သမ္မာကျမ်းစာ၏ သမိုင်းဝင်မှုကို တစ် “ပင်မ်” က သက်သေထူ
သမ္မာကျမ်းစာတွင် “ပင်မ်” ဟူသည့်စကားလုံး တစ်ကြိမ်တည်းသာ ပါရှိ၏။ ဘုရင်ရှောလုခေတ်က ဣသရေလလူမျိုးသည် ၎င်းတို့၏သတ္တုတန်ဆာပလာကိရိယာများကို ဖိလိတ္တိလူမျိုး ပန်းပဲသမားများထံ သွား၍သွေးခဲ့ကြရ၏။ “ထွန်သွား၊ ပေါက်တူး၊ သုံးခွခက်ရင်း၊ ပုဆိန်၊ ထိုးတံချွန်များ သွေးခကို တစ်ပင်မ်ဟု သတ်မှတ်ထားသည်” ဟု သမ္မာကျမ်းစာကဆိုသည်။—၁ ဓမ္မရာဇဝင် ၁၃:၂၁၊ ကဘ။
ပင်မ်ဟူသည် အဘယ်နည်း။ ရှေးဂီဇာမြို့တွင် ပထမဦးဆုံး ပင်မ် ကျောက်အလေးကို တူးဖော်တွေ့ ရှိခဲ့သည့် စီ.အီး. ၁၉၀၇ ခုနှစ်အထိ ထိုမေးခွန်း၏အဖြေကို မရခဲ့ချေ။ အစောပိုင်းခေတ်က ကျမ်းစာဘာသာပြန်သူများသည် “ပင်မ်” ဟူသည့်စကားလုံးကို ဘာသာပြန်ဆိုရန် အခက်တွေ့ခဲ့ကြ၏။ သာဓကအနေနှင့်၊ ဂျိမ်းစ်ဘုရင်ဘာသာပြန်ကျမ်းက ၁ ဓမ္မရာဇဝင် ၁၃:၂၁ ကို ဤသို့ပြန်ဆိုခဲ့လေသည်– “သို့တိုင် သူတို့တွင် ပေါက်တူး၊ ထယ်သွား၊ ခက်ရင်း၊ ပုဆိန်များအတွက်နှင့် ချွန်းများကို ထက်စေရန် တံစဉ်းရှိခဲ့၏။”
ယနေ့ ပင်မ်သည် အခြေခံ ဟေဗြဲအလေးယူနစ်ဖြစ်သော တစ်ရှယ်ကယ်လ်၏ သုံးပုံနှစ်ပုံခန့် သို့မဟုတ် ပျမ်းမျှ ၇.၈၂ ဂရမ်ရှိသော အလေးတစ်ခု ဖြစ်သည်ဟု ကျမ်းပညာရှင်များ သိထားကြပြီ။ ဖိလိတ္တိလူတို့သည် ဣသရေလလူတို့၏ ကိရိယာတန်ဆာပလာများကို သွေးပေးရန် သွေးခအဖြစ် တစ်ပင်မ်ပမာဏရှိ ငွေစတစ်စ ကောက်ခံခဲ့ကြသည်။ ဘီ.စီ.အီး. ၆၀၇ ခုနှစ်တွင် ယုဒနိုင်ငံနှင့် ယေရုရှလင်မြို့တော် ကျဆုံးသွားသည့်အခါ ရှယ်ကယ်လ်အလေးစနစ်ကိုလည်း အသုံးမပြုတော့ချေ။ သို့ဆိုလျှင် ဟေဗြဲကျမ်း၏သမိုင်းဝင်မှုကို ပင်မ်အလေးက မည်သို့သက်သေထူသနည်း။
ကျမ်းပညာရှင်တချို့က ဓမ္မရာဇဝင်ပထမစောင်အပါအဝင် ဟေဗြဲကျမ်းပိုင်းသည် ဟေလနစ်–ရောမခေတ်ကဖြစ်ပြီး ဘီ.စီ.အီး. ဒုတိယရာစုမှ ပထမရာစုအထိထက်ပင်ရှေးကျသည်ဟု ဆိုကြ၏။ ထို့ကြောင့် “ယင်းတို့သည် . . . ‘သမိုင်းဝင်မဟုတ်သောကျမ်း၊’ ‘သမ္မာကျမ်းစာတွင်ဖော်ပြထားသော’ ‘ရှေးဣသရေလ’ နှင့်စပ်လျဉ်း၍ အချက်အလက်မှန်အတွက် အသုံးမဝင်သလောက်ဖြစ်ကာ ခေတ်သစ် ဂျူးနှင့် ခရစ်ယာန်စာပေဖန်တီးမှုများမျှ ဖြစ်ကြသည်” ဟု ဆို၏။
သို့ရာတွင်၊ မြေထဲပင်လယ်အရှေ့ဒေသ ရှေးဟောင်းသုတေသနနှင့် မနုဿဗေဒ ပါမောက္ခ ဝီလျံ ဂျီ. ဒဲဗာက ၁ ဓမ္မရာဇဝင် ၁၃:၂၁ တွင် ဖော်ပြထားသည့် ပင်မ်ယူနစ်ကို ရည်ညွှန်းလျက် ဤသို့ဆို၏– “ထိုအလေးများ ပျောက်ကွယ်သွား၍ မေ့လျော့သွားပြီးနောက်ပိုင်း ရာစုနှစ်ပေါင်းများစွာအကြာ ဟေလနစ်–ရောမ ခေတ်မှစာရေးဆရာများက [ယင်းတို့] ကို ‘ဖန်တီး’ ရေးသားခဲ့ကြခြင်းမဖြစ်နိုင်။ အမှန်မှာ၊ ပင်မ်ဆိုသည့် ဟေဗြဲစကားလုံးပါသော ရှေးဟောင်းသုတေသနတွေ့ ရှိချက်များကို ပထမဦးဆုံးတွေ့ ရှိခဲ့သည့် အေ.ဒီ. ၂၀ ရာစုနှစ် အစောပိုင်းအထိ ဤကျမ်းစာသားတိုလေးကို . . . နားလည်ခဲ့ကြမည်မဟုတ်ပါ။” ၎င်းပါမောက္ခက ဤသို့ဆက်၍ဆိုသည်– “အကယ်၍ ကျမ်းစာဖြစ်ရပ်များသည် ဟေလနစ်–ရောမ ခေတ်က ‘စာပေဖန်တီးမှုများ’ ဖြစ်ကြမည်ဆိုလျှင် ဤတစ်ခုတည်းသောဖြစ်ရပ်အကြောင်း ဟေဗြဲကျမ်းစာတွင် အဘယ်ကြောင့် ပါရှိခဲ့ရသနည်း။ တစ်ဦးတစ်ယောက်က ပင်မ်အကြောင်းသည် ‘အသေးစိတ်အချက်အလက်တစ်ခုသာ’ ဖြစ်သည်ဟု ကန့်ကွက်ပြောဆိုပေမည်။ သေချာသည်သာမက အများသိဖြစ်ကြသည့်အတိုင်း ‘သမိုင်းသည် အသေးစိတ်အချက်အလက်များပင်ဖြစ်လေသည်။’”
[စာမျက်နှာ ပါ ရုပ်ပုံ]
တစ်ပင်မ်အလေးသည် ရှယ်ကယ်လ် သုံးပုံနှစ်ပုံခန့် ရှိ