၆။ ကမ္ဘာချီ ဟောပြောခြင်းလုပ်ငန်း
“[ဘုရားသခင့်] နိုင်ငံတော်နှင့်ဆိုင်သော ဤသတင်းကောင်းကို လူနေရာမြေတစ်ပြင်လုံး၌ ဟောပြောရလိမ့်မည်။”—မဿဲ ၂၄:၁၄။
● ဗိုင်ယာတီအာဟာ ပစိဖိတ်သမုဒ္ဒရာက တွာမော်တူးကျွန်းစုမှာရှိတဲ့ အရမ်းဝေးလံတဲ့ သန္တာကျွန်းတစ်ကျွန်းမှာ နေထိုင်ပါတယ်။ တွာမော်တူးကျွန်းစုမှာ စတုရန်းမိုင်ပေါင်း ၃၁၀,၀၀၀ ကျော်အထိ ပျံ့နှံ့နေတဲ့ သန္တာကျွန်းပေါင်း ၈၀ ခန့်ရှိပြီး လူဦးရေကတော့ ၁၆,၀၀၀ လောက်ပဲရှိပါတယ်။ ဒါပေမဲ့ ဗိုင်ယာတီအာနဲ့ အိမ်နီးချင်းတွေဆီကို ယေဟောဝါသက်သေတွေ သွားလည်ပတ်ခဲ့ကြပါတယ်။ ဘာကြောင့် လည်ပတ်ခဲ့ကြတာလဲ။ လူတွေ ဘယ်နေရာမှာပဲ နေထိုင်နေပါစေ သူတို့ကို ဘုရားသခင့်နိုင်ငံတော်သတင်းကောင်း ဝေမျှပေးချင်တဲ့အတွက် ဖြစ်ပါတယ်။
အဖြစ်မှန်က ဘာကို ဖော်ပြနေသလဲ။ ဘုရားသခင့်နိုင်ငံတော်သတင်းတရားက မြေကြီးစွန်းတိုင်အောင် ရောက်ရှိနေပါတယ်။ ၂၀၁၀ တစ်နှစ်တည်းမှာပဲ ယေဟောဝါသက်သေတွေဟာ နိုင်ငံပေါင်း ၂၃၆ နိုင်ငံမှာ သတင်းကောင်းဟောပြောဖို့ နာရီပေါင်း ၁.၆ ဘီလီယံကျော် အသုံးပြုခဲ့ကြတယ်။ အဲဒါကို ပျမ်းမျှတွက်ကြည့်မယ်ဆိုရင် သက်သေခံတစ်ဦးဟာ နေ့စဉ် မိနစ် ၃၀ ဟောပြောနေပါတယ်။ လွန်ခဲ့တဲ့ ဆယ်စုနှစ်အတွင်း ကျမ်းစာပညာပေး စာပေအမျိုးမျိုးကို ဘီလီယံ ၂၀ ကျော် ထုတ်ဝေဖြန့်ချိခဲ့ပါတယ်။
လူအများ ဘယ်လိုတုံ့ပြန်ကြသလဲ။ ကျမ်းစာသတင်းတရားကို ဟောပြောလာခဲ့တာ နှစ်ပေါင်း ထောင်နဲ့ချီ ကြာခဲ့ပါပြီ။
လူအများရဲ့ တုံ့ပြန်ချက်က ခိုင်လုံရဲ့လား။ ကျမ်းစာသတင်းတရားနဲ့ပတ်သက်တဲ့ အကြောင်းအရာတစ်ခုခုကို လူများစွာ ဟောပြောခဲ့ကြပါတယ်။ ဒါပေမဲ့ အများစုက ဒေသအနည်းငယ်မှာ တစ်ခဏပဲ ဟောပြောခဲ့ကြတာပါ။ ယေဟောဝါသက်သေတွေကျတော့ လူသန်းပေါင်းများစွာဆီ ရောက်ရှိနိုင်ဖို့ စနစ်တကျ ဖွဲ့စည်းထားတဲ့ ကမ္ဘာချီဟောပြောခြင်းလုပ်ငန်းကို လုပ်ဆောင်ပြီးမြောက်နေပါတယ်။ လူ့သမိုင်းမှာ အာဏာအရှိဆုံးနဲ့ အရက်စက်ဆုံး လူ့အဖွဲ့အစည်းတချို့ရဲ့ ပြင်းထန်တဲ့ဆန့်ကျင်မှုကြားကနေ သက်သေခံတွေဟာ ဟောပြောခြင်းလုပ်ငန်းမှာ ဇွဲနပဲနဲ့ ပါဝင်လုပ်ဆောင်ခဲ့ကြပါတယ်။a (မာကု ၁၃:၁၃) ဒါ့အပြင် ယေဟောဝါသက်သေတွေဟာ အခကြေးငွေရလို့ ဟောပြောနေကြတာမဟုတ်ပါဘူး။ အဲဒီအစား သူတို့ရဲ့အချိန်တွေကို စိတ်လိုကိုယ်လျောက် ပေးဆပ်ပြီး စာပေတွေကို အခမဲ့ ဝေငှပေးနေပါတယ်။ သူတို့ရဲ့လုပ်ငန်းတစ်ခုလုံးကို စေတနာအလျောက် ထည့်ဝင်တဲ့ အလှူငွေတွေနဲ့ ပံ့ပိုးကြပါတယ်။
သင်ကော ဘယ်လိုထင်သလဲ။ ဘုရားသခင့် “နိုင်ငံတော်သတင်းကောင်း” ကို ကမ္ဘာချီ ဟောပြောနေကြသလား။ အဲဒီကျမ်းစာကြိုဟောချက် ပြည့်စုံနေတာက လာမယ့်အနာဂတ်မှာ ကောင်းတဲ့အရာတွေ ဖြစ်ပျက်လာမယ်လို့ ဆိုလိုတာလား။
[အောက်ခြေမှတ်ချက်]
a ထပ်သိချင်တယ်ဆိုရင် ယေဟောဝါသက်သေတွေ ထုတ်ဝေတဲ့ “စမ်းသပ်မှုများအောက် သစ္စာရှိ၊” “ခရမ်းရောင်တြိဂံများ၊” နဲ့ “ယေဟောဝါသက်သေတို့ နာဇီထိုးနှက်မှုကို အခိုင်အမာရပ်တည်” ဆိုတဲ့ ဗီဒီယိုခွေသုံးခွေမှာ ကြည့်ရှုနိုင်ပါတယ်။
[စာမျက်နှာ ၉ ပါ အကျဉ်းဖော်ပြချက်]
“ယေဟောဝါဘုရားသခင် ခွင့်ပြုသရွေ့ ဘုရားသခင့်နိုင်ငံတော် သတင်းကောင်းကို ကျွန်ုပ်တို့ ဇွဲနဲ့ ဆက်ဟောပြောမှာဖြစ်ပြီး လူတွေဆီရောက်ရှိဖို့ ဘယ်နည်းကိုမဆို အသုံးပြုသွားမှာဖြစ်တယ်။”—ယေဟောဝါသက်သေတွေရဲ့ ၂၀၁၀ နှစ်ချုပ်စာအုပ်။