“ယုံကြည်ခြင်းအတွက် နှိပ်စက်ညှဉ်းပန်းခံခဲ့ရ”

အီတလီမြောက်ပိုင်း၊ စာနိုဘွာမြို့ရှိ ပန်းဥယျာဉ်ကြီးတစ်ခုတွင် လူ့အခွင့်အရေးချိုးဖောက်ခံရခြင်းကြောင့် သေဆုံးခဲ့ကြသူများအတွက် အထိမ်းအမှတ်မြေနေရာတစ်ကွက် တည်ရှိသည်။ အထိမ်းအမှတ်မြေကွက်ရှိ မော်ကွန်းကျောက်ပြားတစ်ချပ်ကို နာစီဆိုရိထ်အား ရည်စူး၍ အခမ်းအနားဖြင့်ဖွင့်လှစ်ခဲ့သည်။ ဂျာမနီနိုင်ငံဖွား၊ အီတလီလူမျိုး ရိထ်သည် ၁၉၃၀ ပြည့်လွန်နှစ်များတွင် ယေဟောဝါသက်သေတစ်ဦးဖြစ်လာခဲ့သည်။ ယေဟောဝါသက်သေများသည် စစ်မှန်သောဘုရားသခင် ယေဟောဝါကို ဟစ်တလာထက် ပို၍အလေးပေးခဲ့သောကြောင့် ဟစ်တလာအုပ်ချုပ်နေစဉ် နှိပ်စက်ညှဉ်းပန်းခံခဲ့ရသည်။

ချွေးတပ်စခန်းများထဲသို့ ကင်းမျှော်စင်စာစောင်များ လျှို့ဝှက်ပို့ရာ၌ ရိထ်လည်း ပါဝင်ကြောင်း ဂက်စတာပိုသိသွားချိန်တွင် စာနိုဘွာမြို့သို့ သူထွက်ပြေးခဲ့သည်။ ထိုတွင် ကင်းမျှော်စင်ကို အီတလီဘာသာစကားသို့ သူ့အားပြန်ဆိုစေပြီး အနီးတစ်ဝိုက်ရှိ ယုံကြည်သူချင်းများထံ ဖြန့်ဝေပေးစေခဲ့သည်။ သူ၏တက်ကြွသောလုပ်ဆောင်မှုများကို သတိပြုမိသွားကြသည်။ သို့ဖြင့် အက်စ်အက်စ်အရာရှိတစ်ဦးနှင့် သူ၏အဖွဲ့သည် ရိထ်၏အိမ်ကို ရုတ်တရက် ဝင်ရောက်ရှာဖွေကာ သူ့ကိုဖမ်းဆီးပြီး ကျမ်းစာနှစ်အုပ်နှင့် စာအနည်းငယ်ကို “ပြစ်မှုမကင်းသော” သက်သေအထောက်အထားအဖြစ် သိမ်းယူခဲ့ကြသည်! ရိထ်ကို ဂျာမနီနိုင်ငံသို့ခေါ်ဆောင်သွားပြီး ဒါ့ခ်ရှောချွေးတပ်စခန်း၌ အကျဉ်းချကာ ဒုတိယကမ္ဘာစစ်မပြီးမီလေးတွင် ကွပ်မျက်လိုက်ကြသည်။ သူသည် “ယုံကြည်ခြင်းအတွက် နှိပ်စက်ညှဉ်းပန်းခံခဲ့ရ” သည်ဟု စာနိုဘွာမြို့ရှိ မော်ကွန်းကျောက်ပြားက ဆို၏။

နာဇီတို့၏နှိပ်စက်ခြင်းခံခဲ့ရသော နာစီဆိုရိထ်နှင့် အခြားသက်သေခံရာနှင့်ချီတို့သည် စကြဝဠာတွင် ဝတ်ပြုကိုးကွယ်ခံထိုက်သော တစ်ပါးတည်းသောအရှင် ယေဟောဝါအပေါ် ဆက်၍တည်ကြည်ကြရန် မျက်မှောက်ခေတ်ခရစ်ယာန်များအတွက် အားပေးမှုတစ်ခုဖြစ်သည်။ (ဗျာ. ၄:၁၁) ယေရှုက “ဖြောင့်မတ်ခြင်းတရားကြောင့် နှောင့်ယှက်ညှဉ်းဆဲခြင်းကို ခံရသောသူတို့သည် မင်္ဂလာရှိကြ၏” ဟုမိန့်တော်မူခဲ့သည်။ ဘုရားသခင်သည် သူတို့၏လုပ်ဆောင်မှုများကို သတိရတော်မူပြီး ရဲစွမ်းသတ္တိရှိလမ်းစဉ်ကို သူတို့လိုက်လျှောက်ကြသည့်အတွက် ဆုချပါလိမ့်မည်။—မဿဲ ၅:၁၀; ဟေဗြဲ ၆:၁၀။