¿Ndáaña kivi sakúa’ayó xíʼin u̱vi̱ carta ña̱ ka̱ʼyí ta Pedro?

1. Tá si̱lóʼo kúma̱ní ña̱ kuvi ta̱ Pedro, ¿ndáa chiñu ta̱xi Jehová ndaʼa̱ra?

NDA̱KÚNÍ ni̱xi̱yo ini ta̱ Pedro xíʼin Jehová ta ku̱a̱ʼání ku̱i̱ya̱ ka̱chíñura nu̱úra. Ni̱xi̱kara sa̱náʼa̱ra na̱ yiví xíʼin ta̱ Jesús, ta ta̱yóʼo kúú ta̱ nu̱ú ta̱ ni̱xa̱ʼa̱n sa̱náʼa̱ na̱ yiví na̱ inka ñuu, ta saátu xi̱kuura Cuerpo Gobernante. Tá si̱lóʼo kúma̱ní kuvira, Jehová ta̱xira inka chiñu ndaʼa̱ra. Ti̱xin ku̱i̱ya̱ 62 iinsaá nda̱a̱ ku̱i̱ya̱ 64 Jehová ni̱ka̱ʼa̱nra xíʼinra ña̱ ná kaʼyíra u̱vi̱ carta, ña̱ naní primera xíʼin segunda ña̱ Pedro. Ta̱ apóstol Pedro xi̱kuni̱ra ña̱ ná chindeétáʼan carta ña̱ ka̱ʼyíra xíʼin na̱ cristiano na̱ ni̱xi̱yo tiempo saá chi kǒokara koo xíʼinna (2 Ped. 1:​12-15).

2. ¿Nda̱chun va̱ʼaní chi̱ndeétáʼan carta ña̱ ka̱ʼyí ta̱ Pedro xíʼin na̱ cristiano?

² Tá ka̱ʼyí ta̱ Pedro carta yóʼo, na̱ cristiano na̱ ni̱xi̱yo tiempo saá ndeéní xi̱ndi̱ʼi̱-inina xa̱ʼa̱ tu̱ndóʼo ña̱ xi̱ya̱ʼana (1 Ped. 1:6). Ni̱xi̱yo sava na̱ yiví na̱ xi̱sanáʼa̱ ña̱ vatá ti̱xin congregación, chi xi̱kuni̱na sandáʼvina na̱ hermano tasaá kixáʼana keʼéna ña̱ kini nu̱ú Jehová (2 Ped. 2:​1, 2, 14). Tiempo saá si̱lóʼoní xi̱kuma̱ní ña̱ sandíʼi-xa̱ʼa̱ na̱ romano ñuu Jerusalén ta saátu templo Jehová (1 Ped. 4:7). Ña̱kán carta ña̱ ka̱ʼyí ta̱ Pedro va̱ʼaní chi̱ndeétáʼanña xíʼin na̱ cristiano na̱ ni̱xi̱yo tiempo saá ña̱ ya̱ʼana nu̱ú tu̱ndóʼo.b

3. ¿Nda̱chun xíniñúʼu kaʼviyó carta ña̱ ka̱ʼyí ta̱ Pedro?

³ Ni ka̱ʼyí ta̱ Pedro carta yóʼo ku̱a̱ʼa̱n nu̱ú na̱ cristiano na̱ ni̱xi̱yo tá siglo nu̱ú, mií Jehová ni̱ka̱ʼa̱n ña̱ ná ka̱ʼyi̱ña nu̱ú Biblia, ña̱kán nda̱a̱ miíyó kivi chindeétáʼanña xíʼin tiempo vitin (Rom. 15:4). Ku̱a̱ʼání ña̱ kini kéʼé na̱ yiví na̱ íyo tiempo vitin, ta saátu ku̱a̱yaʼayó nu̱ú tu̱ndóʼo ña̱ kivi ixayo̱ʼvi̱ xíʼinyó ña̱ kachíñuyó nu̱ú Jehová. Saátu miíyó si̱lóʼoní kúma̱ní ta ya̱ʼayó nu̱ú ña̱ gran tribulación, ta tu̱ndóʼo yóʼo ndeéníka kooña nu̱úka ña̱ ni̱ya̱ʼa na̱ judío tá ndi̱ʼi-xa̱ʼa̱ Jerusalén xíʼin templo. Íyo ña̱ ndáyáʼviní sákuaʼayó xíʼin u̱vi̱ saá carta ña̱ ka̱ʼyí ta̱ Pedro. Tá kúú, ña̱ koo tu̱ʼvayó ña̱ kixaa̱ ki̱vi̱ káʼnu Jehová, ña̱ ndakú koo iniyó ta kǒo yi̱ʼvíyó na̱ yiyí, xíʼin ña̱ kuʼvi̱ní-iniyó kuniyó na̱ hermano. Ta saátu chindeétáʼanña xíʼin na̱ anciano ña̱ kundaana na̱ congregación.

NÁ KOO TU̱ʼVAYÓ

4. ¿Ndáaña kivi sandákava-iniyó ta kǒo kandíxakayó ña̱ káʼa̱n Jehová? (2 Pedro 3:​3, 4).

⁴ Kǒo kándíxaví na̱ yiví ña̱ káʼa̱n Biblia kǒo chí nu̱úni̱nú. Xa̱ʼa̱ ña̱ xa̱a̱ ku̱a̱ʼání tiempo nátúʼunyó xíʼin na̱ yiví ña̱ kixaa̱ iin ki̱vi̱ ña̱ ndiʼi-xa̱ʼa̱ ndiʼi ña̱ kini ña̱ íyo nu̱ú ñuʼú yóʼo, sana kixáʼana kusi̱kindaana miíyó ta ka̱ʼa̱nna ña̱ kǒo kixaa̱ví ki̱vi̱ yóʼo (kaʼvi 2 Pedro 3:​3, 4). Tá iin na̱ yiví na̱ ndáni̱ʼi̱yó predicación, na̱ káchíñu xíʼinyó á na̱ táʼanyó ná ka̱ʼa̱nna ña̱yóʼo xíʼinyó, kivi kixáʼa kaka-iniyó xa̱ʼa̱ ña̱ káʼa̱n Jehová koo chí nu̱únínu. Soo, ¿Ndáaña kivi chindeétáʼan xíʼinyó? Ná kotoyó ña̱ ni̱ka̱ʼa̱n ta̱ Pedro.

5. ¿Ndáaña chindeétáʼan xíʼinyó ña̱ kundatuyó ki̱vi̱ káʼnu Jehová? (2 Pedro 3:​8, 9).

⁵ Ku̱a̱ʼání na̱ yiví káʼa̱nna ña̱ kúáchi̱ní Jehová ña̱ sandíʼi-xa̱ʼa̱ra ndiʼi ña̱ kini ña̱ íyo nu̱ú ñuʼú yóʼo. Soo, ndáyáʼviní ña̱ ni̱ka̱ʼa̱n ta̱ Pedro chi su̱ví tá xíto miíyó tiempo saá xíto Jehová ña̱yóʼo (kaʼvi 2 Pedro 3:​8, 9). Nu̱ú Jehová mil ku̱i̱ya̱ iin ki̱vi̱ kúúña. Soo ndátura saáchi kǒo kúni̱ra ndiʼi-xa̱ʼa̱ ni iin na̱ yiví. Soo kixaa̱va ki̱vi̱ ña̱ sandíxa̱ʼa̱ra ndiʼi ña̱ kini, ña̱kán viíní ná kuniñúʼuyó tiempo ña̱ kíndo̱o ña̱ natúʼunyó xíʼin na̱ yiví xa̱ʼa̱ Jehová.

6. ¿Ndáaña keʼéyó ña̱ va̱ʼa koo tu̱ʼvayó tá ná kixaa̱ ki̱vi̱ káʼnu Jehová? (2 Pedro 3:​11, 12).

⁶ Ta̱ Pedro ni̱ka̱ʼa̱nra xíʼinyó ña̱ xíniñúʼu koo tu̱ʼvaníyó ña̱ kixaa̱ ki̱vi̱ káʼnu Jehová (kaʼvi 2 Pedro 3:​11, 12). ¿Ndáa ki̱ʼva keʼéyó ña̱yóʼo? Ña̱ ndakanixi̱níyó xa̱ʼa̱ ndiʼi ña̱ va̱ʼa ña̱ taxi Jehová ndaʼa̱yó nu̱ú ñuyǐví xa̱á, ¿á xa̱a̱ ndákanixi̱níún ña̱ íyoún nu̱ú ñuyǐví xa̱á ta ya̱si̱nní ña̱ xíxiún ta̱ limpioní ta̱chí ña̱ ndákiʼún? ¿Á xa̱a̱ ndákanixi̱níún ña̱ ndákutáʼún xíʼin na̱ táʼún na̱ nda̱taku? Ta saátu ku̱a̱ʼání na̱ xi̱ndoo xi̱naʼá ndataku ña̱kán, ¿á xa̱a̱ ndákanixi̱níún ña̱ nátúʼún xíʼinna xa̱ʼa̱ profecía ña̱ va̱xi nu̱ú Biblia? Ña̱ ndakanixi̱níún xa̱ʼa̱ ña̱yóʼo chindeétáʼanña xíʼún ña̱ koo tu̱ʼvaún saáchi xa̱a̱ yatinní ki̱xaa̱ ki̱vi̱ káʼnu Jehová. Xa̱ʼa̱ ña̱ xa̱a̱ kúnda̱a̱-iniyó xa̱ʼa̱ ña̱ kuu chí nu̱úni̱nu ná kǒo taxiyó ña̱ sandáʼvi na̱ yiví miíyó (2 Ped. 3:17).   

NÁ KǑO YI̱ʼVÍYÓ KUNIYÓ NA̱ YIVÍ

7. ¿Ndáaña kivi ndoʼoyó tá yíʼviyó xíniyó na̱ yiví?

⁷ Kúnda̱a̱-iniyó ña̱ xa̱a̱ ku̱numíní kixaa̱ ki̱vi̱ káʼnu Jehová, ña̱kán kúni̱yó ka̱ʼa̱nyó xíʼin inka na̱ yiví xa̱ʼa̱ ña̱ kaʼndachíñura. Soo, sava yichi̱ kǒo xíínyó ka̱ʼa̱nyó xíʼinna. ¿Nda̱chun? Saáchi yíʼviyó. Ña̱yóʼo kúú ña̱ ndo̱ʼo ta̱ Pedro ñu̱ú tá ti̱inna ta̱ Jesús, chi ni̱yi̱ʼvíra ta ni̱ka̱ʼa̱nra ña̱ kǒo xínira ta̱ Jesús (Mat. 26:​69-75). Soo, tá ndi̱ʼi ndu̱ndakúva-inira ta ni̱ka̱ʼa̱nra: “Va̱ása yi̱ʼvíndó nu̱ú ña̱ yíʼvi na̱kán ta ni kǒo kundi̱ʼi̱-inindó” (1 Ped. 3:14). Tu̱ʼun ña̱ ni̱ka̱ʼa̱nra yóʼo náʼa̱ña nu̱úyó, ña̱ kiviva ndakú koo iniyó ta kǒo yi̱ʼvíyó kuniyó na̱ yiví.

8. ¿Ndáaña kivi chindeétáʼan xíʼinyó ña̱ kǒo yi̱ʼvíyó kuniyó na̱ yiví? (1 Pedro 3:15).

⁸ ¿Ndáaña chindeétáʼan xíʼinyó ña̱ kǒo yi̱ʼvíyó kuniyó na̱ yiví? Ta̱ Pedro ni̱ka̱ʼa̱nra ña̱yóʼo: “Xíʼin ndiʼi níma̱ndó xíniñúʼu ndakunindó ña̱ kúú ta̱ Cristo tátayó” (kaʼvi 1 Pedro 3:15). Ña̱yóʼo kúni̱ kachiña, ña̱ ndakanixi̱níyó xa̱ʼa̱ chiñu ña̱ kúúmií ta̱ Jesús xíʼin ndee̱ ña̱ kúúmiíra chi ta̱kán kúú rey nu̱ú ndiʼiyó. Tá xa̱a̱ kúni̱ún natúʼún xíʼin na̱ yiví, soo kíxáʼa yíʼviún, ndakaʼán xa̱ʼa̱ ta̱ rey Jesucristo. Tá kúú, ndakaʼán ña̱ xa̱a̱ xáʼndachíñura chí ndiví ta ku̱a̱ʼání na̱ ángel íyo xíʼinra. Ta saátu ndakaʼán ña̱ mií Ndióxi̱ ta̱xi chiñu ndaʼa̱ra ña̱ kiʼinra kuenta “xíʼin ndiʼi ña̱ʼa ña̱ íyo chí ndiví xíʼin ña̱ íyo nu̱ú ñuʼú yóʼo” ta koora xíʼún ndiʼi ki̱vi̱ “nda̱a̱ ná ndiʼi-xa̱ʼa̱ ñuyǐví” (Mat. 28:​18-20). Ta̱ Pedro ni̱ka̱ʼa̱nra ña̱ ndiʼi tiempo ná koo tu̱ʼvayó ña̱ natúʼunyó xa̱ʼa̱ Ndióxi̱, ¿á kúni̱ún natúʼún xa̱ʼa̱ Jehová nu̱ú káchíñún, nu̱ú káʼviún á inkaka lugar? Tásaá íyoña, ndakanixi̱ní ama kúú ña̱ kivi keʼún ña̱yóʼo ta ixatu̱ʼva ña̱ ka̱ʼún xíʼinna. Ka̱ʼa̱n xíʼin Jehová ña̱ ná chindeétáʼanra xíʼún ña̱ ndakú koo iniún tasaá kǒo yi̱ʼvíún kuniún na̱ yiví (Hech. 4:29).

“KUʼVI̱NÍ-ININDÓ KUNITÁʼANNDÓ”

9. ¿Ama kúú ña̱ ni̱na̱ʼa̱ ta̱ Pedro ña̱ kǒo kúʼvi̱-inira xínira inkana? (Koto na̱ʼná).

⁹ Ta̱ Pedro sa̱kúaʼara ndáaña kúni̱ kachi ña̱ kuʼvi̱-iniyó kuniyó inkana. Ta̱yóʼo xi̱niso̱ʼovara tá ni̱ka̱ʼa̱n ta̱ Jesús tu̱ʼun yóʼo: “Xáʼndai̱ iin chiñu xa̱á nu̱úndó: ña̱ ná kuʼvi̱-inindó kunitáʼanndó; nda̱a̱ táki̱ʼva ni̱kuʼvi̱-inii̱ xi̱nii̱ ndóʼó” (Juan 13:34). Soo, tá ni̱ya̱ʼa tiempo ta̱ Pedro ni̱yi̱ʼvíra xi̱nira na̱ yiví ta kǒo níxiinra kuxura xíʼin ña̱ cristiano na̱ ke̱e inka ñuu. Ta̱ apóstol Pablo ni̱ka̱ʼa̱nra xíʼin ta̱ Pedro ña̱ va̱ása va̱ʼa íyo ña̱ ke̱ʼéra (Gál. 2:​11-14). Ta̱ Pedro xi̱niso̱ʼora consejo ña̱ ta̱xi ta̱ Pablo ndaʼa̱ra, ta na̱samara ña̱ kéʼéra. Ña̱kán nu̱ú u̱vi̱ saá carta ña̱ ka̱ʼyíra ni̱ka̱ʼa̱nra ña̱ kǒo xíniñúʼu ka̱ʼa̱n kuitíyó ña̱ kúʼvi̱-iniyó xíniyó ña̱ hermano chi xíniñúʼu na̱ʼa̱yóña.

10. ¿Ndáaña chindeétáʼan xíʼinyó ña̱ ndixa na̱ʼa̱yó ña̱ kúʼvi̱-iniyó xíniyó na̱ hermano? (1 Pedro 1:22).

¹⁰ Ta̱ Pedro ni̱ka̱ʼa̱nra ña̱ xíʼin ndiʼi níma̱yó ná kúʼvi̱-iniyó kuniyó na̱ hermanoyó (kaʼvi 1 Pedro 1:22). Ta va̱ʼa kuʼvi̱-iniyó kuniyó inkana chi mií Jehová sána̱ʼa̱ miíyó, chi ta̱kán kǒo ndáka̱xinra na̱ yiví (Hech. 10:​34, 35). Tá sava kuití na̱ hermano na̱ ñúʼu ti̱xin congregación kúʼvi̱-iniyó xíniyó kǒo kándíxayó ña̱ ni̱ka̱ʼa̱n ta̱ Jesús. Ña̱ nda̱a̱, sana íyo sava na̱ hermano na̱ va̱ʼaníka kítáʼanyó xíʼin nda̱a̱ táki̱ʼva ke̱ʼé mií ta̱ Jesús (Juan 13:23; 20:2). Soo, ta̱ Pedro sa̱ndákaʼánra miíyó ña̱ xíniñúʼu va̱ʼa koo iniyó xíʼin ndiʼi na̱ hermano ta na̱ʼa̱yó ña̱ ndixa kúʼvi̱-iniyó xíniyóna. Xíniñúʼu kúʼvi̱-iniyó kuniyóna nda̱a̱ táki̱ʼva kúʼvi̱-iniyó xíniyó na̱ veʼeyó (1 Ped. 2:17).

11. ¿Ndáaña kúni̱ kachi ña̱ xíʼin ndiʼi níma̱yó kuʼvi̱-iniyó kuniyó inkana?

¹¹ Ta̱ Pedro ni̱ka̱ʼa̱nra “xíʼin ndiʼi níma̱ndó kuʼvi̱-inindó kunitáʼanndó”. Ña̱yóʼo kúni̱ kachiña ña̱ xíniñúʼu kuʼvi̱-iniyó kuniyó na̱ kéʼé ña̱ va̱ása va̱ʼa xíʼinyó. Tá kúú, ¿ndáaña ndóʼún tá iin na̱ hermano ke̱ʼéna iin ña̱ va̱ása va̱ʼa xíʼún? Sana sáa̱vaún ta kúni̱ún keʼún xíʼinna nda̱a̱ táki̱ʼva ke̱ʼéna xíʼún. Soo, tá saá ná keʼún kǒo kútóo Jehová ña̱yóʼo, nda̱a̱ táki̱ʼva ni̱ka̱ʼa̱n ta̱ Jesús xíʼin ta̱ Pedro (Juan 18:​10, 11). Ta̱ apóstol Pedro ka̱ʼyíra: “Tá kéʼéna ña̱ va̱ása va̱ʼa xíʼinndó va̱ása keʼéndó saá xíʼinna, tá káʼa̱n-ndi̱va̱ʼana xíʼinndó va̱ása ka̱ʼa̱n-ndi̱va̱ʼandó xíʼinna, nu̱úka ña̱yóʼo keʼéndó ña̱ va̱ʼa xíʼinna” (1 Ped. 3:9). Tá ndixa kúʼvi̱-iniún xíniún inkana ni kéʼéna ña̱ va̱ása va̱ʼa xíʼún, keʼévaún ña̱ va̱ʼa xíʼinna.

12. a) Tá ndixa kúʼvi̱-iniyó xíniyó na̱ hermano, ¿ndáaña keʼéyó? b) ¿Ndáaña sákuaʼún xíʼin video ña̱ naní Ná kundaaníyó ña̱ va̱ʼaní kítáʼanyó?

¹² Nu̱ú primera carta ña̱ ka̱ʼyí ta̱ Pedro, ni̱ka̱ʼa̱nra ña̱ xíniñúʼu kuʼvi̱ní-iniyó kuniyó inkana, saáchi tá kéʼéyó ña̱yóʼo ndiʼi tiempo koo tu̱ʼvayó ña̱ ixakáʼnu-iniyó xa̱ʼa̱na (1 Ped. 4:8). Tá ka̱ʼyí ta̱ Pedro tu̱ʼun yóʼo sana nda̱kaʼánra xa̱ʼa̱ ña̱ ni̱ka̱ʼa̱n ta̱ Jesús xíʼinra. Ta̱ Pedro nda̱kanixi̱níra ña̱ va̱ʼaní-inira chi ni̱ka̱ʼa̱nra ña̱ u̱xa̱ yichi̱ví ixakáʼnu-inira xa̱ʼa̱ na̱ yiví, soo ta̱ Jesús ni̱ka̱ʼa̱nra xíʼinra ña̱ 77 yichi̱ví xíniñúʼu ixakáʼnu-inira xa̱ʼa̱na. Ña̱yóʼo kúni̱ kachiña ña̱ ndiʼi tiempo xi̱niñúʼu keʼéra ña̱yóʼo ta saátu xíniñúʼu keʼé miíyó (Mat. 18:​21, 22). ¿Á íxayo̱ʼvi̱ña xíʼún keʼún ña̱ káʼa̱n texto yóʼo? Tá saá íyoña, kǒo ndakava-iniún saáchi ndiʼiyó sana xa̱a̱ íxayo̱ʼvi̱ña xíʼinyó ña̱ ixakáʼnu-iniyó xa̱ʼa̱ iin na̱ yiví xa̱ʼa̱ ña̱ kúúyó na̱ yiví ku̱a̱chi. Soo, iin ña̱ kivi keʼún kúú, ña̱ chika̱ún ndee̱ ña̱ ixakáʼnu-iniún xa̱ʼa̱ na̱ ke̱ʼé ña̱ va̱ása va̱ʼa xíʼún tasaá vií kutáʼan tukundó.c

NDÓʼÓ NA̱ ANCIANO KUNDAANDÓ NA̱ CONGREGACIÓN

13. ¿Nda̱chun kivi ixayo̱ʼvi̱ña xíʼin na̱ anciano ña̱ kundaana na̱ hermano?

¹³ Tá nda̱taku ta̱ Jesús ni̱ka̱ʼa̱nra ña̱yóʼo xíʼin ta̱ Pedro: “Kundaa ndikachi válí sa̱na̱i̱”, ta sana kǒo nínandóso-ini ta̱ Pedro xa̱ʼa̱ ña̱yóʼo (Juan 21:16). Tá anciano kúún saátu miíún xíniñúʼu keʼún ña̱ ni̱ka̱ʼa̱n ta̱ Jesús. Soo, sana kivi ixayo̱ʼvi̱ña xíʼún ña̱ taváún tiempo keʼún chiñu ña̱ ndáyáʼvíní yóʼo. Ña̱ nu̱ú ña̱ xíniñúʼu keʼé na̱ anciano kúú, ña̱ xíniñúʼu kundi̱ʼi̱-inina xa̱ʼa̱ na̱ veʼena ña̱ taxina ña̱ xíniñúʼuna, ña̱ kuxuna, ña̱ sakúaʼana xa̱ʼa̱ Ndióxi̱ xíʼin inkaka ña̱ xíniñúʼuna. Ta saátu xíniñúʼu kee ni̱ʼina predicación ta xa̱a̱ ya̱chi̱ka xíniñúʼu kaʼvina ña̱ ku̱ʼu̱nna reunión ta saátu ña̱ taxina discurso ti̱xin asamblea. Savatuna chíndeétáʼanna xíʼin na̱ Comité ña̱ Enlace xíʼin Hospital á xíʼin na̱ Departamento Local ña̱ Diseño xíʼin Construcción. Ña̱kán, na̱ anciano ku̱a̱ʼání chiñu kéʼéna.

14. ¿Nda̱chun kúni̱ na̱ anciano kundaana na̱ hermano, ta ndáaña chindeétáʼan xíʼinna? (1 Pedro 5:​1-4).

¹⁴ Ta̱ Pedro ni̱ka̱ʼa̱nra xíʼin inka na̱ anciano: “Kundaandó na̱ congregación” (kaʼvi 1 Pedro 5:​1-4). Na̱ anciano kúʼvi̱níva-inina xínina na̱ hermano ta ndáanana. Soo, sava yichi̱ ndákanixi̱nína ña̱ kǒo kúchiñuna keʼéna chiñu yóʼo, xa̱ʼa̱ ña̱ ku̱a̱ʼání chiñu íyo nu̱úna á ña̱ xa̱a̱ ku̱naána. Tá saá ndóʼún, ¿ndáaña kivi keʼún? Ka̱ʼa̱n xíʼin Jehová xa̱ʼa̱ ña̱ ndóʼún. Ta̱ Pedro ka̱ʼyíra: “Tá íyo iin ndóʼó na̱ chíndeétáʼan xíʼin inkana, na̱ʼa̱ndó ña̱ xíniñúʼundó ndee̱ ña̱ táxi Ndióxi̱ ña̱ va̱ʼa keʼéndó ña̱yóʼo” (1 Ped. 4:11). Sana na̱ hermano yáʼana nu̱ú tu̱ndóʼo ña̱ kǒo kívi nduvií tiempo vitin. Soo, ndakaʼán chi ta̱ Jesús kúú ta̱ va̱ʼaníka chindeétáʼan xíʼinna ta sándi̱kora inina tiempo vitin ta saátu ñuyǐví xa̱á. Ña̱ kúni̱ Jehová keʼé na̱ anciano kúú ña̱ kuʼvi̱-inina kunina na̱ hermano, ña̱ kundaanana ta saátu ña̱ chinúuna iin yichi̱ va̱ʼa nu̱úna.

15. ¿Ndáaña kéʼé iin ta̱ anciano ña̱ va̱ʼa kundaara na̱ hermano? (Koto na̱ʼná).

¹⁵ Ta̱ William xa̱a̱ ku̱a̱ʼání ku̱i̱ya̱ kúúra anciano, ta ndíʼi̱ní-inira ña̱ kundaara na̱ hermano. Tá ki̱xáʼa pandemia ña̱ COVID-19, ta̱yóʼo ni̱ka̱ʼa̱nra xíʼin inka na̱ anciano ña̱ ndiʼi semana xíniñúʼu ka̱ʼa̱nna xíʼin na̱ hermano na̱ ñúʼu grupo ña̱ predicaciónna ña̱ va̱ʼa kotona á íyo va̱ʼana. ¿Nda̱chun? Ta̱yóʼo káchira: “Saáchi ku̱a̱ʼání na̱ hermano yóʼo iinlá miína íyo veʼena, kǒoka inkana íyo xíʼinna. Ta xa̱ʼa̱ ña̱yóʼo kivi kixáʼana ndakanixi̱nína ña̱ kǒo na̱ ndíʼi̱-ini xa̱ʼa̱na”. Tá iin na̱ hermano kúúmiína iin tu̱ndóʼo, ta̱ William viíní xíniso̱ʼorana ña̱ va̱ʼa kunda̱a̱-inira ndáaña ndóʼona á ndáaña xíniñúʼuna. Ta ndúkúra ña̱ kivi chindeétáʼan xíʼinna, tá kúú video ña̱ va̱xi nu̱ú página ña̱ kúúmiíyó nu̱ú Internet. Ta̱ William káchikara: “Vitin kúú tiempo ña̱ xíniñúʼu kundaaníkayó na̱ hermano. Nda̱a̱ táki̱ʼva chíkaa̱yó ndee̱ ña̱ natúʼunyó xíʼin na̱ yiví xa̱ʼa̱ Ndióxi̱, saátu xiniñúʼu chikaa̱yó ndee̱ ña̱ kundaayó na̱ hermano tasaá kǒo keena ti̱xin ñuu Jehová”.

NÁ TAXIYÓ ÑA̱ SANÁʼA̱ JEHOVÁ MIÍYÓ

16. ¿Ndáaña chindeétáʼan xíʼinyó ña̱ keʼéyó ña̱ sa̱kúaʼayó nu̱ú u̱vi̱ saá carta ña̱ ka̱ʼyí ta̱ Pedro?

¹⁶ Nu̱ú artículo yóʼo ni̱ka̱ʼa̱nyó xa̱ʼa̱ sava ña̱ʼa ña̱ va̱xi nu̱ú u̱vi̱ saá carta ña̱ ka̱ʼyí ta̱ Pedro. Ta sana ki̱ʼi̱nyó kuenta ña̱ íyo sava ña̱ʼa ña̱ xíniñúʼu viíka keʼéyó. Tá kúú, ¿Á kúni̱kaún taváún tiempo ña̱ ndakanixi̱niún ndáa ki̱ʼva kundooyó ñuyǐví xa̱á? ¿Á xa̱a̱ chíkaa̱-iniún ña̱ natúʼún xa̱ʼa̱ Ndióxi̱ nu̱ú káchíñún, ti̱xin escuela á inkaka lugar? ¿Á xa̱a̱ ndákanixi̱níún ndáaña kivi keʼún, ña̱ va̱ʼa na̱ʼún ña̱ kúʼvi̱ní-iniún xíniún na̱ hermano? Tá anciano kúún, ¿á kúsi̱í-iniún ña̱ chíndeétáʼún xíʼin na̱ hermano ta ndáúnna? Tá xa̱a̱ nda̱kanixi̱níún xa̱ʼa̱ ña̱yóʼo ta xítoún ña̱ va̱ása kéʼúnña, kǒo ndakava iniún. Ndakaʼán chi va̱ʼaní-ini Jehová ta miíra chindeétáʼan xíʼún ña̱ vií keʼúnña (1 Ped. 2:3). Ta̱ Pedro ni̱ka̱ʼa̱nra: “[Ndióxi̱] sanáʼa̱ ndóʼó nda̱a̱ ná xa̱a̱ndó koo tu̱ʼvandó, miíra taxi ndee̱ ndaʼa̱ndó, miíra chindeétáʼan xíʼinndó ña̱ nda̱kú koo inindó ta chindeétáʼanra xíʼinndó ña̱ kútu̱ní kunditandó” (1 Ped. 5:10).

17. ¿Ndáaña va̱ʼa ndakiʼinyó tá táxiyó ña̱ sanáʼa̱ Jehová miíyó?

¹⁷ Ta̱ Pedro xi̱kundaa̱-inira ña̱ kúúra iin ta̱ ku̱a̱chi ña̱kán kǒo níxiinra kuyatinra nu̱ú ta̱ Jesús (Luc. 5:8). Soo, Jehová xíʼin ta̱ Jesús chi̱ndeétáʼanna xíʼin ta̱ Pedro chi xi̱kuʼvi̱-inina xi̱xininara. Ta ta̱ Pedro kǒo nísandákoora ña̱ kundiku̱nra ta̱ Jesús. Xa̱ʼa̱ ña̱yóʼo ta̱ Pedro nda̱kiʼinra ña̱ va̱ʼa ña̱ koora ti̱xin Reino “tátayó Jesucristo ta̱ sáka̱ku miíyó” (2 Ped. 1:11). Ta saátu yóʼóva tá chíka̱ún ndee̱ ña̱ ndasakáʼnún Jehová ta táxiún ña̱ sanáʼa̱ra yóʼó miíra taxi ña̱ kutakún ndiʼi tiempo. Ta xa̱ʼa̱ ña̱ kándíxaúnra kusi̱íní-iniún chi ka̱kuvaún (1 Ped. 1:9).