Ndáaña keʼéyó ña̱ va̱ʼa ná kǒo kundi̱ʼi̱ní-iniyó ni ku̱a̱ʼání ña̱ʼa va̱xi nu̱úyó

1, 2. a) ¿Ndáaña kivi kundoʼo na̱ hermano tá násama chiñu ña̱ kúúmiína ti̱xin ñuu Ndióxi̱? (Koto na̱ʼná ña̱ va̱xi chí xa̱ʼa). b) Táki̱ʼva káchi Salmo 131, ¿ndáaña kivi chindeétáʼan xíʼinyó ña̱ va̱ʼa kǒo kundi̱ʼi̱-iniyó?

TA̱ Lloyd xíʼin ñá Alexandra xa̱a̱ yáʼa 25 ku̱i̱ya̱ xi̱kachíñuna Betel. Ña̱kán tá ta̱xina inka chiñu ndaʼa̱na, ku̱suchíní-inina. Ta̱ Lloyd káchira: “Xi̱kusi̱íní-inii̱ ña̱ xi̱kachíñui̱ ti̱xin Betel. Ku̱nda̱a̱va-inii̱ nda̱chun na̱samana chiñu ña̱ xi̱kuumiíndi̱, soo tá ni̱ya̱ʼa semana xíʼin yo̱o̱ nda̱kavaní-inii̱. Sava xi̱kusi̱íva-inii̱ soo iin sana xi̱ndakava-inii̱”.

² Tá yáʼayó nu̱ú sava ña̱ʼa, sana ndíʼi-iniyó (Prov. 12:25). Ta sava nda̱a̱ íxayo̱ʼvi̱ña xíʼinyó ña̱ kandíxayó keʼéyó chiñu ña̱ táxina ndaʼa̱yó. ¿Ndáaña chindeétáʼan xíʼinyó ña̱ kǒo kundi̱ʼi̱-iniyó ni ku̱a̱ʼá ña̱ʼa ná kixi nu̱úyó? (Kaʼvi Salmo 131:1-3).a Ná kotoyó ndáaña ke̱ʼé sava na̱ xi̱ndasakáʼnu Ndióxi̱ tiempo xi̱naʼá, ta saátu ndáaña kéʼé na̱ íyo tiempo vitin, ña̱ va̱ʼa kǒo ndíʼi-inina tá yáʼana nu̱ú sava ña̱ʼa.

NDA̱SAA KIVI CHINDEÉTÁʼAN NDIÓXI̱ XÍʼINYÓ ÑA̱ VA̱ʼA KǑO KUNDI̱ʼI̱-INIYÓ

3. ¿Ndáaña ndo̱ʼo ta̱ José?

³ Ta̱ Jacob xi̱kuni̱níra se̱ʼera ta̱ José. Xa̱ʼa ña̱yóʼo na̱ ñanira ni̱sa̱a̱ní-inina xi̱ninara, ta nda̱a̱ ni̱xi̱kónara ña̱ va̱ʼa kachíñu ndáʼvira nu̱ú inkana tá xi̱kuumiíra 17 ku̱i̱ya̱ (Gén. 37:2-4, 23-28). Ku̱ndeé ndiʼi-inira 13 ku̱i̱ya̱ ña̱ ka̱chíñu ndáʼvira nu̱ú inkana, ta saátu chi̱ka̱a̱nara veʼeka̱a chí ñuu Egipto, ta xíkaní ni̱xi̱yora nu̱ú yivára. ¿Ndáaña chi̱ndeétáʼan xíʼinra ña̱ va̱ása níndi̱ʼi̱-inira ta va̱ása nísa̱a̱-inira xa̱ʼa ndiʼi ña̱ ke̱ʼéna xíʼinra?

4. a) ¿Ndáaña xi̱ndakanixi̱ní ta̱ José xa̱ʼa tá xi̱ndika̱a̱ra veʼeka̱a? b) ¿Nda̱saa nda̱kuiin Jehová oración ña̱ ke̱ʼéra?

⁴ Tá xi̱ndika̱a̱ ta̱ José veʼeka̱a, ni̱xo̱ʼvi̱níra soo nda̱kanixi̱níra xa̱ʼa ña̱ ni̱na̱ʼa̱ Jehová ña̱ ndáara miíra (Gén. 39:21; Sal. 105:17-19). Saátu ña̱ ni̱xaníra tá ni̱xi̱yo loʼora, nda̱sandeéña ña̱ kándíxara Ndióxi̱ (Gén. 37:5-11). Ña̱yóʼo chi̱ndeétáʼan xíʼinra ña̱ va̱ʼa ka̱ʼa̱nra xíʼin Jehová xa̱ʼa ña̱ ndóʼora (Sal. 145:18). Mií Jehová nda̱sandeé-inira ña̱ va̱ʼa kandíxara ña̱ chindeétáʼanvara xíʼinra nda̱a̱ ndáaka ña̱ʼa ná kundoʼora (Hech. 7:9,10).b

5. ¿Nda̱saa chíndeétáʼan Ndióxi̱ xíʼinyó ña̱ va̱ʼa kachíñukayó nu̱úra?

⁵ Tiempo vitin sana yáʼayó nu̱ú ku̱a̱ʼá tu̱ndóʼo. Soo ni saá kivi chindeétáʼan Jehová xíʼinyó ña̱ kǒo kundi̱ʼi̱-iniyó (kaʼvi Filipenses 4:6, 7).c Ña̱kán ná ka̱ʼa̱nyó xíʼin Jehová tá ndíʼi̱ní-iniyó xa̱ʼa iin ña̱ʼa. Ta miíra chindeétáʼan xíʼinyó ña̱ kǒo kundi̱ʼi̱ní-iniyó, tasaá ya̱ʼayó nu̱ú ndiʼi ña̱ sándi̱ʼi̱-iniyó ta va̱ása ndakava-iniyó. Ná kotoyó ña̱ ndóʼo sava na̱ hermano tiempo vitin.

NÁ KA̱ʼA̱NYÓ XÍʼIN JEHOVÁ NÁ TAXIRA ÑA̱ VA̱ʼA KUNIYÓ

6, 7. ¿Nda̱saa kivi kǒo kundi̱ʼi̱-iniyó tá ná ndukúyó nu̱ú Ndióxi̱ mií ña̱ xíniñúʼuyó? Ka̱ʼa̱n xa̱ʼa iin ejemplo.

⁶ Tá ku̱nda̱a̱-ini ta̱ Ryan xíʼin ñá Juliette ña̱ va̱ása kuukana precursor especial, ku̱suchíní-inina. Ta̱ Ryan káchira ña̱ ndi̱ku̱n saá ni̱ka̱ʼa̱nna xíʼin Jehová. Káchira: “Xi̱kunda̱a̱-inindi̱ ña̱ vitin kúú ña̱ xíniñúʼu na̱ʼa̱ndi̱ nu̱ú Ndióxi̱ ña̱ kándíxandi̱ra. Ku̱a̱ʼání na̱ hermano na̱ congregación na̱ xa̱á kúúna, ña̱kán ni̱ka̱ʼa̱nndi̱ xíʼin Jehová ná chindeéra ndi̱ʼi̱ ña̱ ná kunina ña̱ kándíxandi̱ miíra”.

⁷ ¿Nda̱saa chi̱ndeé Ndióxi̱ miína? Ta̱ Ryan káchira: “Tándi̱ʼi ni̱ka̱ʼa̱nndi̱ xíʼin Ndióxi̱, va̱ása níndi̱ʼi̱ka-inindi̱. Ndióxi̱ ta̱xira ña̱ va̱ʼaní ku̱nindi̱. Ku̱nda̱a̱-inindi̱ ña̱ kivika kusi̱í-inindi̱ ña̱ kachíñundi̱ nu̱úra”.

8-10. a) ¿Nda̱saa chíndeétáʼan espíritu yi̱i̱ Ndióxi̱ xíʼinyó ña̱ va̱ʼa ya̱ʼayó nu̱ú tu̱ndóʼo? b) ¿Nda̱saa kivi ndakuiin Jehová ña̱ káʼa̱nyó xíʼinra tá kéʼéyó ña̱ kúni̱ra?

⁸ Su̱ví kuití kǒo kundi̱ʼi̱-iniyó xa̱ʼa ña̱ ndóʼoyó, saátu espíritu Ndióxi̱ kivi chindeétáʼanña xíʼinyó, ña̱ ndakaʼányó xa̱ʼa sava versículo ña̱ chindeé miíyó ña̱ keʼéyó chiñu Ndióxi̱ (kaʼvi Juan 14:26, 27).d Ná kotoyó ña̱ ndo̱ʼo ta̱ Philip xíʼin ñá Mary, iin matrimonio na̱ ka̱chíñu Betel ti̱xin 25 ku̱i̱ya̱. Ti̱xin ña̱ ku̱mí yo̱o̱ ni̱xi̱ʼi̱ siʼí u̱vi̱ saána xíʼin inka na̱ veʼe ta̱yóʼo. Saátu xi̱niñúʼu kundaana yivá ñá Mary, ta̱yóʼo xi̱kuumiíra iin kue̱ʼe̱ ña̱ xi̱nandosó-inira xa̱ʼa ña̱ xi̱keʼéra.

⁹ Ta̱ Philip káchira: “Xi̱ndakanixi̱níi̱ ña̱ va̱ʼaní yáʼi̱ nu̱ú tu̱ndóʼo yóʼo soo íyo iin ña̱ kúma̱ní keʼíi̱. Iin ki̱vi̱ tá káʼvi iin artículo ña̱ va̱xi ti̱xin Tutu Ña̱ Nátúʼun xíʼinyó ka̱ʼvii̱ ña̱ káʼa̱n Colosenses 1:11. Ku̱nda̱a̱-inii̱ ña̱ kúndeéva-inii̱ xíʼin ña̱ ndóʼi̱, soo kúma̱ní keʼíi̱ inka ña̱ʼa. Versículo yóʼo chi̱ndeétáʼan xíʼi̱n ña̱ ku̱nda̱a̱-inii̱ ña̱ xíniñúʼu kundeé-inii̱ xíʼin ña̱ si̱í-ini. Ta ña̱yóʼo sa̱ndákaʼánña yi̱ʼi̱ ña̱ kivi kusi̱í-inii̱ ni tá yáʼi̱ nu̱ú tu̱ndóʼo, chi espíritu yi̱i̱ Ndióxi̱ chíndeétáʼan xíʼi̱n”.

¹⁰ Ta̱ Philip xíʼin ñá Mary chi̱ka̱a̱nína ndée ña̱ keʼéna ña̱ kúni̱ Jehová, ta ta̱xira ku̱a̱ʼání bendición ndaʼa̱na. Tá ni̱ya̱ʼa loʼo tiempo ña̱ ki̱tana ti̱xin Betel u̱vi̱ saána nda̱ni̱ʼína na̱ yiví na̱ kúni̱ kaʼvi Biblia xíʼinna, ta va̱ʼaní chi̱ka̱a̱na ndée ña̱ keʼéna ña̱ kúni̱ Ndióxi̱. Ñá Mary káʼa̱nñá: “Ku̱si̱íní-inindi̱ chi xíʼin ña̱yóʼo ni̱na̱ʼa̱ Jehová nu̱úndi̱ ña̱ kǒo xíniñúʼu kundi̱ʼi̱ní-inindi̱”.

NÁ TAXIYÓ ÑA̱ CHINDEÉ JEHOVÁ MIÍYÓ

11, 12. a) ¿Ndáaña ke̱ʼé ta̱ José ña̱ va̱ʼa ta̱xira ná chindeétáʼan Jehová xíʼinra? b) ¿Ndáa bendición ta̱xi Jehová ndaʼa̱ ta̱ José xa̱ʼa ña̱ ku̱ndeé-inira xíʼin ña̱ ni̱ya̱ʼara nu̱ú?

¹¹ Sana tá yáʼayó nu̱ú sava ña̱ yo̱ʼvi̱, yíʼviyó xa̱ʼa ña̱ kivi kundoʼoyó chí nu̱únínu. Kivi kundoʼo ta̱ José ña̱yóʼo, soo va̱ása níyi̱ʼvíra, chi ta̱xira ña̱ chindeétáʼan Jehová xíʼinra. Ña̱kán ni tá xi̱ndika̱a̱ra veʼeka̱a, va̱ʼaní ti̱inra chiñu ña̱ ta̱xi ta̱ kíʼin kuenta xíʼin na̱ ñúʼu veʼeka̱a ndaʼa̱ra, táki̱ʼva xi̱keʼéra tá xi̱kachíñura veʼe ta̱ Potifar (Gén. 39:21-23).

¹² Iin yichi̱ ni̱ka̱ʼa̱nna xíʼinra ña̱ ná taxira ña̱ xíniñúʼu u̱vi̱ ta̱a ta̱ xi̱kachíñu nu̱ú ta̱ faraón. Xa̱ʼa ña̱ va̱ʼaní ke̱ʼé ta̱ José xíʼin na̱yóʼo, iin ki̱vi̱ ni̱ka̱ʼa̱nna xíʼinra xa̱ʼa ña̱ sándi̱ʼi̱-inina ta saátu xa̱ʼa xa̱ni ña̱ ni̱xa̱nína (Gén. 40:5-8). Va̱ása xíni̱ ta̱ José soo ña̱ na̱túʼunra xíʼin na̱kán chindeétáʼan xíʼinra so̱ndíʼi. Ni̱ya̱ʼa u̱vi̱ ku̱i̱ya̱ ta mií ki̱vi̱ ña̱ ki̱tara ti̱xin veʼeka̱a nda̱kiʼinra iin chiñu ña̱ káʼnuní ti̱xin ñuu kán, soo ta̱ káʼnuka xi̱kuu ta̱ faraón (Gén. 41:1, 14-16, 39-41).

13. Nda̱a̱ ndáaka tu̱ndóʼo ná ya̱ʼayó nu̱ú, ¿nda̱saa kivi taxiyó ña̱ chindeétáʼan Jehová xíʼinyó?

¹³ Táki̱ʼva ndo̱ʼo ta̱ José, sana ndóʼoyó iin tu̱ndóʼo ña̱ kǒo kivi nasamayó. Soo tá kúee íyo iniyó ta chíka̱a̱yó ndée ña̱ keʼéyó ndiʼi ña̱ kúni̱ Jehová, taxiyó ña̱ chindeétáʼanra xíʼinyó (Sal. 37:5). Sana sava yichi̱ va̱ása xíni̱yó ndáaña keʼéyó, soo kivi ‘ya̱ʼavayó nu̱ú tu̱ndóʼo yóʼoʼ ta va̱ása ndi̱ʼiní-iniyó táki̱ʼva ni̱ka̱ʼa̱n ta̱ apóstol Pablo (2 Cor. 4:8). Ná kǒo kundi̱ʼi̱-iniyó, ta ná chíka̱a̱níyó ndée ña̱ keʼéyó chiñu Ndióxi̱.

NÁ KEʼÉYÓ CHIÑU NDIÓXI̱

14-16. ¿Ndáaña ke̱ʼé ta̱ Felipe ni ni̱ya̱ʼara nu̱ú ku̱a̱ʼá ña̱ʼa?

¹⁴ Ná kotoyó ndáaña ndo̱ʼo ta̱ Felipe ta̱ xi̱ndasakáʼnu Ndióxi̱ tiempo xi̱naʼá, va̱ʼaní yichi̱ sa̱ndákoo ta̱yóʼo nu̱úyó xa̱ʼa ña̱ kivi keʼéyó tá va̱xi ku̱a̱ʼání ña̱ʼa nu̱úyó. Ta̱ Felipe xi̱keʼéra inka chiñu nu̱ú Jehová chí ñuu Jerusalén (Hech. 6:1-6). Soo tá xa̱ʼnína ta̱ Esteban, na̱ yiví ki̱xaʼá íxaa ndi̱va̱ʼana xíʼin na̱ hermano.e Tá xi̱ni ta̱ Felipe ña̱ xi̱nu na̱ xi̱ndiku̱n ta̱ Jesús ku̱a̱ʼa̱nna inka ñuu, chi̱ka̱a̱ra ndée ña̱ ku̱ʼu̱nra natúʼunra xa̱ʼa Ndióxi̱ xíʼin na̱ yiví na̱ ñuu Samaria, chi loʼoní kúú na̱ xíni̱ xa̱ʼa Ndióxi̱ ñuu kán (Mat. 10:5; Hech. 8:1, 5).

¹⁵ Ta̱ Felipe ta̱xira ña̱ chindeétáʼan espíritu yi̱i̱ Ndióxi̱ xíʼinra. Xa̱ʼa ña̱yóʼo Jehová xi̱niñúʼurara ña̱ va̱ʼa sanáʼa̱ra ñuu nu̱ú ta̱ʼán kuniso̱ʼo na̱ yiví xa̱ʼara. Tiempo kán na̱ judío xi̱kundasína xi̱xinina na̱ samaritano. Soo ta̱ Felipe va̱ʼava xi̱kitáʼanra xíʼinna, ta xa̱ʼa ña̱yóʼo va̱ʼaní ku̱nina xíʼinra. Ña̱kán va̱ása ndákanda̱-iniyó ña̱ va̱ʼaní xi̱niso̱ʼo na̱ yiví kán ña̱ sa̱náʼa̱rana (Hech. 8:6-8).

¹⁶ Tasaá espíritu yi̱i̱ Ndióxi̱ ta̱xiña yichi̱ nu̱úra ña̱ ku̱ʼu̱nra ñuu Asdod xíʼin Cesarea, ña̱yóʼo xi̱kuu u̱vi̱ ñuu nu̱ú ni̱xi̱yo na̱ va̱ása kúú judío (Hech. 8:39, 40). Tá ni̱ya̱ʼa 20 ku̱i̱ya̱ ña̱ ki̱xaʼára sánáʼa̱ra xa̱ʼa Ndióxi̱ chí ñuu Samaria, na̱sama tuku chiñu ña̱ xi̱kuumií ta̱ Felipe. Vitin xa̱a̱ íyo ñá síʼíra xíʼin se̱ʼera ta ki̱ndoora iin ñuu nu̱ú xi̱sanáʼa̱ra xa̱ʼa Ndióxi̱. Ni ni̱ya̱ʼara nu̱ú sava ña̱ʼa, ke̱ʼévara chiñu Ndióxi̱ ta xa̱ʼa ña̱yóʼo miíra xíʼin na̱ veʼera nda̱kiʼinna ku̱a̱ʼání bendición (Hech. 21:8, 9).

17, 18. ¿Ndáaña xíniñúʼu keʼéyó tá va̱xi inka ña̱ʼa nu̱úyó?

¹⁷ Ku̱a̱ʼání na̱ káchíñu ku̱a̱ʼá tiempo nu̱ú Jehová káʼa̱nna, ña̱ chíka̱a̱kana ndée ña̱ keʼéna ña̱ kúni̱ra, ña̱yóʼo chíndeétáʼan xíʼinna ña̱ va̱ása ndi̱ʼi̱-inina xa̱ʼa ña̱ʼa ña̱ va̱xi nu̱úna. Ná kotoyó ndáaña ndo̱ʼo ta̱ Osborne xíʼin ñá Polite, iin matrimonio na̱ ñuu Sudáfrica. Tá ki̱tana ti̱xin Betel nda̱kanixi̱nína ña̱ kamaní ndani̱ʼína chiñu ña̱ kachíñuna loʼo tiempo ta saátu ña̱ ndani̱ʼína iin veʼe nu̱ú kundoona. Soo, ¿ndáaña ndo̱ʼona? Ta̱ Osborne káchira: “Va̱ása níndani̱ʼí kamandi̱ chiñu ña̱ kachíñundi̱ táki̱ʼva nda̱kanixi̱níndi̱”. Ñá Polite káchiña: “Ni̱ya̱ʼa u̱ni̱ yo̱o̱ va̱ása níkachíñundi̱ ta ni va̱ása níxikuumiíndi̱ xu̱ʼún. I̱xayo̱ʼvi̱níña xíʼindi̱”.

¹⁸ ¿Ndáaña chi̱ndeétáʼan xíʼinna ña̱ va̱ʼa ni̱ya̱ʼana nu̱ú tu̱ndóʼo yóʼo? Ta̱ Osborne káchira: “Ña̱ xi̱keendi̱ xi̱sanáʼa̱ndi̱ xa̱ʼa Ndióxi̱ xíʼin na̱ hermano na̱ congregación, chi̱ndeétáʼanña xíʼindi̱ ña̱ va̱ása ndi̱ʼi̱ní-inindi̱ ta va̱ása ndakava-inindi̱. Va̱ʼaka chi̱ka̱a̱ndi̱ ndée ña̱ kachíñukandi̱ nu̱ú Ndióxi̱ nu̱úka ña̱ ndi̱ʼi̱ní-inindi̱. Ña̱yóʼo ta̱xi ña̱ ku̱si̱í-inindi̱. Na̱ndukúkandi̱ chiñu ta nda̱ni̱ʼívandi̱ña”.

KÚEE NÁ KOO INIYÓ TA NÁ KANDÍXAYÓ ÑA̱ CHINDEÉTÁʼAN JEHOVÁ XÍʼINYÓ

19-21. a) ¿Ndáaña chindeétáʼan xíʼinyó ña̱ va̱ʼa kuniyó? b) ¿Ndáaña va̱ʼa ndakiʼinyó tá kándíxayó ña̱ yáʼayó nu̱ú?

¹⁹ Táki̱ʼva sa̱kuaʼayó xíʼin ña̱ ke̱ʼé sava na̱ hermano tá ni̱ya̱ʼana nu̱ú tu̱ndóʼo, tá chíka̱a̱yó ndée ña̱ keʼéyó chiñu nu̱ú Jehová ta kándíxayó ña̱ chindeétáʼanra xíʼinyó, va̱ʼaníva kuniyó (kaʼvi Miqueas 7:7).f Sana nda̱a̱ kotoyó ña̱ va̱ʼaníka íyoyó vitin xa̱ʼa ña̱ ka̱ndíxayó Ndióxi̱. Ñá Polite káʼa̱nñá ña̱yóʼo xa̱ʼa ña̱ ndo̱ʼoñá xíʼin yiíñá: “Tá ndákiʼinyó inka chiñu ti̱xin ñuu Ndióxi̱, ña̱yóʼo sánáʼa̱ña yi̱ʼi̱ ña̱ xíniñúʼu kandíxaníyó ña̱ chindeétáʼanra xíʼinyó. Va̱ʼaníka kítáʼi̱n xíʼinra vitin”.

²⁰ Ñá Mary, ñá ni̱ka̱ʼa̱nyó xa̱ʼa nu̱ú párrafo 8, ndáañá yiváñá nda̱a̱ tiempo vitin ta kúúñá precursora. Ta káchiñá: “Ña̱ sa̱kuaʼi̱ kúúña, tá kíxaʼá ndíʼi̱-inii̱, xíniñúʼu keʼíi̱ oración ta ndakiʼin ndeíi̱. Ña̱ sa̱kuaʼi̱ xíʼin ña̱yóʼo kúú, ña̱ xíniñúʼu taxi ná chindeétáʼan Jehová xíʼi̱n. Ta ña̱yóʼo kúú ña̱ chindeé yi̱ʼi̱ chí nu̱únínu”.

²¹ Ta̱ Lloyd xíʼin ñá Alexandra, na̱ ni̱ka̱ʼa̱nyó xa̱ʼa tá ki̱xaʼá ña̱ artículo yóʼo, káʼa̱nna ña̱ na̱sama chiñu ña̱ xi̱keʼéna, saá ni̱na̱ʼa̱na ña̱ kándíxana Ndióxi̱. Káchina: “Tá yáʼayó nu̱ú iin ña̱ʼa ña̱ va̱ása ndátuyó kuu, saá náʼa̱yó á ndixa kándíxayó Ndióxi̱, ta ña̱yóʼo chindeétáʼan xíʼinyó ta sandi̱koña iniyó tá ná ya̱ʼayó nu̱ú iin tu̱ndóʼo ña̱ yo̱ʼvi̱. Vitin va̱ʼaníka na̱ yiví kúúndi̱”.

22. ¿Ndáaña xíniñúʼu kandíxayó ni tá yáʼayó nu̱ú iin ña̱ íxayo̱ʼvi̱ xíʼinyó?

²² Tá iin sana ná kixi ku̱a̱ʼá ña̱ʼa ña̱ íxayo̱ʼvi̱ xíʼinyó, á inka chiñu ná ndakiʼinyó ti̱xin ñuu Ndióxi̱, á tá ná kiʼin iin kue̱ʼe̱ miíyó á inkaka ña̱ʼa ná ya̱ʼayó nu̱ú, ná kandíxayó chi ndíʼi̱-ini Jehová xa̱ʼayó ta chindeétáʼanra xíʼinyó mií tiempo ña̱ xíniñúʼuyóña (Heb. 4:16; 1 Ped. 5:6, 7). Soo vitin xíniñúʼu chika̱a̱yó ndée ña̱ keʼéyó chiñu Ndióxi̱. Ná kuyatinkayó nu̱úra, ná ka̱ʼa̱nyó xíʼinra ta ná taxiyó ná kundaara miíyó. Saá va̱ʼaní kuniyó ni tá va̱xi sava ña̱ʼa nu̱úyó.