“အဘယ်ပညတ်သည် ပထမဦးဆုံးပညတ် ဖြစ်ပါသနည်း”

ကျွန်ုပ်တို့ဆီကနေ ဘုရားသခင် ဘာတွေ တောင်းဆိုထားသလဲ။ လိုက်လျှောက်ရမယ့် ပညတ်တွေ အများကြီးရှိသလား။ မရှိပါဘူး။ ဘုရားသခင့်သားတော် ယေရှုခရစ် ပြောခဲ့တဲ့အရဆိုရင် ဘုရားသခင် တောင်းဆိုထားရာတွေကို စကားလုံးတစ်လုံးတည်းနဲ့ အကျဉ်းရုံးဖော်ပြနိုင်ပါတယ်။—မာကု ၁၂:၂၈-၃၁ ကိုဖတ်ပါ။

ဖော်ပြပါကျမ်းချက်ထဲက ယေရှုပြောတဲ့စကားရဲ့ နောက်ခံအခြေအနေကို ဦးဆုံး သုံးသပ်ကြည့်ရအောင်။ ယေရှုဟာ မိမိမသေခင် သုံးရက်အလို နိသန်လ ၁၁ ရက်နေ့၊ ဗိမာန်တော်မှာ ဟောပြောသွန်သင်နေတယ်။ အဲဒီမှာ ယေရှုကို အမှားရှာချင်တဲ့ ရန်သူတွေက အငြင်းအခုံဖြစ်စေနိုင်တဲ့ မေးခွန်းတချို့ မေးခဲ့ကြတယ်။ သူတို့ရဲ့မေးခွန်းကို ယေရှုဖြေဆိုတိုင်း သူတို့ ပြန်မပြောနိုင်လောက်တဲ့အထိ နှုတ်ဆိတ်သွားကြတယ်။ အဲဒီနောက် ယေရှု ဒီလိုအမေးခံခဲ့ရတယ်– “အဘယ်ပညတ်သည် ပထမဦးဆုံး ပညတ်ဖြစ်ပါသနည်း။”—အခန်းငယ် ၂၈။

ဒီမေးခွန်းက ဖြေဆိုရခက်တဲ့ မေးခွန်းဖြစ်ပါတယ်။ ပညတ် ၆၀၀ ကျော်ပါတဲ့ မောရှေပညတ်ထဲမှာ ဘယ်ပညတ်က ပထမဦးဆုံး ပညတ်ဖြစ်သလဲ၊ ဒါမှမဟုတ် အရေးကြီးဆုံး ဖြစ်သလဲဆိုတာကို ဂျူးတချို့ ငြင်းခုံခဲ့ကြတယ်။ ဂျူးတချို့ကျတော့ ပညတ်တွေအားလုံး တန်းတူအရေးကြီးတယ်၊ ပညတ်တချို့ဟာ ပိုပြီးအရေးပါတယ်လို့ ယူဆတာက မှားတယ်ဆိုပြီး အခိုင်အမာ ပြောဆိုကြပုံရတယ်။ အဲဒီလို အခြေအနေမျိုးအောက်မှာ သူတို့ရဲ့ မေးခွန်းကို ယေရှု ဘယ်လို ပြန်ဖြေခဲ့သလဲ။

ယေရှုဟာ ပညတ်တစ်ခုတည်းမဟုတ်ဘဲ နှစ်ခု ဖော်ပြခဲ့တယ်။ ပထမပညတ်ကို ဒီလိုပြောတယ်– “သင်၏ဘုရားသခင် ယေဟောဝါကို စိတ်နှလုံးအကြွင်းမဲ့၊ ဉာဏ်စွမ်းရှိသမျှ၊ အစွမ်းသတ္တိရှိသမျှဖြင့် တစ်သက်တာလုံး ချစ်လော့။” (အခန်းငယ် ၃၀; တရားဟောရာ ၆:၅) ဆိုလိုတာက အစွမ်းခွန်အားရှိသမျှ၊ ပိုင်ဆိုင်မှုမှန်သမျှနဲ့ ယေဟောဝါဘုရားသခင်ကို ချစ်ရမှာ ဖြစ်တယ်။ ကျမ်းစာအကိုးအကားစာအုပ် တစ်အုပ်မှာ ဒီလိုရေးထားတယ်– “ဘုရားသခင်ကို အပြည့်အဝ ချစ်ရမည်။” ဒါကြောင့် သင်ဟာ ဘုရားသခင်ကို ချစ်တယ်ဆိုရင် ကိုယ်တော်ရဲ့မျက်နှာသာ ရရှိစေနိုင်တဲ့ နည်းလမ်းနဲ့ နေ့တိုင်း ကြိုးစားနေထိုင်သွားမှာဖြစ်တယ်။—၁ ယောဟန် ၅:၃။

ဒုတိယပညတ်ကို ယေရှု ဒီလိုပြောပြတယ်– “လူသားချင်းကို ကိုယ်နှင့်အမျှ ချစ်လော့။” (အခန်းငယ် ၃၁; ဝတ်ပြုရာ ၁၉:၁၈) ဘုရားသခင်ကို ချစ်တဲ့မေတ္တာနဲ့ လူသားချင်းကို ချစ်တဲ့မေတ္တာဟာ ခွဲခြားလို့မရအောင် ဆက်စပ်နေပါတယ်။ ဘုရားသခင်ကို ချစ်တဲ့အတွက် လူသားချင်းကို ချစ်တာဖြစ်တယ်။ (၁ ယောဟန် ၄:၂၀၊ ၂၁) ကျွန်ုပ်တို့ဟာ ကိုယ့်ကိုယ်ကိုယ် ချစ်သလို လူသားချင်းကို ချစ်မယ်ဆိုရင် ကျွန်ုပ်တို့ကို ဆက်ဆံစေချင်သလို သူတစ်ပါးကို ဆက်ဆံပါလိမ့်မယ်။ (မဿဲ ၇:၁၂) ဒီလိုနည်းနဲ့ ကျွန်ုပ်တို့နဲ့တခြားသူတွေကို မိမိပုံသဏ္ဌာန်နဲ့အညီ ဖန်ဆင်းထားတဲ့ ဘုရားသခင်ကို ချစ်ကြောင်း ဖော်ပြကြတယ်။—ကမ္ဘာဦး ၁:၂၆။

ဘုရားသခင်နဲ့လူသားချင်းကို ချစ်ပါဆိုတဲ့ ပညတ်တွေက ဘယ်လောက်ထိ အရေးကြီးသလဲ။ “ဤပညတ်များထက် သာ၍ကြီးမြတ်သော ပညတ်မရှိ” လို့ယေရှု ပြောခဲ့တယ်။ (အခန်းငယ် ၃၁) တခြားပညတ်အားလုံးဟာ ဒီပညတ်နှစ်ခုအပေါ်မှာ အခြေခံထားတယ်လို့ ကျမ်းပြိုင်ဖြစ်တဲ့ မဿဲခရစ်ဝင်ကျမ်းမှာ ယေရှု ပြောခဲ့တယ်။—မဿဲ ၂၂:၄၀။

ဘုရားသခင့်စိတ်တော်နဲ့တွေ့ဖို့ မခက်ပါဘူး။ ကျွန်ုပ်တို့ဆီကနေ ဘုရားသခင် တောင်းဆိုထားရာအားလုံးကို မေတ္တာဆိုတဲ့ စကားလုံးတစ်လုံးတည်းနဲ့ အကျဉ်းရုံးဖော်ပြနိုင်ပါတယ်။ ဘုရားသခင်ဟာ မိမိကိုချစ်ပါဆိုပြီး မိမိကိုကိုးကွယ်တဲ့သူတွေကို အရင်ကလည်း တောင်းဆိုခဲ့သလို အခုရော၊ နောင်ရော အမြဲတောင်းဆိုသွားမှာဖြစ်တယ်။ ဒါပေမဲ့ အပြောနဲ့ ဒါမှမဟုတ် ခံစားချက်နဲ့ပဲ ချစ်ဖို့မဟုတ်ဘဲ လုပ်ရပ်နဲ့ ချစ်ကြောင်း ဖော်ပြရပါမယ်။ (၁ ယောဟန် ၃:၁၈) “ချစ်ခြင်းမေတ္တာဖြစ်” တဲ့ ယေဟောဝါဘုရားသခင်ကို သင် ချစ်မြတ်နိုးကြောင်း မေတ္တာကို ဘယ်လိုပျိုးထောင်ပြီး ပြသမယ်ဆိုတာကို သင်ယူကြည့်ရင် မကောင်းဘူးလား။—၁ ယောဟန် ၄:၈။