¿Á xa̱a̱ íyo tu̱ʼvaún ña̱ kixaa̱ ki̱vi̱ ña̱ ndáyáʼviní?

1. ¿Ndáa ki̱vi̱ kúúmií ña̱ ndáyáʼviníka nu̱ú miíyó na̱ ndásakáʼnu Ndióxi̱? (Lucas 22:​19, 20).

NDÁYÁʼVINÍ ña̱ Conmemoración nu̱ú miíyó na̱ testigo Jehová, chi saá ndákaʼányó xa̱ʼa̱ ki̱vi̱ ña̱ ni̱xi̱ʼi̱ ta̱ Jesús xa̱ʼa̱yó. Ta iinlá ña̱yóʼo kúú ña̱ ni̱ka̱ʼa̱n ta̱ Jesús xíʼinyó ña̱ ndakaʼányó (kaʼvi Lucas 22:​19, 20). Xa̱a̱ kúni̱níyó ña̱ kixaa̱ ki̱vi̱ kán. ¿Nda̱chun? Ná ka̱ʼa̱nyó xa̱ʼa̱ ña̱yóʼo.

2. ¿Nda̱chun xa̱a̱ kúni̱níyó ná kixaa̱ ki̱vi̱ ña̱ koo Conmemoración?

² Ña̱ Conmemoración chíndeétáʼanña xíʼinyó ña̱ ndakanixi̱níyó xa̱ʼa̱ ña̱ ndáyáʼviní ke̱ʼé ta̱ Jesús xa̱ʼa̱yó. Saátu sándakaʼánña miíyó ndáaña xíniñúʼu keʼéyó ña̱ va̱ʼa na̱ʼa̱yó ña̱ táxiyó tíxa̱ʼvi ndaʼa̱ Jehová xa̱ʼa̱ ña̱ ke̱ʼé ta̱ Jesús xa̱ʼa̱yó (2 Cor. 5:​14, 15). Saátu chíndeétáʼanña xíʼinyó ña̱ ndakutáʼanyó xíʼin na̱ hermanoyó ta chikaa̱yó ndee̱ xíʼinna (Rom. 1:12). Ndiʼi ku̱i̱ya̱ ku̱a̱ʼání na̱ inactivo xáʼa̱nna Conmemoración ta sava na̱yóʼo ndíkóna nu̱ú Jehová xa̱ʼa̱ ña̱ va̱ʼaní ndákiʼinyóna. Saátu ku̱a̱ʼání na̱ yiví ndákanda̱-inina xíʼin ña̱ xítona xíʼin ña̱ xíniso̱ʼona tá xáʼa̱nna Conmemoración, ta xa̱ʼa̱ ña̱yóʼo kíxáʼana káʼvina Biblia. Xa̱ʼa̱ ña̱kán ndáyáʼviní ña̱ Conmemoración nu̱úyó.

3. ¿Ndáa ki̱ʼva chíndeétáʼan ña̱ Conmemoración xíʼinyó ña̱ va̱ʼaní kutáʼanyó? (Koto na̱ʼná).

³ Tá xa̱a̱ ni̱ndi̱ʼvi ñu̱ʼu á ña̱ka̱ndii ndiʼi miíyó na̱ testigo Jehová ndátakayó ki̱vi̱ ña̱ ndáyáʼviní kán ña̱ va̱ʼa ndakaʼányó xa̱ʼa̱ ña̱ ni̱xi̱ʼi̱ ta̱ Jesús, tasaá xíto na̱ yiví ña̱ va̱ʼaní kítáʼanyó. Ndiʼiyó xíniso̱ʼoyó iin discurso ña̱ káʼa̱n nda̱chun ndáyáʼviní ña̱ sa̱kǎku ta̱ Jesús miíyó. Xítayó u̱vi̱ yaa, ta sáya̱ʼana si̱ta̱váʼa xíʼin tá vino ndaʼa̱yó, ta saátu kéʼéyó ku̱mí oración ta káʼa̱nyó “saá koo”. Ña̱yóʼo kúú ña̱ kéʼé na̱ congregación na̱ íyo iníísaá ñuyǐví ki̱vi̱ kán. Jehová xíʼin ta̱ Jesús kúsi̱íní-inina tá xítona ña̱ kéʼéyó ña̱yóʼo.

4. ¿Ndáaña sakúaʼayó nu̱ú artículo yóʼo?

⁴ Nu̱ú artículo yóʼo ndakuiinyó sava pregunta, tá kúú ña̱yóʼo: ¿Ndáaña keʼéyó ña̱ va̱ʼa koo tu̱ʼvayó tá ná koo ña̱ Conmemoración? ¿Ndáa ki̱ʼva chindeétáʼanyó xíʼin inkana ña̱ va̱ʼa kunda̱a̱-inina xíʼin ña̱ kuniso̱ʼona kán? ¿Ndáa ki̱ʼva chindeétáʼanyó xíʼin na̱ inactivo? Ña̱ sakúaʼayó vitin kúú ña̱ chindeétáʼan xíʼinyó ña̱ koo tu̱ʼvayó tá ná kixaa̱ ki̱vi̱ ña̱ ndáyáʼviní kán.

¿NDÁAÑA KEʼÉYÓ ÑA̱ VA̱ʼA KOO TU̱ʼVAYÓ KI̱VI̱ KÁN?

5. a) ¿Nda̱chun xíniñúʼu ndakanixi̱níyó xa̱ʼa̱ ña̱ ni̱xi̱ʼi̱ ta̱ Jesús? (Salmo 49:​7, 8). b) Ka̱ʼa̱n ndáaña sa̱kúaʼún xíʼin video ña̱ naní ¿Nda̱chun ni̱xi̱ʼi̱ ta̱ Jesús?

⁵ Ña̱ ni̱xi̱ʼi̱ ta̱ Jesús xa̱ʼa̱yó ndáyáʼviníña, ña̱kán ná ndakanixi̱níyó xa̱ʼa̱ ña̱yóʼo tasaá koo tu̱ʼvayó tá xa̱a̱ ná koo ña̱ Conmemoración. Saáchi ni iin miíyó na̱ yiví va̱ása kuchiñuyó chaʼviyó xa̱ʼa̱ ku̱a̱chi ña̱ ni̱ki̱ʼviyó (kaʼvi Salmo 49:​7, 8).a (Saátu koto video ña̱ naní ¿Nda̱chun ni̱xi̱ʼi̱ ta̱ Jesús?).b Jehová ta̱xira se̱ʼera ña̱ ni̱xi̱ʼi̱ra xa̱ʼa̱yó, ndáyáʼviní ña̱ ke̱ʼé u̱vi̱ saána (Rom. 6:23). Tá ku̱a̱ʼáka tiempo ndákanixi̱níyó xa̱ʼa̱ ña̱ ke̱ʼé Jehová xíʼin ta̱ Jesús, saá kúú ña̱ ndáyáʼviní ña̱yóʼo nu̱úyó. Vitin ná kotoyó ña̱ ke̱ʼé Jehová xíʼin ta̱ Jesús xa̱ʼa̱yó, soo siʼnaka ná kotoyó nda̱chun xi̱niñúʼu kuvi ta̱ Jesús.

6. ¿Ndáaña xi̱niñúʼu keʼé ta̱ Jesús ña̱ va̱ʼa chaʼvira xa̱ʼa̱ ku̱a̱chiyó?

⁶ Ña̱ tu̱ʼun rescate kúni̱ kachiña ña̱ chaʼvina xa̱ʼa̱ iin ña̱ʼa ña̱ va̱ʼa ndakiʼinnaña. Tá i̱xava̱ʼa Jehová ta̱ Adán kǒo ku̱a̱chi níxi̱kuumiíra. Soo tá ni̱ki̱ʼvira ku̱a̱chi va̱ása nítaxika Jehová ña̱ kutakura ndiʼi saá tiempo. Ta ni na̱ se̱ʼera va̱ása níkivika kutakuna ndiʼi saá tiempo. Ña̱kán ña̱ va̱ʼa ndasavií ta̱ Jesús ña̱ ke̱ʼé ta̱ Adán, xi̱niñúʼu kuvira xa̱ʼa̱yó saáchi su̱ví ta̱ ku̱a̱chi níxi̱yora. Ndiʼi tiempo ña̱ ni̱xi̱yo ta̱ Jesús nu̱ú ñuʼú yóʼo, va̱ása níki̱ʼvira ku̱a̱chi ta va̱ása níka̱ʼa̱nra nda̱a̱ ni iin ña̱ vatá (1 Ped. 2:22). Su̱ví ta̱ ku̱a̱chi níxi̱yo ta̱ Jesús, xa̱ʼa̱ ña̱kán inkáchi xi̱ndayáʼvira xíʼin ta̱ Adán (1 Cor. 15:45; 1 Tim. 2:6).

7. Ka̱ʼa̱n xa̱ʼa̱ sava tu̱ndóʼo ña̱ ni̱ya̱ʼa ta̱ Jesús nu̱ú.

⁷ Tá ni̱xi̱yo ta̱ Jesús nu̱ú ñuʼú yóʼo xi̱niso̱ʼora ndiʼi ña̱ ni̱ka̱ʼa̱n Jehová xíʼinra ni ni̱ya̱ʼara nu̱ú ku̱a̱ʼá tu̱ndóʼo. Ñá María xíʼin ta̱ José na̱ ku̱a̱chi ni̱xi̱yona, soo ni saá va̱ʼaní xi̱xiniso̱ʼo ta̱ Jesús ña̱ xi̱ka̱ʼa̱nna xíʼinra (Luc. 2:51). Tá ni̱xi̱yo loʼora, sana xi̱ka̱ʼa̱nva inka na̱ yiví xíʼinra ña̱ ná kǒo kuniso̱ʼora ña̱ káʼa̱n na̱ yivára xíʼinra á ña̱ va̱ása nda̱kúka koo inira xíʼin Jehová. Tá xa̱a̱ xa̱ʼnura, ta̱ Ndi̱va̱ʼa ni̱ka̱ʼa̱nra xíʼinra ña̱ keʼéra ña̱ kǒo kútóo Jehová (Mat. 4:​1-11). Ña̱ xi̱kuni̱ ta̱ Ndi̱va̱ʼa kúú ña̱ ki̱ʼvi ta̱ Jesús ku̱a̱chi, tasaá kǒo kivika chaʼvira xa̱ʼa̱ ku̱a̱chi na̱ yiví.

8. ¿Ndáa inka tu̱ndóʼo ni̱ya̱ʼa ta̱ Jesús nu̱ú?

⁸ Tá xa̱a̱ ki̱xáʼa ta̱ Jesús nátúʼunra xa̱ʼa̱ Ndióxi̱, ni̱ya̱ʼara nu̱ú inkaka tu̱ndóʼo. Tá kúú, na̱ xi̱saa̱-ini xi̱xini miíra i̱xandi̱va̱ʼana xíʼinra ta xi̱kuni̱na kaʼnínara (Luc. 4:​28, 29; 13:31). Ta sava yichi̱ na̱ discípulora xi̱keʼéna sava ña̱ kǒo níxikutóora xa̱ʼa̱ ña̱ xi̱kuuna na̱ yiví ku̱a̱chi (Mar. 9:​33, 34). Tá nda̱tiin na̱ chíñu ku̱a̱chi xíʼinra, i̱xandi̱va̱ʼanína xíʼinra ta ni̱kusi̱kindaanara. Tándi̱ʼi, xa̱ʼnínara nda̱a̱ táki̱ʼva xáʼnína iin na̱ kui̱ʼná (Heb. 12:​1-3). Tá si̱lóʼo kúma̱ní kuvira sa̱ndákoo ndaʼa̱ Jehová miíra, ña̱kán iinlá miíra ni̱ya̱ʼa nu̱ú tu̱ndóʼo ña̱ yo̱ʼvi̱ní kán (Mat. 27:46).c

9. ¿Ndáaña ndóʼoyó tá ndákanixi̱níyó xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó? (1 Pedro 1:8).

⁹ Ni̱xo̱ʼvi̱ní ta̱ Jesús ña̱ va̱ʼa chaʼvira xa̱ʼa̱ ku̱a̱chiyó. Tá ndákanixi̱níyó xa̱ʼa̱ ndiʼi ña̱ ke̱ʼé ta̱ Jesús xa̱ʼa̱yó, kúʼvi̱ní-iniyó xíniyóra (kaʼvi 1 Pedro 1:8).

10. ¿Ndáaña ke̱ʼé Jehová ña̱ va̱ʼa chaʼvira xa̱ʼa̱ ku̱a̱chiyó?

¹⁰ ¿Ndáaña ke̱ʼé Jehová ña̱ va̱ʼa chaʼvira xa̱ʼa̱ ku̱a̱chiyó? Chi̱ndaʼára se̱ʼera ta̱ va̱ʼaní kítáʼan xíʼinra ña̱ ki̱xira nu̱ú ñuʼú yóʼo (Prov. 8:30). Ña̱kán, ni̱xo̱ʼvi̱ní-ini Jehová tá xi̱nira ña̱ ni̱ya̱ʼa ta̱ Jesús nu̱ú ku̱a̱ʼání tu̱ndóʼo. Saátu xi̱kusuchíní-inira tá xi̱xitora ña̱ xi̱ ixandi̱va̱ʼanína xíʼin se̱ʼera, ña̱ xi̱kusi̱kindaanara, ta saátu ña̱ xi̱kundasína xi̱xininara.

11. ¿Ndáana va̱ʼaníka kúnda̱a̱-ini xíʼin ña̱ ndo̱ʼo Jehová tá xa̱ʼnína ta̱ Jesús?

¹¹ Ndóʼó na̱ xa̱a̱ ni̱xi̱ʼi̱ iin se̱ʼe, kúnda̱a̱va-inindó ndáaña ndo̱ʼo Jehová tá xa̱ʼnína ta̱ Jesús. Ni kándíxavayó ña̱ káʼa̱n Ndióxi̱ ña̱ ndataku na̱ ni̱xi̱ʼi̱, soo kúsuchíníva-iniyó tá xíʼi̱ iin na̱ kúni̱níyó xíniyó. Ejemplo yóʼo chíndeétáʼanña xíʼinyó ña̱ kunda̱a̱-iniyó ndáaña ndo̱ʼo Jehová ku̱i̱ya̱ 33 tá xi̱nira ña̱ i̱xandi̱va̱ʼanína xíʼin se̱ʼera ta xa̱ʼnínara (Mat. 3:17).d

12. ¿Ndáaña kivi keʼéyó tá kúma̱níka kixaa̱ ki̱vi̱ ña̱ koo Conmemoración?

¹² ¿Á kivi kaʼvi iinlá miíún ta saátu xíʼin na̱ veʼún xa̱ʼa̱ ña̱ ke̱ʼé Jehová ña̱ va̱ʼa chaʼvira xa̱ʼa̱ ku̱a̱chiyó? Kivi keʼún ña̱yóʼo tá kúma̱níka kixaa̱ ki̱vi̱ ña̱ koo Conmemoración. Ta kivi kuniñúʼún tutu ña̱ naní Guía de estudio para los testigos de Jehová á inkaka tutu ña̱ káʼa̱n xa̱ʼa̱ ña̱yóʼo.e Saátu kivi kaʼviún texto ña̱ káʼa̱n xa̱ʼa̱ Conmemoración ña̱ va̱xi nu̱ú tutu ña̱ naní Ña̱ Kéʼé na̱ Ndásakáʼnu Ndióxi̱ Tutu nu̱ú Va̱xi ña̱ Keʼéyó Reunión. Ta saátu kivi kotoún video ña̱ xíto na̱ ñúʼu Betel ña̱ káʼa̱n xa̱ʼa̱ Conmemoración. Tá ná keʼéyó ña̱yóʼo saá kivi chindeétáʼanyó xíʼin na̱ yiví ña̱ ku̱ʼu̱nna Conmemoración (Esd. 7:10).

NÁ CHINDEÉTÁʼANYÓ XÍʼIN NA̱ YIVÍ

13. ¿Ndáaña xíniñúʼu keʼéyó tá kúni̱yó ku̱ʼu̱n na̱ yiví xíʼinyó Conmemoración?

¹³ ¿Ndáaña kivi keʼéyó ña̱ va̱ʼa ku̱ʼu̱n na̱ yiví Conmemoración? Ná keeyó ña̱ xaxayó invitación ña̱ va̱ʼa ka̱ʼa̱nyó xíʼin na̱ yiví ña̱ ku̱ʼu̱nna xíʼinyó. Saátu ná kaʼyíyó ki̱vi̱ na̱ yiví na̱ kúni̱yó kanayó ku̱ʼu̱n xíʼinyó. Tá kúú, na̱ veʼeyó, na̱ káchíñu xíʼinyó, na̱ káʼvi xíʼinyó escuela xíʼin inkaka na̱ xíni̱yó. Tá kǒoka invitación kúúmiíyó ña̱ taxiyó ndaʼa̱na, kivi chindaʼáyó iin enlace nu̱úna. Sana ku̱a̱ʼánívana kuni̱ ku̱ʼu̱n xíʼinyó (Ecl. 11:6).

14. Ka̱ʼa̱n xa̱ʼa̱ iin experiencia ña̱ náʼa̱ ña̱ kiviva ku̱ʼu̱n na̱ yiví Conmemoración tá taxiyó invitación ndaʼa̱na.

¹⁴ Ná kǒo ndakanixi̱níyó ña̱ kǒo ku̱ʼu̱nví na̱ yiví na̱ ta̱xiyó invitación ndaʼa̱. Iin ki̱vi̱ iin ñá hermana nda̱kanda̱ní-iniñá tá ni̱ka̱ʼa̱n yii̱ñá xíʼinñá ña̱ ku̱ʼu̱nra Conmemoración xíʼinñá, ta̱yóʼo su̱ví testigo Jehová kúúra. ¿Nda̱chun nda̱kanda̱ní-iniñá? Saáchi xa̱a̱ ku̱a̱ʼání yichi̱ xi̱ka̱ʼa̱nñá xíʼinra ña̱ ná ku̱ʼu̱nra xíʼinñá ta kǒo níxi̱xaʼa̱nvíra xíʼinñá. Soo, ¿nda̱chun ni̱ka̱ʼa̱nra ña̱ ku̱ʼu̱nra ki̱vi̱ saá? Chi iin ta̱ anciano ta̱ xíni̱-táʼanra xíʼin ta̱xi iin invitación ndaʼa̱ra. Saá kúú ña̱ ki̱xáʼa yii̱ ñá hermana kán xáʼa̱nra ndiʼi Conmemoración.

15. ¿Ndáaña xíniñúʼu ndakaʼányó tá kánayó na̱ yiví ña̱ ku̱ʼu̱nna Conmemoración xíʼinyó?

¹⁵ Tá káʼa̱nyó xíʼin iin na̱ yiví ña̱ ku̱ʼu̱nna Conmemoración xíʼinyó, sana kivi nda̱ka̱tu̱ʼunna sava ña̱ʼa miíyó. Ña̱kán, ná ndakanixi̱níyó ndáaña kivi nda̱ka̱tu̱ʼunna miíyó ta ndáa ki̱ʼva ndakuiinyó yuʼúna (Col. 4:6). Tá kúú, sana kivi ndakanixi̱nína: “¿Ndáaña kéʼéna ti̱xin reunión kán? ¿Nda̱saa hora xíyoña? ¿Ndáa ti̱ko̱to̱ kundixii̱ ku̱ʼi̱n? ¿Á xíniñúʼu chaʼvii̱ ña̱ va̱ʼa ki̱ʼvii̱ kán? ¿Á ndukúna xu̱ʼún nu̱úi̱?”. Ña̱kán kivi nda̱ka̱tu̱ʼunyó na̱ ni̱ka̱ʼa̱nyó xíʼin ku̱ʼu̱n xíʼinyó Conmemoración á íyo iin ña̱ kúni̱na kunda̱a̱-inina xa̱ʼa̱ ta kivi ka̱ʼa̱nyó xíʼinna xa̱ʼa̱ña. Saátu kivi sanáʼa̱yó video nu̱úna ña̱ naní Ná ndakaʼányó xa̱ʼa ña̱ ni̱xi̱ʼi̱ ta̱ Jesús xíʼin ña̱ naní ¿Ndáaña kéʼé na̱ testigo Jehová nu̱ú ndátakana? Kivitu kuniñúʼuyó libro ña̱ naní Kivi koo si̱íún vitin ta saátu chí nu̱únínu, nu̱ú ña̱ lección 28 va̱xi sava ña̱ kivi ka̱ʼa̱nyó xíʼin na̱ yiví.

16. ¿Ndáa inkaka ña̱ kivi ndaka̱tu̱ʼún na̱ yiví miíyó?

¹⁶ Tá xa̱a̱ ndi̱ʼi̱ ña̱ Conmemoración, sana íyo ku̱a̱ʼáka ña̱ kúni̱ na̱ yiví kunda̱a̱-inina xa̱ʼa̱. Sana kivi ndakanixi̱nína, ¿nda̱chun kǒo níxixina si̱ta̱váʼa ta kǒo níxiʼina tá vino? ¿Nda̱saa tiempo ya̱ʼa tasaá koo inka Conmemoración? Á sanatu kuni̱na kunda̱a̱-inina á saá kéʼé na̱ testigo Jehová na̱ íyo iníísaá ñuyǐví. Discurso ña̱ táxina tá xíyo Conmemoración xa̱a̱ káʼa̱nña xa̱ʼa̱ ña̱yóʼo. Soo sana xíniñúʼu viíníka ndakaniyó nu̱ú na̱ yiví kán xa̱ʼa̱ iin tá iin ña̱yóʼo. Ña̱ va̱ʼa ndakuiinyó pregunta ña̱ kúúmiína, kivi kuniñúʼuyó artículo ña̱ va̱xi nu̱ú jw.org ña̱ naní “¿Nda̱chun síín íyo ña̱ ndákaʼán na̱ testigo Jehová ña̱ ni̱xi̱ʼi̱ ta̱ Jesús nu̱ú inka religión?”. Íyo sava na̱ yiví na̱ ndixa kúni̱ sakúaʼa xa̱ʼa̱ Jehová ña̱kán ná chindeétáʼanyó xíʼinna ña̱ kunda̱a̱-inina xíʼin ña̱ Conmemoración (Hech. 13:48).

NÁ CHINDEÉTÁʼANYÓ XÍʼIN NA̱ INACTIVO

17. ¿Ndáaña kivi keʼé na̱ anciano ña̱ va̱ʼa chindeétáʼanna xíʼin na̱ inactivo? (Ezequiel 34:​12, 16).

¹⁷ ¿Ndáaña kivi keʼé na̱ anciano ña̱ va̱ʼa chindeétáʼanna xíʼin na̱ inactivo tá xíyo ña̱ Conmemoración? Ña̱ kundi̱ʼi̱-inina xa̱ʼa̱na ta saátu ña̱ na̱ʼa̱na ña̱ kúʼvi̱-inina xíninana (kaʼvi Ezequiel 34:​12,f 16).g Ndóʼó na̱ anciano, tá kúma̱níka koo ña̱ Conmemoración ka̱ʼa̱nndó xíʼin na̱ inactivo ña̱ ndíʼi̱-inindó xa̱ʼa̱na ta kúni̱ndó chindeétáʼanndó xíʼinna. Ka̱ʼa̱nndó xíʼinna ña̱ ku̱ʼu̱nna Conmemoración ta koo tu̱ʼvandó ña̱ ndakiʼinndóna. Tá xa̱a̱ ndi̱ʼi̱ ña̱ Conmemoración kǒo nandóso-inindó xa̱ʼa̱na. Ta chindeétáʼanndó xíʼinna ña̱ kunda̱a̱-inina ndáaña xíniñúʼu keʼéna ña̱ va̱ʼa ndikó tukuna nu̱ú Jehová (1 Ped. 2:25).

18. ¿Ndáa ki̱ʼva chindeétáʼanyó xíʼin na̱ inactivo? (Romanos 12:10).

¹⁸ Ndiʼiyó na̱ ndákutáʼan ti̱xin ña̱ congregación kivi chindeétáʼanyó xíʼin na̱ inactivo na̱ ku̱ʼu̱n tá ná koo ña̱ Conmemoración. ¿Ndáa ki̱ʼva chindeétáʼanyó xíʼinna? Vií ndakiʼinyóna, na̱ʼa̱yó ña̱ kúʼvi̱-iniyó xíniyóna ta saátu ña̱ íxato̱ʼóyóna (kaʼvi Romanos 12:10). Ná ndakaʼányó chi sana íxayo̱ʼvi̱níña xíʼinna ña̱ ku̱ʼu̱nna reunión. Sana ndákanixi̱nína: “¿Ndáa ki̱ʼva ndakiʼinna yi̱ʼi̱?”. Ta ña̱yóʼo sándi̱ʼi̱ña-inina.h Ña̱kán, ná kǒo nda̱ka̱tu̱ʼunyóna iin ña̱ kivi sakúkaʼan nu̱úna, ta saátu ná kǒo ka̱ʼa̱nyó nda̱a̱ ni iin ña̱ kivi sandákava-inina (1 Tes. 5:11). Na̱ hermanoyó kúúna, ta kúsi̱íní-iniyó ña̱ inkáchi ndakutáʼanyó xíʼinna ña̱ ndasakáʼnuyó Jehová (Sal. 119:176; Hech. 20:35).

19. ¿Ndáaña va̱ʼa ndákiʼinyó tá ndákaʼányó xa̱ʼa̱ ña̱ ni̱xi̱ʼi̱ ta̱ Jesús?

¹⁹ Ndiʼi ña̱ sa̱kúaʼayó vitin chíndeétáʼanña xíʼinyó ña̱ kunda̱a̱-iniyó nda̱chun kúú ña̱ ni̱ka̱ʼa̱n ta̱ Jesús ña̱ ndakaʼányó xa̱ʼa̱ ña̱ ni̱xi̱ʼi̱ra xa̱ʼa̱yó. Saáchi tá kéʼéyó ña̱yóʼo ku̱a̱ʼání ña̱ va̱ʼa ndákiʼinyó ta saátu ku̱a̱ʼání ña̱ va̱ʼa ndákiʼin inka na̱ yiví (Is. 48:​17, 18). Chíndeétáʼanña xíʼinyó ña̱ kuʼvi̱ka-iniyó kuniyó Jehová xíʼin ta̱ Jesús. Saátu chíndeétáʼanña xíʼinyó ña̱ na̱ʼa̱yó ña̱ táxiyó tíxa̱ʼvi ndaʼa̱ Jehová xíʼin ta̱ Jesús xa̱ʼa̱ ña̱ ke̱ʼéna xa̱ʼa̱yó. Ta va̱ʼaníka ndákutáʼanyó xíʼin na̱ hermano. Ta chíndeétáʼanyó xíʼin na̱ yiví ña̱ kunda̱a̱-inina ndáaña xíniñúʼu keʼéna ña̱ va̱ʼa ndakiʼinna bendición xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó. Ña̱kán, ná chika̱a̱níyó ndee̱ ña̱ koo tu̱ʼvayó tá ná kixaa̱ ki̱vi̱ ña̱ koo Conmemoración. Chi ña̱yóʼo kúú ki̱vi̱ ña̱ ndáyáʼviníka ña̱ xíyo ndiʼi ku̱i̱ya̱.