Ña̱ xíniñúʼu kuniñúʼuyó ña̱ va̱ʼa sanáʼa̱yó
1. ¿Nda̱chun inkáchi kúni̱ koo chiñu ña̱ kéʼéyó xíʼin na̱ albañil?
1 Na̱ albañil ku̱a̱ʼání ña̱ʼa xíniñúʼuna nu̱ú káchíñuna. Savaña xíniñúʼu ni̱ʼina ta savaña sava yichi̱ kuití xíniñúʼunaña. Na̱ albañil na̱ xíni̱ va̱ʼa kachíñu ndiʼi yichi̱ níʼina caja nu̱ú ñúʼu ña̱ xíniñúʼu ni̱ʼina, chi ña̱yóʼo kúú ña̱ xa̱sakuaʼa va̱ʼana kuniñúʼuna. Tu̱ʼun Ndióxi̱ káʼa̱nña ña̱ ná chika̱a̱yó ndée ña̱ sakuaʼayó natúʼunyó xa̱ʼa Ndióxi̱, ña̱kán va̱ʼa ná kǒo kukaʼan nu̱úyó natúʼunyó xa̱ʼara (2 Tim. 2:15). ¿Ndáaña kúú ña̱ xíniñúʼu ni̱ʼiyó? Ña̱ Biblia kúúña, ña̱yóʼo kúú ña̱ xíniñúʼuyó ña̱ va̱ʼa sanáʼa̱yó na̱ yiví (Mat. 28:19, 20). Xa̱ʼa ña̱yóʼo kúú ña̱ xíniñúʼu chika̱a̱níyó ndée ña̱ sakuaʼa va̱ʼayó kuniñúʼuyóña. Saátu xíniñúʼu sakuaʼayó kuniñúʼuyó inka tutu ña̱ táxi na̱ ñuu Ndióxi̱ ndaʼa̱yó ña̱ va̱ʼa sanáʼa̱yó na̱ yiví (Prov. 22:29).
2. ¿Ndáa ña̱ʼa kúú ña̱ xíniñúʼuyó ña̱ va̱ʼa sánáʼa̱kayó na̱ yiví?
2 Ña̱ʼa ña̱ xíniñúʼuyó ña̱ va̱ʼa sanáʼa̱yó. Xa̱kúúmiíyó Biblia, ¿ndáaka tutu kúúmiíyó? Libro ña̱ xíniñúʼu va̱ʼakayó ña̱ káʼviyó xíʼin na̱ yiví kúú ña̱ ¿Qué enseña realmente la Biblia? Tándíʼi káʼviyóña xíʼinna, kíxaʼáyó xíʼin libro “Manténganse en el amor de Dios” xíʼin ña̱yóʼo sakuaʼa va̱ʼakana ña̱ va̱ʼa ndaka̱xinna keʼéna ña̱ káʼa̱n Biblia. Xa̱ʼa ña̱yóʼo kúú ña̱ xíniñúʼu sakuaʼa va̱ʼayó ña̱ kuniñúʼuyó u̱vi̱ saá libro yóʼo. Tá kúú folleto ña̱ naní Ndióxi̱ káʼa̱nra tu̱ʼun va̱ʼa xíʼinyó xíniñúʼuyóña ña̱ kíxaʼáyó káʼviyó xíʼin na̱ yiví. Tá territorio ña̱ kúúmiíyó ndáni̱ʼíyó na̱ yiví na̱ va̱ása xíni̱ kaʼvi á na̱ káʼa̱n inka tu̱ʼun ta kǒo ku̱a̱ʼá tutu tu̱ʼun ña̱ káʼa̱nna á íyoña soo loʼoníña íyo, kivi kuniñúʼuyó folleto ña̱ naní Kuniso̱ʼo ña̱ káʼa̱n Ndióxi̱ á Kuniso̱ʼo ña̱ káʼa̱n Ndióxi̱ ta kutiakuún ndisaá tíempo. Inka folleto ña̱ kivi kuniñúʼuyó kúú ¿Ndáana kéʼé ña̱ kúni̱ Jehová tíempo vitin?, ña̱yóʼo chindeéña na̱ káʼviyó xíʼin ña̱ va̱ʼa sakuaʼana ndáa ki̱ʼva íyo na̱ ñuu Ndióxi̱. Saatú video va̱ʼa chindeéñana, ña̱kán xíniñúʼu sakuaʼayó ña̱ kuniñúʼuyóña xíʼinna. Ña̱yóʼo kúú sava video ña̱ va̱ʼa kuniñúʼuyó¿Ndachun kaʼviyó Biblia?,¿Ndáaña kéʼé na̱ testigo Jehová nu̱u ndátakana? ta ¿Ndáa ki̱ʼva sánáʼa̱ na̱ testigo Jehová na̱ yiví?
3. ¿Ndáaña sakuaʼayó nu̱ú tutu Ña̱ Nátúʼunyó xa̱ʼa Reino ña̱ va̱xi chí nu̱ú loʼoka?
3 Nu̱ú tutu ña̱ naní Ña̱ Nátúʼunyó xa̱ʼa Reino ña̱ va̱xi chí nu̱ú loʼoka sakuaʼayó ndáa ki̱ʼva kuniñúʼu viíyó tutu tu̱ʼun Ndióxi̱ ña̱ va̱ʼa sánáʼa̱yó na̱ yiví. Tá ná chika̱a̱yó ndée ña̱ kuniñúʼu viíyóña, kúni̱ kachiña ndíku̱nyó consejo ña̱ va̱xi nu̱ú Biblia: “Kiʼinníún kuenta xíʼin chiñu kéʼún xíʼin ña̱ sánáʼún. Ndakundeékaún keʼún ña̱yóʼo, chi saá kúú ña̱ saka̱kún miíún ta saka̱kutún na̱ xíniso̱ʼo ña̱ káʼún” (1 Tim. 4:16).