Na̱ níʼi yichi̱ nu̱úyó ti̱xin congregación

1. ¿Nda̱chun va̱ʼaní kítáʼan na̱ ñuu Jehová?

¿Á SU̱VÍ ña̱ nda̱a̱ kúú ña̱ kúsi̱íní-iniyó xa̱ʼa̱ ña̱ kúúyó táʼan na̱ ñuu Jehová? Táxi̱n íyoyó ta va̱ʼaní kítáʼanyó xa̱ʼa̱ ña̱ chíka̱a̱yó ndee̱ ña̱ íxato̱ʼóyó na̱ ta̱xi Jehová chiñu ndaʼa̱ ña̱ kuniʼina yichi̱ nu̱úyó. Tá viíka kúnda̱a̱-iniyó xa̱ʼa̱ ña̱yóʼo viíka kítáʼanyó.

2. ¿Ndáa pregunta ndakuiinyó nu̱ú artículo yóʼo?

² Nu̱ú artículo yóʼo ka̱ʼa̱nyó xa̱ʼa̱ na̱ níʼi yichi̱ nu̱úyó ti̱xin congregación. Ta ndakuiinyó pregunta yóʼo: ¿ndáa chiñu kúúmií ná hermana?, ¿á ndiʼi na̱ hermano kúú na̱ níʼi yichi̱ nu̱ú ndiʼi ná hermana?, ¿á nda̱a̱ táki̱ʼva kéʼé iin ta̱ níʼi yichi̱ nu̱ú na̱ veʼera saá xíniñúʼu keʼé na̱ anciano xíʼin na̱ íyo ti̱xin congregación? Siʼna ná ka̱ʼa̱nyó xa̱ʼa̱ chiñu ña̱ kúúmií ná hermana ta ndáa ki̱ʼva kotoyóná.

¿NDÁA KI̱ʼVA XÍNIÑÚʼU KOTOYÓ NÁ HERMANA?

3. ¿Ndáaña chindeétáʼan xíʼinyó ña̱ chindayáʼvikayó ña̱ kéʼé ná hermanayó?

³ Táxiníyó tíxa̱ʼvi ndaʼa̱ ná hermana xa̱ʼa̱ ndiʼi ña̱ kéʼéná, saáchi ndáaná na̱ veʼená, nátúʼunná xíʼin na̱ yiví xa̱ʼa̱ Ndióxi̱ ta chíndeétáʼanná xíʼin na̱ hermano na̱ íyo ti̱xin congregación. Soo kundayáʼvikaná nu̱úyó tá ná ndakanixi̱níyó ndáa ki̱ʼva xíto Jehová xíʼin ta̱ Jesús náyóʼo, ta ndáa ki̱ʼva ke̱ʼé ta̱ apóstol Pablo xíʼinná.

4. ¿Ndáa ki̱ʼva náʼa̱ tu̱ʼun Ndióxi̱ ña̱ inkáchi ndáyáʼvi na̱ ta̱a ta saátu ná ñaʼá nu̱ú Jehová?

⁴ Tu̱ʼun Ndióxi̱ náʼa̱ña ña̱ inkáchi ndáyáʼvi na̱ ta̱a xíʼin ná ñaʼá nu̱ú Jehová. Tá kúú tá siglo nu̱ú, Jehová ta̱xira espíritu santora nda̱a̱ ná ñaʼá ta saátu na̱ ta̱a ña̱ va̱ʼa keʼéna milagro, ta kúú ña̱ ka̱ʼa̱nna ku̱a̱ʼá nu̱ú tu̱ʼun (Hech. 2:1-4, 15-18). Ndióxi̱ nda̱kaxinra na̱ ta̱a ta saátu ná ñaʼá ña̱ va̱ʼa kaʼndachíñuna xíʼin ta̱ Cristo (Gál. 3:26-29). Ta saátu, Jehová taxira ña̱ ná kutaku na̱ ta̱a ta saátu ná ñaʼá ndiʼi tiempo nu̱ú ñuʼú yóʼo (Apoc. 7:9, 10, 13-15). Ta ta̱ Jesús xa̱ʼndara chiñu nu̱ú na̱ ta̱a ta saátu ná ñaʼá ña̱ ná natúʼunna xíʼin na̱ yiví ta ná sanáʼa̱nana xa̱ʼa̱ Reino Ndióxi̱ (Mat. 28:19, 20). Ta kúú, libro ña̱ Hechos káʼa̱nña xa̱ʼa̱ iin ñá xi̱ndasakáʼnu Ndióxi̱ ñá xi̱naní Priscila. Ñáyóʼo xíʼin yiíñá ta̱ Áquila, “ki̱xáʼana ndákani viína xa̱ʼa̱ ña̱ káʼa̱n tu̱ʼun Ndióxi̱” nu̱ú ta̱ Apolos, iin ta̱a ta̱ xi̱xini̱ní xa̱ʼa̱ tu̱ʼun Ndióxi̱ (Hech. 18:24-26).

5. Nda̱a̱ táki̱ʼva káchi Lucas 10:38, 39, 42, ¿ndáa ki̱ʼva xi̱keʼé ta̱ Jesús xíʼin ná ñaʼá?

⁵ Ta̱ Jesús i̱xato̱ʼóra ná ñaʼá. Va̱ása níxi̱yora nda̱a̱ táki̱ʼva ni̱xi̱yo na̱ fariseo, chi na̱yóʼo xi̱kundasína xi̱xinina ná ñaʼá, va̱ása ni̱xika̱ʼa̱nna xíʼinná nu̱ú íyo ku̱a̱ʼá na̱ yiví, ta ni va̱ása nínatúʼunna xíʼinná xa̱ʼa̱ tu̱ʼun Ndióxi̱. Soo ta̱ Jesús xi̱sanáʼa̱ra ná ñaʼá ta saátu na̱ ta̱a xa̱ʼa̱ ña̱ ndáyáʼviní va̱xi nu̱ú tu̱ʼun Ndióxi̱b (kaʼvi Lucas 10:38, 39,c 42).d Ta saátu ta̱xira ña̱ ná kutáʼan ku̱a̱ʼání ná ñaʼá xíʼinra tá ni̱xi̱kara na̱túʼunra xíʼin na̱ yiví xa̱ʼa̱ Ndióxi̱ (Luc. 8:1-3). Ta ta̱xira iin chiñu ña̱ ndáyáʼviní ndaʼa̱ sava náyóʼo, ña̱ ku̱ʼu̱nná natúʼunná xíʼin na̱ apóstol ña̱ xa̱a̱ nda̱takura (Juan 20:16-18).

6. ¿Ndáa ki̱ʼva ni̱na̱ʼa̱ ta̱ apóstol Pablo ña̱ xi̱ ixato̱ʼóra ná ñaʼá?

⁶ Ta̱ apóstol Pablo ni̱ka̱ʼa̱nra xíʼin ta̱ Timoteo ña̱ ná ixato̱ʼóra ná ñaʼá. Ni̱ka̱ʼa̱nra xíʼinra ña̱ nda̱a̱ táki̱ʼva kéʼéra xíʼin siʼíra saá ná keʼéra xíʼin ná xa̱a̱ chée, ta nda̱a̱ táki̱ʼva kéʼéra xíʼin ku̱ʼvara saá ná keʼéra xíʼin ná válíka nu̱úra (1 Tim. 5:1, 2). Ni chi̱ndeétáʼan ta̱ Pablo xíʼin ta̱ Timoteo ña̱ va̱ʼa kandíxakara Ndióxi̱, soo nda̱kunira ña̱ siʼí ta̱ Timoteo xíʼin xi̱tánra kúú ná sa̱náʼa̱ra xa̱ʼa̱ tu̱ʼun Ndióxi̱ (2 Tim. 1:5; 3:14, 15). Ta nu̱ú carta ña̱ chi̱ndaʼá ta̱ Pablo ndaʼa̱ na̱ hermano na̱ ñuu Roma, chi̱ndeéra ku̱a̱ʼá ná hermana ta saátu ni̱ka̱ʼa̱nra ki̱vi̱ná. Ki̱ʼinra kuenta xíʼin ndiʼi ña̱ xi̱keʼé ná hermana kán, ta ni̱na̱ʼa̱ra ña̱ xi̱chindayáʼvira chiñu ña̱ xi̱keʼéná (Rom. 16:1-4, 6, 12; Filip. 4:3).

7. ¿Ndáa pregunta ndakuiinyó?

⁷ Nda̱a̱ táki̱ʼva xa̱a̱ xi̱niyó, tu̱ʼun Ndióxi̱ va̱ása sánáʼa̱ña ña̱ ndáyáʼvika na̱ ta̱a nu̱ú ná ñaʼá. Xa̱ʼa̱ ña̱ kúni̱ná xíniná inkana ta saátu xa̱ʼa̱ ña̱ va̱ʼa-ininá va̱ʼaní chíndeétáʼanná xíʼin na̱ congregación, ta saátu chíndeétáʼanná xíʼin na̱ anciano ña̱ vií kutáʼan na̱ hermano ta táxi̱n koona. Soo vitin xíniñúʼu ndakuiinyó pregunta yóʼo: ¿nda̱chun káʼa̱n Jehová xíʼin ná hermana ña̱ xíniñúʼu ndasiná xi̱níná sava yichi̱?, tá na̱ ta̱a kuití kúú na̱ xáa̱ ndúu anciano á siervo ministerial, ¿á kúni̱ kachi ña̱yóʼo ña̱ ndiʼi na̱ hermano kúú na̱ níʼi yichi̱ nu̱ú ndiʼi ná hermana?

¿Á NDIʼI NA̱ HERMANO KÚÚ NA̱ NÍʼI YICHI̱ NU̱Ú NDIʼI NÁ HERMANA?

8. Nda̱a̱ táki̱ʼva káchi Efesios 5:23, ¿nda̱chun káʼa̱nyó ña̱ su̱ví ndiʼi na̱ hermano kúú na̱ níʼi yichi̱ nu̱ú ná hermana?

⁸ Va̱ása, saáchi iinlá ta̱ Cristo kúú ta̱ níʼi yichi̱ nu̱ú ndiʼi ná hermana ná íyo ti̱xin congregación (kaʼvi Efesios 5:23).e Ta̱ ta̱a kúú ta̱ níʼi yichi̱ nu̱ú ñá síʼira, ta ni xa̱a̱ nda̱kuchi iin ta̱a se̱ʼeñá va̱ása níʼira yichi̱ nu̱úñá (Efes. 6:1, 2). Ni na̱ anciano kúú na̱ níʼi yichi̱ nu̱ú na̱ hermano ta saátu ná hermana ti̱xin congregación, soo íyo sava ña̱ʼa ña̱ va̱ása kivi ka̱ʼa̱nna xíʼinna keʼéna (1 Tes. 5:12; Heb. 13:17). Ta ¿ndáaña kivi ka̱ʼa̱nyó xa̱ʼa̱ iin ñá hermana ñá ta̱ʼán tindaʼa̱ ta va̱ása íyokañá xíʼin na̱ yiváñá? Ñáyóʼo íxato̱ʼóvañána, soo va̱ása níʼika yiváñá yichi̱ nu̱úñá. Ta íxato̱ʼótuñá na̱ anciano; soo ta̱ níʼi yichi̱ nu̱úñá kúú ta̱ Jesús, nda̱a̱ táki̱ʼva níʼira yichi̱ nu̱ú na̱ ta̱a na̱ íyo ti̱xin congregación.

9. ¿Nda̱chun xíniñúʼu ndasi ná hermana xi̱níná sava yichi̱?

⁹ Ña̱ nda̱a̱ kúúña, Jehová nda̱kaxinra na̱ ta̱a ña̱ kuniʼina yichi̱ nu̱ú na̱ congregación ta su̱ví ná ñaʼá (1 Tim. 2:12). ¿Nda̱chun? Saáchi kúni̱ra ña̱ viíní ná koo chiñu ña̱ íyo ti̱xin congregación, chi xa̱ʼa̱ ña̱yóʼo kúú ña̱ ta̱xira chiñu ndaʼa̱ ta̱ Jesús ña̱ kuniʼira yichi̱ nu̱ú na̱ ta̱a. Soo tá iin ñá hermana xíniñúʼu keʼéñá chiñu ña̱ kéʼé iin ta̱ hermano, saá kúú ña̱ káʼa̱n Jehová xíʼin ná hermana ña̱ ná ndasiná xi̱níná (1 Cor. 11:4-7).f Ta su̱ví xa̱ʼa̱ ña̱ va̱ása ndáyáʼviñá kúú ña̱ káʼa̱nra xíʼinñá ña̱ ná keʼéñá ña̱yóʼo, saáchi káʼa̱nra xíʼinñá keʼéñá ña̱yóʼo ña̱ va̱ʼa na̱ʼa̱ñá ña̱ íxato̱ʼóñá na̱ ta̱xira chiñu ndaʼa̱ ña̱ kuniʼina yichi̱ nu̱ú inkana. Soo vitin ná ndakuiinyó pregunta yóʼo: ¿á inkáchi íyo chiñu ña̱ kúúmií na̱ anciano xíʼin na̱ níʼi yichi̱ nu̱ú na̱ veʼena?

CHIÑU ÑA̱ KÚÚMIÍ NA̱ NÍʼI YICHI̱ NU̱Ú NA̱ VEʼENA TA SAÁTU NA̱ ANCIANO

10. ¿Nda̱chun kivi xa̱a̱ iin ta̱ anciano ndakanixi̱níra ña̱ kivi ka̱ʼa̱nra xíʼin na̱ hermano xa̱ʼa̱ ña̱ xíniñúʼu keʼéna?

¹⁰ Na̱ anciano kúʼvi̱-inina xínina ta̱ Cristo, ta saátu kúʼvi̱-inina xínina na̱ hermano na̱ ta̱xi Jehová xíʼin ta̱ Jesús ndaʼa̱na ña̱ kundaana (Juan 21:15-17). Xa̱ʼa̱ ña̱ kúni̱ iin ta̱ anciano chindeétáʼanra xíʼin na̱ hermano na̱ íyo ti̱xin congregación, kivi ndakanixi̱níra ña̱ íyora nda̱a̱ táki̱ʼva íyo yivá na̱yóʼo. Tá kúú kivi ndakanixi̱níra ña̱yóʼo: “Tá iin ta̱ níʼi yichi̱ nu̱ú na̱ veʼera kúúmiíra derecho ña̱ ka̱ʼa̱nra xíʼinna ndáaña keʼéna ña̱ va̱ʼa kundaarana, saátu iin ta̱ anciano kiviva ka̱ʼa̱nra xíʼin na̱ hermano ndáaña keʼéna ña̱ va̱ʼa kundaarana”. Ta sava na̱ hermano kivi chindaʼána na̱ anciano ña̱ kixáʼana ndakanixi̱nína ña̱yóʼo, tá ná kundatuna ña̱ ka̱ʼa̱n na̱ anciano xíʼinna ndáaña kúú ña̱ xíniñúʼu keʼéna. Soo, ¿á inkáchi íyo chiñu ña̱ kúúmií na̱ anciano xíʼin na̱ níʼi yichi̱ nu̱ú na̱ veʼena?

11. ¿Ndáa ki̱ʼva kítáʼan ña̱ kéʼé na̱ anciano xíʼin na̱ níʼi yichi̱ nu̱ú na̱ veʼena?

¹¹ Ta̱ apóstol Pablo ni̱ka̱ʼa̱nra ña̱ íyo sava ña̱ kéʼé na̱ anciano kítáʼanña xíʼin ña̱ kéʼé na̱ níʼi yichi̱ nu̱ú na̱ veʼena (1 Tim. 3:4, 5). Tá kúú, Jehová kúni̱ra ña̱ ná kuniso̱ʼo na̱ familia ta̱ níʼi yichi̱ nu̱úna, ta saátu kúni̱ra ná keʼé na̱ íyo ti̱xin congregación ña̱ ná kuniso̱ʼona na̱ anciano (Col. 3:20). Jehová kúni̱ra ña̱ na̱ níʼi yichi̱ nu̱ú na̱ veʼena ta saátu na̱ anciano ná chindeétáʼanna xíʼin na̱ ndáana ña̱ kandíxakanara, ta ná na̱ʼa̱na nu̱úna ña̱ kúʼvi̱-inina xíninana ta ndáyáʼvina. Ta nda̱a̱ táki̱ʼva kéʼé na̱ va̱ʼaní níʼi yichi̱ nu̱ú na̱ veʼena, saá kéʼé na̱ anciano saáchi chíndeétáʼanna xíʼin na̱ hermano tá yáʼana nu̱ú tu̱ndóʼo (Sant. 2:15-17). Jehová kúni̱ra ña̱ na̱ anciano ta saátu na̱ níʼi yichi̱ nu̱ú na̱ veʼena ná chindeétáʼanna xíʼin inkana ña̱ kandíxana ndiʼi ña̱ káʼa̱nra ná keʼéna, ta ná kǒo keʼéna ña̱ va̱ása va̱xi nu̱ú Biblia (1 Cor. 4:6).

12, 13. Nda̱a̱ táki̱ʼva káchi Romanos 7:2, ¿ndáa ki̱ʼva síín íyo chiñu ña̱ kúúmií na̱ níʼi yichi̱ nu̱ú na̱ veʼena nu̱ú chiñu ña̱ kúúmií na̱ anciano?

¹² Soo ni saá, síín íyo chiñu ña̱ kéʼé na̱ anciano nu̱ú na̱ níʼi yichi̱ nu̱ú na̱ veʼena. Iin chiñu ña̱ ta̱xi Jehová ndaʼa̱ na̱ anciano kúú ña̱ ndatiinna ku̱a̱chi xíʼin na̱ kéʼé ña̱ va̱ása va̱ʼa, ta tavánana ti̱xin congregación tá va̱ása ndándikó-inina xa̱ʼa̱ ña̱ va̱ása va̱ʼa ke̱ʼéna (1 Cor. 5:11-13).

¹³ Jehová táxira ña̱ ná keʼé na̱ níʼi yichi̱ nu̱ú na̱ veʼena sava ña̱ʼa ña̱ va̱ása kívi keʼé na̱ anciano. Iin ña̱ kivi keʼé ta̱ níʼi yichi̱ nu̱ú na̱ veʼera kúú ña̱ ka̱ʼa̱nra xíʼinna ndáaña kúú ña̱ kivi keʼéna ta ndáaña va̱ása kívi keʼéna, ta saátu ka̱ʼa̱nra xíʼinna ña̱ ná saxínuna ña̱yóʼo (kaʼvi Romanos 7:2).g Tá kúú, kúúmiíra derecho ña̱ ka̱ʼa̱nra xíʼin se̱ʼera ndáa hora ndixa̱a̱na tá ñuú, ta saátu kivi taxira castigo ndaʼa̱na tá íxaso̱ʼona ña̱ káʼa̱nra (Efes. 6:1). Soo tá kúma̱níka ndaka̱xinra ndáaña keʼé na̱ veʼera, siʼna xíniñúʼu ka̱ʼa̱nra xíʼin ñá síʼira xa̱ʼa̱ ña̱yóʼo saáchi “su̱ví u̱vi̱ka kúúna chi iinláva ndu̱una” (Mat. 19:6).h

NÁ IXATO̱ʼÓYÓ TA̱ CRISTO TA̱ NÍʼI YICHI̱ NU̱Ú NA̱ CONGREGACIÓN

14. a) Nda̱a̱ táki̱ʼva káchi Marcos 10:45, ¿nda̱chun nda̱kaxin Jehová ta̱ Jesús ña̱ kuniʼira yichi̱ nu̱ú na̱ congregación? b) ¿Ndáa chiñu kúúmií na̱ Cuerpo Gobernante? (Koto recuadro “Chiñu ña̱ kúúmií na̱ Cuerpo Gobernante”).

¹⁴ Tíxa̱ʼvi ña̱ ni̱xi̱ʼi̱ ta̱ Jesús, Jehová cha̱ʼvira xa̱ʼa̱ ndiʼi na̱ íyo ti̱xin congregación ta saátu na̱ yiví na̱ xáa̱ kándíxa ta̱ Jesús (kaʼvi Marcos 10:45;i Hech. 20:28; 1 Cor. 15:21, 22). Ta̱ Cristo ni̱xi̱ʼi̱ra xa̱ʼa̱yó, ña̱kán nda̱kaxin Jehová ta̱yóʼo ña̱ kuniʼira yichi̱ nu̱ú na̱ congregación. Xa̱ʼa̱ ña̱yóʼo, ta̱ Jesús kivi ka̱ʼa̱nra xíʼin na̱ yiví, na̱ familia ta saátu ndiʼi na̱ congregación ndáaña kivi keʼéna ta ndáaña va̱ása kívi keʼéna, ta kúúmiíra derecho ña̱ ka̱ʼa̱nra xíʼinyó ña̱ ná saxínuyó ña̱ káʼa̱nra (Gál. 6:2). Soo ta̱yóʼo va̱ása káʼa̱n kuitíra xíʼinyó ndáaña keʼéyó, saáchi táxira ña̱ xíniñúʼu iin tá iinyó ña̱ sakuaʼayó xa̱ʼa̱ Ndióxi̱ ta ndáara miíyó (Efes. 5:29).

15, 16. ¿Ndáaña sákuaʼún xíʼin ña̱ káʼa̱n ñá Marley ta saátu ta̱ Benjamin?

¹⁵ Ná hermana íxato̱ʼóná chiñu ña̱ kúúmií ta̱ Cristo tá ndíku̱nná ña̱ káʼa̱n na̱ ta̱a na̱ nda̱kaxinra ña̱ kundaana na̱ congregación. Iin ñá hermana ñá íyo chí Estados Unidos ñá nani Marley, káchiñá: “Chíndayáʼviníi̱ chiñu ña̱ kúúmiíi̱ xa̱ʼa̱ ña̱ íyo yiíi̱, ta saátu chiñu ña̱ kúúmiíi̱ ti̱xin congregación. Xíniñúʼu chika̱i̱ ndee̱ ña̱ ixato̱ʼíi̱ chiñu ña̱ ta̱xi Jehová ndaʼa̱ yiíi̱ ta saátu na̱ anciano, soo va̱ása íxayo̱ʼvi̱ña xíʼi̱n keʼíi̱ ña̱yóʼo saáchi yiíi̱ ta saátu na̱ hermano íxato̱ʼóna yi̱ʼi̱ ta náʼa̱na ña̱ chíndayáʼvina ndiʼi ña̱ kéʼíi̱”. Ta sana saátu íyo ña̱ ndákanixi̱ní ku̱a̱ʼání ná hermana.

¹⁶ Na̱ hermano kúnda̱a̱-inina ndáa ki̱ʼva íyo chiñu ña̱ ta̱xi Jehová ndaʼa̱na tá íxato̱ʼóna ná hermana ta náʼa̱na ña̱ ndáyáʼviná nu̱úna. Iin ta̱ hermano ta̱ íyo chí Inglaterra, ta̱ naní Benjamin, káchira: “Xa̱a̱ ku̱a̱ʼání ña̱ sákuaʼi̱ xíʼin comentario ña̱ táxi ná hermana ti̱xin reunión, ta saátu tá káʼa̱nná ndáa ki̱ʼva viíka kaʼviyó, ndáa ki̱ʼva natúʼunyó xíʼin na̱ yiví á ña̱ viíka sanáʼa̱yó na̱ káʼviyó xíʼin. Ndáyáʼviní chiñu ña̱ kéʼéná”.

17. ¿Nda̱chun xíniñúʼu ixato̱ʼóyó chiñu ña̱ ta̱xi Jehová ndaʼa̱ savana ña̱ kuniʼina yichi̱ nu̱úyó?

¹⁷ Tá ndiʼi miíyó na̱ íyo ti̱xin congregación, kúúyó ta̱a á ñaʼá, níʼiyó yichi̱ nu̱ú na̱ veʼeyó á kúúyó anciano kúnda̱a̱-iniyó ndáa ki̱ʼva íyo chiñu ña̱ ta̱xi Jehová ndaʼa̱ savana ta íxato̱ʼóyó ña̱yóʼo, na̱ congregación viíníka kítáʼanna. Soo iin ña̱ ndáyáʼviníka kúú ña̱ ndásakáʼnuyó yiváyó Jehová ta̱ kúʼvi̱ní-ini xíni miíyó (Sal. 150:6).