အဖိုးတန်ဘဏ္ဍာ အပ်နှင်းခံရ

^၁ တမန်တော်ပေါလုသည် ဘုရားသခင်အပ်နှင်းထားသော ဟောပြောခြင်းတာဝန်ကို အလွန်တန်ဖိုးထားပြီး ယင်းကို “ဘဏ္ဍာ” အဖြစ် ရည်ညွှန်းခဲ့၏။ (၂ ကော. ၄:၇) သူသည် ထိုတာဝန်ကိုထမ်းဆောင်ရာတွင် အခက်အခဲများနှင့် နှိပ်စက်ညှဉ်းပန်းမှုများ ခံရပ်ခဲ့ရသည်။ တွေ့ဆုံသူတိုင်းကို မမောနိုင်မပန်းနိုင် ဟောပြောသည်။ ထို့ပြင် အခက်အခဲပေါများပြီး အန္တရာယ်ထူပြောသော ကုန်းကြောင်း၊ ရေကြောင်းခရီးကို သွားလာခဲ့ရသည်။ ကျွန်ုပ်တို့လည်း ဓမ္မအမှုကိုတန်ဖိုးထားကြောင်း တင်ပြရာတွင် ပေါလုကိုမည်သို့တုပနိုင်သနည်း။ (ရော. ၁၁:၁၃၊ ၁၄) အဘယ်အရာက ကျွန်ုပ်တို့၏ဓမ္မအမှုကို အဖိုးတန်ဘဏ္ဍာဖြစ်စေသနည်း။

^၂ ထူးမြတ်သောဘဏ္ဍာ– မြေကြီးဘဏ္ဍာများသည် စိတ်သောကရောက်စေပြီး ခေတ္တ သို့မဟုတ် အကန့်အသတ်ဖြင့်သာ အကျိုးပေးနိုင်သည်။ သို့သော် ကျွန်ုပ်တို့၏ဓမ္မအမှုသည် ကျွန်ုပ်တို့ကိုယ်တိုင်နှင့် အခြားသူများကိုပါ တည်မြဲသောအကျိုးကျေးဇူးများ ရရှိစေသည်။ (၁ တိ. ၄:၁၆) ယင်းက စိတ်ရင်းမှန်သူများကို ယေဟောဝါအကြောင်း သိရှိစေပြီး သူတို့၏ဘဝတွင် လိုအပ်သောပြုပြင်ပြောင်းလဲမှုများ လုပ်ဆောင်စေကာ ထာဝရအသက်ရရှိစေနိုင်သည်။ (ရော. ၁၀:၁၃-၁၅) ဓမ္မအမှုကို အလွန်တန်ဖိုးထားခြင်းဖြင့် ကျွန်ုပ်တို့၏ဘဝတွင် ရည်ရွယ်ချက်ရှိစေပြီး ထာဝစဉ်တည်မြဲသော ပြီးမြောက်အောင်မြင်မှုခံစားစေကာ အနာဂတ်အတွက် အားရှိဖွယ်မျှော်လင့်ချက်ရှိလာစေသည်။—၁ ကော. ၁၅:၅၈။

^၃ သင့်ဘဏ္ဍာကို တန်ဖိုးထားကြောင်း တင်ပြပါ– တစ်စုံတစ်ရာအတွက် ကျွန်ုပ်တို့ လိုလိုလားလားပေးဆပ်လိုက်သည့်အရာကို ကြည့်ခြင်းဖြင့် ယင်းကို မည်မျှတန်ဖိုးထားကြောင်း သိနိုင်သည်။ ကျွန်ုပ်တို့၏အချိန်နှင့်ခွန်အားကို ယေဟောဝါအားချီးမွမ်းရန် အသုံးပြုရခြင်းသည် အခွင့်ထူးပါတကား! (ဧ. ၅:၁၆၊ ၁၇) ကျွန်ုပ်တို့၏အချိန်ကို အသုံးပြုပုံက ရုပ်ပစ္စည်းလိုက်စားခြင်းထက် ဝိညာဉ်ရေးရာကို ပို၍တန်ဖိုးထားကြောင်း ဖော်ပြသင့်သည်။ ကျွန်ုပ်တို့တွင် အဖိုးတန်ဘဏ္ဍာရှိထားသည်ဖြစ်ရာ ယင်းကို အခြားသူများအား ထက်သန်စွာဝေမျှလိုကြသည်။ ထို့ပြင် အခွင့်အရေးရတိုင်း သတင်းကောင်းဟောပြောလိုကြသည်။

^၄ အဖိုးတန်ဘဏ္ဍာများဟူသည် ဝှက်ထားလေ့မရှိဘဲ အခြားသူများမြင်နိုင်ရန် ပြသထားလေ့ရှိသည်။ ကျွန်ုပ်တို့၏ဓမ္မအမှုကို ဘဏ္ဍာအဖြစ်ယူမှတ်ပါက ယင်းသည် ကျွန်ုပ်တို့အသက်တာတွင် အဓိကအရာဖြစ်နေပါလိမ့်မည်။ (မ. ၅:၁၄-၁၆) ကျွန်ုပ်တို့၏ဓမ္မအမှုကို ဘဏ္ဍာတစ်ခုသဖွယ် အလွန်တန်ဖိုးထားကြောင်း ဖော်ပြနိုင်ရန် တမန်တော်ပေါလုနည်းတူ အခွင့်အရေးတိုင်းကို အသုံးချကြပါစို့။