နှစ်ခြင်းခံကြ၊ နှစ်ခြင်းခံကြ၊ နှစ်ခြင်းခံကြ—အဘယ့်ကြောင့်နည်း

“လပေါင်းအနည်းငယ်အတွင်းမှာ တစ်သောင်းမကသော ယောက်ျား၊ မိန်းမ၊ ကလေးများကို ကျွန်တော်နှစ်ခြင်းပေးခဲ့တယ်။” ဂျက်စွတ်သာသနာပြု ဖရန်စစ္စဇေးဗီးယား က အိန္ဒိယနိုင်ငံ၊ ထရာဗန်ကိုးပြည်နယ်ရှိ မိမိ၏လုပ်ငန်းနှင့်ပတ်သက်၍ အထက်ပါအတိုင်းရေးသားခဲ့သည်။ “တစ်ရွာဝင်တစ်ရွာထွက် လူတွေကို ခရစ်ယာန်ဖြစ်စေခဲ့တယ်။ ကျွန်တော်ရောက်တဲ့နေရာတိုင်းမှာ ကျွန်တော်တို့ရဲ့ဆုတောင်းချက်တွေနဲ့ပညတ်ချက်တွေကို ဒေသခံဘာသာစကားနဲ့ရေးထားတဲ့ စာရွက်တစ်ရွက်စီထားခဲ့တယ်။”

ဖရန်စစ္စဇေးဗီးယား၏စာသည် ပေါ်တူဂီဘုရင် ဂျွန်အား အလွန်စိတ်စွဲငြိသွားစေပြီး သူ၏နိုင်ငံတစ်ခွင်လုံးတွင် တရားဟောစင်မြင့်တိုင်းပေါ်၌ ယင်းတို့ကိုကျယ်လောင်စွာဖတ်ကြားရမည်ဟု သူအမိန့်ထုတ်ခဲ့သည်။ အထက်ကကိုးကားထားသည့် ၁၅၄၅ ခု၊ ဇန်နဝါရီလတွင်ရေးသောစာကို ပုံနှိပ်ထုတ်ဝေခွင့်ပင်ရခဲ့သည်။ ရလဒ်ကားအဘယ်နည်း။ “မကြာမီမှာပင် ဥရောပတိုက်ရှိကျောင်းသားများစွာတို့သည် ‘ဒူးထောက်လိုက်ကြပြီး မျက်ရည်ပူများကိုသွန်ထုတ်လိုက်ကြကာ’ အိန္ဒိယနိုင်ငံရှိ ဘုရားတရားမယုံကြည်သူများအား သွား၍ဘာသာသွင်းပေးရန် ညိုးညိုးညံညံတောင်းဆိုလာကြသည်” ဟု မန်းဖရက်ဘာတလ် က သူရေးသားသော The Jesuits—History & Legend of the Society of Jesus စာအုပ်တွင် ဖော်ပြထားသည်။ သူဆက်ပြောသည်မှာ “လူများကို ကြည်သာရေဖျန်းပေးသူအနည်းငယ်နှင့် လက်ကမ်းစာစောင်အိတ်တစ်အိတ်စာတို့က တစ်နိုင်ငံလုံးရှိလူများကိုပြောင်းလဲစေမည်ဟူသောအစီအစဉ်သည် ထိုအချိန်ကလူများစွာအတွက် မဖြစ်နိုင်ဖွယ်ရှိခဲ့သည်” ဟူ၍ဖြစ်သည်။

ထိုအုံကြွပြောင်းလဲမှုမှ အမှန်အားဖြင့်မည်သည့်အရာဖြစ်ထွန်းသနည်း။ နီကောလပ်စ်လန်ချီလိုတိုအမည်ရှိဂျက်စွတ်တစ်ဦးက အဖြစ်မှန်ကို ရောမသို့အစီရင်ခံစာတင်သွင်းခဲ့သည်။ “နှစ်ခြင်းခံသူအများစုတို့သည် မထင်ရှားသည့်သဘောထားရှိသူများဖြစ်ကြသည်။ အာရပ်နှင့်ဟိန္ဒူတို့၏ကျေးကျွန်များသည် နှစ်ခြင်းခံခြင်းအားဖြင့် လွတ်မြောက်မှု သို့မဟုတ် ဖိနှိပ်သောသခင်လက်မှကာကွယ်မှုရရန် သို့မဟုတ် ဝတ်ရုံအင်္ကျီသစ်၊ ခေါင်းပေါင်းအသစ်ရရန်အတွက်သက်သက်မျှပင် မျှော်လင့်ကြသည်။ အချို့တို့က အပြစ်ဒဏ်ကျရောက်ခြင်းမှလွတ်မြောက်ရန် ထိုသို့ပြုကြသည်။ . . . ကျွန်ုပ်တို့၏သွန်သင်ချက်များအားဖြင့် ကယ်တင်ခြင်းကိုကြိုးစားရန် မိမိတို့၏စိတ်ချယုံကြည်မှုသက်သက်ဖြင့် တိုက်တွန်းခံရသူမည်သူမဆိုသည် အရူးဟုသတ်မှတ်ခြင်းခံရသည်။ လူများစွာတို့သည် နှစ်ခြင်းခံပြီးမရှေးမနှောင်းမှာပင် ဖောက်ပြန်သွားကြပြီး မိမိတို့၏မူရင်းတိတ္ထိအကျင့်အကြံများဆီသို့သာ ပြန်သွားကြသည်။”

ဘုရားတရားမယုံကြည်သည့်သူများအား ပြောင်းလဲရန်နှင့်နှစ်ခြင်းပေးလိုသောဆန္ဒသည် ထိုအချိန်က ဥရောပတိုက်သားနယ်မြေသစ်ရှာဖွေသူများထံသို့လည်း ကူးစက်ခဲ့သည်။ ခရစ္စတိုဖာကိုလံဘတ်စ်သည် ကရစ်ဘီယံပင်လယ်တွင် သူတွေ့ခဲ့သည့် “အိန္ဒိယလူမျိုး” များအား နှစ်ခြင်းပေးခဲ့သည်ဟုအဆိုရှိသည်။ “စပိန်နိုင်ငံ၏မင်းဧကရာဇ်အစိုးရသည် တိုင်းရင်းသားများအား ဘာသာပြောင်းခြင်းကို ဦးစားပေးလုပ်ဆောင်ခဲ့သည်” ဟု The Oxford Illustrated History of Christianity အမည်ရှိစာအုပ်က ဖော်ပြထားသည်။ “ဆယ့်ခြောက်ရာစုအကုန်ပိုင်းလောက်တွင် စပိန်အင်ပါယာအတွင်းရှိ အိန္ဒိယလူမျိုး ၇,၀၀၀,၀၀၀ သည် အနည်းဆုံး အမည်ခံအနေနှင့် ခရစ်ယာန်များဖြစ်လာခဲ့ကြသည်။ ဘာသာပြောင်းသည့်စာရင်းအင်းများကိုကြည့်လိုက်လျှင် (ချားလ်စ်ဘုရင်နှင့်အမျိုးတော်ပြီး သာသနာပြုဖြစ်သွားသော ပေသရိုဒေဂန်တဲဆိုသူသည် အဖော်တစ်ယောက်တည်းဖြင့် တစ်ရက်တည်းတွင် လူပေါင်း ၁၄,၀၀၀ ကို နှစ်ခြင်းပေးခဲ့သည်ဟုဆိုသည်) ပြောင်းလဲခြင်းမပြုမီ ကြိုတင်သြဝါဒပေးခြင်းမရှိနိုင်ကြောင်းထင်ရှားသည်။” ထိုကဲ့သို့သော အပေါ်ယံကြော နှစ်ခြင်းပေးခြင်းသည် တိုင်းရင်းသားများအား ကြမ်းကြမ်းတမ်းတမ်း၊ ရက်ရက်စက်စက်၊ နိုင်ထက်ကလူဆက်ဆံခြင်းများဖြင့် ဒွန်တွဲတတ်သည်။

နှစ်ခြင်းခံခြင်းအပေါ်ထားရှိသည့်အရေးကြီးမှုသည် နယ်မြေသစ်ရှာသူများနှင့်သာသနာပြုများအား ဆက်၍လှုံ့ဆော်သည်။ ၁၄၃၉ ခုနှစ်တွင် ပုပ်ရဟန်းမင်း စတုတ္ထယူဂျီးနီးယပ်စ်သည် ဖလောရင့်ကောင်စီတွင် အမိန့်တစ်ရပ်ကိုထုတ်ပြန်ခဲ့သည်မှာ ဤသို့ဖြစ်သည်။ “သန့်ရှင်းသောနှစ်ခြင်းခံခြင်းသည် ဘာသာသွင်းမင်္ဂလာအစီအစဉ်များထဲတွင် ဦးဆုံးနေရာယူသည်။ အကြောင်းမှာ ယင်းသည် ဝိညာဏအသက်တာအတွက် တံခါးဝဖြစ်သောကြောင့်ဖြစ်သည်။ ယင်းအားဖြင့် ကျွန်ုပ်တို့သည် ခရစ်တော်၏အဖွဲ့ဝင်များဖြစ်လာကြပြီး ချာ့ချ်နှင့်ဖွဲ့စည်းတည်ဆောက်ခံရကြသည်။ ပထမလူသား၏သေခြင်းသည် လူသားအားလုံးထံကူးစက်ရောက်ရှိကတည်းက ရေနှင့်သန့်ရှင်းသောဝိညာဉ်တော်အားဖြင့် တစ်ဖန်မွေးဖွားခြင်းမခံပါက ကျွန်ုပ်တို့သည် ကောင်းကင်နိုင်ငံတော်သို့မဝင်ရောက်နိုင်ပါ။”

မည်သူ၏နှစ်ခြင်းသည်သာ ခိုင်မြဲသည်ဟူသော အငြင်းအခုံများလည်းပေါ်ပေါက်ခဲ့သည်။ “ယင်းသည် ချာ့ချ်အဖွဲ့အစည်းထဲသို့ဝင်နိုင်ရန် အခြေခံကျသောထုံးတမ်းစဉ်လာလည်းဖြစ်သောကြောင့် မိမိတို့ကိုယ်ကို ယုံကြည်ခြင်းခိုင်မာသူများဟုခေါ်ပြီး အခြားသူများအား တိတ္တိများ၊ ဂိုဏ်းခွဲသူများဟုစွပ်စွဲသော ပြိုင်ဘက်ချာ့ချ်များက နှစ်ခြင်းခံခြင်းကို အခွင့်ထူးတစ်ရပ်အဖြစ် အလျင်စလိုသတ်မှတ်လာကြသည်” ဟု The Encyclopedia of Religion ကမှတ်ချက်ချသည်။

မည်သို့ဆိုစေ နှစ်ခြင်းခံခြင်းသည် ခရစ်ယာန်ယုံကြည်ခြင်းမတိုင်မီကတည်းက ရှိနှင့်သောအရာဖြစ်သည်။ ယင်းကို ဗာဗုလုန်နှင့် နိုင်းမြစ်ရေအေးသည် ခွန်အားတိုးပွားစေပြီး မသေနိုင်သောအဖြစ်ကိုရရှိစေသည်ဟုယူဆသည့် ရှေးအီဂျစ်နိုင်ငံတို့က ကျင့်သုံးခဲ့ကြသည်။ ဂရိလူမျိုးများကလည်း နှစ်ခြင်းခံခြင်းသည် လူသစ်တစ်ဦးအတွက် ပြန်လည်မွေးဖွားခြင်းကိုဖြစ်စေသည် သို့မဟုတ် မသေနိုင်သည့်အဖြစ်ကိုပို့ဆောင်ပေးသည်ဟု ယုံကြည်ကြသည်။ ကွမ္မရန်ဒေသရှိဂျူးဘာသာရေးဂိုဏ်းကလည်း သူတို့၏အသိုင်းအဝိုင်းထဲသို့ရောက်ရှိခြင်းအထိမ်းအမှတ်အနေနှင့် နှစ်ခြင်းခံခြင်းကိုပြုကြသည်။ တစ်ပါးအမျိုးသားများသည် ဂျူးဘာသာသို့ပြောင်းလဲရန် အရေဖျားလှီးခြင်းခံရပြီး ခုနစ်ရက်ကြာသောအခါ မျက်မြင်သက်သေများရှေ့မှောက်တွင် နှစ်ခြင်းခံရရန်လိုအပ်သည်။

ခေတ်ကာလများတစ်လျှောက် နှစ်ခြင်းသည် အလွန်အရေးကြီးသည့်အရာအဖြစ် ယူမှတ်ခံလာရသည်မှာ ထင်ရှားသည်။ သို့သော် ယနေ့ကောမည်သို့နည်း။ ဤခေတ်သစ်အချိန်တွင် လိုအပ်ပါသလော။ လိုအပ်လျှင် အဘယ့်ကြောင့်လိုအပ်သနည်း။ သင်အမှန်တကယ်နှစ်ခြင်းခံသင့်သလော။