ဘုရားသခင် ၀မ်းနည်းတတ်—ကိုယ်တော့်ကို ပျော်ရွှင်စေနိုင်ပုံ

၀မ်းနည်းလွန်းလို့ ကလေးတို့ ငိုဖူးကြသလား။—a တို့တွေအားလုံး ငိုဖူးကြတယ်။ အရမ်း၀မ်းနည်းတဲ့ အခါတွေမှာပေါ့။ တစ်ယောက်ယောက်က တို့တွေအကြောင်း မဟုတ်တာတွေ ပြောနိုင်တယ်။ အဲဒီအခါ ကလေးတို့ ဝမ်းနည်းတယ်မဟုတ်လား။— ဘုရားသခင်အကြောင်း လိမ်ညာပြောဆိုတဲ့အခါ ဘုရားသခင်လည်း အရမ်းဝမ်းနည်းမှာပဲ။ အဲဒီအကြောင်းနဲ့ ကိုယ်တော့်ကို ပျော်ရွှင်အောင် ဘယ်လိုလုပ်ရမလဲဆိုတဲ့အကြောင်း တို့တွေဖတ်ကြည့်ရအောင်နော်။

ဘုရားကို ချစ်ပါတယ်လို့ပြောတဲ့ လူတချို့က ကိုယ်တော့်ကို ၀မ်းနည်းအောင်လုပ်ခဲ့တယ်လို့ ကျမ်းစာမှာ ဖော်ပြထားတယ်။ တို့တွေလည်း ယေဟောဝါဘုရားပြောတာကို မလုပ်ဘူးဆိုရင် ကိုယ်တော်ဘာကြောင့် ၀မ်းနည်းသွားမလဲဆိုတာ အတူတူလေ့လာကြည့်ရအောင်။

ကမ္ဘာပေါ်မှာ ယေဟောဝါဘုရား ဖန်ဆင်းခဲ့တဲ့ ပထမဦးဆုံးလူနှစ်ယောက်ဟာ ကိုယ်တော့်ကို ဝမ်းနည်းအောင် လုပ်ခဲ့ကြတယ်။ “ဧဒင်ဥယျာဉ်” လို့ခေါ်တဲ့ လှပတဲ့ဥယျာဉ်လေးမှာ သူတို့ကို ဘုရားသခင် နေခိုင်းတယ်။ အဲဒီနှစ်ယောက်က ဘယ်သူတွေလဲ၊ ကလေးတို့သိကြလား။— ဟုတ်တယ်၊ အာဒံနဲ့ဧဝပါပဲ။ ယေဟောဝါဘုရား ဝမ်းနည်းအောင် သူတို့ဘာလုပ်ခဲ့သလဲဆိုတာ ဆက်ကြည့်ရအောင်။

ယေဟောဝါဘုရားက အာဒံနဲ့ဧဝကို ဥယျာဉ်မှာနေခိုင်းပြီး ဥယျာဉ်ကို စောင့်ရှောက်ပါ၊ ကလေးတွေမွေးပြီး အမြဲတမ်းအတူတူ ပျော်ပျော်ရွှင်ရွှင် နေသွားပါလို့ ပြောတယ်။ ဒါပေမဲ့ အာဒံနဲ့ ဧဝ ကလေးမရခင်မှာပဲ အရမ်းဆိုးတဲ့ ကိစ္စတစ်ခုဖြစ်ခဲ့တယ်။ အဲဒါဘာလဲဆိုတာ ကလေးတို့ သိလား။— ကောင်းကင်တမန်တစ်ပါးက ပထမဆုံး ဧဝကို၊ နောက်ပိုင်း အာဒံကို ဘုရားစကားနားမထောင်အောင် လိမ်လည်ခဲ့တယ်။ ဘယ်လိုလိမ်ခဲ့သလဲဆိုတာ ပြောပြမယ်နော်။

ကောင်းကင်တမန်က မြွေတစ်ကောင်ကို စကားပြောနေတဲ့ပုံပေါက်အောင် လုပ်လိုက်တယ်။ ‘ဘုရားသခင်လို ဖြစ်’ လာမယ်လို့ မြွေက ပြောလိုက်တာကို ဧဝ သဘောကျသွားတယ်။ ဒါကြောင့် မြွေပြောတဲ့အတိုင်း ဧဝ လိုက်လုပ်ခဲ့တယ်။ ဧဝ ဘာလုပ်ခဲ့သလဲဆိုတာ ကလေးတို့သိလား။—

ယေဟောဝါဘုရားက မစားနဲ့လို့ အာဒံကိုပြောထားတဲ့ အပင်ရဲ့အသီးကို ဧဝစားခဲ့တယ်။ ဘုရားသခင်က ဧဝကို မဖန်ဆင်းခင် အာဒံကို ဒီလိုပြောခဲ့တယ်– “ကောင်းမကောင်းကို သိကျွမ်းရာအပင်မှတစ်ပါး ထိုဥယျာဉ်၌ရှိသမျှသော အပင်တို့၏အသီးကို သင်သည် စားရသောအခွင့်ရှိ၏။ ထိုအပင်၏အသီးကိုကား မစားရ။ စားသောနေ့တွင် ဧကန်အမှန် သေရမည်။”

ဧဝက ဒီတားမြစ်ချက်ကို သိထားတယ်။ ဒါပေမဲ့ ‘ထိုအပင်သည် စားဖွယ်ကောင်းခြင်း၊ အဆင်းလည်းလှခြင်းကို မိန်းမသည်မြင်လျှင် အသီးကို ယူ၍စား၏။’ နောက်ပိုင်း အာဒံကိုလည်း သွားကျွေးတယ်။ ‘သူလည်းစား’ လိုက်တယ်။ အာဒံက ဘာဖြစ်လို့ စားလိုက်တယ်လို့ ကလေးတို့ထင်လဲ။— ဘာကြောင့်လဲဆိုတော့ အာဒံက ယေဟောဝါဘုရားကို ချစ်တာထက် သူ့မိန်းမ ဧဝကို ပိုချစ်လို့ပဲ။ သူက ဘုရားပျော်ရွှင်ဖို့ထက် ဧဝပျော်ရွှင်ဖို့ကိုပဲ ဦးစားပေးလိုက်တယ်။ တကယ်တော့ တခြားသူတွေရဲ့စကား နားထောင်တာထက် ယေဟောဝါဘုရားစကား နားထောင်တာ ပိုအရေးကြီးတယ်မဟုတ်လား။

ဧဝကို စကားပြောခဲ့တဲ့ မြွေကို ကလေးတို့ မှတ်မိလား။ လူတစ်ယောက်က ရုပ်သေးရုပ်လေးကို စကားပြောနေတဲ့ပုံပေါက်အောင် လုပ်နိုင်သလို တစ်ယောက်ယောက်က မြွေစကားပြောနေတဲ့ပုံပေါက်အောင် လုပ်ခဲ့တယ်။ မြွေနောက်ကွယ်က စကားသံဟာ ဘယ်သူ့အသံလဲ။— စာတန်မာရ်နတ်လို့ခေါ်တဲ့ “မူလမြွေ” ကြီးရဲ့အသံပဲ။

ယေဟောဝါဘုရား ပျော်ရွှင်အောင် ဘယ်လိုလုပ်ရမလဲ၊ ကလေးတို့သိကြလား။— ယေဟောဝါဘုရားရဲ့စကားကို အမြဲနားထောင်မယ်ဆိုရင် ဘုရားသခင် ပျော်ရွှင်မယ်။ စာတန်က သူ့စိတ်ကြိုက်အတိုင်း လူတိုင်းကို လုပ်ခိုင်းနိုင်တယ်လို့ ပြောတယ်။ ဒါကြောင့် ဘုရားသခင်က တို့တွေကို ဒီလို ပြောတယ်– “ငါ့သား [ငါ့သမီး] ပညာရှိလော့။ ကဲ့ရဲ့သောသူ [စာတန်] ၏စကားကို ငါချေနိုင်အောင် ငါ့စိတ်ကို ရွှင်လန်းစေလော့။” စာတန်က ယေဟောဝါဘုရားကို ကဲ့ရဲ့လှောင်ပြောင်နေတယ်။ လူအားလုံးကို ယေဟောဝါဘုရားဆီကနေ ဝေးကွာသွားအောင် ငါလုပ်နိုင်တယ်လို့ စာတန်ပြောနေတယ်။ ဒါကြောင့် တို့တွေက ယေဟောဝါဘုရား စကားနားထောင်ပြီး ကိုယ်တော့်ကို ဝတ်ပြုရမယ်။ ဒါမှသာ ယေဟောဝါဘုရား ပျော်ရွှင်မှာဖြစ်တယ်။ ကလေးတို့၊ ယေဟောဝါဘုရားစကားကို အမြဲနားထောင်ဖို့ ကြိုးစားကြမှာလား။—