¿Á xíniñúʼu ndasakáʼnuyó vikó?

SU̱VÍ nu̱ú Biblia nítavana vikó ña̱ kéʼé na̱ veʼe-ñu̱ʼu xíʼin savaka vikó ña̱ kéʼéna iníísaá ñuyǐví. Soo, ¿ndáa míí ta̱vána vikó yóʼo? Tá kúni̱ún va̱ʼa ku̱ʼún iin biblioteca, ña̱ va̱ʼa kaʼviún sava libro ña̱ káʼa̱n xa̱ʼa sava vikó ña̱ kéʼé na̱ ñuún. Yóʼo sakuaʼayó xa̱ʼa savaña.

Pascua. Saá kúú ña̱ ndásakáʼnuna ña̱ ni̱xi̱ʼi̱ ta̱ Jesús xíʼin ña̱ nda̱takura káchina soo su̱ví ña̱ nda̱a̱ kúúña, chi kéʼé ku̱a̱ʼákana vikó ña̱ kǒo káʼa̱n Biblia xa̱ʼa, tá kúú ña̱ káva̱nduuna xíʼin santo. Libro ña̱ naní Las Grandes Religiones Ilustradas, káchiña: tá kúma̱níka kaku ta̱ Jesús, na̱ ñuu Babilonia “ndeékaví xi̱ndasakáʼnuna santo, livikaví ti̱ko̱to̱ sa̱kúndixinaña, ta xi̱taánna siki̱ su̱kúnña, ta xi̱ñuʼu ka̱a ndaʼa̱ña ta xi̱taánna anillo ndaʼa̱ña; livikaví veʼe nu̱ú xi̱ñuʼuña”. Ta sava país ndásakáʼnuna vikó ña̱ naní “conejo de Pascua”. Libro La Enciclopedia Católica káʼa̱n xa̱ʼa ña̱yóʼo, “su̱ví nu̱ú Biblia níkanaña, vikó ña̱ sándakaʼán miína ña̱ va̱ʼa koo ku̱a̱ʼá se̱ʼevana kúúña”.

Ku̱i̱ya̱ xa̱á. Ki̱vi̱ ña̱ ndásakáʼnuna ku̱i̱ya̱ xa̱á su̱ví inkáchi ndásakáʼnunaña xíʼin inka país. Libro ña̱ naní (The World Book Encyclopedia) káʼa̱n míí ki̱xaʼá xa̱ʼa vikó yóʼo, “ta̱ xi̱xaʼndachíñu ñuu Roma ta̱ Julio César ni̱ka̱ʼa̱n ña̱ 1 xíka tí yo̱o̱ enero ndasakáʼnuna ku̱i̱ya̱ xa̱á, ña̱yóʼo ki̱xaʼáña ku̱i̱ya̱ 46 tá kúma̱níka kaku ta̱ Jesús. Ta ki̱vi̱ yóʼo xi̱ndasakáʼnuna ndióxi̱ ta̱ xi̱naní Jano, ta̱ ndióxi̱ yéʼé xi̱kuura xíʼin nu̱ú kíxaʼá xa̱ʼa ndiʼi ña̱ʼa . Xa̱ʼa ña̱yóʼo yo̱o̱ enero [tu̱ʼun latín nanírí Januarius] nda̱kiʼinrí ki̱vi̱ ndióxi̱ Jano, ndióxi̱ yóʼo u̱vi̱ xi̱kuu nu̱úra: iin nu̱úra chí nu̱ú ta inka nu̱úra chí sa̱tá”. Xa̱ʼa ña̱yóʼo, vikó ku̱i̱ya̱ xa̱á iin costumbre na̱ yivíva kúúña.

Vikó ndi̱i. Libro ña̱ naní La Encyclopædia Britannica 1910. Volumen I, página 709 káchiña: “Vikó ndi̱i, ña̱yóʼo kúú ki̱vi̱ ndásakáʼnu na̱ veʼe-ñu̱ʼu católica ndiʼi na̱ ni̱xi̱ʼi̱, vikó yóʼo su̱ví nu̱ú Biblia níkanaña ta xi̱naʼáví kéʼénaña. Na̱ ndásakáʼnu vikó ndi̱i yóʼo káchina, míí ki̱vi̱ saá va̱xi na̱ táʼanna na̱ ni̱xi̱ʼi̱ ña̱ kuxuna ña̱ʼa ña̱ chi̱ndoona nu̱úna”.

Savaka vikó. Kǒo kívi ka̱ʼa̱nyó xa̱ʼa ndiʼi vikó ña̱ kéʼéna iníísaá ñuyǐví. Soo yiváyó Jehová kǒo kútóora vikó ña̱ kéʼé na̱ yiví tá su̱ví nu̱ú Biblia va̱xiña (Jeremías 17:5-7; Hechos 10:25, 26). Ña̱ va̱ʼa kunda̱a̱-iniyó ndáa vikó kúú ña̱ kéʼé na̱ veʼe-ñu̱ʼu, xíniñúʼu nandukúyó míí ki̱xaʼá xa̱ʼaña ta á kútóo Ndióxi̱ ña̱yóʼo (Isaías 52:11; Revelación 18:4). Ndiʼi ña̱ sa̱kuaʼayó nu̱ú capítulo 16 ña̱ libro yóʼo chindeé miíyó ña̱ ndakanixi̱níyó xa̱ʼa vikó ña̱ kéʼéyó á kútóo Ndióxi̱ ña̱yóʼo.