LECCIÓN 26

¿Nda̱chun íyoní ña̱ va̱ása va̱ʼa ta saátu ña̱ xóʼvi̱yó?

Siaʼa ka̱naña nu̱ú tutu

Tá kúú iin tu̱ndóʼo ku̱a̱ʼání na̱ yiví ndáka̱tu̱ʼunna: “¿Nda̱chun ku̱uña?”. Va̱ʼaní kúniyó tá kúnda̱a̱-iniyó ña̱ káxiní ndákuin Biblia pregunta yóʼo.

1. ¿Ndáaña ke̱ʼé ta̱ Ndi̱va̱ʼa tasaá ki̱xáʼa íyo ña̱ va̱ása va̱ʼa nu̱ú ñuʼú yóʼo?

Ta̱ Ndi̱va̱ʼa á Satanás, va̱ása níxiniso̱ʼokara Ndióxi̱. Xa̱ʼa̱ ña̱ xi̱kuni̱ra kaʼndachíñura nu̱ú inkana sa̱ndáʼvira ta̱ Adán xíʼin ñá Eva ña̱ ná va̱ása kuniso̱ʼokana Ndióxi̱. Ta ña̱ va̱ʼa ke̱ʼéra ña̱yóʼo ni̱ka̱ʼa̱nra iin ña̱ vatá xíʼin ñá Eva (Génesis 3:1-5). Ta ni̱ka̱ʼa̱nra xíʼinñá ña̱ chíse̱ʼé Jehová iin ña̱ va̱ʼa nu̱úñá ta su̱ví iin ña̱ va̱ʼa kúú ña̱ kéʼéra saá. Ta ña̱ xi̱kuni̱ra kachira kúú ña̱ si̱íní koo na̱ yiví tá ná va̱ása kuniso̱ʼona ña̱ káʼa̱n Ndióxi̱. Ña̱ vatá ña̱ nu̱ú ña̱ ni̱ka̱ʼa̱n ta̱ Ndi̱va̱ʼa kúú, tá ni̱ka̱ʼa̱nra xíʼin ñá Eva ña̱ va̱ása kuviñá. Ña̱kán Biblia káʼa̱nña xa̱ʼa̱ra “ta̱ vatá kúúra ta kúúra yivá na̱ káʼa̱n ña̱ vatá” (Juan 8:44).

2. ¿Ndáaña nda̱kaxin ta̱ Adán xíʼin ñá Eva ke̱ʼéna?

Jehová va̱ʼaní ni̱xi̱yo inira xíʼin ta̱ Adán ta saátu xíʼin ñá Eva. Ni̱ka̱ʼa̱nra xíʼinna ña̱ kivi kaxína ku̱i̱ʼi ña̱ íyo ndaʼa̱ ndiʼi yitu̱n tú íyo ti̱xin ña̱ jardín ña̱ Edén soo saátu ni̱ka̱ʼa̱nra xíʼinna ña̱ ná va̱ása kaxína ña̱ íyo ndaʼa̱ iinlá yitu̱n (Génesis 2:15-17). Soo ni saá xa̱xívana ku̱i̱ʼi ña̱ íyo ndaʼa̱ yitu̱n kán. Ñá Eva ki̱ʼinñá ku̱i̱ʼi ndaʼa̱nú ta ki̱xáʼa xáxiñáña. Ta saátu ta̱ Adán ki̱xáʼara xáxiraña (Génesis 3:6). Tasaá u̱vi̱ saána va̱ása níxiniso̱ʼokana Ndióxi̱. Xa̱ʼa̱ ña̱ va̱ása níxi̱kuumií ta̱ Adán xíʼin ñá Eva ku̱a̱chi, kivi ndiʼi tiempo keʼéna ña̱ va̱ʼa. Soo, xa̱ʼa̱ ña̱ va̱ása níxiniso̱ʼokana Ndióxi̱ ni̱ki̱ʼvina ku̱a̱chi ta va̱ása níxiinkana ña̱ kaʼndachíñura nu̱úna. Xa̱ʼa̱ ña̱kán ki̱xiní tu̱ndóʼo nu̱úna (Génesis 3:16-19).

3. ¿Ndáaña ndóʼoyó xa̱ʼa̱ ña̱ nda̱kaxin ta̱ Adán xíʼin ñá Eva ke̱ʼéna?

Tá ni̱ki̱ʼvi ta̱ Adán xíʼin ñá Eva ku̱a̱chi, ni̱xa̱a̱na ndu̱una na̱ yiví ku̱a̱chi, ta xa̱ʼa̱ ña̱yóʼo ndiʼi se̱ʼena ni̱xa̱a̱na ndu̱una na̱ yiví ku̱a̱chi. Ña̱ Biblia káʼa̱nña xa̱ʼa̱ ta̱ Adán: “Ña̱kán, xa̱ʼa̱ iin ta̱a kúú ña̱ ni̱ki̱ʼvi ku̱a̱chi ñuyǐví yóʼo ta xa̱ʼa̱ ku̱a̱chi yóʼo kúú ña̱ xíʼi̱yó, tasaá kúú ña̱ ki̱xáʼa xíʼi̱ ndiʼi na̱ yiví” (Romanos 5:12).

Tá saá, ¿nda̱chun xóʼvi̱yó? Saáchi sava yichi̱ va̱ása vií íyo ña̱ ndáka̱xinyó keʼéyó. Á sava yichi̱ xóʼvi̱yó xa̱ʼa̱ ña̱ kéʼé inka na̱ yiví. Ta sava yichi̱ xóʼvi̱yó chi íyoyó iin lugar ta iin kama kúú tu̱ndóʼo (kaʼvi Eclesiastés 9:11).

NÁ SAKUAʼAKAYÓ XA̱ʼA̱ÑA

Ná kotoyó nda̱chun va̱ása kivi chika̱a̱yó ku̱a̱chi Ndióxi̱ xa̱ʼa̱ ña̱ xóʼvi̱yó, ña̱ va̱ása va̱ʼa kúú nu̱ú ñuʼú yóʼo ta saátu kotoyó ndáaña ndóʼora tá xítora xóʼvi̱yó.

4. Ta̱ kúúmií ku̱a̱chi xa̱ʼa̱ ña̱ xóʼvi̱yó

Ku̱a̱ʼání na̱ yiví ndákanixi̱nína Ndióxi̱ kúú ta̱ xáʼndachíñu nu̱ú ñuyǐví yóʼo. ¿Á ña̱ ndixa kúú ña̱yóʼo? Kotondó VIDEO.

VIDEO: ¿Ndáana ndísochíñu xíʼin ñuyǐví yóʼo? (1:24)

Káʼvindó Santiago 1:13 xíʼin 1 Juan 5:19, tá ndi̱ʼi ka̱ʼa̱nndó xa̱ʼa̱ ña̱yóʼo:

¿Á kúúmií Ndióxi̱ ku̱a̱chi xa̱ʼa̱ ña̱ xóʼvi̱yó ta saátu xa̱ʼa̱ ña̱ íyo ña̱ va̱ása va̱ʼa?

5. Ña̱ kúú xa̱ʼa̱ ña̱ xáʼndachíñu ta̱ Ndi̱va̱ʼa

Kotondó VIDEO.

VIDEO: ¿Nda̱chun táxi Ndióxi̱ ña̱ íyoní tu̱ndóʼo ñuyǐví yóʼo? (iin táʼvíña) (3:07)

Kaʼvindó Génesis 3:1-6 ta ka̱ʼa̱nndó xa̱ʼa̱ ña̱yóʼo:

¿Ndáaña vatá kúú ña̱ ni̱ka̱ʼa̱n ta̱ Ndi̱va̱ʼa? (kotondó versículo 4 xíʼin 5).
¿Ndáa ki̱ʼva ni̱ka̱ʼa̱n ta̱ Ndi̱va̱ʼa ña̱ chíse̱ʼé Jehová iin ña̱ va̱ʼa nu̱ú na̱ yiví?
Nda̱a̱ táki̱ʼva ni̱ka̱ʼa̱n ta̱ Ndi̱va̱ʼa, ¿á xíniñúʼu na̱ yiví ña̱ kaʼndachíñu Jehová nu̱úna ña̱ va̱ʼa si̱í koona?

Kaʼvindó Eclesiastés 8:9 ta ka̱ʼa̱nndó xa̱ʼa̱ ña̱yóʼo:

Ndiʼi tiempo ña̱ ta̱ʼán kaʼndachíñu Jehová nu̱ú na̱ yiví, ¿á vií íyona?

Ku̱a̱ʼá na̱ʼná ña̱ náʼa̱ ña̱ kúú nu̱ú ñuʼú yóʼo nda̱a̱ tá na̱kuva̱ʼaña tasaá nda̱a̱ ñuʼú livi ña̱ ni̱ka̱ʼa̱n Ndióxi̱ taxira: A. Iin ñuʼú livi. B. Xa̱ʼa̱ ña̱ xáʼndachíñu na̱ yiví xa̱a̱ ku̱a̱ʼání ku̱i̱ya̱ nu̱ú ñuʼú xa̱ʼa̱ ña̱kán íyoní na̱ veʼe-ñu̱ʼu vatá, va̱ása vií kítáʼan na̱ yiví, íyoní guerra ta íxayaku̱a̱na nu̱ú ñuʼú. Ta ña̱ náʼa̱ yóʼo kúú ña̱ xi̱xaʼndachíñu na̱ ñuu Egipto, China, Grecia, Roma, Gran Bretaña xíʼin Estados Unidos. C. Na̱ yiví íyona nu̱ú ñuʼú tá xa̱a̱ nduliviña.

Ta̱ Adán xíʼin ñá Eva kǒo ku̱a̱chi níxi̱kuumiína tá ni̱xi̱yona nu̱ú ñuʼú livi, xi̱niso̱ʼona ña̱ ni̱ka̱ʼa̱n ta̱ Ndi̱va̱ʼa ta kǒo níkandíxakana Jehová.
Xa̱ʼa̱ ndiʼi ña̱ ku̱u yóʼo ni̱ki̱ʼvi ku̱a̱chi iníísaá ñuyǐví ta íyo ña̱ xóʼvi̱yó ta xíʼi̱yó.
Jehová sandíʼi-xa̱ʼa̱ra ku̱a̱chi, ña̱ xóʼvi̱yó, ta saátu ña̱ xíʼi̱yó. Na̱ yiví va̱ása kuumiíkana ku̱a̱chi ta saátu koona nu̱ú ñuʼú livi.

6. Jehová xóʼvi̱ra tá xítora xóʼvi̱yó

¿Á va̱ása ndíʼi-ini Ndióxi̱ xa̱ʼa̱yó tá xóʼvi̱yó? Koto ña̱ ka̱ʼyi̱ ta̱ rey David xíʼin ta̱ apóstol Pedro. Kaʼvindó Salmo 31:7 xíʼin 1 Pedro 5:7, ta ka̱ʼa̱nndó xa̱ʼa̱ ña̱yóʼo:

¿Ndáaña ndóʼún tá kúnda̱a̱-iniún ña̱ xóʼvi̱ Jehová tá xítora xóʼvi̱yó xa̱ʼa̱ ña̱ yáʼayó nu̱ú tu̱ndóʼo?

7. Ndióxi̱ sandíʼi-xa̱ʼa̱ra ña̱ sáxo̱ʼvi̱ na̱ yiví

Kaʼvindó Isaías 65:17 xíʼin Apocalipsis 21:3, 4, ta ka̱ʼa̱nndó xa̱ʼa̱ ña̱yóʼo:

Jehová káʼa̱nra ña̱ sandíʼi-xa̱ʼa̱ra ndiʼi ña̱ sáxo̱ʼvi̱ na̱ yiví ta saátu ndasaviíra ndiʼi ña̱ va̱ása va̱ʼa kúú. ¿Á sándi̱ko ña̱yóʼo iniún? Ta, ¿nda̱chun?

¿Á xa̱a̱ xíni̱ún xa̱ʼa̱ ña̱yóʼo?

Xíʼin ña̱ nu̱ú ña̱ vatá ña̱ ni̱ka̱ʼa̱n ta̱ Ndi̱va̱ʼa chi̱ka̱a̱ra ku̱a̱chi síkí Jehová. Xíʼin ña̱yóʼo kúni̱ kachiyó ña̱ i̱xayaku̱a̱ra ki̱vi̱ Jehová, xíʼin ña̱yóʼo xi̱kuni̱ kachira ña̱ va̱ása vií íyo ña̱ xáʼndachíñu Jehová ta va̱ása va̱ʼa-inira, si̱lóʼo kúma̱ní Jehová sandíʼi-xa̱ʼa̱ra ña̱ sáxo̱ʼvi̱ na̱ yiví, tasaá na̱ʼa̱ra ña̱ viíva íyo ña̱ xáʼndachíñura ta ndasayi̱i̱ra ki̱vi̱ra. Tasaá na̱ʼa̱ra ña̱ va̱ʼaníva íyo ña̱ xáʼndachíñura. Ña̱ nduyi̱i̱ ki̱vi̱ Jehová kúú iin ña̱ ndáyáʼvika (Mateo 6:9, 10).

ÑA̱ KÁʼA̱N SAVA NA̱ YIVÍ: “Ndióxi̱ chi̱ndoora miíyó nu̱ú ñuʼú yóʼo ña̱ xo̱ʼvi̱yó”.

¿Ndáaña ndakuiún?

ÑA̱ XA̱A̱ SA̱KUAʼAYÓ

Ta̱ Ndi̱va̱ʼa xíʼin u̱vi̱ na̱ yiví na̱ nu̱ú ni̱xi̱yo nu̱ú ñuʼú yóʼo kúú na̱ kúúmií ku̱a̱chi xa̱ʼa̱ ndiʼi ña̱ va̱ása va̱ʼa kúú. Jehová xóʼvi̱ra tá xítora xóʼvi̱yó ta si̱lóʼo kúma̱ní ta sandíʼi-xa̱ʼa̱ra ña̱yóʼo.