Ku̱a̱ʼá na̱ yiví íxayo̱ʼvi̱ña xíʼinna ña̱ kuʼvi̱-inina kunina Ndióxi̱, chi ndákanixi̱nína ña̱ ndi̱va̱ʼaní-inira, kǒo ndíʼi̱-inira xa̱ʼa̱na ta kǒo kúnda̱a̱-inina xíʼin ña̱ kéʼéra. Koto ndáaña káʼa̱n sava na̱yóʼo:

• “Ni xi̱ka̱ʼa̱nnívai̱ xíʼin Ndióxi̱ ña̱ ná chindeétáʼanra xíʼi̱n, xi̱ndakanixi̱níi̱ ña̱ xíkáníva íyora nu̱úi̱, kǒo kivi kunda̱a̱-inii̱ xíʼin ña̱ kéʼéra ta saátu ña̱ va̱ása ndíʼi̱-inira xa̱ʼíi̱.” (Ta̱ Marco, Italia.)

• “Xi̱kuni̱i̱ kachíñui̱ nu̱ú Ndióxi̱, soo xi̱ndakanixi̱níi̱ ña̱ va̱ása kivi kuyatii̱n nu̱úra. Xi̱ndakanixi̱níi̱ ña̱ kúúra iin Ndióxi̱ ndi̱va̱ʼa-ini chi kúni̱ kuitíra taxira castigo ndaʼa̱yó ta va̱ása va̱ʼa-inira.” (Ñá Rosa, Guatemala.)

• “Tá ni̱xi̱yo loʼi̱ xi̱ndakanixi̱níi̱ ña̱ nina ña̱ va̱ása va̱ʼa kéʼéyó xíto Ndióxi̱ ña̱ va̱ʼa taxira castigo ndaʼa̱yó. Tándi̱ʼi ki̱xáʼa ndákanixi̱níi̱ ña̱ va̱ása ndíʼi̱-inira xa̱ʼa̱yó, nda̱a̱ táki̱ʼva kéʼé iin ta̱ chíñu ta̱ va̱ása ndíʼi̱-ini xa̱ʼa̱ na̱ xáʼndachíñura nu̱ú.” (Ñá Raimunda, Canadá.)

Ta miíún, ¿ndáaña ndákanixi̱níún? ¿Á kivi xa̱a̱yó kuʼvi̱-iniyó kuniyó Ndióxi̱? Xa̱a̱ ku̱a̱ʼání tiempo na̱ yiví kúni̱na kunda̱a̱-inina xa̱ʼa̱ ña̱yóʼo. Nda̱a̱ ni̱xi̱yo iin tiempo ña̱ va̱ása níka̱ʼa̱n na̱ yiví xíʼin Ndióxi̱. ¿Nda̱chun va̱ása níka̱ʼa̱nna xíʼinra? Saáchi xi̱yiʼvína xi̱xininara. Ta̱ historiador Will Durant ni̱ka̱ʼa̱nra ña̱yóʼo: “¿Á kivi ka̱ʼa̱n iin na̱ yiví ku̱a̱chi xíʼin Ndióxi̱ ta̱ xíkání íyo nu̱úna ta ndi̱va̱ʼaní-inira?”.

¿Nda̱chun ndákanixi̱ní na̱ yiví ña̱yóʼo xa̱ʼa̱ Ndióxi̱? ¿Ndáaña kúú ña̱ ndixa sánáʼa̱ Biblia xa̱ʼa̱ ña̱yóʼo? ¿Á kivi xa̱a̱yó kuʼvi̱-iniyó kuniyóra tá ná kunda̱a̱-iniyó ña̱ nda̱a̱ xa̱ʼa̱ra?

ÑA̱ KÁʼA̱N NA̱ YIVÍ:

“Va̱ása kívi xa̱a̱ndi̱ kunda̱a̱-inindi̱ á ndixa íyo ki̱vi̱ Ndióxi̱. Ni ná kunda̱a̱-inindi̱ va̱ása xíni̱ndi̱ ndáa ki̱ʼva naníra.” (Ta̱ profesor David Cunningham, ña̱ ka̱na nu̱ú libro Theological Studies.)

ÑA̱ KÁʼA̱N BIBLIA

Mií Ndióxi̱ ni̱ka̱ʼa̱n: “Yi̱ʼi̱ kúú Jehová. Ña̱yóʼo kúú ki̱víi̱” (Isaías 42:8). Ki̱vi̱ Jehová tu̱ʼun hebreo kúni̱ kachiña: “Ta̱yóʼo kéʼéra ña̱ʼa ta xa̱a̱ña kooña” (Génesis 2:​4 nota).

Jehová kúni̱ra ña̱ ná kuniñúʼuyó ki̱vi̱ra. Ña̱kán Biblia káchiña: “Ka̱ʼa̱nndó ki̱vi̱ra. Ka̱ʼa̱nndó xíʼin na̱ inka ñuu xa̱ʼa̱ ña̱ kéʼéra. Ka̱ʼa̱nndó xíʼinna xa̱ʼa̱ ña̱ káʼnuní ki̱vi̱ra” (Isaías 12:4).

Ta̱ Jesús xi̱niñúʼura ki̱vi̱ Ndióxi̱ ta sa̱náʼa̱ra na̱ discípulora ña̱ ná kuniñúʼunaña. Nda̱a̱ iin yichi̱ ni̱ka̱ʼa̱nra xíʼin yivára ta ka̱chira ña̱yóʼo: “Na̱túʼi̱n xa̱ʼa̱ ki̱vi̱ún xíʼinna”. ¿Nda̱chun ke̱ʼéraña? Miíra ka̱chikara: “Ña̱ va̱ʼa ná kuʼvi̱-inina kunina inka na̱ yiví nda̱a̱ táki̱ʼva ni̱kuʼvi̱-iniún xi̱niún yi̱ʼi̱ ta va̱ʼa inkáchi kutáʼi̱n xíʼinna” (Juan 17:26).

NDA̱CHUN XÍNIÑÚʼU KUNDA̱A̱-INIÚN XA̱ʼA̱ÑA

Ta̱ teólogo Walter Lowrie ka̱ʼyíra: “Na̱ yiví na̱ va̱ása xíni̱ ki̱vi̱ Ndióxi̱ su̱ví ña̱ ndixa kúú ña̱ xíni̱nara [...] ta va̱ása kívi kuʼvi̱-inina kuninara xa̱ʼa̱ ña̱ va̱ása xíni̱nara”.

Iin ta̱a ta̱ naní Victor ndiʼi semana xi̱xa̱ʼa̱nra veʼe-ñu̱ʼu, soo va̱ása níxi̱xini̱ra nda̱a̱ ni iin ña̱ʼa xa̱ʼa̱ Ndióxi̱. Ta̱yóʼo káchira: “Tá sa̱kuaʼi̱ ki̱vi̱ Ndióxi̱ kúú Jehová, saá kúú ña̱ ni̱xa̱i̱ kunda̱a̱-inii̱ xa̱ʼa̱ra, saá kúú ña̱ ni̱xa̱i̱ kunda̱a̱-inii̱ ndáa ki̱ʼva íyo ini ta̱ xi̱ka̱ʼa̱nnína xa̱ʼa̱. Ta saá ni̱xa̱i̱ kunda̱a̱-ini ña̱ ndixa íyo Ndióxi̱. Ta vitin kúúra migoi̱”.

Ta saátu Jehová kúyatinra nu̱ú “na̱ ndákanixi̱ní xa̱ʼa̱ ki̱vi̱ra”, ta káʼa̱nra ña̱yóʼo: “Kundáʼvi-inii̱ kunii̱ ndóʼó, nda̱a̱ táki̱ʼva íxaa iin ta̱a ña̱ kúndáʼvi-inira xínira se̱ʼera ta̱ káchíñu nu̱úra” (Malaquías 3:​16, 17). Ta saátu Jehová táxira bendición ndaʼa̱ na̱ káʼa̱n ki̱vi̱ra. Biblia káchiña: “Ndiʼi na̱ xíniñúʼu ki̱vi̱ Jehová ña̱ káʼa̱nna xíʼinra ña̱ ná chindeétáʼanra xíʼinna, ka̱kuna” (Romanos 10:13).

ÑA̱ KÁʼA̱N NA̱ YIVÍ

Ña̱ Diccionario Akal crítico de Teología káchiña: “Ña̱ Trinidad kúú ña̱ sánáʼa̱na ña̱ iinlá Ndióxi̱ kúúra u̱ni̱ na̱ yiví, ta̱ kúú yivá, ta̱ kúú se̱ʼe xíʼin espíritu santo”. Ta ña̱ Diccionario abreviado del cristianismo káchiña: “Na̱ católico, na̱ ortodoxos, na̱ anglicanos xíʼin na̱ protestantes kándíxana ña̱yóʼo”.

ÑA̱ KÁʼA̱N BIBLIA

Ta̱ Jesús, ta̱ kúú se̱ʼe Ndióxi̱, nda̱a̱ ni iin yichi̱ kǒo níka̱ʼa̱nra ña̱ inkáchi íyora xíʼin yivára. Ña̱yóʼo ka̱chira: “Kusi̱í-inindó ña̱ ku̱ʼi̱n nu̱ú yivái̱, saáchi káʼnukava yivái̱ nu̱ú yi̱ʼi̱” (Juan 14:28). Ta ni̱ka̱ʼa̱nra xíʼin iin na̱ discípulora: “Ku̱ʼi̱n nu̱ú yivái̱ ta̱ kúú yivá ndóʼó, ku̱ʼi̱n nu̱ú Ndióxi̱ miíi̱ ta̱ kúú Ndióxi̱ ndóʼó” (Juan 20:17).

Espíritu santo su̱ví na̱ yiví kúúña. Na̱ cristiano na̱ nu̱ú “ndiʼina nda̱kiʼin ña̱ espíritu santo”, ta Jehová ka̱chira: “Taxii̱ espíritu santo ndaʼa̱ ndiʼi na̱ yiví” (Hechos 2:​1-4, 17). Ña̱ espíritu santo su̱ví táʼví ña̱ Trinidad kúúña chi ndee̱ Ndióxi̱ kúúña.

NDA̱CHUN XÍNIÑÚʼU KUNDA̱A̱-INIÚN XA̱ʼA̱ÑA

Nda̱a̱ táki̱ʼva káchi na̱ xíni̱ va̱ʼa xa̱ʼa̱ Biblia tá kúú ta̱ católico Karl Rahner xíʼin ta̱ Herbert Vorgrimler, ña̱ Trinidad, “va̱ása kívi kunda̱a̱-inina xa̱ʼa̱ ña̱yóʼo tá kǒo iinna náʼa̱ nu̱úna xa̱ʼa̱ña, ta ni xa̱a̱ ni̱na̱ʼa̱naña nu̱úna va̱ása kívi kunda̱a̱-inina xíʼin ndiʼi ña̱yóʼo”. Tá saá, ¿á kivi kuʼvi̱-iniyó kuniyó iin na̱ kǒo kívi kuniyó ni ña̱ kunda̱a̱-iniyó xa̱ʼa̱na? Va̱ása. Xa̱ʼa̱ ña̱kán ña̱ sánáʼa̱na xa̱ʼa̱ Trinidad sásiña nu̱úyó ña̱ kuʼvi̱-iniyó kuniyó Ndióxi̱.

Ta̱ Marco ta̱ ni̱ka̱ʼa̱nyó xa̱ʼa̱ nu̱ú ña̱ artículo ña̱ nu̱ú, xi̱xitora ña̱ Trinidad nda̱a̱ táki̱ʼva íyo iin ña̱ xi̱sasi nu̱úra ña̱ kuxini̱ra Ndióxi̱. Káchira: “Xi̱ndakanixi̱níi̱ ña̱ Ndióxi̱ va̱ása kúni̱ra ña̱ ná kunda̱a̱-inii̱ xa̱ʼa̱ra, ta ña̱yóʼo xi̱ ixayo̱ʼvi̱ña xíʼi̱n”. Soo Biblia káʼa̱nña ña̱yóʼo, “Saáchi Ndióxi̱ viíní kéʼéra chiñu” (1 Corintios 14:​33). Va̱ása chíse̱ʼéra ki̱ʼva ña̱ íyora, nu̱úka ña̱yóʼo káʼa̱nra xíʼinyó ndáa ki̱ʼva íyora. Ta̱ Jesús ni̱ka̱ʼa̱nra: “Ndi̱ʼi̱ xíni̱vandi̱ ña̱ ndásakáʼnundi̱” (Juan 4:22).

Ta̱ Marco káchikara: “Tá ku̱nda̱a̱-inii̱ Ndióxi̱ va̱ása kúúra táʼan ña̱ Trinidad ni̱xa̱i̱ viíka kítáʼi̱n xíʼinra”. Ña̱kán tá xítoyó Jehová nda̱a̱ táki̱ʼva xítoyó na̱ yiví viíka xa̱a̱yó kuʼvi̱-iniyó kuniyóra. Biblia káchiña: “Na̱ va̱ása kúʼvi̱-ini xíni inkana, ta̱ʼán xa̱a̱na kuxini̱na Ndióxi̱, chi Ndióxi̱ kúúra ña̱ kúʼvi̱-ini” (1 Juan 4:8).

ÑA̱ KÁʼA̱N NA̱ YIVÍ

“Níma̱ na̱ ni̱xi̱ʼi̱ na̱ ni̱ki̱ʼvi ku̱a̱chi ndeé ku̱a̱ʼa̱n nda̱kúña chí ndayá á xi̱tu̱n tá xa̱a̱ xíʼi̱na, ta kán xóʼvi̱na xíʼin ñuʼú ña̱ xíxi ndiʼi tiempo” (Catecismo de la Iglesia Católica.) Ta na̱ níʼi yichi̱ nu̱ú na̱ veʼe ñu̱ʼu, káʼa̱nna ña̱ na̱ ku̱a̱ʼa̱n infierno kúxíkána nu̱ú Ndióxi̱.

ÑA̱ KÁʼA̱N BIBLIA

“Na̱ kéʼé ku̱a̱chi na̱kán kúú na̱ kuvi.” (Ezequiel 18:4.) Na̱ ni̱xi̱ʼi̱ “kǒoka ña̱ xíni̱na xa̱ʼa̱” (Eclesiastés 9:5). Tá xíʼi̱ na̱ yiví ta kǒo nda̱a̱ ni iin ña̱ʼa kúnda̱a̱-inina xa̱ʼa̱, ¿á kivi xo̱ʼvi̱na xíʼin ñuʼu̱ ña̱ xíxi ndiʼi tiempo á ña̱ kuxikána ndiʼi tiempo nu̱ú Ndióxi̱?

Nu̱ú Biblia tu̱ʼun hebreo xíʼin griego ña̱ sándaya̱ʼana ña̱ tu̱ʼun infierno káʼa̱nña xa̱ʼa̱ iin lugar ña̱ ndána̱ʼa̱ kuití, ta ña̱yóʼo káʼa̱nña xa̱ʼa̱ nu̱ú ndúxu̱n ndiʼi na̱ yiví. Tá kúú tá ni̱xo̱ʼvi̱ ta̱ Job iin kue̱ʼe̱ ña̱ ndeéní ni̱ka̱ʼa̱nra xíʼin Ndióxi̱: “Tá ná chise̱ʼévíún yi̱ʼi̱ nu̱ú ndúxu̱n na̱ yiví” (Job 14:​13). Á nda̱a̱ táki̱ʼva sándaya̱ʼanaña nu̱ú La Sagrada Biblia, de Guillermo Jünemann, “ti̱xin infierno”. Ta̱ Job va̱ása níxikuni̱ra ku̱ʼu̱nra iin lugar nu̱ú xo̱ʼvi̱ra ndiʼi tiempo ta kuxíkára nu̱ú Ndióxi̱ ndiʼi tiempo; ña̱ xi̱kuni̱ra kúú ña̱ ndakiʼinndeéra nu̱ú ndúxu̱n na̱ yiví.

NDA̱CHUN XÍNIÑÚʼU KUNDA̱A̱-INIÚN XA̱ʼA̱ÑA

Ña̱ ndakanixi̱níyó ña̱ ndi̱va̱ʼaní-ini Ndióxi̱ sákuxikáña miíyó nu̱úra: “Tá ni̱xi̱yo loʼi̱ sa̱náʼa̱na yi̱ʼi̱ ña̱ ndixa íyo ña̱ infierno” káchi ñá Rocío ñá íyo chí México. Ta káchikañá: “Ndiʼi tiempo xi̱yiʼvíi̱ xi̱xinii̱ Ndióxi̱ chi xi̱ndakanixi̱níi̱ ña̱ kǒo ña̱ va̱ʼa kúúmiíra. Xi̱ndakanixi̱níi̱ ña̱ ndiʼi tiempo sáa̱ra ta̱ kue̱ʼe̱níra”.

Ña̱ káʼa̱n Biblia xa̱ʼa̱ Ndióxi̱ ta saátu ña̱ ndóʼo na̱ ni̱xi̱ʼi̱ na̱samaña ki̱ʼva ña̱ ndákanixi̱ní ñá Rocío. Ñáyóʼo ndákaʼánñá: “Va̱ʼaní ku̱nii̱ tá na̱kunda̱a̱-inii xa̱ʼa̱ ña̱yóʼo, ta nda̱a̱ táki̱ʼva íyo ña̱ sa̱kútaʼana iin ña̱ ve̱e satái̱ saá íyoña. Ki̱ʼi̱n kuenta ña̱ kúni̱ Ndióxi̱ ña̱ viíní ná kooyó ta kúʼvi̱-inira xínira miíyó ta saátu yi̱ʼi̱ kivi kuʼvi̱-inii̱ kunii̱ra. Vitin xítoi̱ra nda̱a̱ táki̱ʼva íyo iin ta̱a ta viíní ndáa se̱ʼe ta kúni̱ra ña̱ viíní ná koona” (Isaías 41:13).

Ku̱a̱ʼání na̱ yiví ndíku̱nna iin religión xa̱ʼa̱ ña̱ yíʼvina ku̱ʼu̱nna infierno, soo Ndióxi̱ va̱ása kúni̱ra ña̱ ná kachíñuyó nu̱úra xa̱ʼa̱ ña̱ yíʼviyó xíniyóra. Ta̱ Jesús ni̱ka̱ʼa̱nra ña̱yóʼo: “Kuʼvi̱-iniún kuniún Jehová Ndióxi̱ún” (Marcos 12:29, 30). Ta saátu tá kúnda̱a̱-iniyó ña̱ viíní ndátiin Ndióxi̱ ku̱a̱chi, va̱ása íxayo̱ʼvi̱ña xíʼinyó kandíxayó ña̱ viíní ndatiinra ku̱a̱chi xíʼin na̱ yiví chí nu̱únínu. Ta saá kivi ka̱ʼa̱nyó nda̱a̱ táki̱ʼva ni̱ka̱ʼa̱n ta̱ Elihú, ta̱ xi̱kuu migo ta̱ Job, ta̱yóʼo ka̱chira “Nda̱a̱ ni loʼo va̱ása xíniñúʼu ndakanixi̱níyó ña̱ kéʼé Ndióxi̱ ta̱ nda̱a̱ ña̱ va̱ása va̱ʼa, ni ña̱ ndakanixi̱níyó xa̱ʼa̱ ta̱ íyo ndiʼi ndee̱ ña̱ kéʼéra ña̱ va̱ása nda̱kú” (Job 34:10)

Iin ki̱vi̱ ta̱ Jesús ni̱ka̱ʼa̱nra chí ñuu Jerusalén xa̱ʼa̱ yivára Jehová, ta ni̱ka̱ʼa̱nra ña̱ vatáva kúú ña̱ káʼa̱n na̱ níʼi yichi̱ nu̱ú na̱ veʼe-ñu̱ʼu na̱ xi̱ndoo tiempo saá (Juan 8:​12-30). Ña̱ ni̱ka̱ʼa̱nra náʼa̱ña ndáa ki̱ʼva xíniñúʼu keʼéyó ña̱ nandukúyó xa̱ʼa̱ ña̱ kándíxa savana xa̱ʼa̱ Ndióxi̱. Ta̱kán ka̱chira: “Tá ndíku̱nndó ña̱ sánáʼi̱ ndóʼó, mií ña̱ ndixa kúúndó discípuloi̱, sakúaʼandó ña̱ nda̱a̱, ta tá ná kunda̱a̱-inindó xa̱ʼa̱ ña̱ nda̱a̱ sa̱ñándó” (Juan 8:​31, 32).

Tá ni̱ka̱ʼa̱nra tá ndíku̱nndó ña̱ sanáʼi̱ ndóʼó, ta̱ Jesús ni̱na̱ʼa̱ra nu̱úyó ndáaña chindeétáʼan xíʼinyó ña̱ kunda̱a̱-iniyó ndáaña kúú ña̱ nda̱a̱ ta ndáaña kúú ña̱ vatá ña̱ kándíxa na̱ yiví. Tá ná ka̱ʼa̱nna iin ña̱ʼa xíʼún xa̱ʼa̱ Ndióxi̱ ndakanixi̱ní xa̱ʼa̱ ña̱yóʼo: “¿Á kítáʼan ña̱yóʼo xíʼin ña̱ ni̱ka̱ʼa̱n ta̱ Jesús ta á kítáʼanña xíʼin ña̱ sa̱náʼa̱ra ta saátu xíʼin ndiʼika ña̱ va̱xi nu̱ú Biblia?. Keʼé nda̱a̱ táki̱ʼva ke̱ʼé na̱ xi̱niso̱ʼo ña̱ ni̱ka̱ʼa̱n ta̱ apóstol Pablo: vií kiʼún kuenta xíʼin ña̱ káʼa̱n Biblia ña̱ va̱ʼa kunda̱a̱-iniún á ña̱ ndixa kúú ña̱ ni̱ka̱ʼa̱nna xíʼún (Hechos 17:11).

Ña̱yóʼo kúú ña̱ ke̱ʼé ta̱ Marco xíʼin ñá Rosa ta saátu xíʼin ñá Raimunda, na̱ xa̱a̱ ni̱ka̱ʼa̱nyó xa̱ʼa̱, ka̱ʼvina Biblia xíʼin na̱ testigo Jehová. ¿Ta ndáaña ni̱xa̱a̱na ku̱nda̱a̱-inina?

Ta̱ Marco káchira: “Ta̱ testigo ta̱ xi̱sanáʼa̱ ndi̱ʼi̱ xa̱ʼa̱ Biblia xi̱xiniñúʼura ña̱yóʼo ña̱ va̱ʼa ndakuiinra pregunta ña̱ xi̱kuumiíi̱ xíʼin ñá síʼíi̱. Loʼo tá loʼo ki̱xáʼandi̱ kúʼvi̱-inindi̱ xínindi̱ Jehová ta nda̱a̱ va̱ʼaka ki̱xáʼandi̱ kítáʼanndi̱”.

Ñá Rosa káchiñá: Xi̱ndakanixi̱níi̱ ña̱ Biblia kúúña iin libro ña̱ i̱xava̱ʼa na̱ xíni̱ va̱ʼa ña̱ va̱ʼa ka̱ʼa̱nna xíʼinyó ndáana kúú Ndióxi̱. Soo tá ni̱ya̱ʼa tiempo va̱ʼa xi̱ndakuiinña ña̱ xi̱kuni̱ kunda̱a̱-ini xa̱ʼa̱. Vitin kúnda̱a̱-inii̱ ña̱ ndixa íyo Jehová, ta kivi kandíxai̱ra.

Ñá Raimunda káchiñá: “Ni̱ka̱ʼi̱n xíʼin Ndióxi̱ ña̱ ná chindeétáʼanra xíʼi̱n ña̱ va̱ʼa kuxini̱i̱ra. Tá ni̱ya̱ʼa loʼo miíi̱ xíʼin yiíi̱, ki̱xáʼandi̱ káʼvindi̱ Biblia. Nda̱a̱ vitinví ku̱nda̱a̱-inindi̱ ña̱ nda̱a̱ xa̱ʼa̱ Jehová, ku̱si̱íní-inindi̱ tá ku̱nda̱a̱-inindi̱ ndáa ki̱ʼva íyo Ndióxi̱”.

Tu̱ʼun ña̱ ni̱ka̱ʼa̱n Ndióxi̱ ña̱ va̱xi nu̱ú Biblia, káʼa̱nña ña̱ nda̱a̱ xa̱ʼa̱ra, ta saátu káʼa̱nña xa̱ʼa̱ ña̱ʼa ña̱ va̱ʼa ña̱ kúúmiíra. Ta saátu chíndeétáʼanña xíʼinyó, ña̱ “kunda̱a̱-iniyó xa̱ʼa̱ ña̱ʼa ña̱ ta̱xi Ndióxi̱ ndaʼa̱yó xa̱ʼa̱ ña̱ va̱ʼaní-inira” (1 Corintios 2:12). ¿Á kǒo kúni̱ún kunda̱a̱-iniún ña̱ sánáʼa̱ Biblia xa̱ʼa̱ Ndióxi̱, xa̱ʼa̱ ña̱ kúni̱ra keʼéra vitin ta saátu xa̱ʼa̱ ña̱ kúni̱ra keʼéra chí nu̱únínu? Kivi kunda̱a̱ka-iniún xa̱ʼa̱ ña̱ʼa ña̱ ndáyáʼvi yóʼo nu̱ú www.pr2711.com/es ti̱xin táʼví ña̱ naní “Ña̱ sánáʼa̱ Biblia > Ña̱ kúni̱na kunda̱a̱-inina xa̱ʼa̱ Biblia”. Ta saátu nu̱ú sitio yóʼo kivi ka̱ʼún ña̱ ná kuʼun iin na̱ testigo Jehová sanáʼa̱na yóʼo xa̱ʼa̱ Biblia. Tá ná keʼún ña̱yóʼo saá kúú ña̱ kunda̱a̱-iniún ña̱ kiviva xa̱ún kuʼvi̱-iniún kuniún Ndióxi̱.