၁ ရာဇဝင်ချုပ်

၂၉ ဒါဝိဒ်မင်းက အစ္စရေးလူထုကြီးကို “ဘုရားသခင်ရွေးချယ်တဲ့ ငါ့သားရှောလမုန်ဟာ+ ငယ်သေးတယ်။ အတွေ့အကြုံလည်း မရှိဘူး။+ ဒါပေမဲ့ လုပ်ရမယ့်လုပ်ငန်းက  ကြီးမားလွန်းတယ်။ အခုဆောက်ရမယ့် ဗိမာန်တော်ဟာ လူအတွက်မဟုတ်ဘဲ ယေဟောဝါဘုရားအတွက် ဖြစ်တယ်။+ ၂ ဒါကြောင့် ငါကိုးကွယ်တဲ့ဘုရားရဲ့ အိမ်တော်အတွက် ငါအစွမ်းကုန်ပြင်ဆင်ခဲ့တယ်။ ရွှေထည်တွေအတွက် ရွှေ၊ ငွေထည်တွေအတွက် ငွေ၊ ကြေးထည်တွေအတွက် ကြေးနီ၊+ သံထည်တွေအတွက် သံ၊ သစ်သားထည်တွေအတွက် သစ်သား၊+ မဟူရာကြောင်ဝင်ကျောက်တွေ၊ အင်္ဂတေကိုင်ဖို့ ကျောက်တုံးတွေ၊ ရောင်စုံကျောက်စရစ်ခဲတွေ၊ ကျောက်မျက်အမျိုးမျိုးနဲ့ ကျောက်ဖြူအမြောက်အမြားကို စုဆောင်းခဲ့တယ်။ ၃ သန့်ရှင်းရာ အိမ်တော်အတွက် ငါပြင်ဆင်ခဲ့တာအားလုံးအပြင်  ငါ့ပိုင်ဆိုင်ရာထဲက+ ရွှေငွေတွေကိုလည်း အိမ်တော်အတွက်  ငါပေးလှူတယ်။ ဘုရားသခင်ရဲ့ အိမ်တော်ကို သိပ်မြတ်နိုးလို့ပါ။+ ၄ ဗိမာန်တော်နံရံတွေကို မွမ်းမံဖို့ သြဖိရရွှေ+ တဲလင့်* ၃,၀၀၀၊ ငွေစင်တဲလင့် ၇,၀၀၀၊ ၅ ရွှေထည်တွေအတွက် ရွှေ၊ ငွေထည်တွေအတွက် ငွေ၊ လက်မှုပညာသည်တွေလုပ်ဖို့ လိုအပ်သမျှကိုလည်း ငါပေးလှူတယ်။ အခု ယေဟောဝါဘုရားအတွက် စေတနာစိတ်နဲ့ ပေးလှူချင်တဲ့သူ ဘယ်သူရှိသလဲ”+ လို့ပြောတယ်။

၆ အဲဒီအခါ ဆွေမျိုးစု ခေါင်းဆောင်တွေ၊ အစ္စရေးအနွယ် ခေါင်းဆောင်တွေ၊ လူတစ်ထောင်အုပ်တွေ၊ လူတစ်ရာအုပ်တွေနဲ့+ ဘုရင့်အမှုကို ကြီးကြပ်သူတွေက+ စေတနာစိတ်နဲ့ ပေးလှူကြတယ်။ ၇ စစ်မှန်တဲ့ဘုရားသခင်ရဲ့ အိမ်တော်လုပ်ငန်းအတွက် ရွှေတဲလင့် ၅,၀၀၀၊ ဒဲရစ်* ၁၀,၀၀၀၊ ငွေတဲလင့် ၁၀,၀၀၀၊ ကြေးနီတဲလင့် ၁၈,၀၀၀၊ သံတဲလင့် ၁၀၀,၀၀၀ ပေးလှူကြတယ်။ ၈ ကျောက်မျက်ရတနာရှိသူတွေကလည်း ဂေရရှုန်အမျိုးသား+ ယေဟေလ+ ကြီးကြပ်မှုအောက်မှာရှိတဲ့ ယေဟောဝါရဲ့အိမ်တော် ဘဏ္ဍာတိုက်ဆီ ပေးလှူကြတယ်။ ၉ စေတနာအလျောက် အဲဒီလိုလှူဒါန်းရတာကို လူတွေ ဝမ်းသာပီတိ ဖြစ်ကြတယ်။ ယေဟောဝါအတွက် စိတ်နှလုံးအကြွင်းမဲ့ စေတနာရှိရှိ ပေးလှူကြလို့ပဲ။+ ဒါဝိဒ်မင်းလည်း သိပ်ကို ဝမ်းသာကြည်နူးသွားတယ်။

၁၀ အဲဒီနောက် ဒါဝိဒ်က လူထုကြီးရှေ့မှာ ယေဟောဝါကို ချီးမွမ်းတယ်။ “ကျွန်တော်တို့ရဲ့ဘိုးဘေး  အစ္စရေး ကိုးကွယ်တဲ့ ဘုရားသခင် ယေဟောဝါ၊ ကိုယ်တော့်ကို အစဉ်ထာဝရ ချီးမွမ်းကြပါစေ။ ၁၁ ယေဟောဝါဘုရား၊ ကိုယ်တော်ဟာ ကြီးမြတ်မှု၊+ တင့်တယ်မှု၊ ခမ်းနားမှု၊ အစွမ်းသတ္တိ၊+ ဘုန်းတန်ခိုးနဲ့ ပြည့်စုံပါတယ်။+ ယေဟောဝါဘုရား၊ ကောင်းကင်နဲ့ မြေကြီးပေါ် ရှိသမျှကို ပိုင်တယ်။+ မင်းအာဏာတော်ကိုလည်း ပိုင်တယ်။+ ကိုယ်တော်ဟာ အရာခပ်သိမ်းရဲ့အထွတ်အဖြစ် ကိုယ့်ကိုယ်ကိုယ် ချီးမြှောက်တဲ့အရှင်ပါပဲ။ ၁၂ စည်းစိမ်ဥစ္စာနဲ့ ဂုဏ်ကျက်သရေဟာ ကိုယ်တော်ပေးသနားတဲ့ အရာတွေပါ။+ အရာခပ်သိမ်းကို ကိုယ်တော် အုပ်စိုးတယ်။+ လက်တော်ဟာ တန်ခိုး၊+ အစွမ်းသတ္တိနဲ့ ပြည့်စုံပြီး+ လူတွေကို ကြီးမြတ်စေနိုင်သလို+ ခွန်အားလည်း ပေးနိုင်တယ်။+ ၁၃ ကျွန်တော်တို့ရဲ့ ဘုရားသခင်၊ ကျေးဇူးတင်ပါတယ်။ တင့်တယ်လှတဲ့ နာမတော်ကို ချီးမွမ်းပါတယ်။

၁၄ “တကယ်တော့  ကျွန်တော်နဲ့ ကျွန်တော့်လူတွေဟာ  စေတနာအလျောက်ပေးတဲ့  အလှူတွေကို  ဒီလောက်အထိ လှူနိုင်စွမ်း မရှိပါဘူး။ အရာခပ်သိမ်းကို  ကိုယ်တော့်ဆီက ရထားတာပါ။ ကိုယ်တော် ပေးသနားထားတာတွေကိုပဲ ပြန်ပြီး ပေးလှူနေကြတာပါ။ ၁၅ ကျွန်တော်တို့ဟာ ဘိုးဘေးတွေလိုပဲ ရှေ့တော်မှာ တိုင်းတစ်ပါးသားတွေ၊ လာရောက်အခြေချသူတွေ ဖြစ်ပါတယ်။+ ကမ္ဘာမြေပေါ်မှာ အသက်ရှင်ရတဲ့နေ့ရက်တွေဟာ အရိပ်လိုပါပဲ။+ မျှော်လင့်ချက် မရှိပါဘူး။ ၁၆ ယေဟောဝါဘုရား၊  ကိုယ်တော့်အတွက်၊ သန့်ရှင်းမြင့်မြတ်တဲ့ နာမတော်အတွက် အိမ်တော်တည်ဆောက်ဖို့ ကျွန်တော်တို့ ပြင်ဆင်ထားတဲ့ ဒီပစ္စည်းဥစ္စာအားလုံးဟာ ကိုယ်တော် ပေးသနားထားတာတွေ၊ ကိုယ်တော် ပိုင်ဆိုင်တာတွေပါပဲ။ ၁၇ ဘုရားသခင်၊ ကိုယ်တော်ဟာ စိတ်နှလုံးကို စစ်ဆေးပြီး+ သမာဓိရှိသူကို နှစ်သက်မှန်း+ ကျွန်တော် ကောင်းကောင်း သိပါတယ်။ ဒီပစ္စည်းဥစ္စာအားလုံးကို ရိုးဖြောင့်တဲ့စိတ်နဲ့၊ စေတနာအပြည့်နဲ့ လှူဒါန်းပါတယ်။ ဒီမှာရှိနေတဲ့ ကိုယ်တော့်လူတွေ စေတနာအပြည့်နဲ့ ပေးလှူနေတာကို မြင်ရတဲ့အတွက် ကျွန်တော် သိပ်ဝမ်းသာပါတယ်။ ၁၈ ဘိုးဘေး အာဗြဟံ၊ အိဇက်၊ အစ္စရေးတို့ရဲ့ ဘုရားသခင် ယေဟောဝါ၊ လူမျိုးတော်ရဲ့ နှလုံးသားထဲမှာ ဒီလိုစိတ်ဆန္ဒတွေ၊ သဘောထားတွေ အမြဲရှိနိုင်ဖို့၊ ကိုယ်တော့်ကို စိတ်နှလုံးအကြွင်းမဲ့ ဝတ်ပြုနိုင်ဖို့ သူတို့ကို ကူညီပေးပါ။+ ၁၉ ပညတ်ချက်တွေ၊+ သတိပေးချက်တွေနဲ့ စည်းမျဉ်းတွေကို စိတ်နှလုံးအကြွင်းမဲ့ လိုက်နာနိုင်ဖို့+ သားတော် ရှောလမုန်ကို ကူညီပေးပါ။ ဒါတွေအားလုံးကို သူလုပ်ဆောင်နိုင်ဖို့၊ ကျွန်တော် ပြင်ဆင်ပေးထားတဲ့အတိုင်း ဗိမာန်တော်ကို တည်ဆောက်နိုင်ဖို့လည်း ကူညီပေးပါ။”+

၂၀ အဲဒီနောက်  “ယေဟောဝါဘုရားကို ချီးမွမ်းကြ” လို့ ဒါဝိဒ် ပြောလိုက်တဲ့အခါ လူထုကြီးက ဘိုးဘေးတို့ရဲ့ဘုရား ယေဟောဝါကို ချီးမွမ်းပြီး ယေဟောဝါနဲ့ ဘုရင်ကို ဦးညွှတ်ပျပ်ဝပ်ကြတယ်။ ၂၁ နောက်တစ်နေ့မှာ ယေဟောဝါအတွက် ပူဇော်သက္ကာတွေ၊ ယေဟောဝါအတွက် မီးရှို့ရာအလှူတွေအဖြစ်+ နွားထီးပျို ၁,၀၀၀၊ သိုးထီး ၁,၀၀၀၊ သိုးသငယ်အထီး ၁,၀၀၀ နဲ့ သွန်းလောင်းရာ အလှူတွေကို+ ဆက်ပြီးပူဇော်ကြတယ်။ အစ္စရေးတစ်မျိုးလုံးအတွက် ပူဇော်သက္ကာတွေ အများကြီး ပူဇော်ကြတယ်။+ ၂၂ အဲဒီနေ့မှာ ယေဟောဝါရှေ့ သူတို့စားသောက်ပြီး အကြီးအကျယ် ရွှင်လန်းကြတယ်။+  ပြီးတော့  ဒါဝိဒ်ရဲ့သား  ရှောလမုန်ကို ဘုရင်အဖြစ် ဒုတိယအကြိမ် ကြေညာပြီး ယေဟောဝါရှေ့မှာ ခေါင်းဆောင်အဖြစ် ဘိသိက်ပေးတယ်။+ ဇာဒုတ်ကိုလည်း ပုရောဟိတ်အဖြစ် ဘိသိက်ပေးတယ်။+ ၂၃ ရှောလမုန်လည်း  ခမည်းတော်ဒါဝိဒ်ရဲ့ ထီးနန်းကို ဆက်ခံပြီး ယေဟောဝါရဲ့  ရာဇပလ္လင်ပေါ်မှာ  ထိုင်တယ်။+ သူဟာ အောင်မြင်တဲ့ ဘုရင်တစ်ပါးဖြစ်ပြီး အစ္စရေးအားလုံး သူ့ကို နာခံကြတယ်။ ၂၄ မှူးမတ်တွေ၊+ သူရဲကောင်းတွေ၊+ ဒါဝိဒ်မင်းရဲ့ သားတော်တွေလည်း+ ရှောလမုန်မင်းကို လက်အောက်ခံကြတယ်။ ၂၅ ယေဟောဝါက ရှောလမုန်ကို အစ္စရေးအားလုံးရှေ့မှာ အတိုင်းထက်အလွန် ကြီးမြတ်စေတယ်။ အရင်က အစ္စရေးဘုရင်တစ်ပါးမှ မရဖူးတဲ့ ဘုန်းအသရေကိုလည်း ပေးသနားတယ်။+

၂၆ ယေရှဲရဲ့သား ဒါဝိဒ်က အစ္စရေးတစ်နိုင်ငံလုံးကို  အုပ်ချုပ်ခဲ့တယ်။ ၂၇ အစ္စရေးတွေကို နှစ်ပေါင်း ၄၀ အုပ်ချုပ်တယ်။ ဟေဗြုန်မြို့မှာ ၇ နှစ်၊+ ဂျေရုဆလင်မြို့မှာ ၃၃ နှစ် အုပ်ချုပ်တယ်။+ ၂၈ နောက်ဆုံးတော့ သူဟာ စည်းစိမ်ချမ်းသာ၊ ဂုဏ်ကျက်သရေ၊ ကျေနပ်စရာကောင်းတဲ့ဘဝနဲ့ အသက်ရှည်ရှည် နေပြီးတဲ့နောက် သေဆုံးသွားတယ်။+ သားတော်ရှောလမုန်က ထီးနန်းဆက်ခံတယ်။+ ၂၉ ဒါဝိဒ်မင်းရဲ့ရာဇဝင် အစအဆုံးကို အကြားအမြင်ရသူ ရှမွေလ၊ ပရောဖက် နာသန်၊+ စိတ်အာရုံမြင်ရသူ ဂဒ်တို့ရဲ့+ ကျမ်းစောင်မှာ ရေးသားထားတယ်။ ၃၀ ဒါဝိဒ်မင်း နန်းစံချိန်မှာ ဖြစ်ပျက်ခဲ့တာတွေ၊ စွမ်းဆောင်ချက်တွေ၊ အစ္စရေးပြည်နဲ့ ပတ်ဝန်းကျင်တိုင်းပြည်တွေမှာ ဖြစ်ပျက်ခဲ့တာတွေကိုလည်း ရေးသားထားတယ်။