Ña̱ kivi keʼéyó tá kúma̱níka kaʼviyó

Tá káʼviyó Biblia, kúni̱yó ña̱ sákuaʼayó xa̱ʼa̱ Jehová ná xa̱a̱ña nda̱a̱ níma̱yó, vií ndakanixi̱níyó xa̱ʼa̱ña ta ná keʼéyó ña̱ sakúaʼayó. Ná keʼéyó nda̱a̱ tá ki̱ʼva ke̱ʼé ta̱ Esdras, “xíʼin ndiʼi níma̱ra na̱ndukúra ña̱ káʼa̱n ley Jehová” (Esd. 7:10). ¿Ndáa ki̱ʼva kundiku̱nyó yichi̱ra?

Ka̱ʼa̱n xíʼin Ndióxi̱. Tá kúma̱níka kixáʼún kaʼviún, ka̱ʼa̱n xíʼin Jehová ña̱ ná chindeétáʼanra xíʼún kunda̱a̱-iniún xíʼin ña̱ káʼviún ta keʼé ña̱ sakúaʼún (Sal. 119:​18, 34).

Vitá koo iniún. Ndióxi̱ kǒo táxira ña̱ ná kunda̱a̱-ini na̱ ni̱nu kúni xíʼin na̱ ndákanixi̱ní ña̱ ndíchinína xa̱ʼa̱ra (Luc. 10:21). Kǒo kaʼvi kuitíún xa̱ʼa̱ ña̱ ná ndakanixi̱ní inkana xa̱ʼún ña̱ xíni̱níún. Soo tá káʼviún ta kíʼún kuenta ña̱ xíniñúʼu nasamaún sava ña̱ kéʼún, vitá koo iniún ta nasama ña̱ va̱ása va̱ʼa kéʼún.

Kuniso̱ʼo sava yaa ña̱ tává na̱ ñuu Ndióxi̱. Yaa xáa̱ña nda̱a̱ níma̱yó ta chíndeétáʼanña xíʼinyó ña̱ ndasakáʼnuyó Ndióxi̱. Tá siʼnaka yaa ña̱ tává na̱ ñuu Ndióxi̱ ná kuniso̱ʼoyó tá kúma̱níka kixáʼayó kaʼviyó, saá kúú ña̱ chindeétáʼanña xíʼinyó ña̱ viíka ndakanixi̱níyó xa̱ʼa̱ Jehová, ta ña̱ káʼviyó chindeétáʼanña xíʼinyó.