“လေဗနုန်တောင်ပေါ်မှအာရဇ်ပင်ကဲ့သို့မြင့်မား”

“သခင့်အာရဇ်ပင်များ” ဟုအဓိပ္ပာယ်ရှိသော အာ့ဇ် အာရပ်ဘ်ဟုခေါ်သည့်သစ်ပင်များသည် လှပသောလေဗနုန်တောင်တန်းပေါ်တွင်ပေါက်သည်။ တစ်ချိန်က ထိုတောင်တန်းကိုဖုံးလွှမ်းခဲ့သော ခန့်ညားထည်ဝါသည့် အမြဲစိမ်းစိုသော ဤသစ်ပင်များအကြောင်းကို သမ္မာကျမ်းစာက အကြိမ်ခုနစ်ဆယ်ခန့်—အခြားမည်သည့်သစ်ပင်ထက်မဆို အကြိမ်ပေါင်းများစွာ—ဖော်ပြထားသည်။

လေဗနုန်တောင်ပေါ်မှ ခန့်ညားသောအာရဇ်ပင်များကို ဖော်ပြရာတွင် သမ္မာကျမ်းစာက “လက်ရွေးစင်” နှင့် “ခန့်ညားထည်ဝါသော” ဟူသည့်စကားလုံးများကို အသုံးပြုထားသည်။ (ရှောလမုန်သီချင်း ၅:၁၅၊ ကဘ; ယေဇကျေလ ၁၇:၂၃၊ ကဘ) အာရဇ်ပင်၏အရွယ်အစားနှင့် ယင်းသည်ကြာရှည်ခံနိုင်သည့်အတွက် အိမ်နှင့်သင်္ဘောများဆောက်ဖို့သာမက ပရိဘောဂပြုလုပ်ဖို့အတွက်လည်း ရေပန်းစားခဲ့သည်မှာ ကြာမြင့်ပေပြီ။ အာရဇ်သား၏မွှေးရနံ့နှင့် နီထွေးထွေးအရောင်က အလွန်ဆွဲဆောင်မှုဖြစ်ပြီး သစ်စေးပါဝင်မှုပမာဏ မြင့်မားခြင်းကလည်း ဆွေးမြည့်ခြင်းနှင့် ခြကိုက်ခြင်းတို့ကို မဖြစ်စေပါ။ ထိုအပင်များသည် အလွန်မြင့်မား၍ ထုကြီးမားပြီး အမြင့်ပေ ၁၂၀ နှင့် လုံးပတ်ပေ ၄၀ အထိရှိကာ ရှည်လျားခိုင်ခံ့သောအမြစ်များရှိသည်။ ယင်းကြောင့် ခေတ်သစ်တောအုပ်အချို့က ၎င်းတို့ကို “သစ်ပင်တကာတို့၏ထိပ်ခေါင်တင်” ဟုဖော်ပြထားကြခြင်းသည် အံ့အားသင့်စရာမဟုတ်ပေ!

ကျမ်းရေးသူယေဇကျေလက မေရှိယကို ဘုရားသခင်ကိုယ်တိုင်စိုက်ပျိုးသော အာရဇ်ပင်၏အညွန့်နှင့် ပရောဖက်ပြုခိုင်းနှိုင်းခဲ့သည်။ (ယေဇကျေလ ၁၇:၂၂) အမှန်ဆိုလျှင် “အာရဇ်ပင်” ၏ဟေဗြဲစကားလုံးမှာ “ခိုင်မြဲရန်” ဟူသော အဓိပ္ပာယ်ရင်းမြစ်မှ ဆင်းသက်လာသည်။ အလားတူ ယနေ့လည်း မေရှိယသခင် ယေရှုခရစ်၏နောက်လိုက်များသည် မြင့်မား၍ ကြံ့ခိုင်သည့်အာရဇ်ပင်ကဲ့သို့ ‘ယုံကြည်ခြင်း၌တည်ကြည်ပြီး . . . ခွန်အားစုံလင်လျက်’ နေရန်လိုသည်။ (၁ ကောရိန္သု ၁၆:၁၃) ယင်းကို မည်သို့ပြီးမြောက်စေနိုင်မည်နည်း။ ခရစ်ယာန်မဆန်သောလုပ်ရပ်များ၏ ဩဇာလွှမ်းမိုးမှုများကိုမြဲမြံစွာတွန်းလှန်၍ သမာဓိရှိရှိ ဘုရားဝတ်၌မွေ့လျော်သည့်လမ်းစဉ်တွင် စွဲစွဲမြဲမြဲတည်ကြည်ခံရပ်ခြင်းအားဖြင့်ဖြစ်သည်။ ထိုသို့ပြုသူများကို ‘လေဗနုန်တောင်ပေါ်မှာ အာရဇ်ပင်ကဲ့သို့ကြီးပွားသော . . . ဖြောင့်မတ်သော [သူ]’ အဖြစ် သမ္မာကျမ်းစာကဖော်ပြထားသည်။—ဆာလံ ၉၂:၁၂။