¿Á kúni̱ Ndióxi̱ ná kundaayó na̱ yiváyó tá xa̱a̱ ku̱chéena?

Ña̱ káʼa̱n Biblia xa̱ʼa̱ ña̱yóʼo

Na̱ íyo yivá xíʼin siʼí xíniñúʼu kiʼinna kuenta xíʼinna ta kundaanana. Saáchi ña̱yóʼo kúú ña̱ káʼa̱n Biblia: “Ná ndakundeéna kundaana na̱ yivána xíʼin na̱ xi̱ína, chi nda̱a̱ táki̱ʼva íyo na̱ níkána nu̱ú saá íyona, chi ña̱yóʼo kúú ña̱ kíndo̱oní-ini Ndióxi̱ xíʼin” (1Timoteo 5:4). Tá viíní kíʼinna kuenta xíʼin na̱ yivána, náʼa̱na ña̱ ndíku̱nna ña̱ káʼa̱n Biblia ta íxato̱ʼónana (Efesios 6:2, 3).

Biblia kǒo káʼa̱n káxiña xíʼinyó ndáa ki̱ʼva kundaayó na̱ yiváyó tá xa̱a̱ ku̱chéena, soo káʼa̱nña ndáa ki̱ʼva ke̱ʼé ná ñaʼá ta saátu na̱ ta̱a na̱ xi̱ndoo tiempo xi̱naʼa̱ tá xi̱ndaana na̱ yivána. Ta saátu táxiña consejo ndaʼa̱ na̱ ndáa na̱ veʼena na̱ xa̱a̱ ku̱chée.

• ¿Ndáa ki̱ʼva xi̱ndaa na̱ xi̱ndoo tiempo xi̱naʼá na̱ yivána na̱ xa̱a̱ ku̱chée?

• ¿Ndáa consejo táxi Biblia?

• ¿Á káʼa̱n Biblia ña̱ inkáchi veʼe xíniñúʼu kundoona xíʼin na̱ yivána ña̱ va̱ʼa kundaanana?

¿Ndáa ki̱ʼva xi̱ndaa na̱ xi̱ndoo tiempo xi̱naʼá na̱ yivána na̱ xa̱a̱ ku̱chée?

Xa̱a̱ síín síínva ke̱ʼéna tá xi̱ndaana na̱ yivána.

• Ta̱ José xíkání ni̱xi̱yora nu̱ú yivára ta̱ Jacob tá xa̱a̱ ku̱chée ta̱yóʼo. Ta ndu̱kúra ki̱ʼva ña̱ va̱ʼa xa̱a̱ yivára yatin koora xíʼinra. Ta̱ José ndu̱kúra míí koo yivára ta saátu ta̱xira ña̱ kuxura (Génesis 45:9-11; 47:11, 12).

• Ñá Rut ni̱xa̱ʼa̱nñá ni̱xi̱yoñá ñuu si̱soñá ta ndeéní ka̱chíñuñá ña̱ va̱ʼa kundaaña ñáyóʼo (Rut 1:16; 2:2, 17, 18, 23).

• Ta̱ Jesús, tá si̱lóʼo kúma̱ní kuvira, ni̱ka̱ʼa̱nra xíʼin iinna ña̱ ná kiʼinna kuenta xíʼin siʼíra ñá María, chi sana xa̱a̱ ni̱xi̱ʼi̱va yii̱ñá tiempo saá (Juan 19:26, 27).a

¿Ndáa consejo táxi Biblia?

Yo̱ʼvi̱va kundaayó na̱ yiváyó na̱ xa̱a̱ ku̱chée, soo Biblia táxiña consejo ña̱ va̱ʼaní chindeétáʼan xíʼinyó.

• Ixato̱ʼóndó na̱ yivándó.

  Ña̱ káʼa̱n Biblia: “Ixato̱ʼó yiváún xíʼin siʼún” (Éxodo 20:12).

  Ndáa ki̱ʼva keʼéyóña: Va̱ása kasindó nu̱ú na̱ yivándó ña̱ keʼéna ku̱a̱ʼá ña̱ʼa, ta taxindó ña̱ miína ndaka̱xin ndáa ki̱ʼva kúni̱na ná kundaandóna. Kunda̱a̱-inindó xíʼin ña̱ ndóʼona, chindeétáʼanndó xíʼinna ta xíʼin ña̱ to̱ʼó keʼéndóña.

• Kunda̱a̱-inindó xíʼin ña̱ ndóʼona ta ixakáʼnu-inindó xa̱ʼa̱na.

  Ña̱ káʼa̱n Biblia: “Xa̱ʼa̱ ña̱ vií ndákanixi̱ní iin na̱ yiví va̱ása sáa̱ kamana, ta iin ña̱ va̱ʼaní kúú ña̱ ixakáʼnu-inina xa̱ʼa̱ ku̱a̱chi inkana” (Proverbios 19:11).

  Ndáa ki̱ʼva keʼéyóña: Kivi ka̱ʼa̱n na̱ yiváún xíʼún iin ña̱ʼa ña̱ saxóʼvi̱ yóʼó á sana kǒo chindayáʼvina ña̱ kéʼún xa̱ʼa̱na. Tá saá kéʼéna nda̱ka̱tu̱ʼún miíún: “¿Ndáa ki̱ʼva kunii̱ tá saá ná kundoʼi̱? ¿Á ndi̱ʼiní-inii̱?”. Tá ná ndakanixi̱níún ndáa ki̱ʼva kúnina ta íxakáʼnu-iniún xa̱ʼa̱na, va̱ása kakuka ku̱a̱chi saá.

• Nandukú xa̱ʼa̱ña.

  Ña̱ káʼa̱n Biblia: “Tá va̱ása nátúʼun táʼanna, va̱ása vií kana ña̱ kúnina keʼéna, soo viíva kána chiñu nu̱ú íyo ku̱a̱ʼá na̱ táxi consejo” (Proverbios 15:22).

  Ndáa ki̱ʼva keʼéyóña: Nandukú xa̱ʼa̱ kue̱ʼe̱ ña̱ kuumií na̱ yiváún. Ta nandukú á íyo iin ña̱ kivi chindeétáʼan xíʼin na̱ yiváún nu̱ú íyona. Ka̱ʼa̱n xíʼin inka na̱ yiví na̱ ndáa na̱ yivána na̱ xa̱a̱ ku̱chée. Tá íyo ñaniún á ku̱ʼvaún, ¿á kivi ndatakandó ta ka̱ʼa̱nndó xa̱ʼa̱ ña̱ xíniñúʼu na̱ yivándó tasaá kundaa iin tá iin ndóona?

  

• Va̱ása keʼé iinlá miíún chiñu.

  Ña̱ káʼa̱n Biblia: “Ña̱ ndíchi íyoña xíʼin na̱ yiví na̱ va̱ʼa-ini” (Proverbios 11:2).

  Ndáa ki̱ʼva keʼéyóña: Kúnda̱a̱-iniyó ña̱ loʼoní tiempo xíʼin ndee̱ kúúmiíyó. Ta kǒo kívi keʼéyó ndiʼi ña̱ kúniyó keʼéyó xa̱ʼa̱ na̱ yiváyó. Tá íxayo̱ʼvi̱níña xíʼún kundaún na̱ veʼún, ka̱ʼa̱n xíʼin iin na̱ táʼún á iin na̱ xíni̱va̱ʼa ná chindeétáʼanna xíʼún.

• Kundaa miíún.

  Ña̱ káʼa̱n Biblia: “Nda̱a̱ ni iinna va̱ása kúndasína xínina ku̱ñuna, chi sákuxunaña ta kíʼinna kuenta xíʼinña” (Efesios 5:29).

  Ndáa ki̱ʼva keʼéyóña: Ni xíniñúʼu kundaún na̱ yiváún soo saátu xíniñúʼu kundaún miíún, ta tá xa̱a̱ ti̱ndaʼún, saátu xíniñúʼu kundaún na̱ veʼún. Xíniñúʼu kuxu va̱ʼún, ndakindeún ta saátu ku̱su̱n va̱ʼún (Eclesiastés 4:6). Sava yichi̱ xíniñúʼu kita loʼún, tasaá, kǒo íxayo̱ʼvi̱ña xíʼún kundaún na̱ yiváún.

¿Á káʼa̱n Biblia ña̱ inkáchi veʼe xíniñúʼu kundoona xíʼin na̱ yivána ña̱ va̱ʼa kundaanana?

Biblia va̱ása káʼa̱n káxiña xa̱ʼa̱ ña̱yóʼo. Sava na̱ familia ndáka̱xinna ña̱ koo na̱ yivána xíʼinna ndiʼi tiempo. Soo sana ndákanixi̱nína ña̱ va̱ʼaka kundaana na̱ yivána chí nu̱ú ndáana na̱ xa̱a̱ ku̱chée. Ña̱ va̱ʼa kúú ña̱ ndataka na̱ familia ña̱ va̱ʼa ndaka̱xinna ndáaña keʼéna (Gálatas 6:4, 5).