စာရှုသူများအမေး

ပညာရှိသုံးဦးသည် ဖွားစသူငယ်ယေရှုထံ အမှန်ပင် လည်ပတ်ခဲ့ပါသလော

ကမ္ဘာတစ်ဝန်းရှိ ခရစ္စမတ်ပုံပြင်များတွင် ဘုရင်သုံးပါး သို့မဟုတ် ပညာရှိသုံးဦးက ဖွားစသူငယ်ယေရှုအတွက် အဖိုးတန်လက်ဆောင်များ ယူဆောင်လာသည်ဟု ဖော်ပြထားသည်။ ယင်းသည် မှန်ကန်ပါသလော။ တကယ့်ဖြစ်ရပ်မှန်နှင့် ကိုက်ညီသလော။ ဆန်းစစ်ကြည့်ကြစို့။

မဿဲနှင့်လုကာခရစ်ဝင်ကျမ်းတို့တွင်  ယေရှုကိုဖွားမြင်ခြင်းအကြောင်း မှတ်တမ်းတင်ထားသည်။ ယေရှုကိုဖွားမြင်ချိန်တွင် အနီးအနားရှိကွင်းပြင်မှ အညတရသိုးထိန်းများသာ လည်ပတ်ခဲ့ကြောင်း ထိုမှတ်တမ်းများက ဖော်ပြသည်။ ဘုရင်များ သို့မဟုတ် ပညာရှိများဟု လူတို့ယူဆသူတို့သည် အမှန်အားဖြင့် နက္ခတ်ဗေဒင်ဆရာများဖြစ်ပြီး ဘုရင်များမဟုတ်ကြပါ။ ထို့ပြင် သူတို့၏အရေအတွက်ကိုလည်း ကျမ်းစာတွင် မဖော်ပြထားချေ။ ယေရှုထံ ထိုနက္ခတ်ဗေဒင်ဆရာများ လာရောက်ချိန်သည် နွားစားခွက်တွင်သိပ်ထားသော ဖွားစအရွယ်တွင်မဟုတ်ဘဲ ယေရှု သူငယ်အရွယ်ရှိချိန်၊ မိဘများနှင့်အတူ အိမ်တွင်ရှိနေချိန်ဖြစ်သည်။ သူတို့ရောက်ရှိလာခြင်းက ယေရှုအတွက် အသက်အန္တရာယ်ပင်ရှိခဲ့သည်။

ယေရှုဖွားမြင်ခြင်းနှင့်စပ်လျဉ်း၍ ကျမ်းရေးသူ လုကာ၏မှတ်တမ်းကို သေချာဆန်းစစ်ကြည့်ပါ။ ဤသို့ဆိုထားကြောင်း သင်တွေ့ရပါလိမ့်မည်– ‘ထိုအရပ်ဒေသမှ သိုးထိန်းများသည် မိမိတို့၏သိုးအုပ်များကို ညအခါ ကွင်းပြင်၌ ထိန်းကျောင်းလျက်ရှိကြ၏။ ယေဟောဝါဘုရားသခင်၏ ကောင်းကင်တမန်သည် သူတို့အနီးတွင် ရုတ်တရက်ပေါ်လာ၍ . . . “ဖွားစသူငယ်ကို အနှီးဖြင့်ပတ်လျက် နွားစားခွက်၌ သိပ်ထားသည်ကို တွေ့ရလိမ့်မည်” ဟုမြွက်ဆို၏။ . . . သူတို့သည် အလျင်အမြန်သွား၍ မာရိနှင့်ယောသပ်အပြင် နွားစားခွက်၌ သိပ်ထားလျက်ရှိသော ဖွားစသူငယ်ကိုလည်း တွေ့ ကြ၏။’—လုကာ ၂:၈-၁၆။

ယောသပ်၊ မာရိနှင့် သိုးထိန်းတို့သာ ဖွားစသူငယ်ယေရှုနှင့်အတူရှိသည်ဟု လုကာ၏မှတ်တမ်းက ဆိုသည်။ အခြားမည်သူ့ကိုမျှ မဖော်ပြထားချေ။

ခေတ်သုံးမြန်မာသမ္မာကျမ်းတွင် ဖော်ပြထားသော မဿဲ ၂:၁-၁၁ ပါမှတ်တမ်းကို ယခုသုံးသပ်ကြည့်ပါ– “ဟေရုဒ်မင်း၏လက်ထက်၊ ယုဒပြည်ဗက်လင်မြို့တွင် . . . သူငယ်တော်ယေရှုကို ဖွားမြင်လေ၏။ ထိုအခါ အရှေ့တိုင်းနိုင်ငံမှ ပညာရှိတို့သည် ယေရုရှလင်မြို့သို့ ရောက်လာ . . . ၏။ သူတို့သည် အိမ်ထဲသို့ဝင်ကြရာ သူငယ်တော်အား မယ်တော်နှင့်အတူ တွေ့ မြင်ကြ၏။”

ထိုမှတ်တမ်းတွင် “ပညာရှိသုံးဦး” ဟုမဆိုဘဲ “ပညာရှိတို့” ဟူ၍သာဆိုထားကြောင်း၊ သူတို့သည် အရှေ့တိုင်းနိုင်ငံမှ ယေရှုကိုဖွားမြင်ရာ ဗက်လင်မြို့သို့မဟုတ်ဘဲ ယေရုရှလင်မြို့သို့ ဦးဆုံးသွားကြကြောင်း သတိပြုပါ။ နောက်ဆုံးတွင် ဗက်လင်မြို့သို့ သူတို့ရောက်သွားချိန်၌ ယေရှုသည် ဖွားစအရွယ်မဟုတ်တော့ဘဲ “သူငယ်” အရွယ်ရှိနေပြီ။ ထို့ပြင် မြင်းဇောင်းတွင်မဟုတ်ဘဲ အိမ်တွင်ရှိနေခြင်းဖြစ်သည်။

ထို့ပြင် ခေတ်သုံးမြန်မာသမ္မာကျမ်းတွင် “ပညာရှိတို့” ဟူသောစကားလုံးများကို အသုံးပြုထားသော်လည်း အချို့ဘာသာပြန်ကျမ်းများတွင် “မာဂုပညာရှိတို့” သို့မဟုတ် “နက္ခတ်ဗေဒင်ဆရာများ” ဟူ၍ အသုံးပြုထားသည်။ မဿဲခရစ်ဝင်ကျမ်း၏ လက်စွဲစာစောင်အရ “ပညာရှိတို့” ဟူသော ထိုစကားလုံးကို “နက္ခတ်ပညာတွင် တစ်ဖက်ကမ်းခတ်ကျွမ်းကျင်သော ပါးရှားဘုန်းတော်ကြီးများကို ရည်ညွှန်းသည့် ဂရိနာမ်” ဟူ၍ ပြန်ဆိုသည်။ ထို့ပြင် ထိုစကားလုံးကို “မှော်ဆရာ၊ စုန်းကဝေပညာရှင်၊ မှော်အတတ်လိုက်စားသူ၊ စုန်းအတတ်ကို သင်ကြားပို့ချပေးသူ” ဟူ၍ အဘိဓာန်တစ်အုပ်တွင်လည်း အနက်ဖွင့်ထားသည်။—The Expanded Vine’s Expository Dictionary of New Testament Words.

နက္ခတ်ပညာနှင့် မှော်အတတ်သည် ယနေ့တိုင် ရေပန်းစားနေသော်လည်း ယင်းကို ရှောင်ကြဉ်ရန် ကျမ်းစာက သတိပေးသည်။ (ဟေရှာယ ၄၇:၁၃-၁၅) ယင်းတို့သည် နတ်ဆိုးပညာ၏ အသွင်အပြင်များဖြစ်ပြီး ယေဟောဝါဘုရားသခင် အလွန်စက်ဆုပ်ရွံရှာသော အကျင့်များဖြစ်သည်။ (တရားဟောရာ ၁၈:၁၀-၁၂) ထို့ကြောင့်ပင် ဘုရားသခင်၏ကောင်းကင်တမန်သည် ယေရှုမွေးဖွားကြောင်းကို ထိုနက္ခတ်ဗေဒင်ဆရာများထံ မကြေညာခဲ့ခြင်းဖြစ်သည်။ ယေရှုကို သတ်ရန်အားထုတ်နေသော မင်းဆိုးဟေရုဒ်ထံ သတင်းမပို့ရန် အိပ်မက်အားဖြင့် သူတို့ကို ဘုရားသခင် တားမြစ်ခဲ့သည်။ သို့နှင့် “သူတို့သည် အခြားလမ်းဖြင့် မိမိတို့တိုင်းနိုင်ငံသို့ ပြန်သွားကြ၏။”—မဿဲ ၂:၁၁-၁၆၊ ခမ။