¿Á ndóʼún nda̱a̱ táki̱ʼva ndóʼo na̱yóʼo? Sana xi̱kuni̱vaún kaʼviún Biblia soo íyo iin ña̱ sa̱si nu̱ún. Ku̱a̱ʼání na̱ yiví túvina ña̱ yo̱ʼvi̱ní kaʼvina libro yóʼo. Soo ¿á ndakanikaxi̱níún saá tá ná kunda̱a̱-iniún ña̱ kivi sakúsi̱íña-iniún ta saátu ña̱ kunda̱a̱-iniún ndáaña keʼún tá ná kaʼviúnña? Soo ¿tá ná kunda̱a̱-iniún ña̱ íyova ki̱ʼva ña̱ kutóún kaʼviúnña? ¿Á kúni̱ún kunda̱a̱-iniún ndáaña va̱ʼa ndakiʼún tá ná kaʼviún Biblia?

Koto ndáaña káʼa̱n savana tá ki̱xáʼana ka̱ʼvina Biblia, ta ni̱xa̱a̱na ku̱nda̱a̱-inina ña̱ ku̱a̱ʼání ña̱ va̱ʼa ndákiʼinna tá káʼvinaña.

Ta̱ Ezekiel, ta̱ kúúmií ki̱ʼva 20 ku̱i̱ya̱, káchira: “Tá ya̱chi̱ ni̱xi̱yoi̱ nda̱a̱ táki̱ʼva íyo na̱ yiví na̱ ku̱a̱ʼa̱n iin yichi̱, soo va̱ása kúnda̱a̱-inina ndáa míí xa̱a̱na. Soo naní tá ki̱xáʼíi̱ káʼvii̱ Biblia kúnda̱a̱-inii̱ ndáaña keʼíi̱ vitin. Kúúmiíña consejo ña̱ chíndeétáʼan xíʼi̱n ndiʼi ki̱vi̱”.

Ñá Frieda ñá kúúmií ki̱ʼva 20 ku̱i̱ya̱ káchiñá: “Yi̱ʼi̱ xi̱sa̱i̱ xa̱ʼa̱ nda̱a̱ ndáaka ña̱ʼa, soo xa̱ʼa̱ ña̱ ki̱xáʼíi̱ káʼvii̱ Biblia va̱ása kamaka sái̱. Ta vitin íyo ku̱a̱ʼáka na̱ migoi̱”.

Iin ñá ñaʼá ñá kúúmií yáʼaka 50 ku̱i̱ya̱ káchiñá: “Chíndeétáʼanña xíʼi̱n ña̱ viíka koi̱ ta saátu ña̱ sandákoi̱ ña̱ va̱ása kéʼíi̱”.

Tá ná kaʼviún Biblia kivi si̱íníka koún, nda̱a̱ táki̱ʼva ndo̱ʼo na̱ ni̱ka̱ʼa̱nyó xa̱ʼa̱ yóʼo ta saátu ku̱a̱ʼáka na̱ yiví (Isaías 48:​17, 18). Chindeétáʼanña xíʼún ña̱ vií koo ña̱ ndaka̱xiún keʼún, ndani̱ʼún na̱ koo migoún, va̱ása kundi̱ʼi̱ní-iniún ta saátu sakúaʼún ña̱ nda̱a̱ xa̱ʼa̱ ta̱ i̱xava̱ʼa ndiʼi ña̱ʼa, chi ña̱yóʼo kúú ña̱ ndáyáʼvika. Consejo ña̱ va̱xi nu̱ú Biblia, Ndióxi̱ kúú ta̱ káʼa̱nña xíʼinyó tá kéʼéyóña viíní kana ña̱ kéʼéyó. Saáchi ta̱yóʼo nina consejo va̱ʼa taxira ndaʼa̱yó.

Ña̱ íxayo̱ʼvi̱ xíʼinyó kúú ña̱ kixáʼayó kaʼviyó Biblia. Nu̱ú artículo ña̱ va̱xi ndani̱ʼún ña̱ chindeétáʼan xíʼún ña̱ kixáʼún kaʼviún Biblia ta saátu ña̱ kusi̱í-iniún kaʼviúnña.

¿Ndáaña kivi keʼún ña̱ va̱ʼa kusi̱íka-iniún kaʼviún Biblia ta saá va̱ʼaní chindeétáʼanña xíʼún? Koto u̱ʼu̱n ña̱ʼa ña̱ xa̱a̱ chíndeétáʼan xíʼin na̱ káʼviña.

Nu̱ú koún kaʼviúnña. Ndukú nu̱ú táxi̱n íyo. Tá táxi̱n íyo, ta túvi nu̱ú íyoún káʼviún, ta saátu va̱ása niʼníní á vi̱xinní va̱ʼaka kunda̱a̱-iniún xíʼin ña̱ káʼviún.

Vií ndakanixi̱níún xa̱ʼa̱ ña̱ káʼviún. Biblia iin ña̱ ta̱xi yiváyó ta̱ íyo chí ndiví ndaʼa̱yó kúúña. Ña̱ va̱ʼa vií va̱ʼa kunda̱a̱-iniún xíʼinña, kaʼviña nda̱a̱ táki̱ʼva kéʼé iin ta̱ loʼo ta̱ kúni̱ kunda̱a̱-ini xíʼin ña̱ sánáʼa̱ yivára miíra. Kǒo ndakanixi̱níún ña̱ va̱ása va̱ʼa xa̱ʼa̱ ña̱ káʼviún, ta taxi ná sanáʼa̱ Ndióxi̱ yóʼó (Salmo 25:4).

Tá kúma̱níka kixáʼún ka̱ʼa̱n xíʼin Ndióxi̱. Mií Ndióxi̱ kúú ta̱ káʼa̱n ña̱ va̱xi nu̱ú Biblia, xa̱ʼa̱ ña̱kán xíniñúʼuyó ña̱ ná chindeétáʼanra xíʼinyó ña̱ kunda̱a̱-iniyó xíʼinña. Káʼa̱nra ña̱ taxira espíritu santo ndaʼa̱ na̱ ndúkúña nu̱úra (Lucas 11:13). Espíritu santo yóʼo kivi chindeétáʼanña xíʼinyó ña̱ kunda̱a̱-iniyó ndáa ki̱ʼva ndákanixi̱ní ta̱ i̱xava̱ʼa miíyó. Ta tá ná ya̱ʼa tiempo, “nda̱a̱ ña̱ ndíchi ña̱ kúúmií Ndióxi̱” kunda̱a̱-iniún xíʼin (1 Corintios 2:​10).

Kaʼvi ña̱ va̱ʼa kunda̱a̱-iniún. Va̱ása kaʼvi kuitíúnña. Ndakanixi̱ní xa̱ʼa̱ ña̱ káʼviún. Ta ndakanixi̱ní xa̱ʼa̱ ña̱yóʼo: “¿Ndáaña va̱ʼa ke̱ʼé na̱ káʼvii̱ xa̱ʼa̱ yóʼo? ¿Ndáa ki̱ʼva keʼíi̱ ña̱ sákuaʼi̱ yóʼo?”.

Ndaka̱xin ña̱ kúni̱ún keʼún. Ña̱ va̱ʼa kusi̱í-iniún xíʼin ña̱ káʼviún nu̱ú Biblia, chika̱a̱ ndeé ña̱ sakúaʼún ña̱ʼa ña̱ chindeétáʼan xíʼún. Chika̱a̱ ndee̱ ña̱ kuxini̱kaún Ndióxi̱, ña̱ viíka koo iniún ta saátu ña̱ viíka koún xíʼin na̱ ti̱ndaʼa̱ xíʼún á inkaka ña̱ʼa. Ta nda̱kaxin iin táʼví ña̱ Biblia ña̱ kivi chindeétáʼan xíʼún ña̱ keʼún ña̱yóʼo.a

U̱ʼu̱n saá ña̱yóʼo chindeétáʼanña xíʼún ña̱ kixáʼún, soo ¿ndáaña chindeétáʼan xíʼún ña̱ kutóokaún kaʼviún Biblia? Nu̱ú inkaka artículo ka̱ʼa̱nkaña xa̱ʼa̱ ña̱ kivi keʼún.

Ña̱ ndáka̱xiún keʼún kúú ña̱ chindeétáʼan xíʼún ña̱ kutóún kaʼviún Biblia. Ña̱ kivi keʼún tá xa̱a̱ káʼviún Biblia.

Nda̱kaxin iin Biblia ña̱ kúúmií tu̱ʼun ña̱ káʼa̱nna tiempo vitin. Tá ná ndani̱ʼún tu̱ʼun ña̱ íxayo̱ʼvi̱ xíʼún kúnda̱a̱-iniún xíʼin á ña̱ va̱ása xíniñúʼukana, ixayo̱ʼvi̱ña xíʼún ña̱ kunda̱a̱-iniún xíʼin ña̱ káʼviún. Xa̱ʼa̱ ña̱kán ndukú iin Biblia ña̱ kúúmií tu̱ʼun ña̱ kúnda̱a̱-iniún xíʼin ta xáa̱ña nda̱a̱ níma̱ún. Ta saátu ná kǒo nasa̱ma ña̱ káʼa̱nña xa̱ʼa̱, ta káxi ná kooña.a

Kuniñúʼu ña̱ʼa ña̱ íyo tiempo vitin. Tiempo vitin Biblia ku̱a̱ʼá ki̱ʼva kivi kuumiíyóña, nda̱a̱ kivi kuumiíyóña nu̱ú celular á tableta. Kivi kaʼviúnña nu̱ú internet á sánuúnña nu̱ú iin computadora á inkaka ña̱ʼa. Ta savaña nda̱a̱ kivi kotoún ndáaña káʼa̱n inka Biblia xa̱ʼa̱ versículo yóʼo á chitáʼún iin versículo xíʼin inka versículo. Tá va̱ása kúni̱ún kaʼviúnña, kivitu kuniso̱ʼúnña saáchi xa̱a̱ kúúmiíña audio. Ku̱a̱ʼánína kútóona kuniso̱ʼonaña tá ku̱a̱ʼa̱nna kachíñuna, tá ku̱a̱ʼa̱nna xíʼin carro, tá ndakatana ti̱ko̱to̱ á tá kéʼéna inkaka chiñu. ¿Ndáaña chindeétáʼanka xíʼún túviún? ¿Á kúni̱ún keʼúnña?

Nandukúka xa̱ʼa̱ ña̱ káʼviún. Tutu ña̱ káʼa̱n xa̱ʼa̱ ña̱ kúni̱ kachi Biblia chindeétáʼanña xíʼún ña̱ kunda̱a̱ka-iniún xa̱ʼa̱ ña̱ káʼviún. Tá kúú, íyo mapa nu̱ú va̱xi lugar ña̱ káʼa̱n Biblia xa̱ʼa̱, ta chindeétáʼanña xíʼún ña̱ kunda̱a̱-iniún xa̱ʼa̱ ña̱ káʼa̱nña. Savatu ña̱ kána nu̱ú artículo yóʼo va̱xiña ti̱xin táʼví ña̱ naní “Ña̱ sánáʼa̱ Biblia” nu̱ú sitio ña̱ Internet jw.org, ta ña̱yóʼo chindeétáʼanña xíʼún ña̱ kunda̱a̱-iniún xíʼin ku̱a̱ʼání ña̱ va̱xi nu̱ú Biblia.

Xa̱a̱ síín síín ki̱ʼva kaʼviúnña. Sana ndákanixi̱níún ña̱ kaʼviún Biblia nu̱ú kíxáʼaña iinsaá nda̱a̱ nu̱ú ndíʼiña íxayo̱ʼvi̱ña xíʼún, soo tá ná ndaka̱xiún iin ña̱ kútóún, ña̱yóʼo va̱ʼaní chindeétáʼanña xíʼún. Iin ña̱ kivi keʼún kúú ña̱ kaʼviún xa̱ʼa̱ iin na̱ káʼa̱n Biblia xa̱ʼa̱ nu̱ú recuadro ña̱ naní “Sakúaʼa xa̱ʼa̱ ña̱ káʼa̱n Biblia kuxini̱ na̱ káʼa̱nña xa̱ʼa̱”, ña̱yóʼo kivi chindeétáʼanña xíʼún ña̱ kunda̱a̱-iniún xa̱ʼa̱ iin na̱ yiví na̱ káʼa̱n Biblia xa̱ʼa̱. Kivi kaʼviún iin tá iin ña̱ káʼa̱nña xa̱ʼa̱ á kaʼviúnña nda̱a̱ táki̱ʼva ku̱u ña̱ káʼa̱nña xa̱ʼa̱. ¿Á kivi keʼún iin ña̱yóʼo?

Síínní íyo Biblia nu̱ú inka libro. Nu̱ú ña̱yóʼo va̱xi consejo ña̱ táxi ta̱ i̱xava̱ʼa miíyó (2 Timoteo 3:16). Ña̱ káʼa̱nña kivi chindeétáʼanníña xíʼún. Saáchi mií Biblia káchiña ña̱yóʼo: “Tu̱ʼun Ndióxi̱ ña̱ táku kúúña ta kúúmiíníña ndee̱” (Hebreos 4:12). Táxiña consejo ña̱ chindeétáʼan xíʼún ndiʼi ki̱vi̱, ta saátu chindeétáʼanña xíʼún ña̱ kuxini̱ún Ndióxi̱ ta saátu ña̱ keʼéra chí nu̱únínu (1 Timoteo 4:8; Santiago 4:8).

Táxiña consejo ña̱ chíndeétáʼan xíʼún ndiʼi ki̱vi̱. Biblia táxiña consejo ndaʼa̱yó xa̱ʼa̱ ña̱ kivi keʼéyó, ta íyo ku̱a̱ʼáníka ña̱ káʼa̱nña xa̱ʼa̱ tá kúú:

• Ña̱ vií kutáʼanyó xíʼin inkana (Efesios 4:31, 32; 5:22, 25, 28, 33).

• Ña̱ va̱ása kiʼin kue̱ʼe̱ miíyó ta saátu ña̱ kusi̱í-iniyó (Salmo 37:8; Proverbios 17:22).

• Ña̱ kǒo keʼéyó ña̱ va̱ása va̱ʼa (1 Corintios 6:​9, 10).

• Ña̱ káʼa̱n xa̱ʼa̱ xu̱ʼún (Proverbios 10:4; 28:19; Efesios 4:28).a

Iin na̱ ti̱ndaʼa̱ na̱ íyo chí Asia ki̱ʼinna kuenta ña̱ consejo ña̱ táxi Biblia va̱ʼaní chíndeétáʼanña xíʼinna. Nda̱a̱ táki̱ʼva ndóʼo na̱ sa̱kán tíndaʼa̱, na̱yóʼo i̱xayo̱ʼvi̱ña xíʼinna ña̱ vií kutáʼanna ta saátu ña̱ nátúʼun xíʼin táʼanna. Soo ki̱xáʼana kéʼéna ña̱ sákuaʼana nu̱ú Biblia. ¿Ndáa ki̱ʼva chi̱ndeétáʼan ña̱yóʼo xíʼinna? Ta̱ Vicent káchira: “Ña̱ ka̱ʼvii̱ nu̱ú Biblia chi̱ndeétáʼanña xíʼi̱n ña̱ na̱ʼi̱ ña̱ kúʼvi̱-inii̱ xínii̱ ñá síʼíi̱ ni yáʼandi̱ nu̱ú tu̱ndóʼo. Xa̱ʼa̱ ña̱ kéʼéndi̱ ña̱ káʼa̱n Biblia si̱í íyondi̱”. Ñá síʼíra ñá Annalou káchiñá: “Ña̱ kaʼvindi̱ xa̱ʼa̱ na̱ káʼa̱n Biblia xa̱ʼa̱, chi̱ndeétáʼanníña xíʼinndi̱. Vitin si̱í íyoi̱ xíʼin yiíi̱, ta kusi̱í-inii̱ chi inkáchi íyo chiñu ña̱ kéʼéndi̱”.

Ña̱ kivi chindeétáʼan xíʼinyó ña̱ kuxini̱kayó Ndióxi̱. Ta̱ Vicent káchikara: “Xa̱ʼa̱ ña̱ káʼvii̱ Biblia chíndeétáʼanña xíʼi̱n ña̱ yatinníka íyoi̱ nu̱ú Jehová”. Íyo iin ña̱ ndáyáʼviní sákuaʼayó xíʼin ña̱ ni̱ka̱ʼa̱nra yóʼo: Ña̱ Biblia kivi chindeétáʼanña xíʼún ña̱ kuxini̱kaún Ndióxi̱. Tá ná kaʼviúnña ndakiʼún consejo ña̱ táxiña ta saátu xa̱ún koún migo Ndióxi̱. Saátu Biblia káʼa̱nña xa̱ʼa̱ ña̱ va̱ʼaní kooyó chí nu̱únínu, nu̱ú kusi̱í-iniyó kutakuyó ndiʼi tiempo (1 Timoteo 6:​19). Iinlá nu̱ú Biblia kúú nu̱ú kivi kunda̱a̱-iniún xa̱ʼa̱ ña̱yóʼo.

Tá ná kixáʼún kaʼviún Biblia ta saátu ná kaʼviún ña̱yóʼo ndiʼi ki̱vi̱, ña̱yóʼo chindeétáʼanña xíʼún ña̱ viíka koún ta saátu ña̱ kuxini̱kaún Ndióxi̱. Sana ku̱a̱ʼání ña̱ ndaka̱tu̱ʼún miíún tá ná kixáʼún kaʼviúnña. Tá ná ndoʼún saá ndakaʼán xa̱ʼa̱ iin ta̱ chíñu ta̱ ni̱xi̱yo ñuu Etiopía xa̱a̱ yáʼaka ki̱ʼva u̱vi̱ mil ku̱i̱ya̱ chí sa̱tá. Ku̱a̱ʼání ña̱ʼa xi̱kuni̱ ta̱yóʼo kunda̱a̱-inira xa̱ʼa̱ tu̱ʼun Ndióxi̱. Ta̱ Felipe ta̱ xi̱kuu discípulo ta̱ Jesús ni̱nda̱ka̱tu̱ʼunra ta̱ ta̱a ñuu Etiopía á kúnda̱a̱-inira xíʼin ña̱ káʼvira, ta ta̱yóʼo nda̱kuiinra: “¿Ndáa ki̱ʼva kunda̱a̱-inii̱ xíʼinña tá kǒo ni iinna sánáʼa̱ yi̱ʼi̱?”.b Soo xa̱ʼa̱ ña̱ xi̱xini̱ ta̱ Felipe xa̱ʼa̱ ña̱yóʼo ta̱xira ña̱ ná chindeétáʼanra xíʼinra (Hechos 8:30, 31, 34). Saátu tá kúni̱kaún kunda̱a̱-iniún xa̱ʼa̱ ña̱ sánáʼa̱ Biblia, káʼa̱nndi̱ xíʼún ña̱ ná ki̱ʼviún nu̱ú Internet nu̱ú sitio jw.org sandákutún iin tutu, á kivitu kaʼyíún iin tutu ña̱ ku̱ʼu̱n dirección ña̱ va̱xi sa̱tá revista yóʼo ña̱ yatinka kíndo̱o nu̱ú íyoún. Kivitu ka̱ʼún xíʼin na̱ testigo Jehová na̱ íyo yatin nu̱ú íyoún á ku̱ʼún nu̱ú íyo iin Salón ña̱ Reino. Káʼa̱nndi̱ xíʼún ña̱ ná ndukún iin Biblia ta ná taxiún ña̱ chindeétáʼan ña̱yóʼo xíʼún ña̱ viíka koún.