Iin ta̱ su̱tu̱ sa̱ndákoora veʼe-ñu̱ʼu

Natúʼún xíʼinndi̱ xa̱ʼa̱ tá ni̱xi̱yo loʼún

Ka̱kui̱ chí Italia ta ku̱i̱ya̱ 1943. Ñanii̱ xíʼin yi̱ʼi̱ xa̱ʼnundi̱ iin ñuu loʼo. yivái̱ ta̱ xi̱chiʼi xi̱kuura ta saátu xi̱kuura carpintero. Miíra xíʼin siʼíi̱ sa̱kúaʼnuna ndi̱ʼi̱ ti̱xin ña̱ religión católica.

¿Nda̱chun nda̱kaxiún koún su̱tu̱?

Tá ni̱xi̱yo loʼi̱ xi̱kutóoní ku̱ʼi̱n misa ta saátu ña̱ kuniso̱ʼi̱ ña̱ xi̱ka̱ʼa̱n ta̱ su̱tu̱. Xi̱kutóoníi̱ ña̱ xi̱ka̱ʼa̱nra xíʼin ña̱ xi̱keʼéra, xi̱ndakanda̱-inii̱ xíʼin ña̱yóʼo. Xa̱ʼa̱ ña̱kán xi̱kuni̱i̱ koi̱ su̱tu̱. Tá xi̱kuumiíi̱ 13 ku̱i̱ya̱, siʼíi̱ ni̱xa̱ʼa̱n ndakañá yi̱ʼi̱ iin internado nu̱ú xi̱sakuaʼa na̱ va̱lí ña̱ va̱ʼa xa̱a̱na koona su̱tu̱.

¿Á ka̱ʼviún Biblia tá sa̱náʼa̱na yóʼó?

Loʼo kuitíva, tá xi̱kuumiíi̱ 15 ku̱i̱ya̱ iin ta̱ xi̱sanáʼa̱na yi̱ʼi̱ ta̱xira iin libro ndaʼíi̱ nu̱ú va̱xi Evangelio, ña̱ xi̱ka̱ʼa̱n xa̱ʼa̱ ña̱ ke̱ʼé ta̱ Jesús, ta ku̱a̱ʼá yichi̱ ka̱ʼvii̱ña. Tá xi̱kuumiíi̱ 18 ku̱i̱ya̱ ni̱xa̱ʼi̱n chí Roma ña̱ va̱ʼa ku̱ʼi̱n iin universidad pontificia, ña̱ xi̱kiʼin ta̱ papa kuenta xíʼin. Ta kán ka̱ʼvii̱ latín, griego, historia, filosofía, psicología xíʼin teología. Ni xi̱kaʼvindi̱ versículo ña̱ va̱xi nu̱ú Biblia ta xi̱xiniso̱ʼondi̱ misa ki̱vi̱ domingo, soo mií ña̱ nda̱a̱ va̱ása nísakuaʼa va̱ʼandi̱ xa̱ʼa̱ ña̱yóʼo.

Tá xi̱kiʼún kuenta xíʼin ña̱ seminario, ¿á sa̱náʼún inkana?

Chiñu ña̱ xi̱kuumiíi̱ kúú ña̱ xi̱kiʼin kuenta xíʼinña, soo sa̱náʼi̱ xa̱ʼa̱ ña̱ decretos del Concilio Vaticano II.

¿Nda̱chun ki̱xáʼa ni̱xi̱ka-iniún xa̱ʼa̱ ña̱ sánáʼa̱ na̱ veʼe-ñu̱ʼu?

Xa̱ʼa̱ u̱ni̱ ña̱ʼa xi̱kuuña, xi̱xitoi̱ ña̱ kíʼvi na̱ veʼe-ñu̱ʼu xíʼin ña̱ política, ta va̱ása níxika̱ʼa̱nna xíʼin na̱ su̱tu̱ na̱ xi̱keʼé ña̱ va̱ása va̱ʼa, xíʼin na̱ xi̱ndiku̱n ña̱ sánáʼa̱ na̱yóʼo, ta saátu sava ña̱ sánáʼa̱ na̱ veʼe-ñu̱ʼu católica i̱xayo̱ʼvi̱ña xíʼi̱n kandíxai̱ña. Ta kúú, ¿nda̱chun iin Ndióxi̱ ta̱ kúʼvi̱ní-ini xíni miíyó sáxo̱ʼvi̱ra na̱ yiví tá xíʼi̱na? Ta, ¿á kúni̱ra ña̱ ná kuniñúʼuyó iin rosario ña̱ ka̱ʼa̱nyó rezo ku̱a̱ʼání yichi̱?a

¿Ndáaña nda̱kaxiún keʼún?

Nda̱a̱ xa̱kui̱ ta ni̱ka̱ʼa̱n ndáʼvi xíʼin Ndióxi̱ ña̱ ná chindeétáʼanra xíʼi̱n, sa̱tái̱ iin Biblia de Jerusalén, ña̱ sa̱kán ka̱na tu̱ʼun italiano, ta ki̱xáʼíi̱ káʼviña. Iin Domingo xi̱ta̱a̱n tá ndi̱ʼi ta̱vái̱ ti̱ko̱to̱ ña̱ xíniñúʼi̱ tá táxii̱ misa, ki̱xaa̱ u̱vi̱ na̱ ta̱a seminario. Ta ni̱ka̱ʼa̱nna xíʼi̱n ña̱ kúúna testigo Jehová ta ki̱xáʼandi̱ nátúʼunndi̱. Yáʼaka iin hora ni̱ka̱ʼa̱nndi̱ xa̱ʼa̱ Biblia ta saátu ña̱ káʼa̱nña xa̱ʼa̱ religión ña̱ nda̱a̱.

¿Ndáaña nda̱kanixi̱níún xa̱ʼa̱ na̱ testigo Jehová?

Nda̱kanda̱ní-inii̱ xíʼin ña̱ kándíxana ta va̱ʼaní xi̱nandukúna texto ña̱ va̱xi nu̱ú Biblia católica. Tá ni̱ya̱ʼa loʼo, iin ta̱ testigo ta̱ nani Mario ni̱xa̱ʼa̱nra xi̱tora yi̱ʼi̱. Kúee ni̱xi̱yo inira ta ndiʼi sábado xi̱xa̱ʼa̱nra xi̱xitora yi̱ʼi̱ ni kúun sa̱vi̱ ta xi̱kani ndaʼa̱ra yéʼé ña̱ seminario ka̱a i̱i̱n xi̱ta̱a̱n.

¿Ndáaña xi̱ndakanixi̱ní inka na̱ su̱tu̱ xa̱ʼa̱ ña̱ xi̱xa̱ʼa̱nna xi̱xitona yóʼó?

Ni̱ka̱ʼi̱n xíʼinna ña̱ inkáchi kaʼvindi̱, soo ni iinna va̱ása níxiin kaʼvi Biblia. Soo yi̱ʼi̱ xi̱kutóoníi̱ña, ki̱xáʼíi̱ sákuaʼi̱ ña̱ va̱ʼaní. Tá kúú ku̱nda̱a̱-inii̱ nda̱chun táxi Ndióxi̱ ña̱ íyo ña̱ va̱ása va̱ʼa ta xóʼvi̱yó, ña̱yóʼo kúú iin ña̱ i̱xayo̱ʼvi̱ xíʼi̱n kunda̱a̱-inii̱.

Na̱ níʼi yichi̱ nu̱ú na̱ veʼe-ñu̱ʼu, ¿á ni̱ka̱ʼa̱nna xíʼún ña̱ sandákoún kaʼviún Biblia?

Tá ku̱i̱ya̱ 1975 ku̱a̱ʼá yichi̱ ni̱xa̱ʼi̱n ñuu Roma ña̱ va̱ʼa ka̱ʼi̱n xíʼinna xa̱ʼa̱ ña̱ sákuaʼi̱. Ta na̱ níʼi yichi̱ nu̱úi̱ ni̱ka̱ʼa̱nna xíʼi̱n ña̱ va̱ása va̱ʼa íyo ña̱ sákuaʼi̱, soo ni iinna va̱ása níxiniñúʼu Biblia ña̱ ka̱ʼa̱nna xíʼi̱n xa̱ʼa̱ ña̱yóʼo. Tá 9 tí enero ña̱ ku̱i̱ya̱ 1976, ka̱ʼyíi̱ iin carta ña̱ va̱ása kutáʼankai̱ xíʼin na̱ veʼe-ñu̱ʼu ta chi̱ndaʼíi̱ña chí Roma, tá ni̱ya̱ʼa u̱vi̱ ki̱vi̱ sa̱ndákoi̱ ña̱ seminario tasaá ni̱xa̱ʼi̱n yichi̱ nu̱ú ña̱ reunión xíʼin na̱ testigo Jehová. Ña̱yóʼo xi̱kuu iin asamblea nu̱ú nda̱taka ku̱a̱ʼání na̱ congregación. Síínní ni̱xi̱yoña saáchi iin tá iinna kúúmiína Biblia ta xi̱nandukúna texto nu̱úña ña̱ xi̱ka̱ʼa̱n ta̱ xi̱taxi discurso.

¿Ndáaña nda̱kanixi̱ní na̱ veʼún xa̱ʼa̱ ña̱ ke̱ʼún?

Ku̱a̱ʼánína ni̱sa̱a̱na. Soo ku̱nda̱a̱-inii̱ ña̱ iin ñanii̱ ki̱xáʼara sákuaʼara xa̱ʼa̱ Biblia xíʼin na̱ testigo chí Lombardía, iin ñuu ña̱ kíndo̱o chí norte ña̱ Italia. Ni̱xa̱ʼi̱n xi̱toi̱ra ta na̱ testigo chi̱ndeétáʼanna xíʼi̱n ña̱ nda̱ni̱ʼíi̱ iin chiñu ta saátu nu̱ú koi̱. Ta mií ku̱i̱ya̱ kán ndu̱i̱ testigo Jehová.

¿Á ndándikó-iniún xa̱ʼa̱ ña̱ ke̱ʼún?

¿Á ndándikó-inii̱? Va̱ása, nda̱a̱ vitin íyo yatin xíʼin Ndióxi̱, saáchi sa̱kuaʼi̱ ña̱ va̱xi nu̱ú Biblia sánáʼa̱ña ña̱ nda̱a̱, su̱ví ña̱ sánáʼa̱ ña̱ filosofía ni ña̱ sánáʼa̱ ña̱ veʼe-ñu̱ʼu católica. Vitin kúnda̱a̱-inii̱ ña̱ káʼi̱n xíʼin na̱ yiví ña̱ nda̱a̱ kúúña.