¿Á xa̱a̱ íyo tu̱ʼvandó ña̱ kixaa̱ ña̱ gran tribulación?

1. ¿Nda̱chun xíniñúʼu ya̱chi̱ka ixatu̱ʼvayó miíyó ña̱ va̱ʼa ya̱ʼayó nu̱ú tu̱ndóʼo?

ÑA̱ IXATU̱ʼVAYÓ miíyó chindeétáʼanña xíʼinyó ña̱ va̱ása kuviyó. Tá kúú, na̱ yiví na̱ xa̱a̱ ya̱chi̱ka íyo tu̱ʼva tá kúma̱ní kixaa̱ iin tu̱ndóʼo sana ka̱kuvana tasaá kivi chindeétáʼanna xíʼin inkana. Nda̱a̱ táki̱ʼva íyo ña̱ ni̱ka̱ʼa̱n na̱ chíndeétáʼan xíʼin na̱ yiví, na̱ íyo chí Europa, “tá xa̱a̱ ya̱chi̱ka ná koo tu̱ʼvayó ña̱yóʼo chindeétáʼan xíʼinyó ña̱ va̱ása kuviyó”.

2. ¿Nda̱chun xíniñúʼu koo tu̱ʼvayó? (Mateo 24:44).

² Iin kama kixáʼa ña̱ gran tribulación (Mat. 24:21). Tá ná kuu ña̱yóʼo su̱ví ndiʼivína yi̱ʼví, saáchi savana xa̱a̱ xíni̱na ña̱ kixaa̱ña. Xa̱a̱ íyo 2,000 ku̱i̱ya̱ ta̱ Jesús ni̱ka̱ʼa̱nra xíʼin na̱ discípulora ña̱ xíniñúʼu koo tu̱ʼvana tá ná kuu ña̱yóʼo (kaʼvi Mateo 24:44). Tá ná kuniso̱ʼoyó consejo yóʼo, saá kúú ña̱ va̱ása ixayo̱ʼvi̱ña xíʼinyó ka̱kuyó ta saátu ña̱ chindeétáʼanyó xíʼin inkana (Luc. 21:36).

3. ¿Ndáa u̱ni̱ ña̱ʼa xíniñúʼu keʼéyó ña̱ va̱ʼa koo tu̱ʼvayó tá ná kixaa̱ ña̱ gran tribulación?

³ Ña̱ va̱ʼa koo tu̱ʼvayó tá ná kixaa̱ ña̱ gran tribulación, xíniñúʼu keʼéyó u̱ni̱ ña̱ʼa ña̱ ndáyáʼviní. ¿Ndáaña keʼéyó tá ná ka̱ʼa̱n na̱ ñuu Ndióxi̱ xíʼinyó ña̱ natúʼunyó xíʼin na̱ yiví ña̱ xa̱a̱ ku̱nu̱mí kixaa̱ ki̱vi̱ ña̱ ndiʼi-xa̱ʼa̱na? (Apoc. 16:21). Saá kúú ña̱ xíniñúʼu kundeé-iniyó ta kuniso̱ʼoyó ña̱ káʼa̱n Jehová saáchi miíra kundaa miíyó. ¿Ndáaña keʼéyó tá ná ku̱ndaa̱-iniyó ña̱ ndi̱ʼi-xa̱ʼa̱ ndiʼi ña̱ʼa ña̱ kúúmií na̱ hermano? (Hab. 3:17, 18). Tá ná kuu ña̱yóʼo saá chindeétáʼanyó xíʼinna, tasaá na̱ʼa̱yó ña̱ kúndáʼvi-iniyó xíniyóna. Ta, ¿ndáaña keʼéyó tá ná kixáʼa iin tiʼvi na̱ yiví ixandi̱va̱ʼana xíʼinyó? ¿Ndáaña keʼéyó tá ná ka̱ʼa̱nna xíʼinyó ña̱ kindo̱oyó iin veʼe ña̱ táñuní xíʼin na̱ hermanoyó? (Ezeq. 38:10-12). Tá ná kuu ña̱yóʼo saá kúú ña̱ na̱ʼa̱yó ña̱ kúʼvi̱ní-iniyó xíniyó na̱ hermanoyó.

4. ¿Nda̱chun xíniñúʼu chika̱a̱yó ndee̱ ña̱ kuʼvi̱ka-iniyó kuniyó inkana, ña̱ kundáʼvi-iniyó kuniyóna xíʼin ña̱ kundeé-iniyó?

⁴ Tu̱ʼun Ndióxi̱ chíndeétáʼanña xíʼinyó ña̱ kundeé-iniyó, ña̱ kundáʼvi-iniyó kuniyó inkana xíʼin ña̱ kuʼvi̱-iniyó kuniyóna. Lucas 21:19 káchiña: “Tá ná kundeé-inindó saá kúú ña̱ ka̱kundó”. Colosenses 3:12 káchiña: “Kundáʼvi-inindó kunindó inkana”. 1 Tesalonicenses 4:9, 10 káchiña: “Saáchi mií Ndióxi̱ kúú ta̱ sánáʼa̱ ndóʼó ndáa ki̱ʼva kuʼvi̱-inindó kunitáʼanndó. […] Soo káʼa̱nndi̱ xíʼinndó ñaniyó ña̱ ná ndakundeékandó keʼéndó ña̱yóʼo”. Tu̱ʼun yóʼo ni̱ka̱ʼa̱nnaña xíʼin na̱ cristiano na̱ xa̱a̱ va̱ʼaní xi̱keʼé u̱ni̱ saá ña̱ ni̱ka̱ʼa̱nyó xa̱ʼa̱ yóʼo. Soo xi̱niñúʼu chika̱a̱kana ndee̱ ña̱ keʼénaña. Ta saátu xíniñúʼu keʼé miíyó tiempo vitin. ¿Ndáaña chindeétáʼan xíʼinyó ña̱ keʼéyó ña̱yóʼo? Nu̱ú artículo yóʼo sakúaʼayó ndáaña ke̱ʼé na̱ cristiano na̱ ni̱xi̱yo tá siglo nu̱ú ña̱ va̱ʼa na̱ʼa̱na ña̱yóʼo, ta ndáa ki̱ʼva kundiku̱nyó yichi̱na. Ña̱yóʼo chindeétáʼanña xíʼinyó ña̱ koo tu̱ʼvayó tá ná kixaa̱ ña̱ gran tribulación.

CHIKAA̱ NDEE̱ ÑA̱ KUNDEÉ-INIÚN

5. ¿Ndáaña ke̱ʼé na̱ cristiano na̱ xi̱ndoo tá siglo nu̱ú ña̱ va̱ʼa kundeé-inina?

⁵ Na̱ cristiano na̱ ni̱xi̱yo tá siglo nu̱ú xi̱niñúʼu chika̱a̱na ndee̱ ña̱ kundeé-inina (Heb. 10:36). Su̱ví loʼo tu̱ndóʼo níxi̱yo nu̱úna saáchi xi̱ ixandi̱va̱ʼa na̱ judío na̱ xi̱niʼi yichi̱ ti̱xin veʼe-ñu̱ʼu xíʼinna, ta saátu xi̱ ixandi̱va̱ʼa na̱ chíñu romano xíʼinna xa̱ʼa̱ ña̱ xi̱ndasakáʼnuna Ndióxi̱, xi̱ ixandi̱va̱ʼatu na̱ veʼena xíʼinna (Mat. 10:21). Ta xi̱xiniñúʼu chikaa̱na ndee̱ ña̱ va̱ása kuniso̱ʼona ña̱ vatá ña̱ xi̱sanáʼa̱ na̱ apóstata, chi na̱yóʼo xi̱kuni̱na ndataʼvína na̱ congregación xíʼin ña̱ xi̱sanáʼa̱na (Hech. 20:29, 30). Soo nisaá na̱ cristiano yóʼo chi̱kaa̱na ndee̱ ña̱ kundeé-inina ya̱ʼana nu̱ú tu̱ndóʼo (Apoc. 2:3). ¿Ndáaña chi̱ndeétáʼan xíʼinna? Ña̱ nda̱kanixi̱nína xa̱ʼa̱ na̱ ni̱xi̱yo tiempo xi̱naʼá, tá kúú xa̱ʼa̱ ta̱ Job (Sant. 5:10, 11). Ni̱ka̱ʼa̱nna xíʼin Jehová ña̱ taxira ndee̱ ndaʼa̱na ña̱ ndakú koo inina (Hech. 4:29-31). Ta saátu xi̱kandíxana ña̱ ku̱a̱ʼání ña̱ va̱ʼa taxi Jehová ndaʼa̱na xa̱ʼa̱ ña̱ kúndeé-inina (Hech. 5:41).

6. ¿Ndáaña sákuaʼayó xíʼin ña̱ ke̱ʼé ñá Merita tá ni̱ya̱ʼañá nu̱ú tu̱ndóʼo?

⁶ Iin ña̱ chindeétáʼan xíʼinyó ña̱ kundeé-iniyó kúú, ña̱ kaʼviyó Biblia ta ndakanixi̱níyó xa̱ʼa̱ na̱ ni̱xi̱yo tiempo xi̱naʼá xíʼin na̱ va̱xi nu̱ú tutu ña̱ tává na̱ ñuu Ndióxi̱. Ña̱yóʼo kúú ña̱ chi̱ndeétáʼan xíʼin iin ñá hermana ñá ñuu Albania ñá naní Merita, ña̱ kundeé-iniñá tá xi̱ ixandi̱va̱ʼa na̱ veʼeñá xíʼinñá. Ñáyóʼo káchiñá: “Tá ka̱ʼvii̱ nu̱ú Biblia ña̱ káʼa̱n xa̱ʼa̱ ta̱ Job, nda̱a̱ níma̱i̱ ni̱xa̱a̱ ña̱yóʼo. Ndeéní ni̱xo̱ʼvi̱ ta̱yóʼo ta va̱ása níkunda̱a̱-inira ndáana ta̱xi tu̱ndóʼo ndaʼa̱ra. Nda̱a̱ táki̱ʼva íyo ña̱ ni̱ka̱ʼa̱nra nu̱ú Job 27:5, ‘nda̱kú koo inii̱ xíʼin Ndióxi̱ nda̱a̱ ná kuvii̱’. Ta̱ Job ni̱xo̱ʼvi̱níra, soo va̱ása kítáʼanña xíʼin ña̱ xóʼvi̱ yi̱ʼi̱ saáchi ndeéníka ña̱ ndo̱ʼo ta̱kán, ta yi̱ʼi̱ kúnda̱a̱va-inii̱ ndáana táxi tu̱ndóʼo yóʼo ndaʼa̱yó”.

7. Ni kǒo tu̱ndóʼo ña̱ ndeé yáʼún nu̱ú vitin soo, ¿ndáaña kivi keʼún?

⁷ Inka ña̱ chindeétáʼan xíʼinyó ña̱ kundeé-iniyó kúú ña̱ ka̱ʼa̱n ni̱ʼiyó xíʼin Jehová xa̱ʼa̱ ña̱ ndóʼoyó (Filip. 4:6; 1 Tes. 5:17). Sana kǒoví tu̱ndóʼo ña̱ ndeé yáʼún nu̱ú vitin. Soo, ¿ndáaña keʼún tá sáa̱ún á ndíʼi̱-iniún ta kǒo xíni̱ún ndáaña keʼún? Tá ndóʼún ña̱yóʼo, ¿á káʼún xíʼin Jehová ña̱ chindeétáʼanra xíʼún? Tá saá kéʼún, ña̱yóʼo chindeétáʼan xíʼún ña̱ ka̱ʼún xíʼinra tá ná kixi tu̱ndóʼo ña̱ yo̱ʼvi̱ka nu̱ún chí nu̱únínu. Saá kivi kandíxaún ña̱ mií Ndióxi̱ xíni̱ra ama kúú ña̱ chindeétáʼanra xíʼún ta ndáa ki̱ʼva keʼéraña (Sal. 27:1, 3).

8. Ña̱ kundeé-iniyó nda̱a̱ táki̱ʼva ke̱ʼé ñá Mira, ¿ndáa ki̱ʼva chindeétáʼanña xíʼinyó chí nu̱únínu? (Santiago 1:2-4; koto na̱ʼná).

⁸ Tá tiempo vitin kúndeé-iniyó tá yáʼayó nu̱ú tu̱ndóʼo saá kúú ña̱ kundeé-iniyó ya̱ʼayó nu̱ú ña̱ gran tribulación (Rom. 5:3). ¿Nda̱chun káʼa̱nyó ña̱yóʼo? Ku̱a̱ʼání na̱ hermano káʼa̱nna ña̱ tá kúndeé-inina yáʼana nu̱ú iin tu̱ndóʼo ña̱yóʼo ndásandakúña-inina ña̱ kundeé-inina ya̱ʼana nu̱ú inkaña, tá kíʼinna kuenta ña̱ mií Jehová kúú ta̱ chíndeétáʼan xíʼinna tá yáʼana nu̱ú tu̱ndóʼo saá kúú ña̱ kándíxaníkana ña̱ miíra chindeétáʼan xíʼinna tá ná kixi inkaka tu̱ndóʼo nu̱úna (kaʼvi Santiago 1:2-4). Saá ndákanixi̱ní iin ñá precursora ñá naní Mira ñá íyo chí Albania, ñá hermana yóʼo ndákanixi̱níñá ña̱ iinlá miíñá kúú ñá yáʼa nu̱ú ku̱a̱ʼáníka tu̱ndóʼo, soo tá ndóʼoñá ña̱yóʼo kíxáʼa ndákaʼánñá ndáa ki̱ʼva chi̱ndeétáʼan Jehová xíʼinñá ti̱xin 20 ku̱i̱ya̱ ña̱ ni̱ya̱ʼa, ta káʼa̱nñá xíʼin miíñá: “Nda̱kú koo iniún, kǒo sandákoún ña̱ ndasakáʼnún Jehová chi xa̱a̱ ku̱a̱ʼání tu̱ndóʼo ni̱ya̱ʼún nu̱ú ta ki̱ʼún kuenta ña̱ chi̱ndeétáʼanva Jehová xíʼún”. Saátu miíún kivi ndakaʼún ndáa ki̱ʼva xa̱a̱ chíndeétáʼan Jehová xíʼún ña̱ ya̱ʼún nu̱ú tu̱ndóʼo. Kíʼinvara kuenta ña̱ kúndeé-iniún tá yáʼún nu̱ú tu̱ndóʼo ta ku̱a̱ʼaní ña̱ va̱ʼa taxira ndaʼún (Mat. 5:10-12). Ña̱kán, tá ná kixáʼa ña̱ gran tribulación xa̱a̱ chika̱a̱-iniún ña̱ kundeé-iniún ta kǒo yi̱ʼvíkaún.

NA̱ʼA̱ ÑA̱ KÚNDAʼVI-INIÚN XÍNIÚN INKANA

9. ¿Ndáa ki̱ʼva ni̱na̱ʼa̱ na̱ congregación na̱ Antioquia ña̱ Siria ña̱ kúndaʼvi-inina xínina inkana?

⁹ Ná ndakanixi̱níyó ndáaña ndo̱ʼo na̱ cristiano na̱ xi̱ndoo chí Judea tá xi̱ndika̱a̱ní so̱ko. Tá ku̱nda̱a̱-ini na̱ cristiano na̱ xi̱ndoo chí Antioquia ña̱ Siria xa̱ʼa̱ ña̱yóʼo, ku̱ndaʼvi-inina xi̱ninana ta ni̱na̱ʼa̱na ña̱yóʼo xíʼin ña̱ ke̱ʼéna. Sava na̱yóʼo loʼo ña̱ʼa xi̱kuumiína ta savatuna ku̱a̱ʼáña xi̱kuumiína, soo ndiʼina chi̱ndaʼána ña̱ʼa ku̱a̱ʼa̱n ndaʼa̱ na̱ xi̱ndoo chí Judea (Hech. 11:27-30). Ni xíka xi̱ndoo na̱ cristiano na̱ ni̱ya̱ʼa nu̱ú tu̱ndóʼo yóʼo, soo na̱ ni̱xi̱yo chí Antioquia ña̱ Siria chi̱ndeétáʼanvana xíʼinna (1 Juan 3:17, 18).

10. ¿Ndáa ki̱ʼva na̱ʼa̱yó ña̱ kúndaʼvi-iniyó xíniyó na̱ hermanoyó tá ku̱a̱yaʼana nu̱ú tu̱ndóʼo? (Koto na̱ʼná).

¹⁰ Saátu miíyó kivi na̱ʼa̱yó ña̱ kúndaʼvi-iniyó xíniyó na̱ hermanoyó tá kúnda̱a̱-iniyó ña̱ yáʼana nu̱ú tu̱ndóʼo. Ta ndi̱ku̱n kama ná nda̱ka̱tu̱ʼúnyó na̱ anciano ndáaña kivi keʼéyó. Ná taxiyó xu̱ʼún ña̱ kúúmiíyó ndaʼa̱ na̱ ñuu Ndióxi̱, ta ná ka̱ʼa̱nyó xíʼin Jehová xa̱ʼa̱ na̱ hermano na̱ yáʼa nu̱ú tu̱ndóʼo (Prov. 17:17).b Tá kúú, ku̱i̱ya̱ 2020, yáʼaka 950 na̱ Comité ña̱ Socorro ku̱vaʼa iníísaá ñuyǐví ña̱ va̱ʼa chindeétáʼanna xíʼin na̱ hermano xa̱ʼa̱ ña̱ ndeéní xi̱ndika̱a̱ kue̱ʼe̱ ña̱ COVID-19. Táxiníyó tíxa̱ʼvi ndaʼa̱ ndiʼi na̱ chíndeétáʼan xíʼin na̱ yáʼa nu̱ú tu̱ndóʼo. Xa̱ʼa̱ ña̱ kúndáʼvi-inina xínina na̱ hermano chíndeétáʼanna xíʼinna ta táxina ña̱ʼa ña̱ xíniñúʼuna. Saátu xíniñúʼuna tu̱ʼun Ndióxi̱ ña̱ sándi̱kona-inina. Ta ndásaviína veʼena, ta saátu veʼe nu̱ú ndákutáʼanna ña̱ ndasakáʼnuna Ndióxi̱ (chitáʼanña xíʼin 2 Corintios 8:1-4).

11. ¿Ndáa ki̱ʼva ndásakáʼnuyó Jehová tá chíndeétáʼanyó xíʼin inkana?

¹¹ Tá chíndeétáʼanyó xíʼin na̱ hermanoyó na̱ yáʼa nu̱ú tu̱ndóʼo, inka na̱ yiví xítona ña̱yóʼo. Tá kúú, ku̱i̱ya̱ 2019 tá huracán Dorian sa̱ndíʼi-xa̱ʼa̱ra iin Salón chí ñuu Bahamas. Tá ki̱xáʼana ndásaviína Salón kán, na̱ hermano ni̱ka̱ʼa̱nna xíʼin iin ta̱ contratista nda̱saa kiʼinra ña̱ ndasaviíra ña̱yóʼo, tasaá ni̱ka̱ʼa̱nra xíʼinna: “Kúnii̱ chindeétáʼíi̱n xíʼin religióndó, taxii̱ máquina tú kuniñúʼundó xíʼin inkaka ña̱ʼa ta kǒo xu̱ʼún kiʼi̱n xa̱ʼa̱ ña̱yóʼo, ta saátu kǒo xu̱ʼún kiʼi̱n xa̱ʼa̱ chiñu ña̱ keʼíi̱. Ndákanda̱ní-inii̱ ndáa ki̱ʼva kéʼéndó xíʼin na̱ migondó”. Ku̱a̱ʼání na̱ yiví va̱ása xíni̱vína xa̱ʼa̱ Jehová, soo xítona ndáaña kéʼé miíyó na̱ ndásakáʼnura. Kúsi̱íní-iniyó saáchi xíʼin ña̱ kéʼéyó kivi xa̱a̱ inka na̱ yiví ndasakáʼnuna Jehová chi ta̱kán “kúndáʼviní-inira xínira miíyó” (Efes. 2:4).

12. Tá kúndáʼvi-iniyó xíniyó na̱ yiví tiempo vitin, ¿ndáa ki̱ʼva chindeétáʼan ña̱yóʼo xíʼinyó ti̱xin ña̱ gran tribulación? (Apocalipsis 13:16, 17).

¹² Tá ná koo ña̱ gran tribulación saá kúú ña̱ xíniñúʼu kundáʼviníka-iniyó kuniyó inkana, saáchi Biblia káʼa̱nña, na̱ kǒo chíndeétáʼan xíʼin na̱ chíñu ñuyǐví yóʼo kooní tu̱ndóʼo nu̱úna tiempo vitin ta saátu tá ná koo ña̱ gran tribulación (kaʼvi Apocalipsis 13:16, 17). Tá ná kuu ña̱yóʼo saá kúú ña̱ chindeétáʼanníkayó xíʼin na̱ hermanoyó ta taxiyó ña̱ xíniñúʼuna. Tá ná kixi tátayó Jesucristo ña̱ ndatiinra ku̱a̱chi xíʼin na̱ yiví, kúni̱yó ña̱ ndani̱ʼíra miíyó ña̱ chíndeétáʼanyó xíʼin inkana á ña̱ kúndáʼvi-iniyó xíniyóna. Tá saá kéʼeyó, ka̱ʼa̱nra ña̱yóʼo xíʼinyó: “Ndakiʼinndó ña̱ʼa va̱ʼa xa̱ʼa̱ Reino Ndióxi̱ ña̱ i̱xava̱ʼara xa̱ʼa̱ndó” (Mat. 25:34-40).

KUʼVI̱NÍKA-ININDÓ KUNINDÓ NA̱ HERMANO

13. ¿Ndáaña ke̱ʼé na̱ cristiano na̱ ni̱xi̱yó tá siglo nu̱ú ña̱ kuʼvi̱ka-inina kunitáʼanna? (Romanos 15:7).

¹³ Tá siglo nu̱ú ndiʼi na̱ yiví xi̱kiʼinna kuenta ña̱ xi̱kuʼvi̱ní-ini na̱ cristiano xi̱xinitáʼanna. Soo, ¿á kǒo ní ixayo̱ʼvi̱ña xíʼinna ña̱ na̱ʼa̱na ña̱yóʼo? Ná ka̱ʼa̱nyó xa̱ʼa̱ na̱ hermano na̱ xi̱ñuʼu congregación ña̱ ñuu Roma. Na̱ hermano yóʼo xa̱a̱ síín síín ni̱xi̱yona, savana xi̱kuuna na̱ judío ta va̱ʼaní xi̱xiniso̱ʼona ña̱ xi̱ka̱ʼa̱n Ley ta̱ Moisés, soo saátu ni̱xi̱yo sava na̱ ke̱e inka ñuu ta xa̱a̱ síín síín costumbre xi̱kuumiína. Savana xi̱kuuna esclavo ta savana va̱ása níxikuuna esclavo, ta nda̱a̱ xi̱kuumiína na̱ xi̱kachíñu nu̱úna. Xa̱ʼa̱ ña̱kán, ¿ndáaña chindeétáʼan xíʼinna ña̱ kuʼvi̱-inina kunitáʼanna ta kǒo kundasí táʼanna? Ña̱yóʼo ni̱ka̱ʼa̱n ta̱ apóstol Pablo xíʼinna: “Viíní ndakiʼin-táʼanndó” (kaʼvi Romanos 15:7). Ña̱ tu̱ʼun “viíní ndakiʼin-táʼanndó” kúni̱ kachiña, ña̱ vií ndakiʼinyó na̱ yiví ta va̱ʼa koo iniyó xíʼinna. Tá kúú, iin yichi̱ ta̱ Pablo ni̱ka̱ʼa̱nra xíʼin ta̱ Filemón ña̱ viíní ná ndakiʼinra ta̱ Onésimo ta̱ xi̱kuu esclavora, ta ni̱ka̱ʼa̱nra xíʼinra: “Viíní ndakiʼúnra” (Filem. 17). Ñá Priscila xíʼin ta̱ Áquila ku̱a̱ʼáníka ña̱ʼa xi̱xini̱na xa̱ʼa̱ Ndióxi̱ nu̱úka ña̱ xi̱xini̱ ta̱ Apolos, soo viíní ke̱ʼéna xíʼinra ta nda̱kiʼinnara ku̱a̱ʼa̱n xíʼinna (Hech. 18:26). Ni xa̱a̱ síín síín ni̱xi̱yo na̱ xi̱ndasakáʼnu Ndióxi̱ tiempo xi̱naʼá, soo kǒo nítaxina ña̱ ndataʼvi ña̱yóʼo miína saáchi viíní xi̱kitáʼanna.

14. ¿Ndáa ki̱ʼva ni̱na̱ʼa̱ ñá Anna xíʼin yiíñá ña̱ kúʼvi̱-inina xínina inkana?

¹⁴ Saátu miíyó kivi na̱ʼa̱yó ña̱ kúʼvi̱-iniyó xíniyó na̱ hermanoyó ta vií kutáʼanyó xíʼinna. Tá ná keʼéyó ña̱yóʼo, saátu keʼé miína xíʼinyó (2 Cor. 6:11-13). Ña̱yóʼo kúú ña̱ ndo̱ʼo ñá Anna xíʼin yiíñá. Na̱yóʼo xi̱kuuna misionero chí África Occidental. Tá sa̱kán ni̱xa̱a̱na inka ñuu ña̱ ndíka̱a̱ chí África ki̱xáʼa kue̱ʼe̱ ña̱ COVID-19 ta kǒo níkivika ndatakana xíʼin na̱ hermano ti̱xin congregación. ¿Ndáaña ke̱ʼé na̱ matrimonio yóʼo ña̱ va̱ʼa na̱ʼa̱na ña̱ kúʼvi̱-inina xínina na̱ hermano kán? Ke̱ʼéna videollamada nu̱úna ta ni̱ka̱ʼa̱nna xíʼinna ña̱ xi̱kuni̱nína ndakutáʼanna xíʼinna. Na̱ hermano kán ku̱tóonína ña̱ ke̱ʼé ñá Anna xíʼin yiíñá, ñakán ki̱xáʼana chíndaʼána mensaje nu̱úna ta saátu ke̱ʼéna videollamada nu̱úna. ¿Nda̱chun chi̱kaa̱ní na̱ misionero yóʼo ndee̱ ña̱ vií kutáʼanna xíʼin inka na̱ hermano? Ñá Anna káchiña: “Ña̱ chíndeétáʼan xíʼin ña̱ na̱ʼi̱ ña̱ kúʼvi̱-inii̱ xínii̱ inkana kúú, ña̱ ndákaʼíi̱n xa̱ʼa̱ ndiʼi ña̱ ke̱ʼé na̱ hermano xa̱ʼa̱ miíi̱ ta saátu xa̱ʼa̱ na̱ veʼi̱, saáchi ni̱na̱ʼa̱na ña̱ kúʼvi̱ní-inina xínina ndi̱ʼi̱”.

15. ¿Ndáaña sákuaʼayó xíʼin ña̱ ke̱ʼé ñá Vanessa? (Koto na̱ʼná).

¹⁵ Ti̱xin iin tá iin congregación íyo ku̱a̱ʼání na̱ ñaniyó xíʼin ku̱ʼvayó, xa̱a̱ síín síín ñuu na̱yóʼo ta saátu xa̱a̱ síín síín xa̱ʼnu iin tá iinna, ¿ndáaña chindeétáʼan xíʼinyó ña̱ kuʼvi̱-iniyó kuniyó ndiʼina? Ña̱ kotoyó ña̱ va̱ʼa ña̱ kúúmiína. Iin ñá hermana ñá naní Vanessa ñá ñuu Nueva Zelanda i̱xayo̱ʼvi̱níña xíʼinñá ña̱ vií kutáʼanñá xíʼin sava na̱ hermano na̱ ñúʼu congregaciónñá. Saáchi xi̱keʼéna sava ña̱ʼa ña̱ xi̱sasáa̱níñá, soo nu̱úka ña̱ kuxíkañá nu̱úna ki̱xáʼañá kítáʼankañá xíʼinna. Xa̱ʼa̱ ña̱kán ki̱ʼinñá kuenta ndáaña va̱ʼa kúú ña̱ xíto Jehová ña̱ kéʼé na̱ hermano yóʼo. Ñáyóʼo káchiñá: “Ni̱ka̱ʼa̱nna xíʼin yiíi̱ ña̱ koora superintendente ña̱ circuito ta xa̱ʼa̱ ña̱yóʼo ku̱a̱ʼání na̱ hermano kítáʼandi̱ xíʼin vitin. Síín íyo iin tá iin na̱yóʼo ta va̱ʼaní kítáʼíi̱n xíʼin ndiʼina. Jehová kútóoníra ña̱ xa̱a̱ síín síín íyoyó ta saátu ndákanixi̱ní yi̱ʼi̱va, saáchi kútóíi̱ ña̱ xa̱a̱ síín síín íyo iin tá iin na̱ hermano”. Tá saá, ¿ndáa ki̱ʼva na̱ʼa̱yó ña̱ kúʼvi̱-iniyó xíniyó na̱ hermanoyó? Ña̱ kotoyó ña̱ va̱ʼa ña̱ kúúmiína nda̱a̱ táki̱ʼva kéʼé Jehová (2 Cor. 8:24).

16. ¿Nda̱chun xíniñúʼu kuʼvi̱níka-iniyó kunitáʼanyó tá xa̱a̱ ná kundika̱a̱ ña̱ gran tribulación? (Koto na̱ʼná).

¹⁶ Tá xa̱a̱ ndíka̱a̱ ña̱ gran tribulación xíniñúʼu kuʼvi̱níka-iniyó kuniyó na̱ hermanoyó. ¿Ndáa ki̱ʼva kundaa Jehová miíyó tá ná kixáʼa ña̱ gran tribulación? Ná ndakaʼányó ndáaña ni̱ka̱ʼa̱n Jehová xíʼin na̱ ñuura keʼéna tá xa̱a̱ ku̱numí ndiʼi-xa̱ʼa̱ ñuu Babilonia: “Kamandó na̱ ñui̱, ki̱ʼvindó cuarto ña̱ ñúʼu chí maá, tá xa̱a̱ ni̱ki̱ʼvindó ndakasindó yéʼé, chise̱ʼéndó miíndó loʼo tiempo nda̱a̱ ná ya̱ʼa tu̱ndóʼo” (Isa. 26:20). Ta sananí miíyó keʼétuyó ña̱ káʼa̱n tu̱ʼun yóʼo tá ná koo ña̱ gran tribulación. Ña̱ tu̱ʼun “cuarto ña̱ ñúʼu chí maá” sana ndanaʼa̱ña congregación ña̱ kúúmiíyó tiempo vitin. Tá va̱ʼaní kítáʼanyó Jehová kundaavara miíyó tá xa̱a̱ ná koo ña̱ gran tribulación saáchi miíra ni̱ka̱ʼa̱n ña̱ keʼéra ña̱yóʼo. Ña̱kán, tá kéʼé na̱ hermano ña̱ va̱ása va̱ʼa xíʼinyó, ná ixakáʼnu-iniyó xa̱ʼa̱na ta ná na̱ʼa̱yó ña̱ ndixa kúʼvi̱-iniyó xíniyóna, saáchi tá kǒo vií kítáʼanyó á kǒo kúʼvi̱-iniyó xíni táʼanyó ndiʼi-xa̱ʼa̱vayó.

TIEMPO VITIN IXATU̱ʼVAÚN MIÍÚN

17. Tá xa̱a̱ íxatu̱ʼvayó miíyó tiempo vitin, ¿ndáa ki̱ʼva chindeétáʼan ña̱yóʼo xíʼinyó tá xa̱a̱ ná koo ña̱ gran tribulación?

¹⁷ Tá ná kixaa̱ “ki̱vi̱ káʼnu Jehová” ndiʼi na̱ yiví kundi̱ʼiní-inina (Sof 1:14, 15). Miíyó na̱ ndásakáʼnu Jehová ya̱ʼayó nu̱ú sava tu̱ndóʼo. Soo tá vitin xa̱a̱ ki̱xáʼayó íxatu̱ʼvayó miíyó ña̱yóʼo chindeétáʼanña xíʼinyó tá ná kixaa̱ ki̱vi̱ kán, ña̱ kǒo ndi̱ʼi-iniyó ta kivi chindeétáʼanyó xíʼin inkana. Ni nda̱a̱ ndáaka tu̱ndóʼo ná kixi nu̱úyó kuchiñuvayó ya̱ʼayó nu̱úña tá kúndeé-iniyó. Saátu tá kúndáʼvi-iniyó xíniyó na̱ hermano taxiyó ña̱ xíniñúʼuna ta chindeétáʼanyó xíʼinna. Ta xa̱ʼa̱ ña̱ kúʼvi̱-iniyó xíniyóna viíní kitáʼanyó xíʼinna. Jehová taxira ña̱ kutakuyó ndiʼi saá tiempo ta ni kǒo ndakaʼánkayó xa̱ʼa̱ ndiʼi tu̱ndóʼo ña̱ yáʼayó tiempo vitin (Is. 65:17).