ကောင်းသောအလုပ်များလုပ်ရန် တိုက်တွန်းနှိုးဆော်သောစည်းဝေးများ

^၁ ကျွန်ုပ်တို့ဝတ်ပြုရေး၏ မရှိမဖြစ်လိုအပ်သောကဏ္ဍနှစ်ရပ်မှာ အသင်းတော်စည်းဝေးများတက်ရောက်ခြင်းနှင့် လယ်ကွင်းလုပ်ငန်းတော်တွင်ပါဝင်ခြင်းဖြစ်သည်။ ကဏ္ဍနှစ်ရပ်သည် ဒွန်တွဲနေသည်။ တစ်ခုက အခြားတစ်ခုအပေါ် ဩဇာသက်ရောက်သည်။ ခရစ်ယာန်စည်းဝေးများသည် ကောင်းသောအလုပ်များလုပ်ရန် တိုက်တွန်းနှိုးဆော်ပေးသည်၊ ယင်းတို့အနက် အကောင်းဆုံးအလုပ်မှာ နိုင်ငံတော်ဟောပြောခြင်းနှင့် တပည့်ဖြစ်စေခြင်းလုပ်ငန်းဖြစ်သည်။ (ဟေဗြဲ ၁၀:၂၄) ကျွန်ုပ်တို့သည် စည်းဝေးများတက်ခြင်းကို ရပ်ဆိုင်းလိုက်ပါက မကြာမီမှာပင် ဟောပြောခြင်းကိုပါ ရပ်ဆိုင်းပစ်လိုက်နိုင်သည်၊ အကြောင်းမှာ ထိုသို့လုပ်ဆောင်ရန် တိုက်တွန်းမခံရတော့သောကြောင့်ပင်။

^၂ ဟောပြောရန်လှုံ့ဆော်ပေးဖို့စီစဉ်ထားသည့် ဝိညာဏသွန်သင်မှုကို ပတ်စဉ်စည်းဝေးများတွင် ကျွန်ုပ်တို့ရရှိကြသည်။ အချိန်ကာလ၏အရေးကြီးမှုသည် အမြဲအလေးဂရုပြုခံရပြီး အခြားသူများအား သမ္မာကျမ်းစာ၏အသက်ပေးသတင်းတရားကို ရရှိစေရန် ကျွန်ုပ်တို့အားလှုံ့ဆော်ပေးသည်။ ကျွန်ုပ်တို့သည် ဟောပြောခြင်းလုပ်ငန်းတွင် ခံနိုင်ရည်ရှိရန် အားပေးမှုနှင့်ခွန်အားကိုရရှိကြသည်။ (မ. ၂၄:၁၃၊ ၁၄) စည်းဝေးများတွင်အဖြေပေးရန် အခွင့်အရေးကိုအသုံးချခြင်းဖြင့် အခြားသူများရှေ့ ကျွန်ုပ်တို့၏ယုံကြည်ခြင်းကိုပြသရာတွင် ပိုမိုအကျွမ်းဝင်လာမည်။ (ဟေဗြဲ ၁၀:၂၃) သီအိုကရက်တစ်ဓမ္မအမှုကျောင်းတွင် စာရင်းသွင်းခြင်းဖြင့် ပိုမိုထိရောက်သောဓမ္မအမှုဆောင်များဖြစ်ရန်နှင့် သွန်သင်ခြင်းစွမ်းရည်တိုးတက်စေရန် လေ့ကျင့်မှုကိုကျွန်ုပ်တို့ရရှိကြသည်။—၂ တိ. ၄:၂။

^၃ လုပ်ငန်းတော်စည်းဝေးများက ကျွန်ုပ်တို့အား ဟောပြောရန်လှုံ့ဆော်ပေးပုံ– ကျွန်ုပ်တို့၏နိုင်ငံတော်ဓမ္မအမှုပါအကြောင်းအရာကို ကြိုတင်၍ကြည့်ထားရန် ကျွန်ုပ်တို့အားလုံး အားပေးခံရကြသည်။ လုပ်ငန်းတော်စည်းဝေးတက်ရောက်စဉ် ထိုအကြောင်းအရာကိုစိတ်တွင်စွဲမှတ်ထားပြီး စင်မြင့်မှ သရုပ်ပြတင်ဆက်မှုများကို ရှုစားပါ။ လယ်ကွင်းလုပ်ငန်းတွင်ပါဝင်သောအခါ ကျွန်ုပ်တို့၏နိုင်ငံတော်ဓမ္မအမှုကို ပြန်ပြောင်းစဉ်းစားနိုင်ပြီး သရုပ်ပြသည့်တင်ဆက်မှုများကို ပြန်သတိရပါ၊ ဤသို့အားဖြင့် ပိုမိုထိရောက်စွာသက်သေခံနိုင်စေသည်။ ယင်းသို့ပင် ကြေညာသူများစွာတို့ကြုံတွေ့ခဲ့ကြသည်။

^၄ လုပ်ငန်းတော်စည်းဝေးများကို ဆက်လက်တက်ရောက်စဉ် အချို့သည် ဓမ္မအမှုတွင်အတူပါဝင်ရန် အခြားသူများနှင့် ချိန်းချက်မှုများပြုကြသည်။ ကြေညာသူများသည် လယ်ကွင်းနှင့်သက်ဆိုင်သည့်အချက်များကို မှတ်မိနေတုန်းပင်ဖြစ်ပြီး ယင်းတို့ကို စမ်းကြည့်ရန်လှုံ့ဆော်ခံရသည်၊ အကြောင်းမှာ ဤစည်းဝေးများက သူတို့အား ပတ်စဉ် ဟောပြောခြင်းလုပ်ငန်းတွင်ပါဝင်ရန် အားပေးတိုက်တွန်းထားသောကြောင့်ဖြစ်သည်။

^၅ ဝတ်ပြုသူချင်းများနှင့်စုရုံးပြီး ကောင်းသောအလုပ်များလုပ်ရန် တိုက်တွန်းခံရသည့်နေရာဖြစ်သော ကျွန်ုပ်တို့၏ခရစ်ယာန်စည်းဝေးများအတွက် အစားထိုးစရာမရှိပါ။ ကျွန်ုပ်တို့၏ဓမ္မအမှုကို ဖြစ်ထွန်းအောင်မြင်လိုပါက အသင်းတော်စည်းဝေးများကို မှန်မှန်တက်ရမည်။ “အချင်းချင်းစည်းဝေးခြင်းအမှုကို မရှောင်မလွှဲကြ” ခြင်းဖြင့် ယေဟောဝါထံတော်မှလာသော ဤအထူးကောင်းမွန်သည့်ပြင်ဆင်ပေးမှုအတွက် ကျေးဇူးတင်လေးမြတ်ကြောင်း ပြသကြစို့။—ဟေဗြဲ ၁၀:၂၅။