ဘုရားသခင်ရဲ့ ‘အောက်မေ့ရာစာအုပ်’ ထဲမှာ သင့်နာမည်ရှိသလား

ယေဟောဝါဘုရားသခင်ဟာ မိမိကိုဝတ်ပြုတဲ့သူတွေ မိမိရဲ့မျက်နှာသာတော်ရရှိဖို့ ကြိုးစားနေတာကို သတိပြုမိပါသလား။ သတိပြုမိပါတယ်။ ဒါပေမဲ့ ဘုရားသခင်နှစ်သက်တဲ့ သူတို့ရဲ့ အပြုအမူတွေနဲ့ ချီးမွမ်းစကားတွေထက်မက ကိုယ်တော် တွေ့မြင်ပါတယ်။ လေးမြတ်တဲ့စိတ်နဲ့ ဘုရားသခင်အကြောင်း သူတို့စဉ်းစားနေတာကိုတောင် သတိပြုမိပါတယ်။ ဒါ့အပြင် ဘုရားသခင်ဟာ မိမိကို ဝတ်ပြုတဲ့သူတွေ လုပ်ဆောင်ပြီးမြောက်ခဲ့တာတွေကို ဘယ်တော့မှ မေ့မှာမဟုတ်ပါဘူး။ အဲဒါကို ကျွန်ုပ်တို့ ဘယ်လိုယုံကြည်နိုင်မလဲ။ အဖြေကို ပရောဖက်မာလခိ မှတ်တမ်းတင်ထားခဲ့တဲ့ စကားတွေမှာ တွေ့နိုင်ပါတယ်။—မာလခိ ၃:၁၆၊ (သမ္မာ) ကိုဖတ်ပါ။

မာလခိ ပရောဖက်ပြုခဲ့တဲ့ ခရစ်နှစ်မတိုင်မီ ငါးရာစုလောက်မှာ အစ္စရေးနိုင်ငံရဲ့ ၀တ်ပြုမှုပိုင်းနဲ့ စာရိတ္တပိုင်းမှာ စိတ်ပျက်စရာကောင်းလောက်အောင် ဆိုးဝါးနေပါတယ်။ ယဇ်ပုရောဟိတ်တွေက တာဝန်ပျက်ကွက်လာကြတယ်။ လူတွေကလည်း မှော်အတတ်၊ အိမ်ထောင်ရေးဖောက်ပြန်မှုနဲ့ လိမ်လည်မှုစတဲ့ ဘုရားသခင်ကို မရိုသေတဲ့ အပြုအမူတွေ ပြုကျင့်လာကြတယ်။ (မာလခိ ၂:၈; ၃:၅) ဒါပေမဲ့ အဲဒီလို ယိုယွင်းဖောက်ပြန်သူတွေရဲ့ အလယ်မှာ ဆက်သစ္စာစောင့်သိတဲ့ အစ္စရေးလူတွေ ရှိခဲ့ပါတယ်။ သူတို့ ဘာတွေ လုပ်နေကြသလဲ။

‘ထာဝရဘုရားသခင်ကို ကြောက်ရွံ့သောသူတို့သည် ထိုသို့အချင်းချင်း တစ်ယောက်ကိုတစ်ယောက် ပြောဆိုကြ၏’ ဆိုပြီး မာလခိ ရှင်းပြပါတယ်။ ဘုရားသခင်ကို ကြောက်ရွံ့တယ်ဆိုတာက အပြုသဘောနဲ့ ပြောနေတာဖြစ်ပါတယ်။ မာလခိ ပြောနေတဲ့လူတွေက ဘုရားသခင်ကို အရမ်းရိုသေလေးစားတဲ့အပြင် ဘုရားသခင် စိတ်ဆိုးမှာကိုလည်း အရမ်းစိုးရိမ်တဲ့ အစ္စရေးလူတွေ ဖြစ်တယ်။ ဘုရားသခင်ကို ကြောက်ရွံ့တဲ့သူတွေဟာ “တစ်ယောက်ကိုတစ်ယောက်ပြောဆို” နေတာကို သတိပြုပါ။ သူတို့ဟာ ယေဟောဝါဘုရားသခင်အကြောင်း အတူတကွ စုရုံးပြောဆိုပြီး တစ်ယောက်ကိုတစ်ယောက် အားပေးကြတယ်ဆိုတာ ထင်ရှားပါတယ်။ ဒါကြောင့် သူတို့ဟာ ဖောက်ပြန်ပျက်စီးနေတဲ့ ပတ်ဝန်းကျင်ကြောင့် စိတ်ပျက်အားလျော့တာမျိုး၊ တိုက်စားခံရတာမျိုး မရှိတာပါ။

သစ္စာရှိတဲ့အစ္စရေးတွေဟာ ယေဟောဝါဘုရားသခင်ကို ကြည်ညိုလေးစားကြောင်း အရေးကြီးတဲ့ နောက်တစ်နည်းနဲ့ ပြသခဲ့ပါတယ်။ သူတို့ဟာ “နာမတော်ကို ဆင်ခြင်အောက်မေ့” နေကြပါတယ်။ နောက်ဘာသာပြန်ကျမ်းတစ်ခုမှာဆိုရင် “နာမတော်ကို ကြည်ညိုလေးစား” တယ်လို့ ပြန်ဆိုထားပါတယ်။ ဘုရားသခင်ကို ကြောက်ရွံ့ကြတဲ့သူတွေဟာ ဘုရားသခင်ကို သူတို့အတွေး ဒါမှမဟုတ် စိတ်နှလုံးထဲကနေတောင် ရိုသေကြတယ်။ ဘုရားသခင်နဲ့ ကိုယ်တော်ရဲ့ ကြီးမြတ်တဲ့နာမည်ကို ကျေးဇူးတင်လေးမြတ်တဲ့စိတ်နဲ့ တွေးတောဆင်ခြင်ခဲ့ကြပါတယ်။ ဒါကြောင့် သူတို့ ဘာတွေလုပ်နေတယ်ဆိုတာကို ဘုရားသခင် သတိပြုမိပါသလား။

မာလခိ ဒီလိုပြောပါတယ်-‘ထာဝရဘုရားသခင်သည်လည်း ဂရုပြု၍ နားထောင်တော်မူ၏။’ ယေဟောဝါဘုရားသခင်ဟာ မိမိကို ဝတ်ပြုကိုးကွယ်တဲ့သူတွေ အချင်းချင်းပြောဆိုနေတဲ့ ချီးမွမ်းစကားတွေကို ကောင်းကင်ဘုံကနေ အသေအချာ အာရုံစိုက်နားထောင်တဲ့အတွက် တစ်လုံးမကျန် ကြားနေရပါတယ်။ သူတို့ရဲ့ တိတ်တဆိတ် တွေးတောဆင်ခြင်နေတာတွေကိုလည်း ကိုယ်တော် ဂရုပြုနေပါတယ်။ (ဆာလံ ၉၄:၁၁) ဒါပေမဲ့ သူတို့ရဲ့ ချီးမွမ်းသံနဲ့ တွေးတောဆင်ခြင်မှုကို သတိပြုရုံထက်မက ကိုယ်တော်လုပ်ဆောင်ပါတယ်။

‘သူ့ရှေ့က အောက်မေ့ရာစာအုပ်ထဲမှာ ရေးမှတ်ထားတယ်’ ဆိုပြီး မာလခိ ဆက်ပြောတယ်။ ယေဟောဝါဘုရားသခင်အပေါ် သစ္စာရှိရှိ အမှုဆောင်ခဲ့တဲ့သူတွေ အားလုံးကို အဲဒီစာအုပ်ထဲမှာ ရေးမှတ်ထားတယ်။ အဲဒီစာအုပ်ကို ‘အောက်မေ့ရာ စာအုပ်’ လို့ခေါ်ဆိုထားတာကို သတိပြုပါ။a ဒါကြောင့် ဘုရားသခင်ဟာ သစ္စာရှိရှိဝတ်ပြုနေတဲ့သူတွေနဲ့ မိမိကိုချီးမွမ်းတဲ့ သူတို့ရဲ့ကောင်းမွန်တဲ့ အပြုအမူ၊ အပြောအဆို၊ တွေးတောဆင်ခြင်မှုအားလုံးကို ဘယ်တော့မှ မေ့မှာမဟုတ်ဘူးဆိုတာ ဒီအချက်ကနေ ကျွန်ုပ်တို့ သိနိုင်ပါတယ်။ သူတို့ကို ဘုရားသခင် အောက်မေ့ရတဲ့ အကြောင်းရင်းရှိပါတယ်။ အောက်မေ့ရာစာအုပ်ကနေ ပယ်ဖျက်လို့မရအောင် မှတ်တမ်းတင်ခံရတဲ့သူတွေကို ထာဝရအသက် ဆုချမယ်လို့ ကိုယ်တော် ကတိပေးထားပါတယ်။b—ဆာလံ ၃၇:၂၉။

ယေဟောဝါဘုရားသခင်ဟာ သူလက်ခံတဲ့နည်းနဲ့ ဝတ်ပြုဖို့ကြိုးစားတဲ့ ကျွန်ုပ်တို့ရဲ့ လုပ်ရပ်အားလုံးကို တန်ဖိုးထားတယ်ဆိုတာကို သိရလို့ ဘယ်လောက် ဝမ်းသာစရာကောင်းလိုက်သလဲ။ မာလခိ ၃:၁၆ မှာပါတဲ့ စကားတွေက ဘုရားသခင်နဲ့ ကျွန်ုပ်တို့ရဲ့ ဆက်ဆံရေးကို အလေးအနက် စဉ်းစားဖို့ လှုံ့ဆော်ပေးပါတယ်။ “ငါ့နာမည်က ဘုရားသခင်ရဲ့ ‘အောက်မေ့ရာစာအုပ်’ မှာ စာရင်းဝင်ပြီလား” လို့ ကိုယ့်ကိုယ်ကိုယ် မေးနိုင်ပါတယ်။ ဘုရားသခင်နှစ်သက်တဲ့ နည်းတွေနဲ့ နေ့စဉ် ပြုမူပြောဆိုစဉ်းစားဖို့ အစွမ်းကုန် ကြိုးစားမယ်ဆိုရင် အောက်မေ့ရာစာအုပ်ထဲမှာ စာရင်းဝင်ပါလိမ့်မယ်။