼi-xa̱ʼa̱ chiñura xa̱ʼa̱ ña̱ ni̱xi̱ta̱ ku̱a̱ʼání petróleo chí delta ña̱ Níger, ta ku̱a̱ʼání tú palmera ndi̱ʼi-xa̱ʼa̱ i̱xaará. Káchira: “Xa̱ʼníra ti̱a̱ká, ta va̱ása va̱ʼa kéʼéra xíʼin ku̱ñundi̱ ta sa̱ndíʼi-xa̱ʼa̱rá yu̱ta tá íyo ñuundi̱. Xa̱ʼa̱ ña̱kán, va̱ása xíni̱kai̱ ndáa chiñu kúú ña̱ keʼíi̱ vitin”.

¿NDÁAÑA NÁʼA̱ ÑA̱YÓʼO? Nda̱a̱ táki̱ʼva káʼa̱n na̱ xíni̱ va̱ʼa, xátana ki̱ʼva 6,500,000 tonelada mi̱ʼí nu̱ú tá mar ndiʼi ku̱i̱ya̱. Ta iin táʼví ña̱yóʼo kúúña plástico ta yáʼaka 100 ku̱i̱ya̱ saáví ndíʼi-xa̱ʼa̱ña. Ta na̱ yiví va̱ása xáta kuitína mi̱ʼí nu̱ú ñuʼú yóʼo, saáchi saátu kamaní sándiʼi-xa̱ʼa̱na ña̱ va̱ʼa ña̱ íyo nu̱úña. Na̱ xíni̱ va̱ʼa káʼa̱nna, ña̱ iin ku̱i̱ya̱ kuití sándiʼi-xa̱ʼa̱ na̱ yiví ña̱ va̱ʼa ña̱ íyo nu̱ú ñuʼú yóʼo, ta ña̱ va̱ʼa nduxa̱á tuku ña̱yóʼo xíniñúʼu ya̱ʼa iin ku̱i̱ya̱ xíʼin u̱ʼu̱n yo̱o̱. “Tá ku̱a̱ʼáka ná nduu na̱ yiví ta ku̱a̱ʼáka ña̱ʼa ña̱ íyo nu̱ú ñuʼú yóʼo ná kuniñúʼuna, nda̱a̱ kivi xa̱a̱yó kuniñúʼuyó u̱vi̱ ñuyǐví ti̱xin ña̱ ku̱i̱ya̱ 2035”, saá káchi ña̱ ka̱na nu̱ú periódico australiano ña̱ naní Sydney Morning Herald.

ÑA̱ NDÁKANIXI̱NÍ NA̱ YIVÍ. Na̱ yiví xíni̱vana ndáaña keʼéna ña̱ va̱ʼa nasamana ña̱ kúu nu̱ú ñuʼú yóʼo, tasaá kuchiñuna sakǎkuna ñuʼú nu̱ú ndóoyó yóʼo.

¿Á ÑA̱ NDIXA KÚÚ ÑA̱YÓʼO? Tíxa̱ʼvi na̱ yiví na̱ káʼa̱n ña̱ vií ná keʼéyó xíʼin nu̱ú ñuʼú yóʼo ta saátu inkaka na̱ yiví, chíndeétáʼanna xíʼin na̱ yiví ña̱ kunda̱a̱-inina ndáaña keʼéna. Soo ni saá, na̱ yiví íxayaku̱a̱kavana nu̱ú ñuʼú yóʼo.

¿NDÁAÑA NDÁKANIXI̱NÍÚN? ¿Á xíniñúʼuyó ña̱ ná chindeétáʼan Ndióxi̱ xíʼinyó ña̱ ndasaviíra nu̱ú ñuʼú ña̱ ndóoyó yóʼo, nda̱a̱ táki̱ʼva xa̱a̱ ni̱ka̱ʼa̱nra?

Nu̱ú u̱ʼu̱n profecía ña̱ xa̱a̱ ni̱ka̱ʼa̱nyó xa̱ʼa̱, ña̱ Biblia ni̱ka̱ʼa̱nña ña̱ kuu iin ña̱ va̱ʼa tiempo nu̱ú ndíʼi ña̱ ndóoyó vitin. Ná ka̱ʼa̱nyó xa̱ʼa̱ ña̱yóʼo.

[Comentario]

“Tá ya̱chi̱ ni̱xi̱yoi̱ nu̱ú iin ñuʼú ña̱ liviní, ta vitin íyoi̱ nu̱ú xátana mi̱ʼí”. (ÑA̱ NI̱KA̱ʼA̱N TA̱ ERIN TAMBER, TA̱ ÍYO CHÍ COSTA SUR ÑA̱ ESTADOS UNIDOS XA̱ʼA̱ ÑA̱ NI̱XI̱TA̱ PETROLEO CHÍ GOLFO ÑA̱ MÉXICO TÁ KU̱I̱YA̱ 2010)

[Cuadro]

¿Á Ndióxi̱ kúú ta̱ kúúmií ku̱a̱chi xa̱ʼa̱ ña̱yóʼo?

Xa̱ʼa̱ ña̱ xa̱a̱ ni̱ka̱ʼa̱n ña̱ Biblia ña̱ koo tu̱ndóʼo tiempo ña̱ ndóoyó vitin, ¿á kúni̱ kachi ña̱yóʼo ña̱ mií Ndióxi̱ kúú ta̱ kúúmií ku̱a̱chi xa̱ʼa̱ ña̱ ndóʼoyó? Ndani̱ʼún ña̱ káʼa̱nka xa̱ʼa̱ ña̱yóʼo nu̱ú capítulo 11 libro ña̱ naní ¿Ndáaña kúú míí ña̱ ndixa sánáʼa̱ Biblia?, ña̱ ta̱vá na̱ testigo Jehová.

[Ña̱yóʼo kúú na̱ʼná inkana]

U.S. Coast Guard photo

6. Nátúʼunna iníísaá ñuyǐví

“Ta tu̱ʼun va̱ʼa ña̱ káʼa̱n xa̱ʼa̱ Reino Ndióxi̱ natúʼunna xa̱ʼa̱ña iníísaá nu̱ú ñuʼú yóʼo” (MATEO 24:14).

● Ñá Vaiatea íyoñá iin isla ña̱ ndíka̱a̱ chí Pacífico, ña̱ kíndo̱o chí archipiélago ña̱ Tuamotú. Ta ndiʼi ña̱ isla válí yóʼo kúúña 80 ta nu̱ú ña̱yóʼo íyo 16,000 na̱ yiví. Soo ni saá, na̱ testigo Jehová xáʼa̱nna xítona ñá Vaiatea xíʼin na̱ íyo yatin xíʼinñá. ¿Nda̱chun xíkaní xáʼa̱nna? Saáchi kúni̱na natúʼunna tu̱ʼun va̱ʼa ña̱ káʼa̱n xa̱ʼa̱ Reino Ndióxi̱ xíʼin ndiʼi na̱ yiví, ni nda̱a̱ ndáaka nu̱ú ndóona.

¿NDÁAÑA NÁʼA̱ ÑA̱YÓʼO? Xa̱a̱ iníísaá ñuyǐví nátúʼunna xa̱ʼa̱ Reino Ndióxi̱. Tá ku̱i̱ya̱ 2010, na̱ testigo Jehová na̱túʼunna tu̱ʼun va̱ʼa ña̱ káʼa̱n xa̱ʼa̱ Reino Ndióxi̱ xíʼin na̱ yiví, ta yáʼaka 1,600 millón hora ke̱ʼéna ña̱yóʼo nu̱ú 236 país xíʼin ñuu válí, ña̱yóʼo kúni̱ kachiña ña̱ 30 minuto na̱túʼun iin tá iin na̱ testigo Jehová xíʼin na̱ yiví iin tá iin ki̱vi̱. Ta xa̱a̱ íyo u̱xu̱ ku̱i̱ya̱ chí sa̱tá, ta̱vána ta xa̱xána yáʼaka 20,000 millón tutu ndaʼa̱ na̱ yiví.

ÑA̱ NDÁKANIXI̱NÍ NA̱ YIVÍ. Xa̱a̱ íyo ku̱a̱ʼáníva ku̱i̱ya̱ kúú ña̱ nátúʼunna xa̱ʼa̱ ña̱ káʼa̱n Biblia.

¿Á ÑA̱ NDIXA KÚÚ ÑA̱YÓʼO? Ku̱a̱ʼání na̱ yiví chíka̱a̱na ndee̱ ña̱ natúʼunna xíʼin inkana xa̱ʼa̱ ña̱ káʼa̱n Biblia. Soo ku̱a̱ʼání na̱yóʼo loʼo kuitíva tiempo kéʼénaña, ta sava kuití ñuu kéʼénaña. Soo na̱ testigo Jehová chíka̱a̱nína ndee̱ ña̱ natúʼunna xíʼin na̱ yiví na̱ íyo nu̱ú iníísaá ñuyǐví. Ta kéʼéna ña̱yóʼo ni sási na̱ chíñu nu̱úna á inkaka na̱ yiví (Marcos 13:13).a Ta saátu, na̱ testigo Jehová távána tiempo ña̱ natúʼunna xíʼin na̱ yiví xa̱ʼa̱ Ndióxi̱, ta táxina tutu ndaʼa̱ na̱ yiví ña̱ va̱ʼa sakuaʼana, ta va̱ása kíʼinna xu̱ʼún xa̱ʼa̱ ña̱yóʼo. Ta xu̱ʼún ña̱ xíniñúʼuna ña̱ távána tutu yóʼo, kúú xu̱ʼún ña̱ táxi na̱ yiví xíʼin ndiʼi níma̱na.

¿NDÁAÑA NDÁKANIXI̱NÍÚN? ¿Á xa̱a̱ nátúʼunna tu̱ʼun va̱ʼa ña̱ káʼa̱n xa̱ʼa̱ Reino Ndióxi̱ xíʼin ndiʼi na̱ yiví na̱ íyo iníísaá ñuyǐví? ¿Á kúni̱ kachi ña̱ xa̱a̱ ku̱a̱ʼa̱n xínu ña̱ profecía yóʼo ña̱ íyo iin ña̱ va̱ʼa ndátuyó ndakiʼinyó chí nu̱únínu?

[Koto]

[Comentario]

“Ta chika̱a̱kandi̱ ndee̱ ña̱ natúʼunndi̱ tu̱ʼun va̱ʼa ña̱ káʼa̱n xa̱ʼa̱ Reino Ndióxi̱ xíʼin na̱ yiví, ta kuniñúʼundi̱ nda̱a̱ ndáaka ña̱ʼa ña̱ keʼéndi̱ ña̱yóʼo, nda̱a̱ ná ka̱ʼa̱n mií Jehová ña̱ va̱ása natúʼunkandi̱”. (ANUARIO DE LOS TESTIGOS DE JEHOVÁ 2010)

Si̱lóʼo kúma̱ní ta ndakiʼinyó iin ña̱ va̱ʼa chí nu̱únínu

“Si̱lóʼova tiempo kúma̱ní, ta na̱ yiví na̱ kéʼé ña̱ va̱ása va̱ʼa ndiʼi-xa̱ʼa̱na [...]. Ta na̱ vitá-ini taxira ñuʼú ndaʼa̱, ta si̱íní kundoona nu̱úña chi kǒoka ku̱a̱chi koo” (SALMO 37:10, 11).

¿Á KÚNI̱ÚN kuniún tá ná xi̱nu ña̱ profecía yóʼo? Sana kúni̱vaún. Íyova ña̱ náʼa̱ ña̱ xa̱a̱ ku̱nu̱mí xi̱nu ña̱yóʼo.

Artículo ña̱ xa̱a̱ ni̱ya̱ʼa, káʼa̱nña xa̱ʼa̱ sava profecía ña̱ náʼa̱ ña̱ xa̱a̱ ndóoyó tiempo nu̱ú ndíʼi (2 Timoteo 3:1-5). Ndióxi̱ ta̱xira espíritu santora ndaʼa̱ na̱ ta̱a ña̱ va̱ʼa ka̱ʼyína ña̱ profecía yóʼo, tasaá chindeétáʼanña xíʼinyó ña̱ kundatuyó ndakiʼinyó iin ña̱ va̱ʼa chí nu̱únínu (Romanos 15:4). Ña̱ xa̱a̱ ku̱a̱ʼa̱n xínu ña̱ profecía yóʼo náʼa̱ña, ña̱ si̱lóʼova kúma̱ní ta ndiʼi-xa̱ʼa̱ ndiʼi tu̱ndóʼo ña̱ ndóʼoyó tiempo vitin.

¿Ndáaña kuu tá ná ndiʼi tiempo nu̱ú ndíʼi? Reino Ndióxi̱ kaʼndachíñuña nu̱ú ndiʼi na̱ yiví (Mateo 6:9, 10). Koto ndáaña káʼa̱n Biblia xa̱ʼa̱ ña̱yóʼo:

● Va̱ása kooka so̱ko. “Nu̱ú ñuʼú ku̱a̱ʼání ña̱ʼa koo kuxuna, chí yuku̱ ku̱a̱ʼáka ña̱ koo” (Salmo 72:16).

● Va̱ása kooka kue̱ʼe̱. “Ni iin na̱ kundoo kán kǒo ka̱ʼa̱nkana: ‘Kue̱ʼe̱ kúúmiíi̱’” (Isaías 33:24).

● Nduxa̱á ña̱ íyo nu̱ú ñuʼú yóʼo. “Ñuʼú yi̱chí kusi̱íní-iniña, ta yoso̱ yi̱chí kusi̱íní-iniña, ta kuaʼnuña nda̱a̱ táki̱ʼva xáʼnu azafrán” (Isaías 35:1).

Ña̱yóʼo kúú sava kuití profecía ña̱ xa̱a̱ ku̱nu̱mí xi̱nu, ta chíka̱a̱níña ndee̱ xíʼinyó, soo íyo ku̱a̱ʼákavaña. Tá kúni̱ún kunda̱a̱ka-iniún xa̱ʼa̱ ña̱yóʼo, ka̱ʼa̱n xíʼin iin na̱ testigo Jehová ná natúʼunna xíʼún nda̱chun kúú ña̱ va̱ása xíka-inina ña̱ ndátuyó ndakiʼinyó iin ña̱ va̱ʼa chí nu̱únínu.