Pregunta ña̱ kéʼé na̱ káʼvi tutu yóʼo

Ta̱ David nu̱ú Salmo 61:8 ni̱ka̱ʼa̱nra ña̱ ndasakáʼnura Jehová ndiʼi tiempo, ¿á xi̱kuni̱ kachi ña̱yóʼo ña̱ va̱ása xa̱a̱ra kuvira?

Ta̱ rey David sákaʼara tú arpa ta xítara.

Va̱ása. Su̱ví ña̱yóʼo níxi̱kuni kachi ta̱ David tá kaʼyíra texto yóʼo.

Ndakanixi̱ní xa̱ʼa̱ ña̱ ka̱ʼyí ta̱ David nu̱ú versículo yóʼo xíʼin inkaka ña̱ kítáʼan xíʼin ña̱yóʼo. Ta̱yóʼo ka̱chira: “Ndasakáʼnui̱ ki̱vi̱ún ndiʼi tiempo ta ndiʼi ki̱vi̱ sáxi̱nui̱ ña̱ ki̱ndoi̱ xíʼún”, “Ndasakáʼnui̱ yóʼó xíʼin ndiʼi níma̱i̱ Jehová Ndióxi̱ miíi̱, ta ndasakáʼnui̱ ki̱vi̱ún ndiʼi tiempo” (Sal. 61:8; 86:12; 145:1, 2).

Tá ka̱ʼyí ta̱ David tu̱ʼun ña̱ va̱xi yóʼo, va̱ása níxi̱kuni kachira ña̱ va̱ása kuvira, chi ta̱yóʼo xi̱kunda̱a̱va-inira ña̱ Jehová ni̱ka̱ʼa̱n xa̱ʼa̱ na̱ yiví na̱ kúúmií ku̱a̱chi ña̱ kuvivana. Ta nda̱a̱ mií ta̱ David nda̱kunira ña̱ kúúra iin ta̱ yiví ku̱a̱chi (Gén. 3:3, 17-19; Sal. 51:4, 5). Xi̱kunda̱a̱tu-inira ña̱ nda̱a̱ na̱ xi̱ndasakáʼnu Ndióxi̱ tiempo xi̱naʼá, tá kúú ta̱ Abrahán, ta̱ Isaac xíʼin ta̱ Jacob ni̱xi̱ʼi̱vana. Ta saátu xi̱kunda̱a̱-inira ña̱ kixaa̱ iin ki̱vi̱ ña̱ kuvira (Sal. 37:25; 39:4). Soo tu̱ʼun ña̱ va̱xi nu̱ú Salmo 61:8 náʼa̱ña nu̱úyó ña̱ xi̱kuni̱ ta̱ David ndasakáʼnura Jehová ndiʼi tiempo á ña̱ xi̱kuni̱ kachira kúú ña̱ nani tákura ndasakáʼnura Jehová (2 Sam. 7:12).

Sava yichi̱ ta̱ David xi̱kaʼyíra xa̱ʼa̱ ña̱ xi̱ndoʼo miíra, nda̱a̱ táki̱ʼva íyo ña̱ va̱xi chí xi̱ní ña̱ Salmo 18, 51 xíʼin 52. Ta nu̱ú Salmo 23 ta̱ David ni̱ka̱ʼa̱nra xa̱ʼa̱ Jehová ña̱ íyora nda̱a̱ táki̱ʼva íyo iin pastor ta̱ va̱ʼaní níʼi yichi̱ nu̱ú ndikachi sa̱na̱ra ta va̱ʼaní ndáararí ta sándi̱kora-inirí. Ta ki̱ʼva saá xi̱ndaa ta̱ David ndikachi sa̱na̱ra, xa̱ʼa̱ ña̱kán xi̱kuni̱ra ndasakáʼnura Jehová nani xi̱takura (Sal. 23:6).

Ná ndakaʼányó chi Ndióxi̱ xi̱niñúʼura ta̱ David ña̱ ka̱ʼyíra sava salmo. Ta sava ña̱yóʼo kúú profecía ña̱ kúma̱níka xi̱nu. Tá kúú Salmo 110, nu̱ú ña̱yóʼo ni̱ka̱ʼa̱n ta̱ David xa̱ʼa̱ ta̱ Jesús ña̱ koora chí ndaʼa̱ kúaʼa Ndióxi̱ chí ndiví ta Ndióxi̱ ku̱a̱ʼání ndee̱ taxira ndaʼa̱ra. Ta xíʼin ndee̱ yóʼo sandíʼi-xa̱ʼa̱ra na̱ sáa̱-ini xíni Ndióxi̱ na̱ íyo nu̱ú ñuʼú yóʼo. Ti̱xin na̱ veʼe ta̱ David kúú nu̱ú ki̱xi ta̱ Mesías ta̱ kaʼndachíñu chí ndiví ta koora su̱tu̱ ndiʼi tiempo (Sal. 110:1-6). Ta̱ Jesús ni̱ka̱ʼa̱nra xa̱ʼa̱ profecía ña̱ va̱xi nu̱ú Salmo 110, ña̱ xa̱ʼa̱ miíra káʼa̱nña ta xi̱nuña chí nu̱únínu (Mat. 22:41-45).

Nda̱a̱ táki̱ʼva sa̱kuaʼayó, Jehová xi̱niñúʼura ta̱ David ña̱ ka̱ʼyíra xa̱ʼa̱ sava ña̱ʼa ña̱ ku̱u tiempo ña̱ ni̱xi̱yora ta saátu xa̱ʼa̱ sava ña̱ʼa ña̱ kuu chí nu̱únínu tá ná ndatakura ta kivi ndasakáʼnura Jehová ndiʼi tiempo. ¿Ndáa ki̱ʼva chíndeétáʼan Salmo 37:10, 11, 29 xíʼinyó ña̱ kunda̱a̱-iniyó xa̱ʼa̱ ña̱yóʼo? Versículo yóʼo káʼa̱nña ndáa ki̱ʼva ni̱xi̱yo na̱ ñuu Israel tiempo xi̱naʼá ta saátu káʼa̱nña ndáa ki̱ʼva kutakuyó chí nu̱únínu tá ná xi̱nu ña̱ kúni̱ Ndióxi̱ (kaʼvi artículo ña̱ naní “Koún xíʼi̱n nu̱ú ñuʼú livi” párrafo 8, ña̱ va̱xi nu̱ú tutu yóʼo).

Ña̱kán ña̱ va̱xi nu̱ú Salmo 61:8 xíʼin inkaka versículo ña̱ kítáʼan xíʼin ña̱yóʼo, chíndeétáʼanña xíʼinyó kunda̱a̱-iniyó ña̱ xi̱kuni̱ ta̱ David ndasakáʼnura Jehová nani xi̱takura. Ta saátu chíndeétáʼanña xíʼinyó ña̱ kunda̱a̱-iniyó ña̱ ndakundeéva ta̱ David ndasakáʼnura Jehová tá ná ndatakura chí nu̱únínu.