၂ ရာဇဝင်ချုပ်
၂၃ ခုနစ်နှစ်မြောက်မှာတော့ ယောယဒက သတ္တိရှိရှိ လုပ်ဆောင်တယ်။ ရာတပ်မှူးတွေဖြစ်တဲ့+ ယေရောဟံရဲ့သား အာဇရိ၊ ယေဟောဟနန်ရဲ့သား အိရှမေလ၊ သြဗက်ရဲ့သား အာဇရိ၊ အဒါယရဲ့သား မာသေယ၊ ဇိခရိရဲ့သား ဧလိရှဖတ်တို့နဲ့ ကတိကဝတ်ပြုတယ်။ ၂ အဲဒီနောက် ယုဒပြည်တစ်လျှောက်လုံးကို သွားပြီး ယုဒမြို့တွေမှာရှိတဲ့ လေဝိအမျိုးသားတွေနဲ့+ အစ္စရေးဆွေမျိုးစု ခေါင်းဆောင်တွေကို စုဝေးခိုင်းလိုက်တယ်။ ဂျေရုဆလင်မြို့ကို သူတို့ ရောက်လာတဲ့အခါ၊ ၃ လူအားလုံးက စစ်မှန်တဲ့ဘုရားသခင်ရဲ့ အိမ်တော်မှာ ဘုရင်နဲ့ ကတိသစ္စာပြုကြတယ်။+ အဲဒီနောက် ယောယဒက–
“ဒါဝိဒ်ရဲ့သားမြေးတွေနဲ့ ပတ်သက်ပြီး ယေဟောဝါဘုရား ကတိပေးထားတဲ့အတိုင်း အခု ဘုရင့်သားတော် စိုးစံလိမ့်မယ်။+ ၄ ခင်ဗျားတို့ လုပ်ရမှာက– လူသုံးစု ခွဲလိုက်ပါ။ ဥပုသ်နေ့မှာ တာဝန်ကျတဲ့+ ပုရောဟိတ်နဲ့ လေဝိအမျိုးသားတွေဖြစ်တဲ့ တစ်စုက တံခါးစောင့်လုပ်ရမယ်။+ ၅ နောက်တစ်စုက နန်းတော်မှာ+ စောင့်ရမယ်။ နောက်ဆုံးတစ်စုက အုတ်မြစ်တံခါးမှာ စောင့်ရမယ်။ လူအားလုံးကတော့ ယေဟောဝါရဲ့ အိမ်တော်ဝင်းထဲမှာ+ ရှိနေရမယ်။ ၆ ယေဟောဝါရဲ့ အိမ်တော်ထဲ ဘယ်သူ့ကိုမှ မဝင်စေနဲ့။ တာဝန်ထမ်းဆောင်နေတဲ့+ ပုရောဟိတ်တွေနဲ့ လေဝိအမျိုးသားတွေကတော့ သန့်ရှင်းတဲ့လူစုဖြစ်လို့ ဝင်လို့ရတယ်။ ကျန်တဲ့လူတွေကတော့ ယေဟောဝါရဲ့တောင်းဆိုချက်ကို လိုက်နာတဲ့အနေနဲ့ အပြင်မှာပဲ နေရမယ်။ ၇ လေဝိအမျိုးသားတွေက လက်နက်ကိုယ်စီကိုင်ပြီး ဘုရင်ကို ခြံရံစောင့်ကြပ်ရမယ်။ အိမ်တော်ထဲ ဝင်လာသူမှန်သမျှ သေဒဏ်ပဲ။ ဘုရင်သွားလေရာရာ ခင်ဗျားတို့ လိုက်ရမယ်” ဆိုပြီး ညွှန်ကြားတယ်။
၈ လေဝိအမျိုးသားတွေနဲ့ ယုဒလူတွေအားလုံးက ပုရောဟိတ်ယောယဒ ညွှန်ကြားတဲ့အတိုင်း တစ်သဝေမတိမ်း လိုက်နာကြတယ်။ တပ်မှူးတွေက ဥပုသ်နေ့မှာ တာဝန်ကျသူတွေကိုရော တာဝန်မကျသူတွေကိုပါ ခေါ်ထားတယ်။+ ပုရောဟိတ်ယောယဒက သူတို့ကို+ အနားမပေးဘူး။ ၉ ပုရောဟိတ်ယောယဒက ရာတပ်မှူးတွေကို+ ဘုရားသခင်ရဲ့အိမ်တော်မှာရှိတဲ့+ ဒါဝိဒ်မင်းရဲ့ လှံတွေ၊ ဒိုင်းငယ်တွေ၊ ဒိုင်းဝိုင်းတွေ ပေးတယ်။+ ၁၀ ပြီးတော့ လူတွေကို လက်နက်ကိုယ်စီကိုင်၊ ဘုရင်ကိုခြံရံပြီး ပူဇော်ရာပလ္လင်အနား၊ အိမ်တော်အနား၊ အိမ်တော်ရဲ့ညာဘက်ကနေ ဘယ်ဘက်အထိ စောင့်ကြပ်ဖို့ နေရာချပေးတယ်။ ၁၁ အဲဒီနောက် ဘုရင့်သားတော်+ ယောရှကို ခေါ်ထုတ်လာတယ်။ ခေါင်းပေါ် သရဖူဆောင်းပေးပြီး ပညတ်ကျမ်းလိပ်ကို+ တင်တယ်။ ယောယဒနဲ့သားတွေက ယောရှကို မင်းမြှောက်ပြီး ဘိသိက်ပေးလိုက်တယ်။ “မင်းကြီး အသက်တော် ရှည်ပါစေ” လို့ ကြွေးကြော်ကြတယ်။+
၁၂ အာသလိဟာ အုတ်အုတ်ကျက်ကျက် ဖြစ်နေတဲ့အသံ၊ ဘုရင်ကို ချီးမွမ်းသြဘာပေးနေတဲ့ အသံကို ကြားတာနဲ့ လူတွေစုဝေးနေတဲ့ ယေဟောဝါရဲ့ အိမ်တော်ကို ရောက်လာတယ်။+ ၁၃ အိမ်တော်ဝင်ပေါက်မှာရှိတဲ့ တိုင်နားမှာ ဘုရင်ရပ်နေတာကို သူတွေ့လိုက်ရတယ်။ မှူးမတ်တွေ၊+ ခရာမှုတ်သူတွေက ဘုရင်အနားမှာ ရှိနေပြီး ပြည်သူပြည်သားတွေလည်း ဝမ်းသာအားရ+ ခရာတွေ မှုတ်နေကြတယ်။ တူရိယာတီးမှုတ်နေတဲ့ သီချင်းသည်တွေကလည်း ဦးဆောင်ပြီး ချီးမွမ်းသီချင်းဆိုနေကြတယ်။ ဒါနဲ့ အာသလိက ကိုယ့်အဝတ်ကို ဆွဲဆုတ်ပြီး “ဒါ ပုန်ကန်မှုပဲ။ ပုန်ကန်နေကြတာပဲ” လို့အော်တော့တယ်။ ၁၄ ပုရောဟိတ်ယောယဒက တပ်သားတွေကို ကြီးကြပ်ရတဲ့ ရာတပ်မှူးတွေကို ခေါ်ပြီး “အစောင့်အကြပ်တွေကြားကနေ သူ့ကို ခေါ်ထုတ်သွားကြ။ သူ့နောက်ကို လိုက်တဲ့သူရှိရင်လည်း ဓားနဲ့ကွပ်မျက်ကြ” လို့ အမိန့်ပေးတယ်။ ယောယဒက “သူ့ကို ယေဟောဝါဘုရားရဲ့ အိမ်တော်ထဲမှာ မသတ်ကြနဲ့” လို့ မှာထားတဲ့အတွက်၊ ၁၅ သူ့ကို ဖမ်းချုပ်ပြီး နန်းတော်ရဲ့ မြင်းတံခါးဝကို ရောက်တာနဲ့ ကွပ်မျက်လိုက်ကြတယ်။
၁၆ အဲဒီနောက် ယောယဒက ဘုရင်နဲ့ လူတွေကို ယေဟောဝါရဲ့လူမျိုး အမြဲဖြစ်နေစေဖို့ သူနဲ့ ကတိသစ္စာပြုခိုင်းတယ်။+ ၁၇ နောက်တော့ ပြည်သူပြည်သားတွေက ဗာလဘုရားကျောင်းကို လာပြီး ဖြိုချတယ်။+ ဗာလရဲ့ယဇ်ပလ္လင်တွေ၊ ဗာလရုပ်တုတွေကို ချိုးဖဲ့ဖျက်ဆီးပြီး+ ဗာလပုရောဟိတ် မဿန်ကို ယဇ်ပလ္လင်တွေရှေ့မှာ ကွပ်မျက်လိုက်တယ်။+ ၁၈ ပြီးတော့ ယောယဒက ဒါဝိဒ်ကိုယ်တိုင် အုပ်စုခွဲပြီး တာဝန်ပေးခဲ့တဲ့ ပုရောဟိတ်တွေနဲ့ လေဝိအမျိုးသားတွေကို ယေဟောဝါရဲ့အိမ်တော် ကြီးကြပ်ဖို့ အပ်လိုက်တယ်။ သူတို့ဟာ ယေဟောဝါရဲ့အိမ်တော်မှာ မီးရှို့ရာပူဇော်သက္ကာတွေကို မောရှေပညတ်အတိုင်း+ ယေဟောဝါဆီ ပူဇော်ပြီး+ ဒါဝိဒ်ညွှန်ကြားခဲ့တဲ့အတိုင်း ရွှင်လန်းစွာ သီချင်းဆိုရမယ့်သူတွေပဲ။ ၁၉ တစ်ခုခုကြောင့် မသန့်မရှင်းဖြစ်နေသူတွေ ယေဟောဝါရဲ့အိမ်တော်ထဲ မဝင်နိုင်အောင် တံခါးစောင့်တွေကိုလည်း+ ချထားတယ်။ ၂၀ ပြီးတော့ ယောယဒက ရာတပ်မှူးတွေ၊+ ဂုဏ်အသရေရှိသူတွေ၊ အုပ်ချုပ်ရေးမှူးတွေ၊ ပြည်သူပြည်သားတွေကို ခေါ်လိုက်တယ်။ သူတို့က ဘုရင်ကို ခြံရံစောင့်ကြပ်ပြီး ယေဟောဝါရဲ့ အိမ်တော်ထဲကနေ ခေါ်ထုတ်လာတယ်။ အထက်တံခါးကိုဖြတ်၊ နန်းတော်ထဲဝင်လာပြီး ဘုရင်ကို ရာဇပလ္လင်ပေါ်+ ထိုင်ခိုင်းကြတယ်။+ ၂၁ အာသလိကို ကွပ်မျက်လိုက်ပြီဖြစ်လို့ ပြည်သူပြည်သားအားလုံး ပျော်ရွှင်မြူးထူးပြီး တစ်မြို့လုံး ငြိမ်သက်အေးချမ်းနေတယ်။