¿Á xa̱a̱ xíni̱ún xa̱ʼa ña̱yóʼo?

¿Nda̱chun va̱ʼaní kúee ni̱xi̱yo ini ta̱ Esteban nu̱ú na̱ sáa̱-ini xíniñaʼá?

TA̱ Esteban íyora nu̱ú ku̱a̱ʼá na̱ ta̱a na̱ ndi̱va̱ʼa-ini, 71 kúú na̱ juez, ndiʼi na̱yóʼo kúúna na̱ Sanedrín á na̱ tíin ku̱a̱chi nu̱ú ña̱ ñuu na̱ judío. Na̱yóʼo kúú na̱ ndeéka nu̱ú na̱ ñuu kán. Ta̱ su̱tu̱ káʼnu Caifás kúú ta̱ nda̱kaya na̱yóʼo, ta̱yóʼo kúú ta̱ ni̱ka̱ʼa̱n ña̱ ná kaʼnína ta̱ Jesús (Mat. 26:57, 59; Hech. 6:8-12). Ta ki̱xa̱a̱ na̱ yiví na̱ káʼa̱n ña̱ vatá xa̱ʼara. Tá nda̱koto na̱yóʼo nu̱ú ta̱ Esteban, nda̱kanda̱-inina tá xi̱nina nu̱úra, chí nu̱úra íyoña táki̱ʼva íyo nu̱ú iin ángel (Hech. 6:13-15).

¿Nda̱chun va̱ʼa kúee ni̱xi̱yo ini ta̱ Esteban nu̱ú tu̱ndóʼo yóʼo? Tá ta̱ʼánka ku̱ʼu̱nna xíʼinra nu̱ú na̱ Sanedrín, ña̱ xi̱ndiʼika inira xa̱ʼa kúú chiñu ña̱ xi̱kuumiíra ti̱xin congregación, chi Jehová xi̱taxi espíritu yi̱i̱ ndaʼa̱ra (Hech. 6:3-7). Tá tíinna ku̱a̱chi xíʼinra, espíritu yi̱i̱ Ndióxi̱ sa̱ndíkoña inira ta sa̱ndákaʼánñara sava ña̱ʼa (Juan 14:16, nota). Soo, ta̱yóʼo ndakúní ni̱xi̱yo inira, tá ni̱ka̱ʼa̱nra xíʼin na̱ chíñu kán, nu̱ú Hechos capítulo 7 nátúʼunkaña xa̱ʼa ña̱yóʼo, soo espíritu yi̱i̱ Ndióxi̱ sa̱ndakaʼánñara xa̱ʼa 20 ña̱ xa̱a̱ sa̱kuaʼara nu̱ú ña̱ Escrituras Hebreas ta ña̱yóʼo kúú ña̱ chi̱ndeétáʼan xíʼinra (Juan 14:26). Soo ña̱ kándíxa ta̱ Esteban Jehová ndu̱ndakúkaña tá xi̱nira iin visión, nu̱ú níndichi ta̱ Jesús chí ndaʼa̱ kúaʼa Ndióxi̱ (Hech. 7:54-56, 59, 60).

Sana nda̱a̱ miíyó kivi kundoʼo saá, ña̱ ya̱ʼayó nu̱ú iin tu̱ndóʼo ña̱ ndéení (Juan 15:20). Tá kúúmiíyó costumbre ña̱ káʼviyó tu̱ʼun Ndióxi̱ ndiʼi ki̱vi̱, ta saátu ña̱ ku̱a̱ʼa̱nyó nátúʼunyó xíʼin na̱ yiví xa̱ʼara, saá taxiyó ña̱ chindeétáʼan espíritu yi̱i̱ Jehová xíʼinyó. Saá taxira ndée ndaʼa̱yó ña̱ va̱ʼa ya̱ʼayó nu̱ú tu̱ndóʼo, ta saátu va̱ʼa sandi̱kora iniyó (1 Ped. 4:12-14).