“Koo tu̱ʼvaníndó” ña̱ kixaa̱ ki̱vi̱ káʼnu Jehová

1. ¿Ndáaña xíniñúʼu keʼéyó ña̱ va̱ʼa ka̱kuyó tá ná kixaa̱ ki̱vi̱ káʼnu Jehová?

TÁ KÁʼA̱N Biblia xa̱ʼa̱ “ki̱vi̱ káʼnu Jehová” káʼa̱nña xa̱ʼa̱ ki̱vi̱ ña̱ sándiʼi-xa̱ʼa̱ra na̱ yiví na̱ kéʼé ña̱ va̱ása va̱ʼa ta sáka̱kura na̱ ñuura. Tá tiempo xi̱naʼá, Jehová sa̱ndíʼi-xa̱ʼa̱ra na̱ kǒo níkeʼé ña̱ ni̱ka̱ʼa̱nra (Is. 13:1, 6; Ezeq. 13:5; Sof. 1:8). Ña̱ siʼna kuu tá ná ki̱xaa̱ “ki̱vi̱ káʼnu Jehová” kúú, ña̱ ndiʼi-xa̱ʼa̱ ndiʼi na̱ veʼe ñu̱ʼu vatá ta tándi̱ʼi saá kixaa̱ ña̱ Armagedón. Ña̱ va̱ʼa ka̱kuyó “ki̱vi̱” yóʼo, vitin kúú ña̱ xa̱a̱ xíniñúʼu koo tu̱ʼvayó. Ta̱ Jesús sa̱náʼa̱ra, ña̱ “xíniñúʼu koo tu̱ʼvayó” tá ná kixaa̱ ña̱ “gran tribulación”, ta ndiʼi tiempo xíniñúʼu keʼéyó ña̱yóʼo (Luc. 12:40; Mat. 24:21).

2. ¿Nda̱chun ndáyáʼviní sakuaʼayó xa̱ʼa̱ ña̱ va̱xi nu̱ú 1 Tesalonicenses?

² Nu̱ú 1 Tesalonicenses, ta̱ apóstol Pablo ni̱ka̱ʼa̱nra xa̱ʼa̱ sava ña̱ʼa ña̱ kivi chindeétáʼan xíʼin na̱ cristiano ña̱ koo tu̱ʼvana tá ná kixa̱a̱ ki̱vi̱ káʼnu Jehová. Ta̱ apóstol Pablo xi̱kunda̱a̱-inira ña̱ xi̱kumaní ku̱a̱ʼání tiempo ña̱ ndatiin Ndióxi̱ ku̱a̱chi xíʼin na̱ yiví na̱ íyo nu̱ú ñuʼú yóʼo (2 Tes. 2:1-3). Soo nisaá ni̱ka̱ʼa̱nra xíʼin na̱ cristiano ña̱ ná koo tu̱ʼvanína ta saátu miíyó kivi kundiku̱nyó consejo yóʼo. Ná kotoyó ndáaña sákuaʼayó xíʼin ña̱ nika̱ʼa̱nra 1) ndáa ki̱ʼva kixaa̱ ki̱vi̱ Jehová 2) ndáana va̱ása ka̱ku tá ná kixaa̱ ki̱vi̱ yóʼo ta 3) ndáaña xíniñúʼu keʼéyó ña̱ va̱ʼa koo tu̱ʼvayó.

¿NDÁA KI̱ʼVA KIXAA̱ KI̱VI̱ JEHOVÁ?

3. ¿Nda̱chun káʼa̱nyó ña̱ ki̱vi̱ Jehová kixaa̱ña nda̱a̱ táki̱ʼva kéʼé iin ta̱ kui̱ʼná? (Koto na̱ʼná).

³ Ki̱vi̱ Jehová kixiña nda̱a̱ “táki̱ʼva kéʼé iin ta̱ kui̱ʼná tá ñuú” (1 Tes. 5:2). Ña̱yóʼo kúú ejemplo ña̱ nu̱ú ña̱ ni̱ka̱ʼa̱n ta̱ apóstol Pablo xa̱ʼa̱ ndáa ki̱ʼva koo ña̱ kixaa̱ ki̱vi̱ Jehová. Nda̱a̱ ni iinyó va̱ása xíni̱yó ama ki̱ʼvi na̱ kui̱ʼná veʼeyó, ta tá íxakuíʼnána ñuú kéʼéna ña̱yóʼo ta kamaní kéʼénaña. Ki̱ʼva saá koo ki̱vi̱ Jehová chi kamaní kixaa̱ña ta ndiʼi na̱ yiví ndakanda̱-inina tá ná kixaa̱ ña̱yóʼo saáchi va̱ása ndátunaña. Ta sana nda̱a̱ miíyó na̱ ndásakáʼnu Jehová ndakanda̱ní-iniyó tá ná kuu ña̱yóʼo saáchi kamaní kooña. Soo miíyó va̱ása ndiʼi-xa̱ʼa̱víyó, saáchi na̱ kéʼé ña̱ kini kúú na̱ sandíʼi-xa̱ʼa̱ Jehová.

4. ¿Ndáa ki̱ʼva kítáʼan ki̱vi̱ káʼnu Jehová xíʼin ña̱ ndóʼo iin ñaʼá ñá xa̱a̱ ku̱numí kaku se̱ʼe?

⁴ “Nda̱a̱ táki̱ʼva ndóʼo iin ñaʼá ñá xa̱a̱ ku̱nu̱mí kaku se̱ʼe” (1 Tes. 5:3). Ñaʼá ñá ñúʼu se̱ʼe kǒo xíni̱ñá ndáa hora ta ndáa ki̱vi̱ kaku se̱ʼeñá, soo xíni̱vañá ña̱ kixaa̱ ki̱vi̱ kán. Ta, tá kíxa̱a̱ ki̱vi̱ ña̱ kaku se̱ʼeñá iin kama kuití kúú ña̱yóʼo, xóʼvi̱níñá ta nda̱a̱ ni iinna kǒo kívi kasi ña̱ kaku ña̱ loʼo se̱ʼeñá. Ki̱ʼva saá ndóʼo miíyó saáchi va̱ása kúnda̱a̱-iniyó ndáa ki̱vi̱ ta ndáa hora kixaa̱ ki̱vi̱ káʼnu Jehová, soo kándíxaníyó ña̱ sandíʼi-xa̱ʼa̱vara na̱ kéʼé ña̱ kini.

5. ¿Ndáa ki̱ʼva kítáʼan ña̱ gran tribulación xíʼin ña̱ xa̱a̱ kunumí tu̱vi?

⁵ Tá xa̱a̱ kunumí tu̱vi. Ta̱ Pablo káʼa̱n tukura xa̱ʼa̱ ña̱ kéʼé na̱ kui̱ʼná tá íxakuíʼnána ñuú, soo vitin kíxáʼara káʼa̱nra ndáaña ndóʼo na̱yóʼo tá xa̱a̱ kunumí tu̱vi, ta sana xi̱niñúʼura ña̱yóʼo ña chitáʼanraña xíʼin ki̱vi̱ káʼnu Jehová. Xa̱ʼa̱ ña̱ ndíʼi̱-ini na̱ kui̱ʼná ixakuíʼnána sana ni kǒo kíʼinna kuenta ña̱ xa̱a̱ ki̱xáʼa ku̱a̱ʼa̱n túvi (1 Tes. 5:4). Ta xa̱ʼa̱ ña̱yóʼo sana kivi kuni na̱ yivína, ta ki̱ʼva saá kuu ti̱xin ña̱ gran tribulación. Na̱ yiví na̱ kéʼé se̱ʼé ña̱ va̱ása va̱ʼa, ndatiin Jehová ku̱a̱chi xíʼinna xa̱ʼa̱ ña̱ kéʼéna. Miíyó va̱ása íyoyó nda̱a̱ táki̱ʼva íyo na̱yóʼo, saáchi xíʼin ña̱ kéʼéyó náʼa̱yó ña̱ íyo tu̱ʼvayó tá ná kixaa̱ ki̱vi̱ káʼnu Jehová. ¿Ndáa ki̱ʼva kéʼéyó ña̱yóʼo? Kǒo kéʼéyó ña̱ va̱ása kútóo Jehová, ta ndákundeéyó kéʼéyó ña̱ va̱ʼa (Efes. 5:8-12). Tándi̱ʼi, ta̱ Pablo xíniñúʼura inka u̱vi̱ ejemplo ña̱ va̱ʼa ka̱ʼa̱nra ndáa na̱ yiví kúú na̱ va̱ása ka̱ku tá ná kixaa̱ ki̱vi̱ káʼnu Jehová.

¿NDÁANA KÚÚ NA̱ VA̱ÁSA KA̱KU TÁ NÁ KIXAA̱ KI̱VI̱ JEHOVÁ?

6. ¿Ndáaña kéʼé na̱ yiví tiempo vitin tasaá náʼa̱na ña̱ nda̱a̱ táki̱ʼva íyo na̱ kísi̱ saá íyona? (1 Tesalonicenses 5:6, 7).

⁶ “Na̱ kísi̱” (kaʼvi 1 Tesalonicenses 5:6, 7). Ta̱ apóstol Pablo ni̱ka̱ʼa̱nra ña̱ tá ná kixaa̱ ki̱vi̱ káʼnu Jehová va̱ása ka̱ku na̱ yiví na̱ íyo nda̱a̱ táki̱ʼva íyo na̱ kísi̱. Iin na̱ yiví na̱ kísi̱ va̱ása kíʼinna kuenta ndáa ki̱ʼva yáʼa tiempo, xa̱ʼa̱ ña̱kán va̱ása kúnda̱a̱-inina tá kúu iin ña̱ʼa ña̱ ndáyáʼviní. Ta kǒo kívi keʼéna nda̱a̱ ni iin ña̱ʼa. Ta ki̱ʼva saá ndóʼo ku̱a̱ʼání na̱ yiví na̱ ndóo tiempo vitin: táki̱ʼva íyo na̱ kísi̱ saá íyona (Rom. 11:8). Va̱ása kándíxana ña̱ íyoyó “tiempo nu̱ú ndíʼi” ta ni va̱ása kándíxana ña xa̱a̱ ku̱yatinní va̱xi ña̱ gran tribulación. Soo tá kúu iin tu̱ndóʼo ña̱ ndeéní, sava na̱ yiví kúni̱na sákuaʼana xa̱ʼa̱ Ndióxi̱. Ta ku̱a̱ʼání na̱ yiví yóʼo, loʼo kuitíva tiempo ndíʼi̱-inina xa̱ʼa̱ ña̱ sákuaʼana xa̱ʼa̱ Ndióxi̱ soo tándi̱ʼi nda̱a̱ táki̱ʼva íyo na̱ ndíko kísi̱ tukú saá íyona. Íyo na̱ yiví na̱ ndákanixi̱ní ña̱ kixaa̱va ki̱vi̱ ña̱ ndatiin Ndióxi̱ ku̱a̱chi, soo túvina ña̱ ku̱a̱ʼáníva tiempo kúma̱ní ña̱ kuu ña̱yóʼo (2 Ped. 3:3, 4). Soo miíyó ndíku̱nyó consejo ña̱ ta̱xi ta̱ apóstol Pablo, ña̱ ndáyáviní ña̱ kunditoyó ta va̱ása ku̱su̱nyó.

7. ¿Nda̱chun nda̱a̱ táki̱ʼva íyo na̱ xíni saá íyo na̱ yiví na̱ sandíʼi-xa̱ʼa̱ Jehová?

⁷ “Na̱ xíʼi ndixi nda̱a̱ xínina”. Ta̱ Pablo ni̱ka̱ʼa̱nra ña̱ na̱ yiví na̱ sándiʼi-xa̱ʼa̱ Jehová íyona nda̱a̱ táki̱ʼva íyo na̱ yiví na̱ xíʼi ndixi nda̱a̱ xínina. Tá xa̱a̱ xíni iin na̱ yiví, va̱ása viíka ndáka̱xinna ña̱ keʼéna. Ki̱ʼva saá íyo na̱ yiví na̱ kǒo kándíxa Jehová saáchi kǒo kéʼéna ña̱ káʼa̱nra, ta ña̱ kútóokana keʼéna kúú ña̱ kini ta ña̱yóʼo kǒo ña̱ va̱ʼa taxiña ndaʼa̱na chí nu̱únínu. Soo ta̱ apóstol Pablo káʼa̱nra xíʼin na̱ ndásakáʼnu Ndióxi̱ ña̱ ná kiʼinnína kuenta xíʼin ña̱ keʼéna ta ná kǒo keʼéna nda̱a̱ táki̱ʼva kéʼé na̱ xíʼi (1 Tes. 5:6). Iin ta̱ xíniva̱ʼa xa̱ʼa̱ Biblia ni̱ka̱ʼa̱nra ña̱ tu̱ʼun vií koo ña̱ ndaka̱xinyó keʼéyó kúni̱ kachiña “táxi̱n kooyó, kǒo ndi̱ʼi̱ní-iniyó tasaá viíní koo ña̱ keʼéyó”. ¿Nda̱chun xíniñúʼu kúee koo iniyó ta va̱ása kamaní keʼéyó iin ña̱ʼa? Saáchi kivi kamaní sáxinu̱na-iniyó ña̱ ki̱ʼviyó xíʼin ña̱ política á inkaka ña̱ʼa ña̱ íyo nu̱ú ñuʼú yóʼo. Ta nani kúyatin ña̱ kixaa̱ ki̱vi̱ Jehová, ixayo̱ʼvi̱níkaña xíʼinyó ña̱ vií koo ña̱ ndaka̱xinyó keʼéyó. Soo espíritu santo Jehová kúú ña̱ chindeétáʼan xíʼinyó ña̱ kǒo ndi̱ʼi̱ní-iniyó tasaá vií koo ña̱ ndaka̱xinyó keʼéyó (Luc. 12:11, 12).

¿NDÁAÑA KIVI KEʼÉYÓ TASAÁ KOO TU̱ʼVAYÓ ÑA̱ KIXAA̱ KI̱VI̱ JEHOVÁ?

8. Nda̱a̱ táki̱ʼva káchi 1 Tesalonicenses 5:8, ¿ndáaña kivi chindeétáʼan xíʼinyó tá ná kixaa̱ ki̱vi̱ káʼnu Jehová? (Koto na̱ʼná).

⁸ “Ná kuniñú’uyó ña̱ ndási kándíkayó […] xí’in casco ña̱ ndási xi̱níyó”. Ta̱ Pablo chi̱táʼanra miíyó xíʼin na̱ soldado na̱ xa̱a̱ íyo tu̱ʼva ña̱ ku̱ʼu̱nna nu̱ú ku̱a̱chi (kaʼvi 1 Tesalonicenses 5:8). Tiempo ña̱ ndíkaa̱ ku̱a̱chi iin ta̱ soldado xíniñúʼu koo tu̱ʼvaníra ña̱ ku̱ʼu̱nra kanitáʼanra, ki̱ʼva saá ndóʼo miíyó tiempo vitin. Náʼa̱yó ña̱ xa̱a̱ íyo tu̱ʼvayó ña̱ kixaa̱ ki̱vi̱ Jehová saáchi kúʼvi̱-iniyó xínitáʼanyó ta ña̱yóʼo íyoña nda̱a̱ táki̱ʼva íyo ña̱ ndási kándíkayó, ta saátu kándíxayó ña̱ sakǎku Ndióxi̱ miíyó ta ña̱yóʼo íyoña nda̱a̱ táki̱ʼva íyo iin casco ña̱ ndási xi̱níyó. Ndiʼi ña̱yóʼo va̱ʼaní chindeétáʼanña xíʼinyó tá ná kixaa̱ ki̱vi̱ káʼnu Jehová.

9. Ña̱ kándíxayó Ndióxi̱, ¿ndáa ki̱ʼva ndáaña miíyó?

⁹ Nda̱a̱ táki̱ʼva ndáa ka̱a kándíka iin ta̱ soldado tá ku̱a̱ʼa̱nra nu̱ú ku̱a̱chi, ki̱ʼva saá ndáa ña̱ kándíxayó Ndióxi̱ miíyó xíʼin ña̱ kúʼvi̱-iniyó xíniyó inkana. Ña̱yóʼo chíndeétáʼanña xíʼinyó ña̱ kǒo sandákooyó ña̱ ndasakáʼnuyó Jehová xíʼin ña̱ kundiku̱nyó ta̱ Jesús. Ta tá kándíxayó Jehová, miíra taxi ku̱a̱ʼání ña̱ va̱ʼa ndaʼa̱yó chí nu̱únínu (Heb. 11:6). Saátu tá kándíxayó Jehová ña̱yóʼo chindeétáʼanña xíʼinyó ña̱ nda̱kú koo iniyó xíʼin ta̱ Jesús ni ku̱a̱ʼání tu̱ndóʼo ná ya̱ʼayó nu̱ú. Ná kotoyó ndáaña chíndeétáʼan xíʼin sava na̱ hermano ña̱ nda̱kú íyo inina xíʼin Ndióxi̱ tá kúma̱ní xu̱ʼún ndaʼa̱na á tá íxandi̱va̱ʼa na̱ chíñu xíʼinna. Iin ña̱ kivi chindeétáʼan xíʼinyó ña̱ kǒo taxiyó ña̱ sandáʼvi na̱ yiví yóʼo miíyó ña̱ kuumiíyó ku̱a̱ʼání ña̱ʼa kúú, ña̱ kotoyó ña̱ kéʼé inka na̱ hermano na̱ ndíʼi̱ka-ini xa̱ʼa̱ chiñu Ndióxi̱ ta va̱ása ndíʼi̱ní-inina ña̱ kuumiína ku̱a̱ʼá ña̱ʼa.b

10. ¿Ndáaña kéʼéyó xa̱ʼa̱ ña̱ kúʼvi̱-iniyó xíniyó Ndióxi̱ xíʼin na̱ yiví?

¹⁰ Iin ña̱ chindeétáʼan xíʼinyó ña̱ koo tu̱ʼvaníyó ta vií koo ña̱ keʼéyó kúú ña̱ kuʼvi̱-iniyó kuniyó inkana (Mat. 22:37-39). Tá kúú, xa̱ʼa̱ ña̱ kúʼvi̱-iniyó xíniyó Jehová kúú ña̱ ndákundeéyó nátúʼunyó xa̱ʼa̱ra ni íyo tu̱ndóʼo nu̱úyó (2 Tim. 1:7, 8). Ta xa̱ʼa̱ ña̱ kúʼvi̱-iniyó xíniyó na̱ yiví kúú ña̱ nátúʼunyó xíʼinna xa̱ʼa̱ Ndióxi̱, ta kéʼéyó ña̱yóʼo tá káʼa̱nyó xíʼinna xíʼin teléfono á tá káʼyíyó carta. Kúni̱yó ña̱ nasamana ki̱ʼva ña̱ íyona, tasaá viíní koo ña̱ keʼéna (Ezeq. 18:27, 28).

11. ¿Ndáaña va̱ʼa ndákiʼinyó xa̱ʼa̱ ña̱ kúʼvi̱-iniyó xíniyó na̱ ñaniyó xíʼin ná ku̱ʼvayó? (1 Tesalonicenses 5:11).

¹¹ Saátu kúʼvi̱ní-iniyó xíniyó na̱ ñaniyó xíʼin ná ku̱ʼvayó ta iin ki̱ʼva ña̱ kéʼéyó ña̱yóʼo kúú ña̱ chíka̱a̱yó ndee̱ xíʼinna ta káʼa̱nyó tu̱ʼun va̱ʼa xíʼinna (kaʼvi 1 Tesalonicenses 5:11). Na̱ soldado na̱ ku̱a̱ʼa̱n nu̱ú ku̱a̱chi chíndeétáʼan xíʼin táʼanna, soo sava yichi̱ kivi sátukue̱ʼe̱na na̱ kítáʼan xíʼinna. Soo su̱ví xa̱ʼa̱ ña̱ kúni̱ miína kéʼéna ña̱yóʼo. Saátu miíyó, sana kǒo kúni̱víyó ka̱ʼa̱nyó á keʼéyó iin ña̱ʼa ña̱ sákusuchí-ini na̱ hermanoyó, soo sana kǒo kíʼinyó kuenta ta kéʼévayó ña̱yóʼo. Ta tá kéʼéna ña̱ va̱ása va̱ʼa xíʼinyó kǒo kéʼéyó nda̱a̱ táki̱ʼva kéʼéna (1 Tes. 5:13, 15). Inka ki̱ʼva ña̱ na̱ʼa̱yó ña̱ kúʼvi̱-iniyó xíniyó na̱ ñaniyó xíʼin ná ku̱ʼvayó kúú, ña̱ ixato̱ʼóyó na̱ níʼi yichi̱ nu̱úyó ti̱xin congregación (1 Tes. 5:12). Ná ndakanixi̱níyó xa̱ʼa̱ congregación ña̱ ni̱xi̱yo chí Tesalónica. Tá ka̱ʼyí ta̱ Pablo carta yóʼo nu̱úna, sa̱kán loʼoníva yo̱o̱ ki̱xáʼa congregación kán íyoña, xa̱ʼa̱ ña̱kán na̱ anciano na̱ ni̱xi̱yo tiempo saá kǒo níxi̱kunda̱a̱ví-inina ndáa ki̱ʼva keʼéna sava ña̱ʼa, soo ni saá xi̱niñúʼu ixato̱ʼóvanana. Xa̱a̱ ku̱nu̱míní kixaa̱ ña̱ gran tribulación ña̱kán xíniñúʼu kandíxaníyó ta kuniso̱ʼoyó ña̱ káʼa̱n na̱ anciano xíʼinyó, saáchi tá ná kixaa̱ ki̱vi̱ kán, sana va̱ása kivika ka̱ʼa̱n na̱ káchíñu Betel xíʼinyó ndáaña kivi keʼéyó. Ña̱kán, ndáyáʼviní ña̱ ixato̱ʼóyó na̱ anciano ta saátu ná kuʼvi̱ní-iniyó kuniyóna. Nda̱a̱ ndáaka ña̱ ná kuu ná ixato̱ʼóníyóna ta ná kǒo kotoyó ña̱ va̱ása va̱ʼa kéʼéna. Ná ndakaʼányó saáchi mií Jehová xíniñúʼura ta̱ Jesús ña̱ kuniʼira yichi̱ nu̱úyó, ta ta̱ Jesús kúú ta̱ níʼi yichi̱ nu̱ú na̱ ancian

12. Ña̱ ndátuyó koo chí nu̱únínu, ¿ndáa ki̱ʼva chíndeétáʼanña xíʼinyó?

¹² Nda̱a̱ táki̱ʼva ndáa iin casco xi̱ní iin ta̱ soldado ta̱ ku̱a̱ʼa̱n nu̱ú ku̱a̱chi, ki̱ʼva saá ndáa ña̱ ndátuyó koo chí nu̱únínu ña̱ ndákanixi̱níyó. Ña̱ ndátuyó koo chí nu̱únínu chíndeétáʼanña xíʼinyó ña̱ kǒo kundayáʼviní ña̱ʼa ña̱ íyo nu̱ú ñuʼú yóʼo nu̱úyó saáchi ña̱ ndiʼi-xa̱ʼa̱va kúúña (Filip. 3:8). Ña̱ ndátuyó koo chí nu̱únínu sándi̱koña-iniyó tasaá kǒo ndíʼi̱ní-iniyó. Ña̱yóʼo kúú ña̱ ndo̱ʼo ta̱ Wallace xíʼin ñá Laurinda, na̱yóʼo káchíñuna nu̱ú Jehová chí África. Ti̱xin ña̱ u̱ni̱ semana, iinna ni̱xi̱ʼi̱ yivá ta inkana ni̱xi̱ʼi̱ siʼí. Tá ku̱u ña̱yóʼo kǒo níkivi ndikóna ña̱ koona xíʼin na̱ veʼena, saáchi ña̱ kue̱ʼe̱ COVID-19 xi̱ndikaa̱. Ta̱ Wallace káchira: “Ña̱ kándíxai̱ ña̱ ndataku na̱ ni̱xi̱ʼi̱ va̱ʼaní sándi̱koña-inii̱, va̱ása ndákanixi̱níi̱ xa̱ʼa̱ ndáaña ndo̱ʼona tá kúma̱níka kuvina, chi ña̱ ndákanixi̱níi̱ xa̱ʼa̱ kúú ndáaña keʼéna tá ná ndatakuna ñuyǐví xa̱á. Ña̱yóʼo chíndeétáʼanníña xíʼi̱n ña̱ kǒo kusuchíní-inii̱, saáchi kúnda̱a̱-inii̱ ña̱ ndatakuvana”.

13. ¿Ndáaña kivi keʼéyó ña̱ va̱ʼa taxi Jehová espíritu santora ndaʼa̱yó?

¹³ “Kǒo kasindó nu̱ú ña̱ espíritu santo ña̱ chindeétáʼanña xíʼinndó” (1 Tes. 5:19). Ta̱ Pablo ni̱ka̱ʼa̱nra ña̱ nda̱a̱ táki̱ʼva íyo iin ñuʼu̱ ña̱ xíxi̱ ña̱ ndíkaa̱-iniyó saá íyo ña̱ espíritu santo. Ña̱yóʼo chíndeétáʼanña xíʼinyó ña̱ vií koo ña̱ ndaka̱xinyó keʼéyó, ta saátu táxiña ndee̱ ndaʼa̱yó ña̱ ndakundeéyó kachíñuyó nu̱ú Jehová (Rom. 12:11). ¿Ndáaña kivi keʼéyó ña̱ va̱ʼa taxi Jehová espíritu santora ndaʼa̱yó? Ná kaʼviyó tu̱ʼunra ta ná kǒo sandákooyó ña̱ kutáʼanyó xíʼin na̱ ñuura. Tá kéʼéyó ña̱yóʼo, saá kúúña xa̱a̱yó kuumiíyó ña̱ va̱ʼa ña̱ kúúmií Ndióxi̱ (Gál. 5:22, 23).

14. ¿Ndáaña kǒo xíniñúʼu keʼéyó tá kúni̱yó taxi Jehová espíritu santora ndaʼa̱yó? (Koto na̱ʼná).

¹⁴ Jehová táxivara espíritu santora ndaʼa̱yó, soo xíniñúʼu kiʼinníyó kuenta ña̱ kǒo keʼéyó ña̱ kini. Ña̱ va̱ʼa taxi Jehová espíritu santora ndaʼa̱yó, ndiʼi ña̱ kéʼéyó xíʼin ña̱ ndákanixi̱níyó xíniñúʼu viíní kooña. Tá ndákanixi̱níyó xa̱ʼa̱ ña̱ kini ta kéʼéyóña, saá va̱ása taxika Jehová espíritu santora ndaʼa̱yó (1 Tes. 4:7, 8). ¿Ndáa inkaka ña̱ xíniñúʼu kiʼinyó kuenta xíʼin? Ta̱ Pablo ni̱ka̱ʼa̱nra ña̱ kǒo kundasíyó kuniyó profecía ña̱ káʼa̱n Ndióxi̱ (1 Tes. 5:20). Ña̱ tu̱ʼun “profecía” kúni̱ kachiña ña̱ keʼé Ndióxi̱ chí nu̱únínu ta espíritu santora xi̱niñúʼura ña̱ va̱ʼa ka̱ʼa̱nra xíʼin na̱ yiví xa̱ʼa̱ ña̱yóʼo. Ta iin ña̱yóʼo kúú ña̱ káʼa̱n ña̱ xa̱a̱ ku̱nu̱míní kixaa̱ ki̱vi̱ káʼnu Jehová. Miíyó va̱ása ndákanixi̱níyó ña̱ kúma̱ní ku̱a̱ʼáníka tiempo saá kixaa̱ ki̱vi̱ Jehová, ta ni kǒo ndákanixi̱níyó ña̱ ya̱chi̱ka kuviyó tasaá kǒo kuniyó kixaa̱ ña̱ Armagedón. Chi kúnda̱a̱va-iniyó ña̱ si̱lóʼoní kúma̱ní tasaá kixaa̱ña. Ña̱kán kiʼinníyó kuenta xíʼin ndiʼi ña̱ kéʼéyó, ta ndiʼi ki̱vi̱ kéʼéyó ña̱ kútóo Jehová (2 Ped. 3:11, 12).

“VIÍNÍ NANDUKÚNDÓ XA̱ʼA̱ NDIʼI ÑA̱ʼA”

15. ¿Ndáaña xíniñúʼu keʼéyó tasaá kǒo taxiyó sandáʼvi na̱ yiví miíyó? (1 Tesalonicenses 5:21).

¹⁵ Si̱lóʼoní tiempo kúma̱ní tasaá na̱ sáa̱-ini xíni Ndióxi̱ kixáʼana ka̱ʼa̱nna: “Vitin va̱ʼaní ndóo ndiʼiyó ta kǒoka ña̱ sándi̱ʼi̱-iniyó” (1 Tes. 5:3). Na̱ chíñu kixáʼana ka̱ʼa̱nna tu̱ʼun vatá ta na̱ ta̱chí ndi̱va̱ʼa kúú na̱ chika̱a̱-inina ña̱ keʼéna ña̱yóʼo ta ku̱a̱ʼání na̱ yiví kandíxana ña̱ ka̱ʼa̱nna (Apoc. 16:13, 14). Soo, kǒo kuchiñuvína sandáʼvina miíyó tá ná keʼéyó ña̱ káʼa̱n texto yóʼo ña̱ “viíní nandukúyó xa̱ʼa̱ ndiʼi ña̱ʼa” (kaʼvi 1 Tesalonicenses 5:21). Ña̱ tu̱ʼun “nandukúndó” ti̱xin tu̱ʼun griego ka̱naña ta ña̱ tu̱ʼun yóʼo xi̱xiniñúʼunaña tá xi̱nandukúna xa̱ʼa̱ plata á oro ña̱ va̱ʼa kotona á ndixa ña̱ va̱ʼa kúúña. Ta saátu xíniñúʼu keʼé miíyó, saáchi xíniñúʼu nandukú va̱ʼayó xa̱ʼa̱ iin ña̱ʼa ña̱ xítoyó á ña̱ káʼviyó á ndixa ña̱ nda̱a̱ kúúña. Na̱ ñuu Tesalónica xi̱xiniñúʼu keʼéna ña̱yóʼo, soo ndáyáʼviníka ña̱ keʼé miíyóña tiempo vitin, saáchi xa̱a̱ ku̱nu̱míní kixaa̱ ña̱ gran tribulación. Nu̱úka ña̱ kandíxayó ndiʼi ña̱ káʼa̱n na̱ yiví, va̱ʼaka siʼna ná nandukúyó xa̱ʼa̱ ña̱yóʼo nu̱ú tu̱ʼun Ndióxi̱ ta saátu ná kotoyó ña̱ tává na̱ ñuura, saá kunda̱a̱-iniyó á ña̱ ndixa kúúña. Tá ná keʼéyó ña̱yóʼo, va̱ása taxiyó ña̱ sandáʼvi na̱ ta̱chí ndi̱va̱ʼa miíyó (Prov. 14:15; 1 Tim. 4:1).

16. ¿Ndáaña va̱ʼaní ndátuyó ndakiʼinyó chí nu̱únínu, ta ndáaña kivi keʼéyó vitin?

¹⁶ Kúnda̱a̱-iniyó ña̱ ka̱kuva miíyó na̱ ñuu Jehová tá ná kixaa̱ ña̱ gran tribulación, soo kǒo kúnda̱a̱-iniyó ndáaña kuu xíʼin iin tá iinyó (Sant. 4:14). Ni ná kuviyó tiempo vitin á ni ná ya̱ʼa tákuyó ñuyǐví xa̱á, Jehová taxira ña̱ kutakuyó ndiʼi tiempo. Na̱ ndátu ku̱ʼu̱n chí ndiví ndakutáʼanna xíʼin ta̱ Jesús, ta na̱ kundoo nu̱ú ñuʼú yóʼo koona nu̱ú iin ñuʼú ña̱ liviní ta kusi̱íní-inina. Nani ndátuyó kuu ña̱yóʼo, ná kǒo nandósóyó xa̱ʼa̱ ña̱ ndátuyó ndakiʼinyó chí nu̱únínu. Ta ná koo tu̱ʼvaníyó chi xa̱a̱ ku̱nu̱míní kixaa̱ ki̱vi̱ káʼnu Jehová.