၂ ရာဇဝင်ချုပ်
၂၈ အာခတ်+ နန်းတက်ချိန်မှာ အသက် ၂၀ ရှိပြီ။ ဂျေရုဆလင်မြို့မှာ ၁၆ နှစ်စိုးစံတယ်။ ဘိုးဘေးဒါဝိဒ်က ယေဟောဝါရှေ့မှာ မှန်ရာကိုလုပ်ခဲ့ပေမဲ့ အာခတ်ကတော့ မလုပ်ဘူး။+ ၂ အစ္စရေးဘုရင်တွေရဲ့ လမ်းစဉ်အတိုင်း လိုက်တယ်။+ ဗာလရုပ်တုတွေကိုတောင် သွန်းလုပ်တယ်။+ ၃ ဒါ့အပြင် အာခတ်က ဟိန်နုံသားရဲ့ချိုင့်ဝှမ်းမှာ* ယဇ်တွေကို မီးရှို့ပူဇော်တယ်။ အစ္စရေးတွေရှေ့ကနေ ယေဟောဝါ မောင်းထုတ်ခဲ့တဲ့ လူမျိုးတွေရဲ့ ရွံမုန်းစရာ အကျင့်ဓလေ့တွေကို လိုက်လုပ်ပြီး+ ကိုယ့်သားတွေကိုတောင် မီးရှို့ပူဇော်တယ်။+ ၄ ဒါ့အပြင် သူက အထွတ်အမြတ် နေရာနဲ့+ တောင်ကုန်းတွေပေါ်မှာ၊ စိမ်းလန်းတဲ့အပင်အောက်မှာ+ ယဇ်တွေ ဆက်သပြီး မီးရှို့ပူဇော်တယ်။
၅ ဒါကြောင့် ယေဟောဝါဘုရားက အာခတ်မင်းကို ဆီးရီးယားဘုရင်လက်ထဲ အပ်လိုက်တယ်။+ ဆီးရီးယားတွေ အနိုင်ရပြီး သုံ့ပန်းအမြောက်အမြားကို ဒမတ်စကတ်မြို့ဆီ ဖမ်းခေါ်သွားတယ်။+ အစ္စရေးဘုရင်လက်ထဲကိုလည်း အပ်တဲ့အတွက် အဲဒီဘုရင်က အာခတ်နဲ့ သူ့လူတွေကို အကြီးအကျယ် ချေမှုန်းတယ်။ ၆ ရေမလိရဲ့သား ပေကာက+ ယုဒပြည်မှာ သတ္တိရှိတဲ့စစ်သည် ၁၂၀,၀၀၀ ကို တစ်နေ့တည်းမှာ ကွပ်မျက်လိုက်တယ်။ သူတို့က ဘိုးဘေးတို့ရဲ့ဘုရား ယေဟောဝါကို စွန့်သွားကြလို့ပဲ။+ ၇ ဧဖရိမ်သူရဲကောင်း ဇိခရိက ဘုရင့်သားတော် မာသေယ၊ နန်းတော်အုပ် အာဇရိကံ၊ ဘုရင်ပြီးရင် ရာထူးအကြီးဆုံးဖြစ်တဲ့ ဧလကာနတို့ကို ကွပ်မျက်လိုက်တယ်။ ၈ အစ္စရေးတွေက ညီအစ်ကိုတော်တဲ့ ယုဒလူတွေနဲ့ သူတို့ရဲ့သားမယားတွေ စုစုပေါင်း ၂၀၀,၀၀၀ ကို ဖမ်းခေါ်သွားတယ်။ တိုက်ရာပါဥစ္စာ အများကြီးကိုလည်း သိမ်းယူပြီး ရှမာရိမြို့ကို သယ်သွားတယ်။+
၉ ရှမာရိမြို့မှာ သြဒက်လို့ခေါ်တဲ့ ယေဟောဝါရဲ့ ပရောဖက်တစ်ယောက် ရှိတယ်။ သူက မြို့ကို ပြန်ရောက်လာတဲ့ စစ်တပ်ကို ထွက်ကြိုပြီး “ဘိုးဘေးတို့ရဲ့ဘုရား ယေဟောဝါက ယုဒပြည်ကို အမျက်ထွက်လို့ သူတို့ကို ခင်ဗျားတို့လက်ထဲ အပ်ခဲ့တာ။+ အခု ခင်ဗျားတို့က သူတို့ကို ရက်ရက်စက်စက် သတ်ပစ်လိုက်ပြီ။ ဒါကို ဘုရားသခင် မြင်တယ်။ ၁၀ ယုဒလူတွေ၊ ဂျေရုဆလင်မြို့သူမြို့သားတွေကို ကျွန်အဖြစ် စေခိုင်းဖို့ ခင်ဗျားတို့ ကြံစည်နေတယ်။+ တကယ်တော့ ခင်ဗျားတို့လည်း ယေဟောဝါဘုရားရှေ့မှာ အပြစ်ရှိတယ် မဟုတ်လား။ ၁၁ အခု ကျွန်တော်ပြောတာကို နားထောင်ကြ။ သုံ့ပန်းအဖြစ် ဖမ်းခေါ်လာတဲ့ ကိုယ့်ညီအစ်ကိုတွေကို ပြန်လွှတ်ပေးကြ။ ခင်ဗျားတို့ကို ယေဟောဝါဘုရား အမျက်ထွက်နေပြီ” လို့ပြောတယ်။
၁၂ အဲဒီအခါ ဧဖရိမ်အမျိုးသား ခေါင်းဆောင်တွေဖြစ်တဲ့ ယေဟောဟနန်ရဲ့သား အာဇရိ၊ မေရှိလမုတ်ရဲ့သား ဗေရခိ၊ ရှလုံရဲ့သား ယေဇကိ၊ ဟာဒလဲရဲ့သား အာမသတို့က တိုက်ပွဲကနေ ပြန်လာသူတွေကို ထွက်တွေ့ပြီး၊ ၁၃ “သုံ့ပန်းတွေကို ဒီကို မခေါ်လာနဲ့။ ခေါ်လာရင် ယေဟောဝါဘုရားရှေ့မှာ ကျွန်တော်တို့ အပြစ်သင့်လိမ့်မယ်။ ရှိပြီးသားအပြစ်ပေါ် အပြစ်တွေထပ်ဆင့်အောင် ခင်ဗျားတို့ လုပ်ချင်နေကြတာလား။ အစ္စရေးတွေကို ဘုရားသခင် အမျက်ထွက်နေပြီ” လို့ပြောကြတယ်။ ၁၄ ဒါနဲ့ စစ်သည်တွေက ခေါင်းဆောင်တွေနဲ့ လူစုကြီးဆီ သုံ့ပန်းတွေ၊ တိုက်ရာပါဥစ္စာတွေ+ အပ်လိုက်တယ်။ ၁၅ အဲဒီနောက် တာဝန်ရထားရသူတွေက သုံ့ပန်းတွေကို ခေါ်သွားပြီး အဝတ်မရှိသူတွေကို တိုက်ရာပါဥစ္စာထဲက အဝတ်တွေ ပေးဝတ်တယ်။ ဖိနပ်တွေ၊ အစားအသောက်တွေ၊ လိမ်းစရာဆီတွေ ပေးကြတယ်။ အားနည်းချည့်နဲ့သူတွေကို မြည်းတွေပေါ် တင်ပြီး စွန်ပလွံမြို့လို့ခေါ်တဲ့ ယေရိခေါမြို့က ညီအစ်ကိုတွေဆီ ပြန်ပို့လိုက်တယ်။ ပြီးတော့ ရှမာရိမြို့ကို ပြန်သွားကြတယ်။
၁၆ အဲဒီအချိန်မှာ အာခတ်မင်းက အဆီးရီးယားဘုရင်တွေကို စစ်ကူတောင်းတယ်။+ ၁၇ ဧဒုံလူတွေကလည်း ယုဒပြည်ကို နောက်တစ်ကြိမ် ကျူးကျော်တိုက်ခိုက်ပြီး သုံ့ပန်းတွေ ဖမ်းခေါ်သွားတယ်။ ၁၈ ဒါ့အပြင် ဖိလိတိလူတွေက+ ယုဒပြည် ရှဖိလာအရပ်နဲ့+ နေဂပ်အရပ်မှာရှိတဲ့ မြို့တွေကို စီးနင်းတိုက်ခိုက်ပြီး ဗက်ရှေမက်မြို့၊+ အာယလုန်မြို့၊+ ဂေဒရုတ်မြို့၊ စောခေါမြို့နဲ့ ပတ်ဝန်းကျင်မြို့ငယ်တွေ၊ တိမနမြို့နဲ့+ ပတ်ဝန်းကျင်မြို့ငယ်တွေ၊ ဂိမဇောမြို့နဲ့ ပတ်ဝန်းကျင်မြို့ငယ်တွေကို သိမ်းပိုက်ပြီး အဲဒီမှာ နေထိုင်ကြတယ်။ ၁၉ အစ္စရေးဘုရင် အာခတ်ကြောင့် ယုဒပြည်သားတွေ ကိုယ်ကျင့်တရား ပျက်စီးလာပြီး ယေဟောဝါအပေါ် အကြီးအကျယ် သစ္စာမဲ့ကြတယ်။ ဒါကြောင့် ယေဟောဝါက ယုဒပြည်ကို နှိမ့်ချခဲ့တယ်။
၂၀ နောက်တော့ အဆီးရီးယားဘုရင် တိဂလတ်ပိနေသာက+ ချီတက်လာပြီး အာခတ်ကို ကူညီမယ့်အစား ဒုက္ခပေးတော့တယ်။+ ၂၁ အာခတ်လည်း ယေဟောဝါရဲ့အိမ်တော်၊ ဘုရင်နဲ့ မှူးမတ်တွေနေထိုင်တဲ့ နန်းတော်ထဲက ဥစ္စာဘဏ္ဍာတွေကို ယူပြီး+ အဆီးရီးယားဘုရင်ကို လက်ဆောင်ပဏ္ဏာပေးလိုက်ပေမဲ့ ဘာမှ အကြောင်းမထူးဘူး။ ၂၂ အာခတ်မင်းက အဲဒီလို ဒုက္ခရောက်နေတဲ့အချိန်မှာ ယေဟောဝါအပေါ် သစ္စာမဲ့တဲ့လုပ်ရပ်တွေ ပိုလုပ်လာတယ်။ ၂၃ သူက “ဆီးရီးယားဘုရားတွေက ဆီးရီးယားဘုရင်တွေကို ကူညီတာပဲ။ ငါလည်း အဲဒီဘုရားတွေကို ယဇ်ပူဇော်မယ်ဆိုရင် ငါ့ကိုကူညီပေးမှာပဲ”+ ဆိုပြီး သူ့ကို အရေးနိမ့်စေခဲ့တဲ့+ ဒမတ်စကတ်မြို့ရဲ့ ဘုရားတွေကို ယဇ်ပူဇော်တော့တယ်။+ ဒါပေမဲ့ အဲဒီဘုရားတွေက သူနဲ့ အစ္စရေးအားလုံးကို ကျရှုံးစေခဲ့တယ်။ ၂၄ ဒါ့အပြင် အာခတ်ဟာ စစ်မှန်တဲ့ဘုရားသခင်ရဲ့ အိမ်တော်ထဲက ပစ္စည်းတွေကို စုပြီး အပိုင်းပိုင်း ဖြတ်လိုက်တယ်။+ ယေဟောဝါရဲ့ အိမ်တော်တံခါးတွေကိုလည်း ပိတ်ပြီး+ ဂျေရုဆလင်မြို့ လမ်းဆုံလမ်းခွတိုင်းမှာ သူ့အတွက် ပူဇော်ရာပလ္လင်တွေ တည်တယ်။ ၂၅ တခြားဘုရားတွေဆီ ယဇ်တွေ မီးရှို့ပူဇော်ဖို့ ယုဒမြို့တွေမှာ အထွတ်အမြတ်နေရာတွေ တည်တယ်။+ ဒီလိုနဲ့ ဘိုးဘေးတို့ရဲ့ဘုရား ယေဟောဝါကို အမျက်ထွက်စေခဲ့တယ်။
၂၆ အာခတ်ရဲ့ ကျန်တဲ့သမိုင်းကြောင်းတွေ၊ လုပ်ဆောင်ခဲ့တာတွေ အစအဆုံးကို ယုဒဘုရင်တွေနဲ့ အစ္စရေးဘုရင်တွေရဲ့ ရာဇဝင်ကျမ်းမှာရေးထားတယ်။+ ၂၇ နောက်ပိုင်းမှာ အာခတ် ကွယ်လွန်သွားတဲ့အတွက် ဂျေရုဆလင်မြို့မှာ သင်္ဂြိုဟ်လိုက်တယ်၊ အစ္စရေးဘုရင်တွေရဲ့ သင်္ချိုင်းမှာတော့ မသင်္ဂြိုဟ်ကြဘူး။+ သားတော်ဟေဇကိ ထီးနန်းဆက်ခံတယ်။