၂ ရာဇဝင်ချုပ်
၃၀ ဟေဇကိမင်းက အစ္စရေးတို့ရဲ့ဘုရား ယေဟောဝါအတွက် ပသခါပွဲ* ကျင်းပဖို့+ ဂျေရုဆလင်မြို့မှာရှိတဲ့ ယေဟောဝါရဲ့အိမ်တော်ကို လာကြပါဆိုပြီး အစ္စရေးနဲ့+ ယုဒလူတွေဆီ သတင်းပို့တယ်၊ ဧဖရိမ်နဲ့ မနာရှေအနွယ်ဆီကိုလည်း+ စာတွေ ပို့တယ်။ ၂ ဒါပေမဲ့ ဘုရင်နဲ့ မှူးမတ်တွေ၊ ဂျေရုဆလင်မြို့မှာရှိတဲ့ လူတွေက ဒုတိယလကျမှပဲ ပသခါပွဲကျင်းပဖို့ ဆုံးဖြတ်လိုက်တယ်။+ ၃ ကိုယ်ကိုသန့်ရှင်းစေတဲ့ ပုရောဟိတ်တွေ မလုံလောက်တဲ့အပြင်+ ဂျေရုဆလင်မြို့မှာ လူမစုံသေးတဲ့အတွက် ပွဲတော်ကျင်းပနေကျအချိန်မှာ မကျင်းပနိုင်ခဲ့ဘူး။+ ၄ ဒီအစီအစဉ်ကို ဘုရင်နဲ့လူအားလုံး သဘောတူကြတယ်။ ၅ ဒါကြောင့် အစ္စရေးတို့ရဲ့ဘုရား ယေဟောဝါအတွက် ပသခါပွဲကျင်းပမှာဖြစ်လို့ ဂျေရုဆလင်မြို့ကို လာကြပါဆိုပြီး ဗေရရှေဘမြို့ကနေ ဒန်မြို့အထိ+ အစ္စရေးတစ်ပြည်လုံးမှာ ကြေညာဖို့ ဆုံးဖြတ်ကြတယ်။ သူတို့က ပညတ်ကျမ်းမှာ ရေးထားတဲ့အတိုင်း ပသခါပွဲကို လူအမြောက်အမြား စုရုံးပြီး မကျင်းပဖူးလို့ပဲ။+
၆ ခြေမြန်တော်တွေလည်း ဘုရင်နဲ့ မှူးမတ်တွေဆီက စာတွေကို ယူပြီး ဘုရင့်အမိန့်အတိုင်း အစ္စရေးပြည်နဲ့ ယုဒပြည်တစ်လျှောက်လုံးကို သွားကြတယ်။ စာထဲမှာ “အစ္စရေးလူတို့၊ အာဗြဟံ၊ အိဇက်နဲ့ အစ္စရေး ကိုးကွယ်တဲ့ဘုရား ယေဟောဝါဆီ ပြန်လာကြပါ။ ဒါမှ အဆီးရီးယားဘုရင်တွေလက်ကနေ လွတ်မြောက်လာတဲ့ ကျန်ကြွင်းသူတွေဆီ ဘုရား ပြန်လာလိမ့်မယ်။+ ၇ ခင်ဗျားတို့ရဲ့ ဘိုးဘေးတွေလို၊ ညီအစ်ကိုတွေလို မလုပ်ကြနဲ့။ သူတို့က ဘိုးဘေးတို့ရဲ့ဘုရား ယေဟောဝါကို သစ္စာဖောက်ခဲ့ကြတယ်။ ဒါကြောင့် ဘုရားက သူတို့ကို လူတွေ ထိတ်လန့်စရာ ဖြစ်စေခဲ့တာ ခင်ဗျားတို့မြင်တဲ့အတိုင်းပဲ။+ ၈ ဘိုးဘေးတွေလို ခေါင်းမမာကြနဲ့။+ ယေဟောဝါဘုရားကို လက်အောက်ခံကြ။ ယေဟောဝါဘုရား အမြဲသန့်ရှင်းစေတဲ့ သန့်ရှင်းရာဌာနတော်ကို လာပြီး+ ဘုရားကို ဝတ်ပြုကြပါ။ ဒါဆိုရင် ခင်ဗျားတို့ကို အမျက်ပြေသွားလိမ့်မယ်။+ ၉ ခင်ဗျားတို့သာ ယေဟောဝါဘုရားဆီ ပြန်လှည့်လာမယ်ဆိုရင် ခင်ဗျားတို့ရဲ့ ညီအစ်ကိုတွေ၊ သားမြေးတွေကို ဖမ်းခေါ်သွားသူတွေက သနားပြီး+ ဒီပြည်ကို ပြန်လာခွင့်ပေးလိမ့်မယ်။+ ယေဟောဝါဘုရားဟာ သနားစာနာတတ်တယ်၊ ကရုဏာရှိတယ်။+ ခင်ဗျားတို့ ပြန်လှည့်လာမယ်ဆိုရင် မျက်နှာလွှဲမှာ မဟုတ်ဘူး”+ လို့ရေးထားတယ်။
၁၀ ခြေမြန်တော်တွေလည်း ဧဖရိမ်၊ မနာရှေနဲ့+ ဇာဗုလုန်နယ်မြေအထိ တစ်မြို့ပြီးတစ်မြို့ သွားကြတယ်။ ဒါပေမဲ့ လူတွေက သူတို့ကို ကဲ့ရဲ့လှောင်ပြောင်တယ်။+ ၁၁ အာရှာ၊ မနာရှေနဲ့ ဇာဗုလုန်နယ်မြေမှာရှိတဲ့ လူတချို့ကတော့ စိတ်ကိုနှိမ့်ချပြီး ဂျေရုဆလင်မြို့ကို လာကြတယ်။+ ၁၂ စစ်မှန်တဲ့ဘုရားသခင် ကောင်းချီးပေးတဲ့အတွက် ယုဒလူတွေက ယေဟောဝါရဲ့စကားအတိုင်း ဘုရင်နဲ့ မှူးမတ်တွေ မိန့်မှာသမျှ စည်းစည်းလုံးလုံး လုပ်ဆောင်ကြတယ်။
၁၃ ဒီလိုနဲ့ နှစ်လပိုင်းမှာ+ တဆေးမဲ့မုန့်ပွဲတော် ကျင်းပဖို့+ ဂျေရုဆလင်မြို့မှာ လူအမြောက်အမြား စုဝေးကြတယ်။ ဧရာမလူစုကြီးပဲ။ ၁၄ သူတို့က ဂျေရုဆလင်မြို့မှာရှိတဲ့ နတ်ဘုရားတွေရဲ့ ပူဇော်ရာပလ္လင်တွေ၊+ နံ့သာပေါင်းပလ္လင်တွေကို ဖယ်ရှားပြီး+ ကိဒြုန်ချိုင့်ဝှမ်းထဲ ပစ်ချလိုက်တယ်။ ၁၅ နှစ်လပိုင်း၊ ၁၄ ရက်နေ့ရောက်တော့ ပသခါပူဇော်သက္ကာကို သတ်ကြတယ်။ ပုရောဟိတ်တွေနဲ့ လေဝိအမျိုးသားတွေလည်း ရှက်သွားတယ်။ ဒါနဲ့ ကိုယ်ကို သန့်ရှင်းစေပြီး ယေဟောဝါရဲ့ အိမ်တော်ဆီ မီးရှို့ရာအလှူတွေ ယူလာကြတယ်။ ၁၆ အဲဒီနောက် ပုရောဟိတ်တွေက စစ်မှန်တဲ့ဘုရားသခင့်လူ မောရှေရဲ့ ပညတ်မှာပါတဲ့အတိုင်း သူတို့ရပ်နေကျနေရာမှာ နေရာယူတယ်။ ပြီးတော့ လေဝိအမျိုးသားတွေဆီကရတဲ့ သွေးကို ယူပြီး ပူဇော်ရာပလ္လင်ပေါ် ဖျန်းတယ်။+ ၁၇ လူစုကြီးထဲမှာ ကိုယ်ကိုသန့်စင်အောင် မလုပ်ရသေးတဲ့သူတွေ အများကြီးရှိတယ်။ အဲဒီလို မသန့်မရှင်းဖြစ်နေသူတွေ ယေဟောဝါအတွက် သန့်ရှင်းလာစေဖို့ လေဝိအမျိုးသားတွေက ပသခါပူဇော်သက္ကာတွေကို သူတို့ကိုယ်စား သတ်ပေးကြတယ်။+ ၁၈ အထူးသဖြင့် ဧဖရိမ်၊ မနာရှေ၊+ အိသခါနဲ့ ဇာဗုလုန်အနွယ်ထဲက လူအများစုက ကိုယ်ကိုသန့်စင်အောင် မလုပ်ရသေးပေမဲ့ ပသခါအစားအစာကို စားကြတယ်။ ဒါဟာ ပညတ်တရားကို ချိုးဖောက်ရာ ရောက်ပေမဲ့ ဟေဇကိမင်းက “ကောင်းမြတ်လှတဲ့ ယေဟောဝါဘုရား၊+ ၁၉ သန့်ရှင်းမှုစံနှုန်းနဲ့အညီ ကိုယ်ကိုစင်ကြယ်အောင် မလုပ်ရသေးပေမဲ့+ ဘိုးဘေးတို့ရဲ့ဘုရား ယေဟောဝါကို ရှာဖွေဖို့ စိတ်ပြင်ဆင်ထားသူတိုင်းကို+ ခွင့်လွှတ်ပေးပါ” လို့ဆုတောင်းပေးတယ်။ ၂၀ ယေဟောဝါလည်း ဟေဇကိမင်း ဆုတောင်းတာကို နားထောင်ပြီး လူတွေကို ခွင့်လွှတ်တယ်။
၂၁ ဂျေရုဆလင်မြို့မှာရှိတဲ့ အစ္စရေးတွေက တဆေးမဲ့မုန့်ပွဲတော်ကို+ ခုနစ်ရက်ကြာ ဝမ်းသာအားရ ကျင်းပကြတယ်။+ လေဝိအမျိုးသားတွေနဲ့ ပုရောဟိတ်တွေက ယေဟောဝါအတွက် တူရိယာတွေ အကျယ်ကြီး တီးမှုတ်ပြီး နေ့တိုင်း ယေဟောဝါကို ချီးမွမ်းကြတယ်။+ ၂၂ ဟေဇကိက ယေဟောဝါအတွက် မြော်မြင်ချင့်ချိန်မှုရှိရှိ အမှုဆောင်တဲ့ လေဝိအမျိုးသားတွေကို အားပေးစကား ပြောတယ်။ လူအားလုံးလည်း ပွဲတော်ရက် ခုနစ်ရက်လုံး စားသောက်ပြီး+ မိတ်သဟာယ ပူဇော်သက္ကာတွေ ပူဇော်ကြတယ်။+ ဘိုးဘေးတို့ရဲ့ဘုရား ယေဟောဝါကို ကျေးဇူးတင်ချီးမွမ်းကြတယ်။
၂၃ အဲဒီနောက် လူအားလုံးက ပွဲတော်ကို နောက်ထပ်ခုနစ်ရက် ကျင်းပဖို့ ဆုံးဖြတ်တဲ့အတွက် နောက်ခုနစ်ရက်လုံး ဝမ်းသာအားရ ပွဲခံကြတယ်။+ ၂၄ ယုဒဘုရင်ဟေဇကိက လူတွေအတွက် နွားထီး ၁,၀၀၀၊ သိုး ၇,၀၀၀ ပေးလှူတယ်။ မှူးမတ်တွေလည်း လူတွေအတွက် နွားထီး ၁,၀၀၀၊ သိုး ၁၀,၀၀၀ ပေးလှူတယ်။+ ပုရောဟိတ်အတော်များများကလည်း ကိုယ်ကို သန့်ရှင်းစေကြတယ်။+ ၂၅ ယုဒပြည်သားတွေ၊ ပုရောဟိတ်တွေ၊ လေဝိအမျိုးသားတွေ၊ အစ္စရေးပြည်ကလာတဲ့ လူတွေ၊+ အစ္စရေးပြည်ကလာတဲ့ တိုင်းတစ်ပါးသားတွေ၊+ ယုဒပြည်မှာနေထိုင်တဲ့ တိုင်းတစ်ပါးသားတွေလည်း ရွှင်လန်းနေကြတယ်။ ၂၆ ဂျေရုဆလင်တစ်မြို့လုံး အကြီးအကျယ် ရွှင်လန်းနေကြတယ်။ အစ္စရေးဘုရင် ဒါဝိဒ်ရဲ့သား ရှောလမုန်လက်ထက်ကစပြီး ဂျေရုဆလင်မြို့မှာ အဲဒီလိုမျိုး မရှိခဲ့ဖူးဘူး။+ ၂၇ နောက်ဆုံးတော့ လေဝိအနွယ် ပုရောဟိတ်တွေက ထပြီး လူတွေကို ကောင်းချီးပေးတယ်။+ သူတို့ရဲ့အသံကို ဘုရားသခင် ကြားတယ်။ သူတို့ရဲ့ဆုတောင်းသံဟာ သန့်ရှင်းတဲ့စံမြန်းရာ ကောင်းကင်အထိ ရောက်တယ်။