“Siʼnaka ndasavií ku̱a̱chi ña̱ kúúmiíún xíʼin ñaniún”

Ndakanixi̱ní ña̱ ñuu Galilea íyoún, tá tiempo ña̱ ni̱xi̱yo ta̱ Jesús. Miíún xíʼin ku̱a̱ʼáníka na̱ yiví na̱ xa̱a̱ síín xa̱a̱ síín ñuu, ke̱endó ku̱a̱ʼa̱nndó vikó ña̱ Cabaña ña̱ íyo ñuu Jerusalén, soo tá xa̱a̱ ni̱xa̱a̱ndó kán, xa̱a̱ ku̱a̱ʼání kúú na̱ yiví íyo. Yóʼó kúni̱ún taxiún iin kití ndaʼa̱ Jehová, xa̱ʼa ña̱kán nda̱kiʼún ku̱a̱ʼún nda̱a̱ nu̱ú íyo templo ta níʼún iin ti̱xúʼu ku̱a̱ʼa̱n xíʼún. Tá ni̱xa̱ún ini templo, xa̱a̱ chútú na̱ yiví na̱ kúni̱ taxi ña̱ʼa ndaʼa̱ Jehová. Vitin xa̱a̱ yóʼó ya̱ʼa ña̱ taxiún ti̱xúʼu ndaʼa̱ na̱ su̱tu̱ ña̱ kaʼnínarí nu̱ú Jehová. Soo saá nda̱kaʼún ña̱ íyo iin na̱ kúúmiíún ku̱a̱chi xíʼin, ta sana ndíka̱a̱na ini templo á sanatu íyona ti̱xin ñuu kán. Ta̱ Jesús ni̱ka̱ʼa̱nra ndáaña xíniñúʼu keʼún (kaʼvi Mateo 5:24). ¿Ndáaña xíniñúʼu keʼún ña̱ va̱ʼa kundikún ña̱ ni̱ka̱ʼa̱n ta̱ Jesús? Ta ¿ndáaña xíniñúʼu keʼétu na̱ kúúmiíún ku̱a̱chi xíʼin ña̱ va̱ʼa kundiku̱nna ña̱ ni̱ka̱ʼa̱n ta̱ Jesús? Kaʼyí ndáaña keʼún nu̱ú ña̱ va̱xi yóʼo.

ÑA̱ XÍNIÑÚʼU KEʼÚN

• Tá ndixa íyo ña̱ ke̱ʼún xíʼinna ta xa̱ʼa ña̱kán sáa̱na, saá kúúña xíniñúʼu ka̱ʼún xíʼinna.

• Ndukún ndáa ki̱ʼva ka̱ʼún xíʼinna ña̱ va̱ʼa nuu-inina ta ná ndakanixi̱nína ña̱ ku̱a̱chi miína kúúña chi kamaní sáa̱na.

• Kuniso̱ʼún ña̱ káʼa̱nna ta va̱ása kama sa̱ún, ni va̱ása kúnda̱a̱-iniún ndáaña ku̱u ta ka̱ʼún xíʼinna ná koo káʼnu-inina xa̱ʼún.

ÑA̱ XÍNIÑÚʼU KEʼÉ NA̱KÁN

• Natúʼunna xíʼin sava na̱ hermano ti̱xin congregación ña̱ keʼún xíʼinna ña̱ va̱ʼa ná sa̱a̱-ini na̱kán kunina yóʼó.

• Ka̱ʼa̱nna xíʼún xa̱ʼa ndiʼi ña̱ ke̱ʼún, chi kúni̱na ná ka̱ʼún ña̱ ku̱a̱chi miíún kúúña.

• Taxina tixaʼvi ndaʼún xa̱ʼa ña̱ ndakú ni̱xi̱yo iniún ña̱ ndu̱kún ña̱ káʼnu-ini nu̱úna, tasaá koo káʼnu-inina xa̱ʼún.

Tiempo vitin va̱ása táxikayó kití ndaʼa̱ Ndióxi̱ tá ndásakáʼnuyóra, soo ¿nda̱chun ni̱ka̱ʼa̱n ta̱ Jesús ña̱ xíniñúʼu vií kutáʼanyó xíʼin na̱ hermano tasaá ndasakáʼnuyó Ndióxi̱?