တောလည်ရာ
၁၂ ကုရှအမျိုးသမီးနဲ့ အိမ်ထောင်ပြုထားလို့ဆိုပြီး+ မောရှေကို မိရိအံနဲ့ အာရုန် ပြစ်တင်ဝေဖန်တယ်။ ၂ “ယေဟောဝါဘုရားက မောရှေကတစ်ဆင့်ပဲ မိန့်မှာသလား။ ငါတို့ကတစ်ဆင့်လည်း မိန့်မှာတာပဲ မဟုတ်လား”+ ဆိုပြီး ပြောကြတယ်။ ဒါကို ယေဟောဝါ နားထောင်နေတယ်။+ ၃ မောရှေဟာ ကမ္ဘာပေါ်က လူအားလုံးထဲမှာ စိတ်ထားအနူးညံ့ဆုံးပဲ။*+
၄ ယေဟောဝါက ချက်ချင်းပဲ “မင်းတို့သုံးယောက် တွေ့ဆုံရာတဲတော်ကို သွားကြ” လို့ပြောတော့ မောရှေ၊ အာရုန်နဲ့ မိရိအံတို့ ထွက်သွားကြတယ်။ ၅ ယေဟောဝါက မိုးတိမ်တိုင်ထဲ ဆင်းလာပြီး+ တဲတော်ဝင်ပေါက်မှာ ရပ်လိုက်တယ်။ အာရုန်နဲ့မိရိအံကို ခေါ်တဲ့အခါ သူတို့ ရှေ့တိုးသွားတယ်။ ၆ ဘုရားသခင်က “ငါပြောတာကို တစ်ဆိတ်လောက် နားထောင်ကြ။ မင်းတို့ထဲမှာ ယေဟောဝါရဲ့ ပရောဖက်ရှိရင် ငါဘယ်သူလဲဆိုတာ စိတ်အာရုံထဲမှာ+ သူ့ကိုအသိပေးမယ်။ အိပ်မက်ထဲမှာ+ သူ့ကို ငါစကားပြောမယ်။ ၇ ငါ့လူမျိုးတစ်မျိုးလုံးကို အပ်ထားတဲ့ ငါ့ကျွန်မောရှေကိုတော့ အဲဒီလိုမလုပ်ဘူး။+ ၈ ငါကိုယ်တိုင် သူနဲ့ အပြန်အလှန် စကားပြောတယ်။+ စကားထာတွေနဲ့မဟုတ်ဘဲ ပွင့်ပွင့်လင်းလင်း ပြောတယ်။ ငါယေဟောဝါ ကိုယ်ထင်ပြတာကိုလည်း သူမြင်ရတယ်။ ဒါတောင် မင်းတို့က ငါ့ကျွန်မောရှေကို ပြစ်တင်ဝေဖန်ရဲသေးလား” ဆိုပြီး ပြောတယ်။
၉ သူတို့ကို ယေဟောဝါ အကြီးအကျယ် စိတ်ဆိုးတယ်။ ဒါကြောင့် သူတို့ဆီကနေ ထွက်သွားတော့၊ ၁၀ မိုးတိမ်က တဲတော်ပေါ်ကနေ ခွာသွားတယ်။ မိရိအံက အနာကြီးရောဂါစွဲပြီး နှင်းလိုဖြူသွားတယ်။+ အာရုန် လှည့်ကြည့်တော့ မိရိအံ အနာကြီးရောဂါ စွဲနေတာကို မြင်ပြီး၊+ ၁၁ ချက်ချင်းပဲ မောရှေကို “ကျွန်တော် တောင်းပန်ပါတယ်။ အပြစ်ကို ဗွေမယူပါနဲ့။ ကျွန်တော်တို့ရဲ့ လုပ်ရပ်ဟာ သိပ်ကို မိုက်မဲပါတယ်။ ၁၂ မွေးကတည်းက ကိုယ်ခန္ဓာတစ်ဝက် ပုပ်ပျက်နေတဲ့ ကလေးအသေလို မိရိအံကို မဖြစ်စေပါနဲ့” လို့ တောင်းပန်တယ်။ ၁၃ မောရှေလည်း “အို ဘုရားသခင်၊ သူ့ရောဂါ ပျောက်အောင် လုပ်ပေးပါ။ တောင်းပန်ပါတယ်” ဆိုပြီး ယေဟောဝါကို အသနားခံတယ်။+
၁၄ ယေဟောဝါက “မိရိအံရဲ့ မျက်နှာကို သူ့အဖေ တံတွေးထွေးရင် ခုနစ်ရက်လုံး သူ အရှက်ကွဲမယ် မဟုတ်လား။ အခု၊ သူ့ကို ခုနစ်ရက်လုံး စခန်းအပြင်မှာ သီးသန့်ထားလိုက်။+ ပြီးမှ စခန်းထဲ ပြန်ဝင်ခိုင်းပါ” လို့မောရှေကို ပြောတယ်။ ၁၅ ဒါနဲ့ မိရိအံကို စခန်းအပြင်မှာ ခုနစ်ရက်လုံး သီးသန့်ထားလိုက်တယ်။+ မိရိအံ စခန်းထဲ ပြန်မဝင်မချင်း လူတွေ စခန်းမသိမ်းကြဘူး။ ၁၆ အဲဒီနောက်မှာ သူတို့က ဟာဇရုတ်အရပ်ကနေ ထွက်ခွာပြီး+ ပါရန်တောကန္တာရမှာ+ စခန်းချကြတယ်။