မြည်တမ်းစကား
א
၃ ငါဟာ အမျက်တော်ကြိမ်လုံးကြောင့် ဒုက္ခခံနေရသူပါ။
၂ ဘုရားက ငါ့ကို မောင်းထုတ်ပြီး အလင်းထဲမှာ မဟုတ်ဘဲ အမှောင်ထဲမှာ လျှောက်ခိုင်းနေတယ်။+
၃ ငါ့ကို တစ်နေ့လုံး လက်တော်နဲ့ အကြိမ်ကြိမ် ဒဏ်ခတ်နေတယ်။+
ב
၄ ငါ့ကို အရိုးပေါ်အရေတင် ဖြစ်စေတယ်။
အရိုးတွေကို ချိုးပစ်တယ်။
၅ ဘုရားက ငါ့ကို ဝိုင်းထားတယ်။ ခါးသီးတဲ့အဆိပ်တွေ၊+ အခက်အခဲတွေနဲ့ ဝိုင်းရံထားတယ်။
၆ ဟိုးတုန်းက သေဆုံးသွားသူတွေလို အမှောင်ထဲမှာ အတင်းထိုင်ခိုင်းတယ်။
ג
၇ ငါမလွတ်မြောက်နိုင်အောင် တံတိုင်းခတ်ထားတယ်။
ကြေးနီခြေကျဉ်းတွေ ခတ်ထားတယ်။+
၈ အသည်းအသန် အော်ဟစ်အကူအညီတောင်းပေမဲ့ ငါ့ဆုတောင်းချက်ကို နားမထောင်ဘူး။+
၉ ငါ့လမ်းတွေကို ဆစ်ထားတဲ့ကျောက်တုံးတွေနဲ့ ပိတ်ဆို့ထားတယ်။
လမ်းတွေကို ကွေ့ကောက်စေတယ်။+
ד
၁၀ ငါ့ကို တိုက်ဖို့ ဝက်ဝံလို ချောင်းမြောင်းပြီး ခြင်္သေ့လို ဝပ်နေတယ်။+
၁၁ လမ်းပေါ်ကနေ တွန်းချတယ်။ အပိုင်းပိုင်း ဆွဲဖဲ့တယ်။*
လူသူကင်းမဲ့စေတယ်။+
၁၂ လေးကိုတင်ပြီး ငါ့ကို ပစ်မှတ်အဖြစ် ချိန်ရွယ်တယ်။
ה
၁၃ မြားကျည်တောက်ထဲက မြားတွေနဲ့ ငါ့ကျောက်ကပ်တွေကို ခွင်းပစ်တယ်။
၁၄ ငါဟာ လူတွေ ဝိုင်းဟားစရာ၊ တစ်နေ့လုံး သီချင်းဖွဲ့ဆိုစရာ ဖြစ်နေတယ်။
၁၅ ငါ့ကို ခါးသီးတဲ့အရာတွေနဲ့ ဗိုက်ဝစေတယ်။ ဒေါနနဲ့* ဝစေတယ်။+
ו
၁၆ ကျောက်စရစ်ခဲ ကျွေးပြီး ငါ့သွားတွေကို ချိုးပစ်တယ်။
ငါ့ကို ပြာထဲမှာ လူးလိမ့်စေတယ်။+
၁၇ ကျွန်တော့်ကို စိတ်ငြိမ်သက်မှု မပေးဘူး။ ကောင်းတာတွေကို မေ့ကုန်ပြီ။
၁၈ ဒါကြောင့် “ငါ့ရဲ့ခမ်းနားမှုတွေ၊ ယေဟောဝါ အပေါ်ထားတဲ့ မျှော်လင့်ချက်တွေ ပျက်စီးသွားပြီ” လို့ ကျွန်တော်ပြောတယ်။
ז
၁၉ ကျွန်တော် ဒုက္ခရောက်ပြီး အိုးမဲ့အိမ်မဲ့ဖြစ်နေတာ၊+ ဒေါနနဲ့ ခါးသီးတဲ့အဆိပ်ပဲ စားနေရတာကို သတိရလှည့်ပါ။+
၂၀ ကိုယ်တော် ကျိန်းသေသတိရပြီး ကျွန်တော့်ကို ကူညီပေးဖို့ ကိုယ်ကို ကိုင်းညွတ်လိမ့်မယ်။+
၂၁ အဲဒါကို ကျွန်တော့်စိတ်ထဲ ပြန်အမှတ်ရနေတယ်။ ဒါကြောင့် စိတ်ရှည်ရှည်နဲ့ စောင့်နေပါ့မယ်။+
ח
၂၂ ယေဟောဝါရဲ့ ခိုင်မြဲတဲ့မေတ္တာကြောင့် ကျွန်တော်တို့ ဇာတ်သိမ်းသွားမှာ မဟုတ်ဘူး။+
ကရုဏာတော် ဘယ်တော့မှ မကုန်ဆုံးဘူး။+
၂၃ ကရုဏာတော်ဟာ မနက်တိုင်း သစ်လွင်နေတယ်။+ သစ္စာတရား ကြီးမားလှတယ်။+
၂၄ “ယေဟောဝါဟာ ငါ့ဝေစုပဲ။+ ဒါကြောင့် ကိုယ်တော့်ကို စိတ်ရှည်ရှည်နဲ့ စောင့်မယ်”+ လို့ ကျွန်တော်ပြောတယ်။
ט
၂၅ ယေဟောဝါဟာ မိမိကို မျှော်လင့်နေသူအပေါ်၊+ မိမိကို အမြဲရှာဖွေနေသူအပေါ် ကောင်းမြတ်တယ်။+
၂၆ ယေဟောဝါရဲ့ ကယ်တင်ခြင်းကို+ နှုတ်ဆိတ်ပြီး* စောင့်နေတာ ကောင်းတယ်။+
၂၇ လူဟာ ငယ်ရွယ်တုန်း ထမ်းပိုးထမ်းတာ ကောင်းတယ်။+
י
၂၈ သူ့အပေါ် ဘုရား ထမ်းပိုးတင်တဲ့အခါ တစ်ယောက်တည်း ထိုင်ပြီး နှုတ်ဆိတ်နေပါစေ။+
၂၉ မျှော်လင့်ချက် ရှိကောင်းရှိနိုင်တဲ့အတွက်+ မျက်နှာကို မြေမှာအပ်ထားပါစေ။+
၃၀ ပါးရိုက်တဲ့သူကို ပါးရိုက်ခွင့်ပေးပါစေ။ စော်ကားမှုတွေကို အပြည့်အဝ ခံရပါစေ။
כ
၃၁ ငါတို့ကို ယေဟောဝါ ထာဝစဉ် စွန့်ပစ်ထားမှာ မဟုတ်ဘူး။+
၃၂ ဘုရားက ဝမ်းနည်းပူဆွေးစေပေမဲ့ ခိုင်မြဲတဲ့မေတ္တာတော် ကြွယ်ဝတဲ့အတိုင်း ကရုဏာလည်း ပြလိမ့်မယ်။+
၃၃ လူတွေကို ဒုက္ခရောက်စေဖို့၊ သောကရောက်စေဖို့ အလိုမရှိဘူး။+
ל
၃၄ အကျဉ်းသားတွေကို နင်းခြေတာ၊+
၃၅ အမြင့်ဆုံးအရှင်ရှေ့မှာ တရားမျှတစွာ မစီရင်ပေးတာ၊+
၃၆ ဖြတ်စားလျှပ်စား လုပ်ပြီး အမှုရှုံးစေတာ၊
ဒါတွေကို ယေဟောဝါ သည်းမခံဘူး။
מ
၃၇ ယေဟောဝါ အမိန့်မပေးဘဲ ဘယ်သူ အမိန့်ပေးပြီး အဲဒီအတိုင်းဖြစ်အောင် လုပ်နိုင်လို့လဲ။
၃၈ အမြင့်ဆုံးအရှင်ရဲ့ နှုတ်ကနေ
ကောင်းတာရော မကောင်းတာရော အတူ ထွက်မလာဘူး။
၃၉ ကိုယ့်အပြစ်နဲ့ ကိုယ်ခံရတာကို ဘာလို့ မကျေမနပ် ဖြစ်နေရမှာလဲ။+
נ
၄၀ ငါတို့ရဲ့လမ်းစဉ်တွေကို အသေအချာ ဆန်းစစ်ပြီး+ ယေဟောဝါဆီ ပြန်သွားကြစို့။+
၄၁ ကောင်းကင်မှာရှိတဲ့ ဘုရားသခင်ဆီ စိတ်ရင်းမှန်နဲ့ လက်ဖြန့်ဆုတောင်းကြစို့-+
၄၂ “ကျွန်တော်တို့ ပြစ်မှားမိပါပြီ။ ပုန်ကန်မိပါပြီ။+ ကျွန်တော်တို့ကို ကိုယ်တော် ခွင့်မလွှတ်ဘူး။+
ס
၄၃ ကျွန်တော်တို့ မလာနိုင်အောင် အမျက်တော်နဲ့ ကာဆီးထားတယ်။+ လိုက်ဖမ်းပြီး မညှာမတာ ကွပ်မျက်တယ်။+
၄၄ ကျွန်တော်တို့ရဲ့ ဆုတောင်းချက်တွေ ရှေ့တော် မရောက်နိုင်အောင် တိမ်ထုကြီးနဲ့ ကာဆီးထားတယ်။+
၄၅ ကျွန်တော်တို့ကို လူပုံအလယ်မှာ အညစ်အကြေး၊ အမှိုက်သရိုက် ဖြစ်စေတယ်။”
פ
၄၆ ငါတို့ကို ဝါးမျိုဖို့ ရန်သူတွေ ပါးစပ်ဟထားကြတယ်။+
၄၇ ကြောက်လန့်စရာတွေ၊ တွင်းတွေ၊+ လူသူကင်းမဲ့တာတွေ၊ ဒဏ်ရာဒဏ်ချက်တွေဟာ ငါတို့ရဲ့ဝေစုပဲ။+
၄၈ ငါ့လူမျိုးသမီးပျိုရဲ့ ဒဏ်ရာကြောင့် ငါ့မျက်ရည်တွေ ချောင်းလိုစီးနေတယ်။+
ע
၄၉ မနားတမ်း ဆက်တိုက် ငိုနေတယ်။+
၅၀ ကောင်းကင်ပေါ်ကနေ ယေဟောဝါ ငုံ့ပြီး မကြည့်မချင်း ငါငိုနေမယ်။+
၅၁ ငါ့မြို့မှာရှိတဲ့ သမီးပျိုတွေရဲ့အဖြစ်ကို မြင်နေရလို့ ငါ့မှာ ဝမ်းနည်းကြေကွဲနေတယ်။+
צ
၅၂ ငှက်ဖမ်းသလို ရန်သူတွေက အကြောင်းမရှိဘဲ ငါ့ကို လိုက်ဖမ်းနေကြတယ်။
၅၃ ငါ့ကို တွင်းထဲမှာ အဆုံးစီရင်ကြတယ်။ ကျောက်ခဲနဲ့ ပေါက်ကြတယ်။
၅၄ ခေါင်းပေါ် ရေတွေ ဒလဟောစီးကျနေတဲ့အတွက် “သေပါပြီ” လို့ ငါပြောမိတယ်။
ק
၅၅ အို ယေဟောဝါ၊ တွင်းနက်ထဲကနေ နာမတော်ကို အော်ခေါ်ပါတယ်။+
၅၆ ကျွန်တော့်အသံကို ကြားလှည့်ပါ။ လွတ်မြောက်နိုင်ဖို့ အော်ဟစ်အကူအညီတောင်းတဲ့အခါ နားပိတ်မထားပါနဲ့။
၅၇ ကျွန်တော် အော်ခေါ်တဲ့နေ့မှာအနားရောက်လာပြီး “မကြောက်ပါနဲ့” လို့ ကိုယ်တော် ပြောတယ်။
ר
၅၈ အို ယေဟောဝါ၊ ကျွန်တော့်အမှုကို ကိုယ်တော် ခုခံကာကွယ်ပေးတယ်။ ကျွန်တော့်အသက်ကို ရွေးယူတယ်။+
၅၉ ယေဟောဝါဘုရား၊ ကျွန်တော် မတရားခံရတာကို ကိုယ်တော် မြင်ပါပြီ။ တရားမျှတစွာ စီရင်ပေးလှည့်ပါ။+
၆၀ ကျွန်တော့်ကို လက်စားချေနေတာ၊ မကောင်းကြံတာကိုလည်း မြင်ပါပြီ။
ש
၆၁ အို ယေဟောဝါ၊ ကျွန်တော့်ကို
ကဲ့ရဲ့ထေ့ငေါ့နေတာ၊ မကောင်းကြံတာ၊+
၆၂ ဆန့်ကျင်သူတွေရဲ့စကား၊
ကျွန်တော့် မကောင်းကြောင်း တစ်နေ့လုံး တီးတိုးပြောနေတာကို ကိုယ်တော်ကြားပါပြီ။
၆၃ ထိုင်နေနေ၊ ထနေနေ ကျွန်တော့်အကြောင်း သီချင်းဖွဲ့ဆိုပြီး လှောင်နေတာကို ကြည့်လှည့်ပါဦး။
ת
၆၄ အို ယေဟောဝါ၊ သူတို့လုပ်ရပ်တွေအတိုင်း ကိုယ်တော် ပြန်ဆပ်ပေးလိမ့်မယ်။
၆၅ ကျိန်စာတိုက်ထားတဲ့အတိုင်း သူတို့ကို အကြင်နာတရား ကင်းမဲ့စေမယ်။
၆၆ အို ယေဟောဝါ၊ သူတို့ကို ဒေါသတကြီး လိုက်ဖမ်းပြီး ကောင်းကင်အောက်ကနေ အစတုံး ဖျက်ဆီးလိမ့်မယ်။