Ndáa ki̱ʼva kuʼvi̱-iniyó kuniyó Ndióxi̱ xíʼin inka na̱ yiví

Miíyó na̱ ndásakáʼnu Ndióxi̱ va̱ása xíniñúʼukaví saxínuyó ndiʼi ña̱ káʼa̱n ley ta̱ Moisés, soo u̱vi̱ ley mií ña̱ ndáyáʼvi va̱ʼaka, ña̱ kuʼvi̱-iniyó kuniyó Jehová xíʼin ña̱ kuʼvi̱-iniyó kuniyó na̱ yiví ndáyáʼviníva ña̱yóʼo, ta ña̱yóʼo kúú ña̱ kúni̱ Jehová keʼéyó (Mt 22:37-39). Ña̱ kuʼvi̱-iniyó kuniyó Ndióxi̱ xíʼin na̱ yiví, va̱ása xáʼnu mií ña̱yóʼo, chi xíniñúʼu sakuaʼnuyóña, ¿Nda̱saa sakuaʼnuyó ña̱yóʼo? Ña̱ va̱ʼa kuaʼnu ña̱yóʼo xíniñúʼu kaʼviníyó Biblia ndiʼi saá ki̱vi̱. Tá ndákanixi̱níyó xa̱ʼa ña̱ káʼviyó, saá kúnda̱a̱-iniyó xa̱ʼa ndiʼi ña̱ kúúmií Jehová ta kúnda̱a̱-iniyó ña̱ va̱ʼaní inira (Sl 27:4). Tá kéʼéyó ña̱yóʼo, kuʼvi̱ka-iniyó kuniyóra tasaá kúú ña̱ ndakanixi̱níyó nda̱a̱ táki̱ʼva ndákanixi̱ní miíra. Ña̱yóʼo kúú ña̱ chindeé táʼan xíʼinyó ña̱ kuniso̱ʼoyó ña̱ káʼa̱nra xíʼinyó, ta saátu ña̱ kuʼvi̱-iniyó kuniyó na̱ yiví (Jn 13:34, 35; 1Jn 5:3). Ná kotoyó u̱ni̱ ña̱ʼa ña̱ chindeé táʼan xíʼinyó ña̱ kutóokayó kaʼviyó Biblia.

• Kuniñúʼu ndiʼi ña̱ ndákanixi̱níún. Ndakanixi̱níún ña̱ ndíka̱ún ti̱xin ña̱ káʼviún. ¿Ndáa ña̱ʼa kúú ña̱ xítoún? ¿Ndáa ña̱ʼa kúú ña̱ xíniso̱ʼún ta nda̱saa xáʼa̱n nu̱ú ndíka̱ún? Ná ndakanixi̱níyó ndáa ña̱ʼa kúu ña̱ ndóʼo na̱ káʼviyó xa̱ʼa.

  

• Xa̱a̱ síín xa̱a̱ síín ña̱ keʼún. Kivi kaʼviyó á kundiku̱nyó iin grabación tá káʼvina Biblia. Á kivitu kaʼviyó xa̱ʼa iin na̱ xi̱ndasakáʼnu Ndióxi̱ tá ya̱chi̱, nu̱úka ña̱ kaʼvi kuitíyó Biblia nda̱a̱ nu̱ú kíxaʼáña iinsaá nda̱a̱ nu̱ú ndíʼiña. Kivi kuniñúʼuyó ña̱ táʼvi 4 xíʼin ña̱ táʼvi 16 nu̱ú ña̱ folleto Ña̱ táxi yichi̱ nu̱úyó ña̱ va̱ʼa sakuaʼakayó xa̱ʼa Biblia ta kivi kaʼviyó ña̱ káʼa̱n xa̱ʼa ta̱ Jesús. Inka ña̱ kivi keʼéyó kúú ña̱ kaʼviyó capítulo nu̱ú ka̱na texto ña̱ káʼviyó ki̱vi̱ tá ki̱vi̱ á kaʼvituyó libro ña̱ va̱xi nu̱ú Biblia nda̱a̱ táki̱ʼva ku̱i̱ya̱ ña̱ ku̱uña.

  

• Kaʼvi ña̱ va̱ʼa ná kunda̱a̱-iniún. Va̱ʼaníka kúú ña̱ kaʼviyó iinlá capítulo iin iin ki̱vi̱ ta̱ kunda̱a̱ va̱ʼa iniyó xíʼinña ta ndakanixi̱níyó xa̱ʼa ña̱ káʼa̱nña, nu̱úka ña̱ kaʼvi kuitíyó ku̱a̱ʼání capítulo ta va̱ása kunda̱a̱-iniyó xíʼinña. Ná ndakanixi̱níyó xa̱ʼa ña̱ xa̱a̱ ku̱u, ná ndakanixi̱níyó ndáa xa̱ʼa káʼa̱nña. Ná kuniñúʼuyó mapa xíʼin ña̱ va̱xi ma̱ʼñú Biblia ña̱ naní referencias marginales. Ta ná nandukúyó xa̱ʼa ña̱ va̱ása kúnda̱a̱-iniyó xíʼin. Koto nda̱saa tiempo ka̱ʼviún, tasaá tiempo ndakanixi̱níún xa̱ʼaña.