၁ သက်သာလောနိတ်
၃ ခင်ဗျားတို့ရဲ့သတင်းကိုမရလို့ မခံစားနိုင်တော့တဲ့အဆုံး အေသင်မြို့မှာ+ တစ်ယောက်ပဲနေခဲ့ရင် ကောင်းမယ်လို့ ယူဆပြီး၊ ၂ ညီအစ်ကိုတိမောသေကို+ ခင်ဗျားတို့ဆီ လွှတ်လိုက်တယ်။ သူဟာ ခရစ်တော်အကြောင်း သတင်းကောင်း ဟောပြောတဲ့သူ၊ ဘုရားသခင်ရဲ့ အမှုဆောင်* တစ်ယောက်ပါ။ ခင်ဗျားတို့ကို ယုံကြည်ခြင်း ခိုင်ခံ့စေပြီး နှစ်သိမ့်ပေးဖို့၊ ၃ ကြုံနေရတဲ့ ဆင်းရဲဒုက္ခတွေကြောင့် ခင်ဗျားတို့ ယိမ်းယိုင်မသွားစေဖို့ သူ့ကို လွှတ်လိုက်တယ်။ ဒါတွေကို မလွဲမသွေ ကြုံရမယ်ဆိုတာ ခင်ဗျားတို့ သိပြီးသားပါ။+ ၄ ဆင်းရဲဒုက္ခကြုံရမယ့်အကြောင်း ခင်ဗျားတို့နဲ့အတူရှိတုန်းက ကျွန်တော်တို့ ကြိုတင်ပြောခဲ့တယ်။ အခု အဲဒီအတိုင်း ဖြစ်ပျက်လာတာ ခင်ဗျားတို့ အသိပဲ။+ ၅ ကျွန်တော်လည်း မခံစားနိုင်တော့တဲ့အဆုံး ခင်ဗျားတို့ရဲ့ သစ္စာရှိမှုအကြောင်း သိချင်လို့ တိမောသေကို လွှတ်လိုက်တာ။+ ဖြားယောင်းသွေးဆောင်သူက+ ခင်ဗျားတို့ကို တစ်နည်းနည်းနဲ့ သွေးဆောင်လိုက်လို့ ကျွန်တော်တို့ အပင်ပန်းခံခဲ့သမျှ အချည်းနှီးဖြစ်သွားမှာကို စိုးရိမ်တာလည်း ပါတယ်။
၆ အခု တိမောသေ ပြန်ရောက်လာပြီ။+ ခင်ဗျားတို့ရဲ့ သစ္စာရှိမှုနဲ့ မေတ္တာအကြောင်း၊ ကျွန်တော် သတိရလွမ်းဆွတ်ပြီး သိပ်တွေ့ချင်နေသလို ခင်ဗျားတို့လည်း အမြဲတမ်းသတိရပြီး တွေ့ချင်နေတဲ့အကြောင်း သတင်းကောင်းကို သူပြန်ပြောပြတယ်။ ၇ ညီအစ်ကိုတို့၊ ကျွန်တော်တို့ စိတ်ဆင်းရဲပြီး ဒုက္ခမျိုးစုံကြုံနေရပေမဲ့ ခင်ဗျားတို့ သစ္စာရှိနေတာကို ကြားရလို့ စိတ်သက်သာရာရပါတယ်။+ ၈ သခင့်နောက်လိုက်တွေအဖြစ် ခင်ဗျားတို့ အခိုင်အမာ ရပ်တည်နေသရွေ့ ကျွန်တော်တို့လည်း အားအင်အသစ်တွေ ပြည့်နေမှာပဲ။ ၉ ခင်ဗျားတို့ကြောင့် ဘုရားသခင့်ရှေ့မှာ အကြီးအကျယ် ရွှင်လန်းရတဲ့အတွက် ဘုရားသခင်ကို ဘယ်လို ကျေးဇူးတင်ရမှန်းတောင် မသိတော့ဘူး။ ၁၀ ခင်ဗျားတို့နဲ့ တွေ့ချင်လို့၊ ခင်ဗျားတို့ရဲ့ ယုံကြည်ခြင်းခိုင်ခံ့အောင် လိုအပ်နေတာတွေကို ဖြည့်ဆည်းပေးချင်လို့ နေ့ရောညပါ စိတ်အားထက်သန်စွာ တိုးလျှိုးအသနားခံ ဆုတောင်းနေတယ်။+
၁၁ အဖဘုရားသခင်နဲ့ သခင်ယေရှုက ခင်ဗျားတို့ဆီ ကျွန်တော်တို့အရောက်လာနိုင်ဖို့ လမ်းဖွင့်ပေးပါစေ။ ၁၂ ခင်ဗျားတို့ကိုချစ်တဲ့ ကျွန်တော်တို့ရဲ့ မေတ္တာလိုပဲ အချင်းချင်းကိုရော လူအားလုံးကိုပါချစ်တဲ့ ခင်ဗျားတို့ရဲ့ မေတ္တာကိုလည်း တိုးပွားများပြားလာအောင်+ သခင် ကူညီပေးပါစေ။ ၁၃ အဲဒီအခါ ခင်ဗျားတို့ စိတ်ဓာတ်ကြံ့ခိုင်လာလိမ့်မယ်။ သန့်ရှင်းသူအားလုံးနဲ့အတူ သခင်ယေရှု ရောက်ရှိလာတဲ့အခါ+ အဖဘုရားသခင်ရှေ့မှာ အပြစ်ပြောစရာမရှိဘဲ သန့်ရှင်းနေလိမ့်မယ်။+