တောလည်ရာ
၂၃ ဗာလမ်က “ဒီနေရာမှာ ကျွန်တော့်အတွက် ပူဇော်ရာပလ္လင် ခုနစ်ခု တည်ပြီး+ နွားထီးခုနစ်ကောင်၊ သိုးထီးခုနစ်ကောင်ကို အသင့်ပြင်ထားပေးပါ” လို့ ပြောတယ်။ ၂ ဗာလက်မင်းလည်း သူပြောတဲ့အတိုင်း ချက်ချင်းလုပ်ပေးတယ်။ သူတို့က ပလ္လင်တစ်ခုစီပေါ်မှာ နွားထီးနဲ့သိုးထီး တစ်ကောင်စီ ပူဇော်တယ်။+ ၃ ဗာလမ်က “မင်းကြီးရဲ့ မီးရှို့ရာအလှူနားမှာ ရပ်နေပါ။ ကျွန်တော့်ကို ယေဟောဝါဘုရား ဆက်သွယ်မယ် ထင်တာပဲ။ သွားကြည့်လိုက်ဦးမယ်။ ဘုရားပြောသမျှ မင်းကြီးကို ပြန်ပြောပါ့မယ်” ဆိုပြီး တောင်ကတုံးတစ်ခုပေါ် တက်သွားတယ်။
၄ ဘုရားသခင် ဆက်သွယ်လာတဲ့အခါ+ ဗာလမ်က “ကျွန်တော် ပူဇော်ရာပလ္လင်ခုနစ်ခု တည်ထားပါတယ်။ ပလ္လင်တစ်ခုစီပေါ်မှာ နွားထီးနဲ့သိုးထီး တစ်ကောင်စီ ပူဇော်ထားပါတယ်” လို့ပြောတယ်။ ၅ ယေဟောဝါက “ဗာလက်မင်းကို သွားပြောလိုက်” ဆိုပြီး ဗာလမ်ပြောရမယ့် စကားတွေကို မှာတယ်။+ ၆ ဗာလမ်ပြန်လာတော့ ဗာလက်မင်းနဲ့ မောဘမှူးမတ်တွေ မီးရှို့ရာအလှူနားမှာ ရပ်နေတာကို တွေ့တယ်။ ၇ အဲဒီအခါ ဗာလမ် စပ်ဆိုပြီး ပြောလိုက်တာက–+
“မောဘဘုရင် ဗာလက်က အာရံပြည်ကနေ၊+
အရှေ့ဘက် တောင်တန်းတွေဆီကနေ ငါ့ကိုခေါ်လာပြီး
‘ယာကုပ်ကို ကျိန်စာတိုက်ပေးပါ။
အစ္စရေးကို ရှုတ်ချပေးပါ’ တဲ့။+
၈ ဘုရားသခင် ကျိန်စာမတိုက်တဲ့သူတွေကို ငါဘယ်လို ကျိန်စာတိုက်နိုင်မလဲ။
ယေဟောဝါ မရှုတ်ချတဲ့သူတွေကို ငါဘယ်လို ရှုတ်ချနိုင်မလဲ။+
၉ ကျောက်တောင်ထိပ်ကနေ၊
တောင်ကုန်းပေါ်ကနေ လှမ်းကြည့်ရင်
လူမျိုးခြားတွေနဲ့ မရောနှောဘဲ သီးခြားနေတတ်တဲ့+
လူမျိုးတစ်မျိုးကို ငါမြင်ရတယ်။
၁၀ မြေမှုန့်လို များလွန်းတဲ့ ယာကုပ်အမျိုးကို ဘယ်သူရေတွက်နိုင်မလဲ။+
အစ္စရေးလူမျိုးရဲ့ လေးပုံတစ်ပုံကိုတောင် ဘယ်သူရေတွက်နိုင်လို့လဲ။
သူတော်ကောင်းတွေလို ငါသေပါရစေ။
သူတို့လို ငါဇာတ်သိမ်းပါရစေ။”
၁၁ အဲဒီအခါ ဗာလက်က “မင်း ဘယ်လိုလုပ်လိုက်တာလဲ။ ငါ့ရန်သူတွေကို ကျိန်စာတိုက်ခိုင်းတာလေ။ ခုတော့ ကောင်းချီးပဲ ပေးနေပါလား”+ လို့ပြောတော့၊ ၁၂ ဗာလမ်က “ယေဟောဝါဘုရား ပြောခိုင်းတာကိုပဲ ကျွန်တော် ပြောမယ်”+ လို့ပြန်ဖြေတယ်။
၁၃ ဗာလက်မင်းက “သူတို့တစ်မျိုးလုံးကို မဟုတ်ဘဲ တချို့ကိုပဲမြင်ရမယ့် နောက်တစ်နေရာကို လိုက်ခဲ့။ အဲဒီကနေ သူတို့ကို ကျိန်စာတိုက်ပါ”+ ဆိုပြီး၊ ၁၄ ပိသဂါ ကုန်းပြင်မြင့်ပေါ်က+ ဇောဖိမ်ကွင်းပြင်ဆီ ခေါ်သွားတယ်။ အဲဒီမှာ ဗာလမ်က ပူဇော်ရာပလ္လင် ခုနစ်ခုတည်ပြီး တစ်ခုစီပေါ်မှာ နွားထီးနဲ့ သိုးထီးတစ်ကောင်စီ ပူဇော်တယ်။+ ၁၅ အဲဒီနောက် “မီးရှို့ရာအလှူနားမှာ မင်းကြီးနေခဲ့ပါ။ ကျွန်တော်ကတော့ ဘုရားသခင်နဲ့ စကားပြောဖို့ ဟိုနားကို သွားလိုက်ဦးမယ်” လို့ပြောတယ်။ ၁၆ ယေဟောဝါက ဗာလမ်ကို ဆက်သွယ်လာပြီး “ဗာလက်မင်းဆီ သွားပြောလိုက်” ဆိုပြီး ဗာလမ်ပြောရမယ့်စကားတွေကို မှာတယ်။+ ၁၇ ဗာလမ်ပြန်လာတော့ ဗာလက်မင်းနဲ့ မောဘမှူးမတ်တွေ မီးရှို့ရာအလှူနားမှာ ရပ်နေတာကို တွေ့ရတယ်။ “ယေဟောဝါဘုရား ဘာတွေပြောလိုက်သလဲ” လို့ ဗာလက်မင်း မေးတဲ့အခါ၊ ၁၈ ဗာလမ် စပ်ဆိုပြီး ပြောလိုက်တာက–+
“ဇိဖော်ရဲ့သား ဗာလက်မင်း၊
နားထောင်ပါဦး။
၁၉ ဘုရားသခင်ဟာ လူတွေလို မလိမ်တတ်ဘူး။+
လူတွေလို စိတ်မပြောင်းလဲတတ်ဘူး။+
ပြောပြီးရင် ပြောတဲ့အတိုင်း လုပ်တယ်။
မိန့်ဆိုပြီးရင် မိန့်ဆိုတဲ့အတိုင်း လုပ်ဆောင်တယ်။+
၂၀ ငါဒီကိုရောက်နေတာ ကောင်းချီးပေးဖို့ပဲ။
ဘုရားပေးတဲ့ ကောင်းချီးကို+ မပြောင်းလဲပစ်နိုင်ဘူး။+
၂၁ မှော်ပညာသုံးပြီး ယာကုပ်အမျိုးကို ဒုက္ခပေးရင် ဘုရားသခင် သည်းခံမှာ မဟုတ်ဘူး။
အစ္စရေးအမျိုး ဒုက္ခရောက်မှာကို ဘုရားသခင်ခွင့်မပြုဘူး။
ယေဟောဝါဘုရားက သူတို့နဲ့အတူရှိတယ်။+
ဘုရားသခင်ဟာ ဘုရင်ပဲဆိုပြီး သူတို့ကြွေးကြော်နေကြတယ်။
၂၂ ဘုရားသခင်က သူတို့ကို အီဂျစ်ပြည်ကနေ ခေါ်ထုတ်လာတယ်။+
ဘုရားသခင်ဟာ သူတို့အတွက် နွားရိုင်းဦးချိုလိုပဲ။+
၂၃ ယာကုပ်အမျိုး ပျက်စီးသွားအောင် မှော်အတတ်နဲ့ လုပ်လို့မရဘူး။+
အစ္စရေးအမျိုး ဒုက္ခရောက်အောင် ပြုစားလို့မရဘူး။+
ယာကုပ်အမျိုး၊ အစ္စရေးအမျိုးအတွက်
‘ဘုရားသခင်လုပ်တဲ့ အံ့ဖွယ်အမှုတွေကို ကြည့်ပါဦး’ လို့ အခု ပြောစမှတ် ပြုနေကြပြီ။
၂၄ လူမျိုးတစ်မျိုးက ခြင်္သေ့လို ထလာလိမ့်မယ်။
ခြင်္သေ့လို ထွက်လာလိမ့်မယ်။+
သားကောင်ကို မစားရမချင်း၊ သွေးကို မသောက်ရမချင်း
လှဲလျောင်းနေမှာ မဟုတ်ဘူး။”
၂၅ အဲဒီအခါ ဗာလက်မင်းက “သူတို့ကို ကျိန်စာမတိုက်ချင်ရင် နေပါ။ ကောင်းချီးတော့ မပေးနဲ့” လို့ပြောတဲ့အခါ၊ ၂၆ ဗာလမ်က “‘ယေဟောဝါဘုရား ပြောတာကိုပဲ လုပ်မယ်’+ လို့ ကျွန်တော်ပြောထားတယ်လေ” လို့ပြန်ဖြေတယ်။
၂၇ ဗာလက်မင်းက “နောက်တစ်နေရာကို လိုက်ခဲ့ဦး။ အဲဒီကနေ သူတို့ကို ကျိန်စာတိုက်ဖို့ စစ်မှန်တဲ့ ဘုရားသခင် အလိုတော် ရှိကောင်းပါရဲ့”+ ဆိုပြီး၊ ၂၈ ယေရှိမုန်အရပ်ဘက်*+ မျက်နှာမူနေတဲ့ ပေဂုရတောင်ထိပ်ဆီ ခေါ်သွားတယ်။ ၂၉ ဗာလမ်က “ဒီနေရာမှာ ပူဇော်ရာပလ္လင် ခုနစ်ခုတည်ပြီး နွားထီးခုနစ်ကောင်၊ သိုးထီးခုနစ်ကောင် အသင့်ပြင်ထားပေးပါ”+ လို့ပြောတဲ့အခါ၊ ၃၀ ဗာလက်မင်းလည်း ပြောတဲ့အတိုင်း လုပ်ပေးတယ်။ ပလ္လင်တစ်ခုစီပေါ်မှာ နွားထီးနဲ့သိုးထီး တစ်ကောင်စီ ပူဇော်တယ်။