LECCIÓN 2

Ki̱ʼva ña̱ natúʼún xíʼinna

2 Corintios 2:17

Xíʼin tu̱ʼun miíún ka̱ʼún xíʼinna ta ndinuʼu-iniún ka̱ʼún xíʼinna, na̱ʼa̱ nu̱úna nda̱saa túviún xíʼin ña̱ káʼún xa̱ʼa xíʼinna.

NDÁA KI̱ʼVA KEʼÚNÑA:

Ka̱ʼa̱n xíʼin Ndióxi̱ ta viíní sákuaʼún ña̱ ka̱ʼún. Ka̱ʼa̱n xíʼin Ndióxi̱ ná chindeéra yóʼó ña̱ va̱ʼa kundi̱ʼi̱-iniún xa̱ʼa ña̱ sanáʼún ta su̱víka xa̱ʼa miíún. Ndakaʼán va̱ʼún ndáaña kúni̱ún ka̱ʼún xa̱ʼa xíʼinna. Xíʼin tu̱ʼun miíún ka̱ʼúnña, ta va̱ása kaʼviúnña ni kǒo ku̱a̱ʼání yichi̱ ndikóún ka̱ʼún tá iin iin tu̱ʼun ña̱ va̱xi nu̱ú bosquejo.

Tá ndákanixi̱níún kaʼviún ña̱ va̱xi nu̱ú Biblia á ña̱ va̱xi nu̱ú inkaka tutu, viíní sákuaʼúnña ña̱kán va̱ʼa vií kaʼviúnña. Tá va̱xi tu̱ʼun ña̱ ni̱ka̱ʼa̱n iin na̱ yiví nu̱úña, ndinuʼuní-iniún kaʼviún tu̱ʼun ña̱ ni̱ka̱ʼa̱nna, soo xíʼin ki̱ʼva keʼúnña.
Xíʼin ndiʼi níma̱ún ka̱ʼún. Ndakanixi̱ní ndáa xa̱ʼa kúú ña̱ ndáyáʼviní ka̱ʼún ña̱yóʼo xíʼin na̱ xíniso̱ʼo yóʼó. Tá ná keʼún ña̱yóʼo va̱ʼaníka ka̱nda̱ ndaʼún ta saátu kivi na̱ʼún nu̱úna xíʼin ki̱ʼva ña̱ xítoún ña̱ kúsi̱íní-iniún káʼún xíʼinna.

Su̱ví iin kúú ña̱ ka̱ʼa̱nyó xíʼin tu̱ʼun miíyó nu̱ú ña̱ ka̱ʼa̱nyó nda̱a̱ ndáaka tu̱ʼun kána yuʼúyó. To̱ʼó ka̱ʼún xíʼinna ta vií ná kunda̱a̱-inina xíʼinña.
Kotoún nu̱ú na̱ káʼún xíʼin. Tá kivi kotoún nu̱ú na̱ káʼún xíʼin, kivi keʼúnña. Tá táxiún iin discurso, nu̱úka ña̱ kotoún nu̱ú ndiʼina, va̱ʼaka siʼna iin na̱ yiví kotoún nu̱ú, ta tándi̱ʼi saá kotoún nu̱ú inkana.