ကြားနာလိုသူအားလုံးထံ ရောက်ရှိခြင်း

^၁ နောက်ဆုံးကာလတွင် ကြီးမားသောဟောပြောခြင်းလုပ်ငန်းကို ထမ်းဆောင်လိမ့်မည်အကြောင်း ယေရှုကြိုတင်ဟောထားသည်။ (မာ၊ ၁၃:၁၀) ဤကဲ့သို့သော ကမ္ဘာချီဟောပြောခြင်းလုပ်ငန်းသည် ဘုရားသခင့်နိုင်ငံတော်တန်ခိုးနှင့်ယေရှုရောက်ရှိနေခြင်း၏ ပုပ္ပနိမိတ်အဝင်ဖြစ်သည်။ (မ၊ ၂၄:၃၊ ၁၄) ဖြောင့်မတ်ခြင်းတရားမြတ်နိုးသူတို့ကို ယေဟောဝါနှင့်လျောက်ပတ်သောဆက်ဆံမှုရှိစေရန် ယနေ့ ဘုရားသခင့်ကျေးကျွန်အကြီးအငယ်အားလုံး သမ္မာတရားကိုကြေညာကြရာတွင် ဘုရားသခင့်နိုင်ငံတော်သတင်းဟောပြောခြင်းလုပ်ငန်းသည် လျင်မြန်လာနေသည်ကို တွေ့ရှိရ၏။ (ဟေရှာ၊ ၆၀:၂၂) ဘုရားသခင့်နိုင်ငံတော်သတင်းအားဖြင့် ဆိုးသွမ်းမှုကို ဘုရားသခင်တရားစီရင်တော့မည်အကြောင်း လူဆိုးတို့အားသတိပေးနေခြင်းလည်းဖြစ်သည်။

^၂ ပထမရာစုခရစ်ယာန်ဓမ္မအမှုဆောင်များနှင့်တမန်တော်များ၏ ထိရောက်သောဟောပြောနည်းများကို သမ္မာကျမ်းစာကကျွန်ုပ်တို့အား ထိုးထွင်းသိရှိစေသည်။ ဘုရားသခင့်နိုင်ငံတော်သတင်းအကြောင်းကို လူအများစုဝေးရာအရပ်နှင့်တစ်အိမ်မှတစ်အိမ် ဇွဲလုံ့လဖြင့် ဟောပြောကြသည်။ (မ၊ ၁၀:၇။ တ၊ ၂၀:၂၀၊ ၂၁) ယေရှုနည်းတူ သူတို့လည်း လူတို့ထံအရောက်သွားကြသည်။ ကိုယ်တော်မှာကြားခဲ့သည်အတိုင်း ရိုးသားသောနှလုံးရှိသူတို့ကို ‘ရှာဖွေ’ ကြသည်။ ဤကြားထိုက်သူများကို သူတို့အထူးဂရုစိုက်ပြီး ဘုရားသခင့်နည်းလမ်းများကိုလည်း သွန်သင်ပေးကြသည်။ (မ၊ ၁၀:၁၁။ ၂၈:၁၉၊ ၂၀) ထိုကြောင့် သူတို့၏လုပ်ငန်းကို ယေဟောဝါကောင်းချီးပေးပြီး အောင်မြင်စေတော်မူသည်။​—ကော၊ ၁:၁၆၊ ၂၃။

^၃ ဘုရားပေးလုပ်ငန်းအပေါ်၊ အခြားသူများအပေါ် ယေရှုနှင့်ကိုယ်တော်၏တပည့်တော်များ၏စိတ်ထားကိုလည်း သမ္မာကျမ်းစာဖော်ပြပါသည်။ ကျွန်ုပ်တို့ဓမ္မအမှုတွင် အောင်မြင်မှုတွေ့လိုပါက သူတို့၏ပုံသက်သေကိုအတုယူကြရမည်။ ဘုရားသခင်အပ်နှင်းထားသည့်လုပ်ငန်းအပေါ် ယေရှုအလွန်စိတ်ဝင်စားပြီး၊ အောင်မြင်ရန်လည်း အစွမ်းကုန်ကြိုးစားခဲ့သည်။ (ယော၊ ၄:၃၄) သမ္မာတရားကိုလည်း သိရှိ၍ လူတို့၏နှလုံးကိုထိမိဖို့ရန် အကောင်းဆုံးကျမ်းချက်ကိုရှာဖွေ၍ ကိုးကားတင်ပြနိုင်သည်။ (လု၊ ၄:၁၇၊ ၁၈) တမန်တော်များလည်း ထပ်တူပင်ပြုတော်မူခဲ့သည်။ ကျမ်းစာကို စေ့ငစွာလေ့လာဆင်ခြင်ခဲ့သောကြောင့် သမ္မာတရားကိုကောင်းစွာသိရှိရုံမက သူတို့နှလုံးအတွင်းရှိစေ၏။​—တ၊ ၂:၁၆-၂၁၊ ၂၅-၂၈။

^၄ သမ္မာတရားကို ကျွန်ုပ်တို့လည်းကောင်းစွာသိရှိကြပါသလော။ ကျမ်းစာကိုနေ့စဉ်လေ့လာကြသလော။ သက်သေခံသည့်အခါ လူတို့၏နှလုံးကိုထိမိနိုင်ရန် မိမိဟောပြောနေသောသတင်းတရားကို ကိုယ်တိုင်ကောင်းစွာသဘောပေါက်ထားပါသလော။ ရပ်ကွက်ရှိသူများအား စာပေများကိုမဝေငှမီ ယင်းတို့ကိုရရှိသည်နှင့် ကိုယ်တိုင်ဖတ်ရှုလေ့လာပါသလော။ ယေရှုက “သင်တို့သည် ငါ၏ဒေသနာ၌တည်လျှင် ငါ့တပည့်အမှန်ဖြစ်ကြ၏။ သမ္မာတရားကိုလည်းသိကြသဖြင့် ထိုတရားသည် သင်တို့ကိုလွှတ်လိမ့်မည်။” (ယော၊ ၈:၃၁၊ ၃၂) ဘုရားသခင့်နှုတ်ကပါဌ်တော်ကို လေ့လာဆင်ခြင်သုံးသပ်ခြင်းမရှိလျှင် သမ္မာတရားကိုသိရှိပြီး ထိုတွင်မည်သို့တည်နိုင်မည်နည်း။ သမ္မာကျမ်းစာအပြင် ဘုရားသခင့်အဖွဲ့အစည်းမှရရှိသော အခြားစာပေစာတမ်းများကို ဖတ်ရှုလေ့လာရမည်။ သိုးကဲ့သို့သောသူများ၏နှလုံးကိုထိမိကာ သူတို့အားသမ္မာတရားကိုတွေ့ရှိစေရန် ယင်းစာပေများအသုံးပြု၍ ကူညီပေးခြင်းငှာ ယင်းတို့၌ပါသောအကြောင်းများကို ကိုယ်တိုင်ကောင်းစွာသိထားသင့်သည်။

^၅ ဇူလိုင်လတွင် လက်ရှိဘရိုရှာများကိုအသုံးပြုကြမည်။ အထူးသဖြင့်အေအိုင်ဒီအက်စ်ဘရိုရှာနှင့် မရဏဖောက်ကားမှု နိုးလော့ မဂ္ဂဇင်းကို အထူးအသုံးပြုကြမည်။ ဤစာပေများကိုအလိုရှိသည့်အသင်းတော်တိုင်း ချက်ချင်းမှာယူနိုင်သည်။ ပရဒိသုဖြစ်ပေါ်စေမည့် ဘုရားအစိုးရ နှင့် ကြည့်ရှုလော့ ဘရိုရှာများ အသင်းတော်အများတွင်ရှိသည်။ ၎င်းတို့ကိုလည်း အသုံးပြုသင့်သည်။ ယင်းတို့ကိုလူတို့လက်မခံလျှင် ဝေစာများထားခဲ့နိုင်သည်။ အခမဲ့ပေးသောဝေစာများကိုပင် သူတို့လက်မခံလိုလျှင် သင့်နှုတ်ခမ်းမှ သတင်းတရားကိုကြားနာစေပါ။ ဤသို့ပြုနိုင်ရန် ဘုရားသခင့်နိုင်ငံတော်သတင်းကို ကိုယ်တိုင်ကောင်းစွာသိနားလည်ထားပြီး ကြားနာလိုသူအားလုံးထံရောက်ရှိဖို့ ဝီရိယစိုက်ထုတ်ကြိုးစားကြပါ။