တရားဟောရာ
၂၆ “ခင်ဗျားတို့က ယေဟောဝါဘုရား အမွေပေးမယ့်ပြည်ထဲ ဝင်ရောက်သိမ်းပိုက်ပြီး နေထိုင်တဲ့အခါ၊ ၂ ယေဟောဝါဘုရားပေးတဲ့ ပြည်ကနေထွက်တဲ့ သီးနှံထဲက သီးဦးသီးဖျားတချို့ကို တောင်းထဲထည့်ပြီး နာမတော်တည်စေဖို့ ယေဟောဝါဘုရား ရွေးချယ်တဲ့နေရာဆီ ယူသွားရမယ်။+ ၃ တာဝန်ထမ်းဆောင်နေတဲ့ ပုရောဟိတ်ဆီ သွားပြီး ‘ကျွန်တော်တို့ကို ပေးမယ်လို့ ဘိုးဘေးတွေကို ယေဟောဝါ ကျိန်ဆိုခဲ့တဲ့ပြည်ထဲ+ ရောက်လာတဲ့အတွက် ယေဟောဝါဘုရားကို ကျေးဇူးတင်ကြောင်း လာပြောတာပါ’ ဆိုပြီး ပြောရမယ်။
၄ “ပုရောဟိတ်က ခင်ဗျားပေးတဲ့ တောင်းကို ယူပြီး ယေဟောဝါဘုရားရဲ့ ပူဇော်ရာပလ္လင်ရှေ့မှာ ချထားမယ်။ ၅ အဲဒီနောက် ခင်ဗျားက ယေဟောဝါဘုရားရှေ့မှာ ‘ကျွန်တော့်ဘိုးဘေးဟာ လှည့်လည်နေထိုင်တဲ့ အာရံအမျိုးသားတစ်ယောက်ပါ။+ သူက အိမ်သားအနည်းငယ်နဲ့အတူ+ အီဂျစ်ပြည်ကို ဆင်းသွားပြီး+ တိုင်းတစ်ပါးသားအဖြစ် နေထိုင်ခဲ့တယ်။ ဒါပေမဲ့ အဲဒီမှာ အင်အားကြီးပြီး များပြားလှတဲ့ လူမျိုးကြီး ဖြစ်လာတယ်။+ ၆ အီဂျစ်တွေက ကျွန်တော်တို့ကို ကျွန်အဖြစ် ပင်ပင်ပန်းပန်း ခိုင်းစေပြီး ညှဉ်းဆဲနှိပ်စက်တယ်။+ ၇ ဒါကြောင့် ဘိုးဘေးတို့ရဲ့ဘုရား ယေဟောဝါကို အော်ဟစ်အကူအညီ တောင်းကြတယ်။ ဒါကို ယေဟောဝါ ကြားတယ်။ ကျွန်တော်တို့ နှိပ်စက်ခံရတာ၊ ဒုက္ခခံရတာ၊ ဖိနှိပ်ခံရတာတွေကိုလည်း မြင်တယ်။+ ၈ နောက်ဆုံးမှာ ယေဟောဝါက အားကြီးတဲ့လက်၊ တန်ခိုးကြီးတဲ့လက်ရုံး၊+ ကြောက်မက်ဖွယ် လုပ်ရပ်တွေ၊ အံ့ဖွယ်အမှုတွေ၊ ထူးဆန်းတဲ့အရာတွေနဲ့+ ကျွန်တော်တို့ကို အီဂျစ်ပြည်ကနေ ခေါ်ထုတ်ခဲ့တယ်။ ၉ ပြီးတော့ ကျွန်တော်တို့ကို ဒီနေရာခေါ်လာပြီး နို့နဲ့ပျားရည်စီးတဲ့ ပြည်ကို ပေးတယ်။+ ၁၀ အခု ကျွန်တော့်ကို ယေဟောဝါပေးတဲ့ မြေထွက်သီးနှံထဲက သီးဦးသီးဖျားတွေကို ယူလာပါပြီ’+ လို့ပြောရမယ်။
“အဲဒီနောက် ယေဟောဝါဘုရားရှေ့မှာ တောင်းကို ချထားပြီး ယေဟောဝါဘုရားကို ဦးညွှတ်ရမယ်။ ၁၁ ကိုယ်တိုင်နဲ့ အိမ်သားတွေကို ယေဟောဝါဘုရားပေးခဲ့တဲ့ ကောင်းမွန်ရာအားလုံးအတွက် ရွှင်လန်းရမယ်။ ကိုယ့်မြို့မှာရှိတဲ့ လေဝိအနွယ်၊ တိုင်းတစ်ပါးသားတွေကိုလည်း ပါဝင်စေရမယ်။+
၁၂ “သုံးနှစ်တစ်ကြိမ် ဆယ်ဖို့တစ်ဖို့ ပေးရတဲ့နေ့+ ရောက်တဲ့အခါ ထွက်သမျှ သီးနှံတွေထဲက ဆယ်ဖို့တစ်ဖို့အားလုံးကို စုသိမ်းပြီး ကိုယ့်မြို့မှာ နေထိုင်တဲ့ လေဝိအနွယ်၊ တိုင်းတစ်ပါးသားတွေ၊ မိဘမဲ့ကလေးတွေ၊ မုဆိုးမတွေကို ပေးရမယ်။ သူတို့ အဝစားကြမယ်။+ ၁၃ အဲဒီနောက် ယေဟောဝါဘုရားရှေ့မှာ ‘ဘုရားမိန့်မှာတဲ့အတိုင်း မြင့်မြတ်တဲ့ဝေစုကို ကိုယ့်အိမ်ထဲကနေ ထုတ်ပြီး လေဝိအနွယ်၊ တိုင်းတစ်ပါးသားတွေ၊ မိဘမဲ့ကလေးတွေ၊ မုဆိုးမတွေကို ပေးပါပြီ။+ ပညတ်ချက်တွေကို ကျွန်တော် မချိုးဖောက်ပါဘူး။ လျစ်လျူမရှုပါဘူး။ ၁၄ ကျွန်တော်က ဒီမြင့်မြတ်တဲ့ဝေစုကို ကွယ်လွန်သူအတွက် ငိုကြွေးချိန်မှာ ယူမစားပါဘူး။ မသန့်မရှင်း ဖြစ်နေချိန်မှာလည်း မထိပါဘူး။ ကွယ်လွန်သူအတွက်သုံးဖို့လည်း မပေးပါဘူး။ ယေဟောဝါဘုရားရဲ့ စကားကို နာခံပါတယ်။ မိန့်မှာထားသမျှ လုပ်ဆောင်ပါတယ်။ ၁၅ အခု၊ သန့်ရှင်းတဲ့ စံမြန်းရာကောင်းကင်ကနေ ငုံ့ကြည့်ပြီး လူမျိုးတော် အစ္စရေးတွေကို ကောင်းချီးပေးပါ။ ဘိုးဘေးတွေကို ကျိန်ဆိုခဲ့တဲ့အတိုင်း+ ကျွန်တော်တို့ကိုပေးတဲ့ နို့နဲ့ပျားရည်စီးတဲ့ ပြည်ကိုလည်း+ ကောင်းချီးပေးပါ’+ ဆိုပြီး ပြောရမယ်။
၁၆ “အခု၊ ဒီစည်းမျဉ်းတွေ၊ တရားစီရင်ချက်တွေအတိုင်း လုပ်ဆောင်ဖို့ ယေဟောဝါဘုရားမိန့်မှာတယ်။ အဲဒါတွေကို စိတ်စွမ်းရှိသမျှ၊+ ကိုယ်စွမ်းရှိသမျှ လိုက်နာစောင့်ထိန်းကြ။ ၁၇ ခင်ဗျားတို့က ဘုရားရဲ့ လမ်းစဉ်တွေအတိုင်း လိုက်လျှောက်တယ်။ ဘုရားရဲ့ စည်းမျဉ်းတွေ၊+ ပညတ်ချက်တွေ၊+ တရားစီရင်ချက်တွေကို+ လိုက်နာပြီး ဘုရားရဲ့စကားကို နားထောင်တယ်။ ဒါကြောင့် ယေဟောဝါက ခင်ဗျားတို့ရဲ့ ဘုရားသခင်ဖြစ်မယ်လို့ ဒီနေ့ ထုတ်ဖော်ပြောဆိုလိုက်ပြီ။ ၁၈ ကတိတော်အတိုင်း ခင်ဗျားတို့လည်း ကိုယ်တော် တန်ဖိုးအထားရဆုံးလူမျိုး+ ဖြစ်ပါ့မယ်၊ ပညတ်ချက်အားလုံး လိုက်နာပါ့မယ်ဆိုပြီး ယေဟောဝါကို ဒီနေ့ ထုတ်ဖော်ပြောဆိုလိုက်ပြီ။ ၁၉ ယေဟောဝါဘုရားရဲ့ သန့်ရှင်းတဲ့လူမျိုးဖြစ်မှန်း ခင်ဗျားတို့ သက်သေပြတဲ့အတွက်+ ဘုရားသခင်က ကတိတော်အတိုင်း ဖန်ဆင်းထားတဲ့ လူမျိုးအားလုံးထက် ခင်ဗျားတို့ကို ချီးမြှောက်မယ်။+ ချီးမွမ်းခြင်း၊ ကျော်ကြားခြင်း၊ ဂုဏ်သရေရှိခြင်းတို့ကို ပေးသနားမယ်။”