၁ ဘုရင်များ

၁၃ ဘုရားသခင်ရဲ့လူက+  ယေဟောဝါရဲ့ အမိန့်အတိုင်း ယုဒပြည်ကနေ ဗေသလမြို့ကို ရောက်လာတယ်။ အဲဒီအချိန်မှာ ယေရောဗောင်က ယဇ်တွေကို မီးရှို့ပူဇော်ဖို့ ယဇ်ပလ္လင်နားမှာ+ ရပ်နေတယ်။ ၂ ဘုရားသခင်ရဲ့လူက ယေဟောဝါရဲ့ အမိန့်အတိုင်း ယဇ်ပလ္လင်ကို “အို ယဇ်ပလ္လင်၊ ယဇ်ပလ္လင်၊ ယေဟောဝါဘုရား ပြောတာက ‘ဒါဝိဒ်အမျိုးမှာ ယောရှိ+ လို့ခေါ်တဲ့ သားတစ်ယောက် မွေးလာလိမ့်မယ်။ သူက မင်းအပေါ်မှာ ယဇ်ပူဇော်လေ့ရှိတဲ့ ပုရောဟိတ်တွေ၊ အထွတ်အမြတ်နေရာတွေမှာ အမှုထမ်းတဲ့ ပုရောဟိတ်တွေကို မင်းအပေါ်မှာပဲ ပူဇော်လိမ့်မယ်၊ လူသေအရိုးတွေကို မီးရှို့လိမ့်မယ်’”+ လို့အော်ပြောတယ်။ ၃ ပြီးတော့ “ကြည့်ပါ၊ ဒီယဇ်ပလ္လင် အက်ကွဲပြီး ပလ္လင်ပေါ်ကနေ ပြာတွေကျလာလိမ့်မယ်။ ဒါဟာ ယေဟောဝါပြောတဲ့ နိမိတ်ပဲ” ဆိုပြီး အဲဒီနေ့မှာ နိမိတ်တစ်ခု ပေးလိုက်တယ်။

၄ ဗေသလမြို့မှာရှိတဲ့ ယဇ်ပလ္လင်နဲ့ ပတ်သက်ပြီး စစ်မှန်တဲ့ ဘုရားသခင်ရဲ့လူ ပြောနေတာကို ယေရောဗောင်မင်း ကြားတဲ့အခါ ယဇ်ပလ္လင်ပေါ်မှာ သူ့လက်ကိုဆန့်ပြီး “အဲဒီလူကို ဖမ်းကြစမ်း” လို့အမိန့်ပေးလိုက်တယ်။+ ချက်ချင်းဆိုသလိုပဲ ဆန့်ထားတဲ့လက်ဟာ လှုပ်လို့ မရတော့ဘူး၊ ပြန်ရုပ်လို့လည်း မရတော့ဘူး။+ ၅ ဘုရားသခင်ရဲ့လူကို ယေဟောဝါပေးခဲ့တဲ့ နိမိတ်အတိုင်း ယဇ်ပလ္လင် အက်ကွဲသွားပြီး ပလ္လင်ပေါ်ကနေ ပြာတွေကျလာတယ်။

၆ အဲဒီအခါ မင်းကြီးက ဘုရားသခင်ရဲ့လူကို “မင်းရဲ့ဘုရား ယေဟောဝါကို တောင်းပန်ပေးပါ။  ငါ့လက်  နဂိုအတိုင်း ပြန်ဖြစ်အောင် ဆုတောင်းပေးပါ” လို့ပြောတဲ့အခါ+ ဘုရားသခင်ရဲ့လူလည်း ယေဟောဝါဆီ တောင်းပန်ပေးတဲ့အတွက် လက်ဟာ နဂိုအတိုင်း ပြန်ကောင်းလာတယ်။ ၇ ဒါနဲ့ မင်းကြီးက ဘုရားသခင်ရဲ့လူကို “နန်းတော်ကို လိုက်ပြီး တစ်ခုခုစားပါ။ လက်ဆောင်တစ်ခု ပေးချင်လို့ပါ” လို့ဖိတ်ခေါ်တယ်။ ၈ ဒါပေမဲ့ ဘုရားသခင်ရဲ့လူက “နန်းတော်တစ်ဝက်ပေးရင်တောင် မင်းကြီးနဲ့အတူ မလိုက်နိုင်ပါဘူး။ ဒီအရပ်မှာ ကျွန်တော် ဘာမှမစားဘူး၊ ဘာမှမသောက်ဘူး။ ၉ ‘မင်း ဘာမှမစားနဲ့၊ ဘာမှမသောက်နဲ့။ လာတဲ့လမ်းအတိုင်း မပြန်နဲ့’ လို့ ယေဟောဝါဘုရား မှာထားပါတယ်”  ဆိုပြီးပြောတယ်။ ၁၀ အဲဒီနောက် ဗေသလမြို့ကိုလာခဲ့တဲ့လမ်းအတိုင်း မပြန်ဘဲ တခြားလမ်းနဲ့ ပြန်သွားတယ်။

၁၁ ဗေသလမြို့မှာ သက်ကြီး ပရောဖက်တစ်ယောက် ရှိတယ်။ သူ့သားတွေက အိမ်ပြန်လာပြီး အဲဒီနေ့မှာ ဘုရားသခင်ရဲ့လူ ဘာတွေလုပ်ခဲ့တယ်၊ မင်းကြီးကို ဘာတွေပြောခဲ့တယ်ဆိုတဲ့အကြောင်း ပြောပြကြတယ်။ သူတို့ ပြောလို့ပြီးသွားတဲ့အခါ၊ ၁၂ အဲဒီပရောဖက်က “သူ ဘယ်လမ်းကနေ ပြန်သွားသလဲ” လို့မေးတော့ သားတွေက ယုဒပြည်ကလာတဲ့ ဘုရားသခင်ရဲ့လူ ပြန်သွားတဲ့လမ်းကို ညွှန်လိုက်တယ်။ ၁၃ အဲဒီအခါ သူက “အဖေ့အတွက် မြည်းကို ကုန်းနှီးတင်ပေးပါ” လို့ပြောတယ်။ သူတို့လည်း မြည်းကုန်းနှီးတင်ပေးတော့ သူစီးသွားတယ်။

၁၄ သက်ကြီးပရောဖက်လိုက်သွားတဲ့အခါ အပင်ကြီးတစ်ပင်အောက်မှာ ဘုရားသခင်ရဲ့လူ ထိုင်နေတာကို တွေ့လိုက်တယ်။ ဒါနဲ့ “ခင်ဗျားက ယုဒပြည်ကလာတဲ့ ဘုရားသခင်ရဲ့လူလား”+ လို့မေးတော့ သူက “ဟုတ်ပါတယ်” လို့ ပြန်ဖြေတယ်။ ၁၅ သက်ကြီးပရောဖက်က “ကျုပ်အိမ်ကို လိုက်ပြီး တစ်ခုခုစားပါလား” လို့ ဖိတ်ခေါ်တော့၊ ၁၆ သူက “ကျွန်တော် မလိုက်နိုင်ဘူး။ ခင်ဗျား ဖိတ်ခေါ်တာကိုလည်း လက်မခံနိုင်ဘူး။ ဒီအရပ်မှာ ခင်ဗျားနဲ့အတူ ကျွန်တော် ဘာမှမစားဘူး၊ မသောက်ဘူး။ ၁၇ ကျွန်တော့်ကို ‘အဲဒီမှာ ဘာမှမစားနဲ့။ ဘာမှမသောက်နဲ့။ လာတဲ့လမ်းအတိုင်း မပြန်နဲ့’ လို့ ယေဟောဝါဘုရား မှာထားပါတယ်” ဆိုပြီးပြန်ဖြေတယ်။ ၁၈ အဲဒီအခါ သက်ကြီးပရောဖက်က “ကျုပ်လည်း  ခင်ဗျားလို  ပရောဖက်တစ်ယောက်ပါပဲ။ ‘သူ့ကို မင်းရဲ့အိမ် ခေါ်သွားလိုက်။ စားဖို့သောက်ဖို့ စီစဉ်ပေးလိုက်ပါ’ ဆိုပြီး ယေဟောဝါ မိန့်မှာတဲ့အကြောင်း ကောင်းကင်တမန်တစ်ပါး ကျုပ်ကို လာပြောသွားတယ်” လို့ပြောတယ်။ (သက်ကြီးပရောဖက်က သူ့ကို လိမ်ပြောလိုက်တာ။) ၁၉ ဒါနဲ့ သူလည်း သက်ကြီးပရောဖက်ရဲ့အိမ်မှာ  စားသောက်ဖို့ ပြန်လိုက်သွားတယ်။

၂၀ စားပွဲမှာထိုင်ပြီး စားသောက်နေတုန်း သူ့ကိုပြန်ခေါ်လာတဲ့ သက်ကြီးပရောဖက်ဆီ ယေဟောဝါရဲ့စကားတော် ရောက်လာတယ်။ ၂၁ သက်ကြီးပရောဖက်က ယုဒပြည်ကလာတဲ့ ဘုရားသခင်ရဲ့လူကို “ယေဟောဝါဘုရား ပြောတယ်– ‘မင်းက ယေဟောဝါရဲ့ အမိန့်ကို ဆန့်ကျင်ပြီး ယေဟောဝါ မှာထားတဲ့ ပညတ်ချက်ကို မလိုက်နာတဲ့အတွက်၊ ၂၂ “ဘာမှ မစားနဲ့။ ဘာမှ မသောက်နဲ့” လို့ မင်းကိုမှာထားတဲ့ အရပ်ဆီ ပြန်သွားပြီး စားသောက်တဲ့အတွက် မင်းရဲ့အလောင်းဟာ ဘိုးဘေးတို့သင်္ချိုင်းကို ရောက်မှာ မဟုတ်ဘူး’”+ လို့ပြောတယ်။

၂၃ သက်ကြီးပရောဖက်က သူပြန်ခေါ်လာတဲ့  ဘုရားသခင်ရဲ့လူ  စားသောက်လို့ပြီးသွားတဲ့အခါ မြည်းကို ကုန်းနှီးတင်ပေးတယ်။ ၂၄ ဒါနဲ့ အဲဒီလူ ပြန်သွားတယ်။ လမ်းမှာ ခြင်္သေ့တစ်ကောင် ထွက်လာပြီး သူ့ကို ကိုက်သတ်လိုက်တဲ့အတွက်+ သူ့အလောင်းက လမ်းပေါ်မှာ လဲနေတယ်။ အလောင်းဘေးမှာ မြည်းနဲ့ ခြင်္သေ့ ရပ်နေတယ်။ ၂၅ လမ်းသွားလမ်းလာတွေက လမ်းပေါ်မှာလဲနေတဲ့ အလောင်းနဲ့ အလောင်းဘေးမှာ ရပ်နေတဲ့ ခြင်္သေ့ကို တွေ့တဲ့အခါ သက်ကြီးပရောဖက်နေတဲ့မြို့ကို လာပြီး အဲဒီအကြောင်း ပြောကြတယ်။

၂၆ သက်ကြီးပရောဖက်က  အဲဒီအကြောင်း ကြားတာနဲ့ “ဒါ ဘုရားသခင်ရဲ့လူပဲ ဖြစ်ရမယ်။ ယေဟောဝါဘုရားရဲ့ အမိန့်ကို+ ဆန့်ကျင်လို့ ယေဟောဝါက ခြင်္သေ့ကို လွှတ်ပြီး သူ့ကို ကိုက်သတ်ခိုင်းလိုက်တာပဲ။ သူ့ကို ယေဟောဝါဘုရား ပြောတဲ့အတိုင်းပါပဲလား”+ လို့ပြောတယ်။ ၂၇ အဲဒီနောက် “အဖေ့အတွက် မြည်းကို ကုန်းနှီးတင်ပေးကြ” လို့ပြောတော့ သားတွေက ကုန်းနှီးတင်ပေးကြတယ်။ ၂၈ သူထွက်သွားတဲ့အခါ လမ်းပေါ်မှာလဲနေတဲ့ အလောင်းနဲ့ အလောင်းဘေးမှာ ရပ်နေတဲ့ မြည်းနဲ့ခြင်္သေ့ကို တွေ့တယ်။ ခြင်္သေ့က အသေကောင်ကို မစားဘူး။ မြည်းကိုလည်း မကိုက်ဘူး။ ၂၉ သူက ဘုရားသခင့်လူရဲ့ အလောင်းကို မပြီး မြည်းပေါ်တင်တယ်။ ငိုကြွေးမြည်တမ်းပြီး သင်္ဂြိုဟ်ဖို့ သူနေတဲ့မြို့ဆီ အလောင်းကို သယ်လာတယ်။ ၃၀ ပြီးတော့ အလောင်းကို သူ့ရဲ့သင်္ချိုင်းဂူမှာ  သင်္ဂြိုဟ်လိုက်တယ်။ “အဖြစ်ဆိုးလိုက်တာ၊ ငါ့ညီရယ်”  ဆိုပြီး  ငိုကြွေးမြည်တမ်းကြတယ်။ ၃၁ သင်္ဂြိုဟ်ပြီးတဲ့နောက် သက်ကြီးပရောဖက်က “အဖေသေတဲ့အခါ ဘုရားသခင်ရဲ့လူကို သင်္ဂြိုဟ်တဲ့ သင်္ချိုင်းမှာပဲ သင်္ဂြိုဟ်ပေးကြပါ။ သူ့အရိုးဘေးမှာ ငါ့အရိုးတွေကို ထားပါ။+ ၃၂ ဗေသလမြို့မှာရှိတဲ့ ယဇ်ပလ္လင်နဲ့ ပတ်သက်လို့၊ ရှမာရိမြို့ရဲ့ အထွတ်အမြတ်နေရာတွေမှာရှိတဲ့ ဝတ်ကျောင်းတွေနဲ့ ပတ်သက်လို့+ သူပြောခဲ့တဲ့ ယေဟောဝါဘုရားရဲ့ စကားတွေ ကျိန်းသေပြည့်စုံလာလိမ့်မယ်” လို့ သူ့သားတွေကို မှာတယ်။+

၃၃ ဒါတွေဖြစ်ပြီးနောက်မှာတောင် ယေရောဗောင်က ဆိုးတဲ့လမ်းစဉ်ကနေ ပြန်မလှည့်လာဘဲ အထွတ်အမြတ်နေရာတွေအတွက် ပုရောဟိတ်တွေကို သာမန်လူတွေထဲကနေ ဆက်ပြီးခန့်နေတုန်းပဲ။+ ပုရောဟိတ်လုပ်ချင်သူ မှန်သမျှကို “အထွတ်အမြတ်နေရာအတွက် ပုရောဟိတ် ဖြစ်စေ” လို့ပြောပြီး ခန့်တတ်တယ်။+ ၃၄ အဲဒီအပြစ်ကြောင့်ပဲ+ ယေရောဗောင်အမျိုး မြေပြင်ပေါ်ကနေ ပယ်ရှင်းခံရတော့မယ်။ အစတုံး ဖျက်ဆီးခံရတော့မယ်။+