တရားသူကြီး
၁၃ အစ္စရေးတွေဟာ ယေဟောဝါရှေ့မှာ မကောင်းတာတွေကို လုပ်ကြပြန်တယ်။+ ဒါကြောင့် ယေဟောဝါက သူတို့ကို ဖိလိတိလူတွေလက်ထဲ အနှစ် ၄၀ အပ်လိုက်တယ်။+
၂ အဲဒီအချိန်တုန်းက ဒန်အနွယ်၊+ ဇောရာမြို့သား+ မာနော်လို့ခေါ်တဲ့+ လူတစ်ယောက်ရှိတယ်။ သူ့ဇနီးက မြုံနေတော့ သားသမီးမရှိဘူး။+ ၃ တစ်နေ့မှာ သူ့ဇနီးဆီ ယေဟောဝါရဲ့ ကောင်းကင်တမန် ရောက်လာပြီး “အခု၊ ခင်ဗျားက မြုံနေလို့ သားသမီးမရှိပေမဲ့ ကိုယ်ဝန်ရှိပြီး သားတစ်ယောက် မွေးလာမယ်။+ ၄ စပျစ်ဝိုင်ဖြစ်စေ၊ အရက်ယမကာဖြစ်စေ လုံးဝမသောက်ပါနဲ့။+ မသန့်ရှင်းတဲ့အရာမှန်သမျှ မစားနဲ့။+ ၅ ခင်ဗျား ကိုယ်ဝန်ရှိပြီး သားတစ်ယောက် မွေးလာမယ်။ အဲဒီကလေးဟာ မွေးကတည်းက ဘုရားသခင်ရဲ့ နာဇရိလူ* ဖြစ်မှာမို့လို့ သူ့ဆံပင်ကို မရိတ်ရဘူး။+ သူက အစ္စရေးတွေကို ဖိလိတိလူတွေလက်ထဲကနေ ကယ်တင်ရာမှာ ဦးဆောင်မယ်”+ လို့ပြောတယ်။
၆ ဒါနဲ့ အဲဒီအမျိုးသမီးက သူ့ယောက်ျားဆီ သွားပြီး “ကျွန်မဆီ စစ်မှန်တဲ့ ဘုရားသခင်ရဲ့လူ ရောက်လာတယ်။ သူ့ပုံစံက ဘုရားသခင်ရဲ့ ကောင်းကင်တမန်နဲ့ တူတယ်။ ရိုသေခန့်ညားစရာပဲ။ သူ ဘယ်ကလာသလဲဆိုတာ မမေးလိုက်မိဘူး။ သူကလည်း နာမည် မပြောပြဘူး။+ ၇ ဒါပေမဲ့ သူက ‘ခင်ဗျား ကိုယ်ဝန်ရှိပြီး သားတစ်ယောက် မွေးလာမယ်။ အခုကစပြီး စပျစ်ဝိုင်ဖြစ်စေ၊ အရက်ယမကာဖြစ်စေ လုံးဝမသောက်နဲ့။ မသန့်ရှင်းတဲ့အရာ မှန်သမျှ မစားနဲ့။ အဲဒီကလေးဟာ မွေးလာချိန်ကစပြီး တစ်သက်လုံး ဘုရားသခင်ရဲ့နာဇရိလူ ဖြစ်လိမ့်မယ်’ တဲ့” ဆိုပြီး အကြောင်းစုံပြောပြတယ်။
၈ အဲဒီအခါ မာနော်က “ယေဟောဝါဘုရား၊ တစ်ခုလောက် ပြောပါရစေ။ အခုနက စေလွှတ်လိုက်တဲ့ ဘုရားသခင်ရဲ့လူကို ကျွန်တော်တို့ဆီ ပြန်လွှတ်ပေးပါဦး။ မွေးလာမယ့်ကလေးကို ဘယ်လိုပြုစုပျိုးထောင်ရမယ်ဆိုတာ သင်ပေးစေချင်လို့ပါ” ဆိုပြီး ယေဟောဝါကို အသနားခံတယ်။ ၉ ဘုရားသခင်လည်း မာနော်ရဲ့စကားကို နားထောင်တယ်။ မာနော်ရဲ့ဇနီး လယ်တောမှာ ထိုင်နေတုန်း ဘုရားသခင်ရဲ့ ကောင်းကင်တမန် ပြန်ရောက်လာတယ်။ မာနော်ကတော့ အနားမှာ မရှိဘူး။ ၁၀ မာနော်ရဲ့ဇနီးက သူ့ယောက်ျားဆီ အပြေးအလွှားသွားပြီး “ဟိုတစ်နေ့က ကျွန်မဆီလာတဲ့လူ ရောက်လာပြန်ပြီ”+ လို့ပြောပြတယ်။
၁၁ ဒါနဲ့ မာနော်တို့ဇနီးမောင်နှံက အဲဒီလူဆီ လာပြီး “ကျွန်တော့်မိန်းမကို စကားလာပြောတဲ့သူက ခင်ဗျားလား” လို့မေးတော့ “ဟုတ်ပါတယ်” လို့ သူဖြေတယ်။ ၁၂ မာနော်ကလည်း “ခင်ဗျားပြောခဲ့တဲ့အတိုင်း ဖြစ်လာပါစေ။ ဒီကလေးကို ဘယ်လိုပြုစုပျိုးထောင်ရမလဲ။ ကြီးလာရင် သူဘာတွေ လုပ်မှာလဲ”+ လို့မေးတယ်။ ၁၃ ယေဟောဝါရဲ့ ကောင်းကင်တမန်က “ကျွန်တော် ရှောင်ခိုင်းထားတာ အားလုံးကို ခင်ဗျားရဲ့ ဇနီးရှောင်ရမယ်။+ ၁၄ စပျစ်ပင်က ထွက်သမျှကို လုံးဝမစားရဘူး။ ဝိုင်ဖြစ်စေ၊ အရက်ယမကာဖြစ်စေ လုံးဝမသောက်ရဘူး။+ မသန့်ရှင်းတဲ့အရာ မှန်သမျှ မစားရဘူး။+ ကျွန်တော်မှာထားတဲ့အတိုင်း လိုက်နာခိုင်းပါ” လို့ပြောတယ်။
၁၅ အဲဒီအခါ မာနော်က “မပြန်ပါနဲ့ဦး။ ဆိတ်ကလေးတစ်ကောင် ချက်ပြီး ဧည့်ခံချင်လို့ပါ”+ ဆိုပြီး ယေဟောဝါရဲ့ ကောင်းကင်တမန်ကို ပြောတယ်။ ၁၆ ယေဟောဝါရဲ့ ကောင်းကင်တမန်က “ကျွန်တော် မပြန်သေးရင်တောင် ခင်ဗျားကျွေးတာကို စားမှာမဟုတ်ဘူး။ ယေဟောဝါဘုရားအတွက် မီးရှို့ရာအလှူ လှူချင်တယ်ဆိုရင်တော့ လှူနိုင်တယ်” လို့ ပြောတယ်။ အဲဒီလူဟာ ယေဟောဝါရဲ့ကောင်းကင်တမန်ဖြစ်မှန်း မာနော် မသိဘူး။ ၁၇ ဒါကြောင့် မာနော်က “ခင်ဗျားနာမည် ဘယ်လိုခေါ်သလဲ။+ ခင်ဗျားပြောတဲ့အတိုင်း ဖြစ်လာတဲ့အခါ ခင်ဗျားကို ဂုဏ်ပြုချင်လို့ပါ” ဆိုပြီး ယေဟောဝါရဲ့ကောင်းကင်တမန်ကို ပြောတယ်။ ၁၈ ဒါပေမဲ့ ယေဟောဝါရဲ့ ကောင်းကင်တမန်က “ကျွန်တော့်နာမည်ဟာ သိပ်အံ့သြစရာကောင်းလို့ မမေးပါနဲ့” ဆိုပြီး ပြန်ပြောတယ်။
၁၉ မာနော်လည်း ဆိတ်ကလေးတစ်ကောင်နဲ့ ကောက်နှံအလှူကိုယူပြီး ကျောက်တုံးကြီးပေါ်မှာ ယေဟောဝါအတွက် ပူဇော်တယ်။ မာနော်တို့ဇနီးမောင်နှံ ကြည့်နေတုန်းမှာပဲ ဘုရားသခင်က အံ့သြစရာတစ်ခု လုပ်လိုက်တယ်။ ၂၀ သူတို့ကြည့်နေတုန်း ယေဟောဝါရဲ့ ကောင်းကင်တမန်က ပူဇော်ရာပလ္လင်ပေါ် လောင်နေတဲ့ မီးတောက်ထဲကနေ ကောင်းကင်ကို တက်သွားတယ်။ သူတို့လည်း ချက်ချင်းပဲ မြေပေါ် ပျပ်ဝပ်လိုက်တယ်။ ၂၁ ယေဟောဝါရဲ့ ကောင်းကင်တမန်က သူတို့ဆီ ထပ်မလာတော့ဘူး။ အဲဒီအခါကျမှ ယေဟောဝါရဲ့ ကောင်းကင်တမန်ဖြစ်နေမှန်း မာနော် သိသွားတယ်။+ ၂၂ မာနော်က “ဘုရားသခင်ကို မြင်လိုက်ရတဲ့အတွက် ငါတို့သေတော့မှာပဲ”+ ဆိုပြီး ပြောတော့၊ ၂၃ သူ့ဇနီးက “ယေဟောဝါဘုရားသာ ကျွန်မတို့ကို သေစေချင်တယ်ဆိုရင် ကျွန်မတို့ရဲ့ မီးရှို့ရာအလှူနဲ့+ ကောက်နှံအလှူကို လက်ခံမှာမဟုတ်ဘူး။ အံ့သြစရာတွေကို လုပ်ပြမှာမဟုတ်ဘူး။ ဒီအကြောင်းတွေကိုလည်း ပြောပြမှာမဟုတ်ဘူး” လို့ ပြန်ပြောတယ်။
၂၄ နောက်ပိုင်းမှာ အဲဒီအမျိုးသမီးက သားလေး မွေးလာတဲ့အခါ ရှံဆုန်လို့ နာမည်ပေးလိုက်တယ်။+ ရှံဆုန် ကြီးပြင်းလာတာနဲ့အမျှ သူ့ကို ယေဟောဝါ ကောင်းချီးပေးတယ်။ ၂၅ အချိန်တန်တော့ ဇောရာမြို့နဲ့ ဧရှတောလမြို့ကြားက+ မဟာနေဒန်မြို့မှာ+ သူ့ကို ယေဟောဝါရဲ့ စွမ်းအားတော် စတင်လှုံ့ဆော်တယ်။+